Mata 23
23
Yesu a cetene ŋkwaɓ ŋ hejəye
1Aya, Yesu a zlepetene ŋ hejəye vəram leŋ ŋ madarlaŋw anta ege, 2a ŋgaya: «Maghwal ma maŋkanaŋkan ege ey Farəysa ege ca, zlan tata ca, ma ata ghwelzetene ma maŋkanaŋkan mala Musa ŋ hejəye. 3Səy hune teh zlam ata tata, hune la səkan maa əy kasasərakzahune. Cemey, hune ɗaw ŋ səbar ŋ la səkan ana tata səkwaw. Mavəday, əy kala səkan ana maa əy kaghwalza, askwaw. 4Mavəday, əy kajaw səkan ma ndeɓndeɓ ege, əy ketewetene ŋ hejəye, cemey, a tata ca, kaw əy kaɗaw ŋ ca mba ra tata ege ata tata ŋ cekzetene səkwaw. 5Zlan tata tewtew maa əy kala ca, ndar hejəye əy sarzata. Əy kaŋtav ma maŋkanaŋkan aka ŋ bukəla, pa ma day aha mala hejəye vedəye, əy kajawata aka ata mananakw tata ege leŋ ata ra tata ege. Əy kaja gagəmay aka a mazlam rəgwac tata ege jem mambaza zeney. 6Ata lazam uda ca, əy ɗaw ca, lanja mala hejəye ma dakal dakal ege a tama, a zeney, ŋ ujek ma ata rak Gazlavay ege ca, əy mpam ca, lanja ma tuwah tuwah ege a tama. 7Əy ɗaw ca, hejəye əy wenzetene ha aka ŋ zlepzetene a tama hejəye ŋ hubakw ege, əy ɗaw ca, hejəye əy yata a “Masasərak ege.” 8Cemey, hune ca, hune ɗaw ŋ lamza, əy ma yahune a “Masasərak ege” səkwaw, mavəday hune tewtew ŋkune ca, hune ata zlanahw ŋkune ege, Madakal ŋkune ca, teŋguleŋ. 9Hune ɗaw ŋ yaɓa ɗala ma ŋ manhayak ŋgha a “Vana” səkwaw, mavəday Cehw ŋkune ca, teŋguleŋ, ma mgba ata uzlaf. 10Hune ɗaw ŋ lamza, əy ma yahune a “Bay Madakal” səkwaw, mavəday Bay Madakal ŋkune ca, teŋguleŋ, ara Almasəyhu. 11Ɗala ma pa ma dakal ŋ taba ŋkune ca, a nala anta ŋ mala zlan ŋkune. 12Kaw vayay ma galza ha anta aza ca, Gazlavay a nabawza aza ŋ ɗala ma pəzekw. Kaw vayay ma bawza ha anta aza ŋ ɗala ma pəzekw ca, Gazlavay a nagalza aza.»
Yesu a ghemata hejəye maghwal ma maŋkanaŋkan ege ey Farəysa ege
13Yesu a zlepetene, a ŋgaya: «Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune a ha ŋkune ege, hune kadam ŋ lazam bay mgba ata uzlaf askwaw, hune katakata hejəye ma kaɗaw ŋ dam ŋma ege aka. 14[ Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune kepəresletene səkan ma asa ra weləye mce ege aza, a zeney, mada hune karak Gazlavay ca, hune zlap dakala, ndar hejəye əy sanahune. Mavəday anta, Gazlavay a najahune guma day aha vedəye.] 15Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune katawar kaw a katay a katay ata hayak leŋ ata ŋtele ege, ndar hune lem kaw ɗala teŋguleŋ ŋ səbar kwakwas ŋkune. Cemey, mada hune kélem aza ca, hune bawza heje anta aza ŋ ɗala ma kanasa gef ŋ kwahwaw mala Gazlavay, ŋ gas gbak day aha hune. 16Gef a nandaha ata hune dakala, hune ulaf ma kenjew ulaf ege! Hune kazlap, huney: “Mada ɗala a meɗ a ujek kwakwas ca, ara səkan bəse. Cemey, mada a meɗ a bənaɓ ma a ujek kwakwas ca, səy ma la səkan aza ana maa a meɗ anta. 17Hune hejəye ma ŋkwaɓ ŋ ha ege askwaw, hune ulaf ege! Səkan ma pa ma tuwah ca, vekey? Bənaɓ vaw, ujek kwakwas ma kabawza bənaɓ aka ŋ səkan ma keweɗ vaw”? 18Hune kazlap zeney, huney: “Mada ɗala a meɗ ata la ma ata ɗəbesene səkan ŋ Gazlavay ca, ara səkan bəse. Cemey, mada a meɗ a səkan ma ata la ma ata ɗəbesene səkan ŋ Gazlavay ca, səy ma la səkan aza ana maa a meɗ anta.” 19Hune ulaf ege, səkan ma pa ma tuwah ca, vekey? Səkan maa əy velene ŋ Gazlavay vaw, la ma ata ɗəbesene səkan, ma kabawza səkan ma əy kevelene ŋ Gazlavay aza ŋ səkan ma keweɗ vaw? 20Ana ebe ŋghe, kaw vayay ma meɗ a la ma ata ɗəbesene səkan ŋ Gazlavay ca, a meɗ ca, a la maa ata ɗəbas səkan zlaɓa səkan ma a heɗe tewtew. 21Kaw vayay, ma meɗ a ujek kwakwas ca, a meɗ ca, a ujek kwakwas zlaɓa Gazlavay ma kénjeye ŋma. 22Kaw vayay, ma meɗ a la ma ata uzlaf ca, a meɗ ca, a lanja Gazlavay zlaɓa Gazlavay ma kénjeye a heɗe.»
23Yesu a zlepetene zeney, a ŋgaya: «Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune kaŋta səkan teŋguleŋ ŋ wam ŋ urey ege maa əy kayata a məyntəy, a anəysa leŋ a algaru, hune kevelene ŋ Gazlavay, cemey, hune keheseŋza səkan ma pa ma tuwah aza ŋ ma maŋkanaŋkan mala Musa. Ana zlap ca, lala səkan ma a heɗe a heɗe, lasan hahar leŋ lala taŋtaŋ. Karba ca, ara səkan ŋghe ege wese ana maa hune kanalata, kaw hune ɗaw ŋ heseŋzata vedəye aza səkwaw. 24Hune ulaf ege, ma kenjew ulaf ege! Hune kajajar yam ŋkune ege ŋ ŋta səkan ma feseɗ ege aza ŋma, cemey, hune kemeɗ ŋgaluba a dəmas.»
25Yesu a zlepetene zeney, a ŋgaya: «Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune kaban dawan tekeɗ ŋkune ege ma ata sa səkan leŋ ma ata zam uda aza, cemey, la ma ŋma ca, kédedekeye a səkan maa hune ŋhelata ege ey ledeŋ ŋkwaɓ ŋkune ma kadak səkwaw ege. 26Hune Farəysa ege, ulaf ege, hune ban la ma ŋ tekeɗ ŋkune ege aza kwagwa, aya, a dəwze anta, dawan anta a nabaw anta ghwezlekghwezlek.»
27Yesu a zlepetene zeney, a ŋgaya: «Gef a nandaha ata hune dakala, hune maghwal ma maŋkanaŋkan ege leŋ hune Farəysa ege, hune hejəye ma a ganana gbak gbak ege! Hune nja ana jeɓ ege maslaraslar ma pepeɗek ma tuwah ŋ gəre ata nje ta a bəza, cemey, la ma uza ŋma ca, ghef a kerŋgesl mce ege leŋ səkan marəɗarəɗa ege tewtew. 28Hune yam, hune nja ana mbe, ata nje hejəye ca, hune hejəye ma taŋtaŋ ege, cemey, ŋ unaf ŋkune ege ca, hune hejəye ma a ganana gbak gbak ege ey maa unaf ege ghef a səkan ma kadak səkwaw ege.»
29Yesu a zlepetene zeney, a ŋgaya: «Gef a nandaha ata hune dakala, hune maghwal ma maŋkanaŋkan ege, hune Farəysa ege, hune hejəye ma a ganana gbak gbak ege! Hune kelemetene jeɓ mala uzəye ma zlap ma mala Gazlavay ege aka, hune kecefetene jeɓ mala hejəye ma kala səkan a heɗe a heɗe ege aka. 30Hune kazlap, huney: “Mada keɗe ata vah jeje ŋcene ege, nene kámbawha aza ca, nene kenecekzetene ŋ jata uzəye ma zlap ma mala Gazlavay ege wese aza, askwaw.” 31Ana ebe ŋghe, hune a ha ŋkune ege ca, hune kasan ca, hune uzəye hejəye ma jata uzəye ma zlap ma mala Gazlavay aza ege. 32Kadak! Hune maɗza zlan ma jeje ŋkune ege, əy maraza ŋ law, wese aza. 33Hune zezekw ege, ŋseŋ ŋkursla ege, hune nasan ŋ reh ata kwahwaw mala Gazlavay ca, vaŋgay? 34Mavəday anta, hune teh zlam aka kadak kadak. Sa nalaɓzata uzəye ma zlap ma mala Gazlavay ege, hejəye kəleŋ ege ey hejəye maghwal ma maŋkanaŋkan ma taŋtaŋ ege ara hune. Hune najata vedəye aza, vedəye yam, hune nadarata aka ata mpe gafaŋgal, vedəye zeney, hune naŋtawata ŋ ujek ŋkune ege ma ata rak Gazlavay, hune natatakata vedəye aza ata uzam ata uzam. 35Aya, guma mala mbambaz hejəye ma kala səkan a heɗe a heɗe ege, maa hejəye əy jata aza ŋ manhayak ege tewtew, mar aka ata mbambaz Habəyla ɗala ma kala səkan a heɗe a heɗe, ha hwas ata mbambaz Zekarəya mba Barakəya maa hune jaw, aza, ŋ taba ata la ma keweɗ mambaza ey la ma ata ɗəbesene səkan ŋ Gazlavay, a nezenha ata ha ŋkune. 36Sa kazlapahune njenjəwen, mbambaz hejəye ŋghe ege tewtew, a nezenha#23.36 A nezenha ata hejəye, ana zlap ca, a naghwafata. ata hejəye ma na ŋgha ege.»
37Yesu a zlepetene zeney, a ŋgaya: «Hune hejəye ma ŋ Urusaləyma ege! Hune hejəye ma ŋ Urusaləyma ege! Hune kajata uzəye ma zlap ma mala Gazlavay ege aza, hune kaŋgwafata hejəye maa Gazlavay a laɓata ege aza. Sa kámpam ŋ ɓecata hejəye ŋkwa ege a tama naka ŋ gas vəram, ana maa man gamtak a keɓecata uzəye anta ege asa papa. Cemey, hune káɗaw səkwaw. 38Ana ebe ŋghe, ujek kwakwas ŋkune a nabaw anta a ŋkef. 39Cemey, sa kazlapahune, mar aka ma na ŋgha, hune kenezen ŋ gərekey zeney, askwaw, ha hwas ata vah maa hune kanazlap: “Bəzla manja ata ɗala ma kandaha a zlam bay Madakal.”»
Actualmente seleccionado:
Mata 23: BHS
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2025 CABTAL