Matáyoso 2
2
Belinsi gúbúlígenyi Yésu
1Yésu mebíbien Bɛ́tɛlɛhɛ́m agá giéns gá gus gá Yudé, Elódo umáabá ofuŋ gá gɛsɛgɛl igiány. Boŋi bómoólonín buay bá niámɛ́n ná ɔɔ́ny masiám Yelúsalɛm, 2obófún ká: «Ofuŋ wá Beyúdɛn úségubíbién aya nyɛ nány e? Disaán yódód yág buay bá niámɛ́n ná ɔɔ́ny, dimoól ká dísibúlígényí wɔ́.» 3Nsɔ́m iyaány iyebueŋidi ofuŋ Elódo na band gidigid bá Yelúsalɛm. 4Uwabɛ́lɛ́gɛn bagɔn bá besigid bidug na bóŋ bisele bá gɛdɔŋ, uwófún bɔ́ kɔɔ́m Kilíse mábiánán ká úbíbién. 5Obóndinyi ká: «Bɛ́tɛ́lɛhɛ́m, agá giéns gá gus gá Yudé, gágual ká ibús yá Gɔdányá mɔ́ɔŋ ká: 6Gɔdányá mɔyɛ́d: Bɛ́tɛlɛhɛ́m, agá meliŋítas, gá bɔtísɔn bá giéns gá gus gá Yudé, adɛbá itítísɔ́n. Gágual ká ofuŋ úgenúendenyi Ísalayɛ́la nigúl nám goólín ɔgɔwɔ.» 7Elódo uwabɛ́lɛ́gɛn gɔg bóŋ agá niɔs ká wófún gɛsɛgɛl bámáan yódód ímáam. 8Agá gélem ány, uganyɛ gɔ́b ká: «Ánɔ́b Bɛtɛlɛhɛ́m, núbíde bese gá buóny bá mɔ́nɔmbɔ, nugal númaán wɔ́, núsiŋɔyɛ́dɛ́n ká yaŋuá sɔ́n yébúlígényí wɔ́.» 9Agá gélem gá gugál gá Elódo uguány, bóŋ abádɔ́mb. Agá nŋili, abaán yódód ɛyɛ́ bámáakɛ́n guán, ímabá yánda ɔgɔ́b gá busió iyénedélímín kɔɔ́m mɔ́nɔmbɔ máabá. 10Bámáal na guán yɛ́, gianta gá ɛyayɔ igiádɛgɛn bɔ́. 11Anyɛ́ béméebíŋín agá gians, abaán mɔ́nɔmbɔ na inyodió waga Maliá. Ebéguns enú, ebébúlígenyi wɔ́, ɔbɔ́gɔ́l gól, na bulɔ, na gɛdɛmɛ bámáabiánán ɔgɔ́b gá bɛgad, ebéŋeen wɔ́. 12Agá gélem ány, Gɔdányá uwebiés bóŋ agá ɛlɛmɛ ká bádiánd guond agá masiá má Elódo, abándɛn agá nŋili imodió ká bónd ɔgɔ́b gá gɛdɔŋ.
Gubɛ́nɔ Esípit
13Bámáal na gɔdɔ́mbɔ, ɔsɔ́mɔ́sɔm wa Ɔgúnɔ́ uwámɛ́n Yɔ́sɛba agá ɛlɛmɛ. Uganyɛ gág ká: «Adɔ́g, ɔ́gɔ́l mɔ́nɔmbɔ na inyódió ɔ́bínɔ Esípit, ɔ́lɔ́bɛn kɔ́ gutɔ guám anyɛ́ ngɔnúguɔyɛdɛn ká ósiondo, gágual ká Elódo gamba nŋili ya guɔ́n mɔ́nɔmbɔ.» 14Yɔ́sɛba guadɔg gɔg, gugɔ́l mɔ́nɔmbɔ na inyódió na budug, uwɔnɔbiɔ́sɛ́g Esípit. 15Uwɔlɔbɛ́n kɔ́ guám anyɛ́ Elódo méegú, anaány ká gugál Ɔgúnɔ́ mɔ́ɔyɛ́d agá niíd na ibús moóbífuógidónyi. Umɔyɛ́d ká: Ngéli mɔɔn wám Esípit#2.15 Alɛ́ŋɛ́d Osé 11.1.
Gifúfie gá bábayɔ Bɛ́tɛlɛhɛ́m
16Anyɛ́ Elódo máan ká bóŋ ményiŋí wɔ́, uwɔ́b gudá ta bɔ́guɔyɔ. Uwadɔ́m band ká bɔ́nɔ́ baábayɔ banɔ́mandɔ gidigid agág gá giéns gá gus, ambál agá duɔŋ duándɛ, gubanyɛg Bɛ́tɛlɛhɛ́m, guám agá gɛsɛgɛl ɛgɛ́ bóŋ mɔɔ́yɛ́dɛ́n wɔ́. 17Anaány gɔg gugál Gɔdányá mɔɔ́yɛ́d agá niíd ná ibús Selemí moóbífuógídónyí. Umɔyɛ́d ká:
18Ekelu gúlenin Láma
oŋóny na dugogó dá nigú:
Lásɛla wɔ́, ubaŋaná baan bág
udiguámba ká bélúŋi wɔ́,
gaguál ká bádɛ́gábá sɔ́n#2.18 Alɛ́ŋɛ́d Selemí 31.15.
Gusiondo gá musal Esípit
19Agá gélem gá nigú ná Elódo, ɔsɔ́mɔ́sɔm wa Ɔgúnɔ́ uwámɛ́n Yɔ́sɛba agá ɛlɛmɛ anyɛ́ umáabá umányɛ Esípit, 20uganyɛ gá Yɔ́sɛba ká: «Adɔ́g, ɔ́gɔ́l mɔ́nɔmbɔ na inyódió, áb agá gɛdɔŋ gá Ísalayɛ́la, gágual ká band bányá guamba guɔ́n mɔ́nɔmbɔ digabá andɔ.» 21Uwadɔg, uwɔgɔ́l mɔ́nɔmbɔ na inyódió, uwond agá gɛdɔŋ gá Ísalayɛ́la. 22Anyɛ́ umɔ́ɔb ká Alesélayúse mɔ́gɔ́l niluku ná bufuŋ bá sie waga Elódo agá giéns gá gus gá Yudé, uwabia buwa bɔ́guɔlɔbɔ́n kɔ́; Gɔdányá gubiés wɔ́ agá ɛlɛmɛ, uwɔb agá giéns gá gus gá Galilé, 23uwɔlɔbɔɔn agá tísɔn bábɛ́laná ká Násalɛd, anaány ká buanda Gɔdányá mɔ́ɔyɛ́d agá eŋíd yá mubús bífuógidónyi. Umɔyɔ́ ká: Bágabɛ́laan wɔ́ ká mɔnd wa Násalɛd.
Actualmente seleccionado:
Matáyoso 2: MMU2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión