माथ 9
9
मित्काड़ गोच् होड़े बोगेयेदे
(मा़र २:१-१२; लु ५:१७-२६)
1आदो जिसु ला़उका़रे देच्काते दोरयाँव हानासा आयाक् नागराहातेये पारोम चालावेना, 2खान पारकोमरे जाड़ावआकान मित्टेन मित्काड़ गोच् होड़ उनि ठेनको आ़गुकेदेया, जिसु दो ओनकोवाक् बिसवा़स ञेलकाते उनि मित्काड़ गोच् होड़े मेतादेया, “दिल जोङमे बाछा, आमाक् का़इको दो इका़येनतामा।” 3आर ञेलपे सोसतोर बाडायको मोदरे आदोम आदोम होड़ मित् एटाक्रेको मेपेनेना, “नुय होड़ दो इसोरे हेनोसतावाय काना।” 4जिसु दो ओनकोवाक् हुदिस बुनदिस बाडाय कातेये मेनकेदा, “आपेयाक् मोनरे चेदाक् बा़ड़िच् दोपे हुदिसजोङ काना? 5ओकाटाक् बा़ड़ति आलगावा, नोवा मेमेन आमाक् का़इको इका़येनतामा से मा बेरेत्मे आर ताड़ाममे? 6मेनखान जेमोनपे बाडाय मानवा होपोन दो धा़रतिरे का़इ इक्का़ रेयाक् एकतिया़रि मेनाक्ताया मेनते,” आदो उनि मित्काड़ गोच् होड़े मेतादेया, “बेरेत्मे आमाक् पारकोम कुटुङताम आर आमाक् ओड़ाक्ते चालाक्मे।” 7खानगे उनि दो बेरेत् एनते आच् ओड़ाक्तेये चालावेना। 8आर गादेल होड़ दो ओना ञेलकातेको बोतोरेना आर मानवा नोनकान एकतिया़रिये एमाको कान, इसोरको सारहावकेदेया।
माथाये होहो ओचोक् कान
(मा़र २:१३-१७; लु ५:२७-३२)
9आर जिसु ओंडे खोने सेन पारोमोक्कानरे माथायको मेताय मित् होड़ मा़सुल उक्ठा़उ ओड़ाक्रे दुड़ुप् आकाने ञेलकेदेया, आरे मेतादेया, “देला पाँजाञमे।” खानगे बेरेत्कातेये पाँजाकेदेया।
10आदो ओड़ाक्रे जोजोमे दुड़ुप् आकान ताहेंकानरे, आ़डि उता़र मा़सुल उक्ठा़उको आर का़इ होड़को हेच्काते जिसु आर उनिरेन चेलाको तुलुच् जोम ला़गित्को दुड़ुप् पानतेयेना। 11आर फा़रिसिको दो ओना ञेलकाते उनिरेन चेलाकोको मेतात्कोवा, “आपेरेन गुरु दो मा़सुल उक्ठा़उको आर का़इ होड़को तुलुच् चेदाक् ए जोजोम काना?” 12मेनखान जिसु दो ओना आँजोमकातेये मेतात्कोवा, “बोगे होड़को दो रारानिच् रेयाक् जा़रुड़ बा़नुक्ताकोवा मेनखान दुखा़लिकोगे। 13चालाक्पे भेद चेत्जोङपे नोवा दो चेत्काना मेनते, माँयाँगेञ बा़सुताक् काना, दाँड़ें दो बाङ। एनते भागे होड़ होहोवाको ला़गित् दो बा़ञ हेच् आकाना मेनखान का़इ होड़कोगे।”#होसिया़ 6:6
उपा़स बाबोतते कुकलि
(मा़र २:१८-२२; लु ५:३३-३९)
14उन जोखेच् जोहानरेन चेलाको जिसु ठेन हेच्कातेको मेतादेया, “चेत् इया़ते आले आर फा़रिसिको दोले उपा़सेदा, आर आमरेन चेलाको दो बाको उपा़सेदा?” 15जिसु दोए मेतात्कोवा, “चेत् बापला ओड़ाक्रे बा़रिया़तकोको भाबनाकोक्आ जाँवाँयबेटा आको साँवरेये ताहेन तुलुच्? मेनखान दिनको दाराकाना ओने उनरे जाँवाँयबेटा दो ओनको खोने रेजोगोक्आ उनरेको उपा़सा।”
16“ओकोय हों बिन बेरेलदाक् किचरिच् कुटरा़ दो मारे किचरिच्रे बाको कानथा जालादा, बाङ खान कानथावाक् कुटरा़ते किचरिच् ए ओर ओड़ेजा, आर ओड़ेच्तेत् दो आरगे माराङोक्आ। 17नावाँ दारखा रासा हों मारे हारतारेयाक् बेनाव भाजानकोरे दो बाको दुल दोहोया बाङ खान ओना हारता भाजान दो ओड़ेजोक्आ आर दारखा रासा दो बुहेल गिडिक्आ आर हारता रेयाक् भाजान हों नोसटोक्आ, मेनखान नावाँ दारखा रासा दो नावाँ हारता भाजानरेगेको दुल दोहोया आर बानारगे बेसते ताहेना।”
जायरोस होपोनेरात आर पोरधोल मायजिवे बोगेक्कान
(माथ ५:२१-४३; लु ८:४०-५६)
18नोवाकोय गालमारावाकोकान ताहेंकानरे, जिहुदिकोरेन मित्टेच् मुखिया़ होड़ हेच्कातेये सेवावादेया आरे मेतादेया “होपोनेराञ नितगेये बेनडावेना; मेनखान एनहों देला सेनकाते चापोयेम आदोए जिवेदोक्आ।” 19आदो जिसु बेरेत्काते उनि साँवतेये चालावेना आर उनि रेन चेलाको हों उनिको पाँजाकेदेया।
20उन जोखेच्गे गेलबार बोछोर खोन पोरधोल ताहेंकानताय मित्टेन मायजिउ उनि तायोम सेच् खोन हेच्काते उनियाक् किचरिच् रेयाक् आञचारे जोटेत्केत् ताया, 21एनते उनि दो मोनेरेये मेनकेदा, “एकेन उनियाक् किचरिच् इञ जोटेत् ञामले खानगेञ बोगेक्आ।” 22आदो जिसुइ आ़चुरेना, आर उनि ञेलकातेये मेतादेया, “ए मा़इ दिल जोङमे, आमाक् बिसवा़सगेये बोगे आकात्मेया।” उनि मायजिउ दो इना़ घा़ड़िच् खानगेये बोगेयेना।
23आदो जिसु उनि मुखिया़ होड़ाक् ओड़ाक् ए हेच् एन खान तिरिया़ ओक्रोङको आर गादेल होड़ का़उवा़रा़उवा़क्काने ञेलकेत्कोते, 24उनि दोए मेतात्कोवा, “मेन ओचोक्पे एनते कुड़ि दो बाङचोय गोच् आकान, एकेने जा़पित् आकादा।” आदोको लानदा धुत्आदेया। 25आर गादेल होड़को ओडोक ओचोयेन खान उनि दो बोलोकाते तिये साप्केदेया, खानगे कुड़ि दोए बेरेत् एना। 26आर नोवा काथा दो ओना गोटा टोठारे डामडाहेयेना।
बारया काँड़ाँ होड़किन बोगेयेन
27आदो जिसु ओंडे खोने सेन पारोमोक्कानरे बारया काँड़ाँ होड़ उनिकिन पाँजाकेदेया, आर होहोवातेकिन मेतादेया, “ए दा़उद होपोन, माँयाँवालिञमे।” 28आर ओड़ाक्तेये हेच्एन खान उनकिन काँड़ाँ होड़ दो उनि ठेनकिन हेच् एना; आदो जिसुइ मेतात्किना, “पा़तिया़उक् कानाबेन नोवाञ दाड़ेयाक्आ मेनते?” मेतादेयाकिन “हें प्रोभु” 29खान उनकिनाक् मेंत् जोटेत्कातेये मेतात्किना, “आबेनाक् बिसवा़स लेका बाड़े होयोक्ताबेनमा।” 30आर उनकिनाक् मेंत् दो बेङगेत् गोत्एनता़किना आदो जिसु का़जिया़ँउकातेये मेतात्किना “मेन ओकोय हों नोवा आलोको बाडायमा।” 31मेनखान उनकिन दो ओडोक सेनकाते ओना गोटा टोठारेकिन डामडाहेकेदा।
मित्टेन गुङगा़ होड़े बोगेयेन
32आर उनकिनकिन ओडोक चालाक्कान ताहेंकानरे मित्टेन बा़ड़िच् जिउ चापाड़ आकावादे गुङगा़ होड़ उनि ठेनको आ़गुकेदेया। 33आर बा़ड़िच् जिउ ए ओडोक गिडियेन खान उनि गुङगा़ होड़े रोड़केदा। खानगे ओनको गादेल होड़ हाहाड़ायेनतेको मेनकेदा, “इसराएलरे नोनका दो तिस हों बाङ ञेलआकाना।”
34मेनखान फा़रिसिको दोको मेनकेदा, “बा़ड़िच् जिउकोरेन मुखिया़ होतेतेगे बा़ड़िच् जिउकोय ओडोक गिडियेत्कोवा।”#माथाय १०:२५; १२:२४; मा़रकुस ३:२२; लुक ११:१५
होड़को ला़गित् जिसुवाक् माँयाँ
35जिसु दो जोतो नागराहा आर आतोकोरे दाँड़ाँ दाँड़ाँते ओनकोवाक् सुना़गोगकोरेये चेत्आको कान आर राजोसटि रेयाक् भागे सोमबाते पोरचाराको कान ताहेंकाना, आर सानाम लेकान रोग बिघिन आर सानाम लेकान रुवा़ हासोये बोगेयेत्ताको ताहेंकाना।#माथाय ४:२३; मा़रकुस १:३९; लुक ४:४४ 36आर जिसु दो गादेल होड़को ञेलकाते ओनकोरे माँयाँ हेच्आदेया, एनते लोराव आकान आरको आसोक्टायोक् आकान ताहेंकाना, गुपियिच् बा़नुगेताको भिडिलेका।#नुमेरि २७:१७; १ रापाजको २२:१७; २ बिबोरोन १८:१६; जेहेसकेल ३४:५; मा़रकुस ६:३४ 37खान आच्रेन चेलाकोय मेतात्कोवा, “बेले चासमा आ़डि उता़र, मेनखान का़मिया़को दोको थोड़ागेया।#लुक १०:२ 38ओनाते बेले चासरेन किसा़ँड़ नेहोंरायपे, जेमोन आयाक् बेले चासरे का़मिया़को कोलते होंए कोल ओडोकको।”
Actualmente seleccionado:
माथ 9: NTSPt25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Santhali Language © The Word for the World International and Santhali Translation Project, Nepal, 2025