Matáyoso 20
20
Nsab ya bɛnama bá bél buól
1«Bufuŋ bá muana gúbɛfuáganan nsab eye, muát gisién maám tútútú na budúdug ká wámbá bél buol gá buol bág. 2Uwɔ́bɔ́n nɔbɔ ká ugúsɛgɛmanan guéŋeen sig mɔnd a bɛnama bɛ́sɛ́gamananá gá buɔ́s bá buol búmoom, uwabád gudɔ́m bɔ́ agág gá gisién. 3Gá bɛsɛgɛl biányɛ́manyɛ nomo bá buɔ́s, uwand guám, uwaán bél buol bómodió bámáabá ány bédénden. 4Uganyɛ gɔ́b ká: “Banuá sɔ́n, ánɔ́b gám gá buol, ngagúnúfá bɛnama bísígimananá.” 5Abáb gá buol. Mɔnd uwaány uwand guám gá tólóf na gá bɛsɛgɛl bídadɔ bá buɔ́s, uwal buanda búmoom. 6Gá gúmana, uwand guám gá bɛsɛgɛl bɛ́tán bá niɔb, uwɔfuɔg bél buol bómodió bámáabá ány, uganyɛ gɔ́b ká: “Gagiág nusɔ́ɔgulɔb ány buɔ́s bum gá gudénden e?” 7Obóndinyi wɔ́ ká: “Gágual ká mɔnd dimɔ́dígɔ́l gá buol”. Uganyɛ gɔ́b ká: “Banuá, ánɔ́b gá buol agám gá gisién.” 8Niɔ́b máal nɛ́mágua, muát gisién ganyɛ gá mɔnd wendenyé bɔnɛ́m bág ká: “Bɛ́lɛ́gɛ́n bél buol, éŋeen sig mɔnd a bɛnama bág, banyɛ́g gá bégúsúgúdenyi, ámána gá bóbúsió.” 9Ebe bámáabanyɛ́g buol gá bɛsɛgɛl bɛ́tán bá niɔ́b abásiám, sig mɔnd a uwadáŋáb bɛnama bɛ́máasɛgɛ́mánán gá buɔ́s bá buol. 10Ebe bámáakɛ́n gubanyɛg buol abásiám gá ɛgɔ́b gɛsɛgɛl, bábɛ́dága ká bágagúnam bɔ́ gudɔ́mb bɔsɔ́gɔ́ bégúsúgúdenyi; ebéŋeen gɔg sig mɔnd bɛnama bɛ́máasɛgɛ́mánán gá buɔ́s bá buol. 11Abágálɛ́ngalɛn muát buol gɛsɛgɛl bɔ́mɔ́ɔgɔ́lɔɔ́n muonyi mɔ́b, bɔ́yɔ́ ká: 12“Bɔsɔ́gɔ́ bégúsúgúdenyi saal buol gá háwa táŋ omoom, amánaám bɔ́ buanda búmoom nasɔ disɔ́gubiɔ́nɔ́gɔ na buol buɔs bum agá gianta gá ɔɔ́ny.” 13Muát gisién uwondinyi omoom wɔbɔ ká: “Ogúl e, ndimágual bɔbɛ, didimɔɔ́bɔ́n gá bɛnama bá buɔ́s bá buol bumoom e? 14Gɔ́l bɛnama bɔ́w ádɔ́mb. Ngeguéŋin eŋél buol wegusúgúdenyi buanda búmóm nɔ́w. 15Saá ngúbianan bugaga báguala buanda mbílénené na muonyi mám a? Agúŋalaan yaág gágual ká inyɛ bese e?” 16Anaány ebe bányá bégúsúgúdenyi ganúbá bóbúsió, ebe bányá bóbúsió bá bégúsúgúdenyi.»
Yésu módógí nigú na guanyɔg gág
(Mál 10.32-34; Lúk 18.31-34)
17Anyɛ́ Yésu máaban Yelúsalɛm, uwɔbɛ́gɔ́gɛ́d na bát na bándɛ. Bámáal bágányá guanda, uganyɛ gɔ́b ká: 18«Ɔ́nubɛ́dɔ́lɛ́gɛ́n, basuá ebe dibúlígenyé Yelúsalɛm, bégegúndú yaŋuá Mɔɔn wá mɔnd aga bɔgɔ́gɔ na bóŋ bisele, básɔ́mb ká bɔ́ŋɔ́n, 19bónd béŋéŋin gá band bádiábáná Beyúdɛn ká bɔ́ŋɔ́n, béngide na dusue, bánsand agá ɛgɔnɔ, buɔ́s bá gádadɔ, yányɔg aga beguén.»
Agánd guámba eluku gá busió bá baan bág
(Mál 10.35-45; Lúk 22.25-27)
20Agá gélem ány, inyódió wa baan bá Sebedé gubɛ́nyɛkɛnɛn Yésu na baan bág, ewegunsín Yésu enú ká wófún wɔ́ buanda. 21Uganyɛ gá agánd ká: «Giág ambaná?» Uganyɛ ká: «Nguámba ká áŋádábɛn ká baan bám ebe bándɛ bá ilukié, omoom agá ɔmbɔ́g ɔnɛ́m wɔ́w, omodió ɔmbɔ́g adád anyɛ́ aganúbá ɔgɔ́w gá Bufuŋ.» 22Yésu guondinyi ká: «Nudigúlɛnsan buanda nuófonó. Nunyɛ bɔ́guɔ́d guɔ́bɛ́g ugú ngɔnuɔ́bɛ́g e?» Bágányɛ gág ká: «Dinyɛ bɔ́guɔ́d.» 23Uganyɛ gɔ́b ká: «Nunyɛ bɔ́guɔ́d guɔ́bɛ́g ugú ngɔnuɔ́bɛ́g. Gá giáy gɛ́lɛ́ŋaná eluku agám gá ɔmbɔg ɔnɛm na ɔmbɔ́g adád, saá yaŋuá yéŋeniné yɔ́, bégéŋin yɔ́ gɔɔ́gɔ gá ebe ɔbɔ́ Babá máadábɔ́nɛ́n bɔ́ yɔ́.» 24Anyɛ́ bafɔ́nɔfɔ́n bát bómodió mɔ́ɔb anaány, ɔbɔ́bɛ́n bá bándɛ abaány ilób. 25Yésu gubɛ́lɛ́gɛn bafɔ́nɔfɔ́n gidigid agá masiá mág, uganyɛ gɔ́b ká: «Banuá muát nugúlɛnsaan ká ebe bányá befuŋ bá bɛdɔŋ, gúmányɛ́ganɛn band bɔ́b anyɛ bamása. Bigúmín bá band degesenyi bɔsɔ́gɔ́. 26Búdigúbianan ká búbá anaány gɔg agá gadágadá wanɔ. Omoom agán gá ɔlɔŋ mámba gubá mfí, ugúbianan ká úbá eŋél buol wanɔ. 27Omoom wanɔ mámba gubá wobusió, nsɛ́ ubá giɔ́l gán. 28Nɛnama nímoom, yaŋuá Mɔɔn wá mɔnd, ndimoól ká báŋalan buol, imoól gɔg ká yála buol yónd yéŋin gusɔ́d gám ká band giod bia giáŋɔna.»
Yésu méŋúgí bebudebude bándɛ
(Mál 10.46-52; Lúk 18.35-43)
29Anyɛ́ bámáabá bágányá guámaan Yelíko, gianta gá giŋi gá band igiálád Yésu. 30Bebúdebude bándɛ mabá ilukié agá masiá má nŋili. Ɔbɔ́b ká Yésu madɔ́mbánɛ́n ány, ebédúm guánsa bɔ́yɔ ká: «Ɔgúnɔ́, Mɔɔn wá Défide, dián gɔsɔ́g!» 31Giŋi gá band bémbenyi bɔ́ ká bélúŋ, ta anaány, abában na busió na guánsa magɔ́gɔ́n bɔ́yɔ ká: «Ɔgúnɔ́, mɔɔn wá Défide, dián gɔsɔ́g!» 32Yésu uwedélímin, uwabɛ́lɛ́gɛn bɔ́, uganyɛ gɔ́b ká: «Giág nuambaná ká nnuál e?» 33Bágányɛ ká: «Ɔgúnɔ́, diguámba ká eŋís yás bífuun!» 34Uwaán bɔ́ gɔsɔ́g, uwebísíd eŋís yɔ́b, kɔ́ na kɔ́, ebédúm guánan, abáládaan wɔ́.
Actualmente seleccionado:
Matáyoso 20: MMU2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión