माथ 26
26
जिसु बिरुदरे मिसरिबाँट
(मा़र ४:१-२; लु २२:१-२; जोहा ११:४५-५३)
1आदो जिसु नोवाको सानाम काथाय मुचा़त्केत् खान, आच्रेन चेलाकोय मेतात्कोवा, 2बाडायगेयापे बा़रसिञ खानगे सेन पारोम पोरोब होयोक्आ, आर मानवा होपोन दो कुरुस ओचोक् ला़गित्ए सोपरोत ओचोक्आ।#एकसोडस १२:१-२७
3उनरे माराङ नायकेको आर दिसा़म होड़कोरेन मुरुबिको दो कायाफाको मेताय माराङ नायकेयाक् दोङगोलरेको जारवायेना, 4आरको चेपेत्एना जेमोन बोनधेकते जिसुको साबे आरको गोजे। 5मेनखानको मेनकेदा, पोरोबरे दो आलो, बाङ खान दिसा़म होड़को तालारे गुलमाल होय बोतेच्कोक्आ।
बेथानिरे जिसुवाक् ओजोक्
(मा़र १४:३-९; जोहा १२:१-८)
6आदो जिसु बेथानिया़रे मुरहुच् जोम सिमोनाक् ओड़ाक्रेये ताहेंकानरे, 7मित्टेन मायजिउ आलाबासतेर चुका़क्रे आ़डि दामानाक् माहकावक् सुनुमानते उनि ठेने हेच्एना, आर जोजोमे दुड़ुप्आकान ताहेंकान जोखेच् बोहोक्रेये दुलादेया।#लुक ७:३७-३८ 8मेनखान चेलाको दो ओना ञेलकाते एदरेयेनतेको मेनकेदा, चेदाक् नोवा भाराभाट दो? 9एनते नोवा दो आ़डि दामते चोङ आ़खरिञकोक् आर रेङगेच्ओरेच्को एमकेको।
10जिसु दो ओना बाडायकातेये मेतात्कोवा, “मायजिउ चेदाक्पे दुक ओचोयेकाना? एनते इञ ला़गित् बेसगेये का़मिआकादा। 11एनते रेङगेच्ओरेच्को मा जावगे मेनाक्कोतापे, मेनखान इञ दो जावगे बा़नुगिञतापेया।#देउतरोनोमि १५:११ 12एनते उनि नोवा माहकावक् सुनुम इञाक् होड़मोरेये दुलादिञ दो तोपाक् सापड़ाविञ ला़गित्ए ओनकाकेदा। 13सा़रिगेञ मेतापेकाना, गोटा धा़रतिरे जाहाँरेगे नोवा भागे सोमबात पोरचारोक्, नुयये का़मिआकात्आक् हों दिसा़ये ला़गित् ला़इ तोराक्आ।”
जिहुदा़ जिसु दोखाय एमादे
(मा़र १४:१०-११; लु २२:३-६)
14उनरे जिहुदा़ इसकारियोतको मेताय, गेलबारको मोदरेन मित् होड़, माराङ नायकेको ठेन सेनेनतेये, 15मेतात्कोवा, जुदिञ सोपरोतआपे खान चेत्पे एमा़ञा? ओनको दो उनि पे गेल चा़नि सिकिको लेखावादेया।#सेकारिया़ ११:१२ 16आदो उन खोनगे जिहुदा़ दो सोपरोते ला़गित् आ़ते ञामबाड़येत् ताहेंकाना।
सेन पारोम पोरोब रेयाक् सेस केदोक्
(मा़र १४:१२-२६; लु २२:७-१३,२१-२३; जोहा १३:२१-३०)
17आर बिन ता़ड़ियानाक् पिठा़ पोरोब रेयाक् पा़हिल हिलोक् चेलाको जिसु ठेन हेच्सोरकातेको कुलिकेदेया, “सेन पारोम भोज जोम ला़गित्ओकारेले तोयनातामा मेनतेम मेनजोङकाना?”
18उनिये मेनकेदा, “नागराहाते सेनकाते मित् होड़ ञापामकाते मेतायपे, ‘गुरुइ मेनआकादा, इञाक् ओकते दो सोर आकाना, आम ठेन इञरेन चेलाको तुलुच् सेन पारोम भोज इञ जोमा।’”
19आदो चेलाको जिसुइ हुकुमात्को लेका केदाको आर सेन पारोम भोजको तेयारकेदा। 20आर आ़युप्एन खान गेलबारको तुलुच् जोजोमे दुड़ुप्एना। 21आरको जोजोमकान ताहेंकानरे जिसुइ मेनकेदा, सा़रिगेञ मेतापेकाना, आपे मोदरेन मित् होड़े सोपरोतिञा। 22ओनको दो आ़डिको मोन दुक एना, आर एके एकेते कुक्लिको एहोप् एना, इञ दो ओहोगे प्रोभु।
23उनिये रोड़ रुवा़ड़केदा, “इञ तुलुच् बा़टिरे ति तोपोकेत्इच्, उनिगेये साप्ओचोञा।#सेरेञको ४१:९ 24मानवा होपोन माय चालाक् कान, आच् रेयाङ ओल आकान लेकागे, मेनखान उनि होड़रे दो हाय हाय, ओने ओकोय होतेते मानवा होपोने सोपरोत ओचोक्कान, उनि होड़ दो आलोय जानामलेन खानगे होनाङ बोगे होयकोक्ताया।”
25आदो सोपरोते कानिच् जिहुदा़इ रोड़ रुवा़ड़केदा, “इञ दो ओहोगे, गुरु।” मेतादेयाय, “आमगेम मेन आकादा।”
प्रोभु केदोक्
(मा़र १४:२२-२६; लु २२:१४-२०; १ कोरि ११:२३-२५)
26आर ओनकोको जोजोमकान ताहेंकानरे जिसु दो पिठा़इ हालाङकेदा, गुनमान जोहारकातेये केचाक्केदा, आर चेलाको एमात्कोतेये मेतात्कोवा, ने आताङते जोमपे, नोवा दो इञाक् होड़मोकाना।
27आर बा़टि हालाङकाते आर गुनमानाव जोहारकातेये एमात्कोवा, आरे मेतात्कोवा, ने नोवा रेयाक् ञुयपे सानामको, 28एनते नोवा दो बोनदोबोस रेयाक् इञाक् माँयाँमकाना, ओका आ़डि होड़ ञुतुमते जोरोक्कान का़इ इका़क् ला़गित्।#एकसोडस २४:८ 29आर इञ मेतापेकाना, “नित खोनाक् दारखा रासा दो बाङगेञ ञुया ओना दिन हा़बिच्, ओने उनरे हापेन आपे साँवते आ़पुञाक् राजरे नाँवानाक् इञ ञुय।”
30आदो सारहाव सेरेञकाते जा़इतुन बुरुतेको ओडोक चालावेना।
जिसु पातरासाक् ञुरुक्ए ला़इ लाहायेत्कान
(मा़र १४:२७-३१; लु २२:३१-३४; जोहा १३:३६-३८)
31उनरे जिसुइ मेतात्कोवा, “निया़ ञिंदा आपे जोतोगे इञरेपे ता़किजोक्आ, एनते ओल आकाना, गुपियिच् इञ मागेया, आर खा़ड़रेन भिडिकोको छिञछा़तुरोक्आ।#सेकारिया़ १३:७ 32मेनखान इञिञ जिवेत् बेरेदोक् तायोम दो आपे लाहाते गा़लिलतेञ चालाक्आ।”
33पातरास दोए रोड़ रुवा़ड़केदा, “जोतोको आमरेको ता़किच्लेनरे हों, इञ दो तिस हों ओहोगेञ ता़किच्लेना।”
34जिसुइ मेतादेया, “सा़रिगेञ मेतामकाना, निया़ ञिंदा़गे सिम सा़ंडि आ़उरिये रागरे पे धावेम बाङेञा।”
35पातरासे मेतादेया, “आम साँवते गुजुक् होयोक्तिञरे हों, ओहोगेञ बाङलेमा।” आर ओनकालेका जोतो चेलागेको मेनकेदा।
गेथसेमानेरे जिसुवाक् कोयजोङ
(मा़र १४:३२-४२; लु २२:३९-४६)
36उनरे जिसु दो ओनको तुलुच् गेथसेमानेको मेताक् जायगाते सेनकाते चेलाकोय मेतात्कोवा, “नोंडे दुड़ुप् हताड़ोक्पे, हानडे सेनकाते आ़उरिञ कोयजोङ हा़बिच्।” 37आर पातरास आर साबदायरेन होपोनकिन इदि तोराकाते भाबनाक् आर धाक धाकावक् ए एहोप् एना। 38खाने मेतात्कोवा, “गुजुक् दा़खिल जिवि लोक्कानतिञा, नोंडेगे ताहेनपे आर इञ तुलुच् जागवार आकाय ताहेनपे।” 39आदो सेन लाहाञोक्काते ताबेरेनतेये कोयकेदा, “ए आ़पुञ, होय दाड़ेयाक् खान नोवा बा़टि दो इञ ठेन खोन चालाव पारोमोक्मा, एनरेहों इञिञ मेनजोङकान लेका दो बाङ, बिचकोम आमेम मेनजोङकान लेका बाड़े होयोक्मा।”
40खान आच्रेन चेलाको ठेन हेच्काते जा़पित् आकात्ए ञामकेत्कोवा, आर पातरासे मेतादेया, “इञ तुलुच् मित् घोन्टा हों बापे जागवार दाड़ेयादा? 41जागवार आकाय ताहेनपे आर कोयजोङपे जेमोन बिडा़उरे आलोपे बोलोक्, जिउमा एनते सापड़ावगे, मेनखान होड़मो दो निजोरगेया।”
42आरहों दोसार धाव सेनकातेये कोयकेदा, ए आ़पुञ, नोवा बा़टि इञ ठेन खोन बाङ पारोम चालाव दाड़ेयाक् खान बेगोर ओनाञ ञुयते, आमाक् मोने लेका बाड़े होयोक्मा। 43आदो आरहों जा़पित् आकात् ए हेच् ञामकेत्कोवा एनते ओनकोवाक् मेत् दो झाप झापोक् कान ताहेंकानताकोवा।
44आर बा़गि ओटोवात्कोते आरहों तेसार धाव सेनकाते इना़ काथा मेनकातेगेये कोयकेदा। 45खानगे चेलाको ठेन हेच्कातेये मेनकेदा, “मा नितोक् दो जा़पिदपे आर जिरा़उ जोङपे, ञेलपे सेटेरेना ओकते दो, मानवा होपोन दो का़इ होड़कोवाक् तिरेये सोपरोत ओचोक्काना। 46मा बेरेत्पे, मेदेलाबोन चालाक्आ, ञेलपे सोपरोतएदिञकानिच् दोए सोरआकाना।”
जिसुइ साप् ओचोक्कान
(मा़र १४:४३-५०; लु २२:४७-५३; जोहा १८:३-१२)
47आर उनिये रोरोड़कान ताहेंकान जोखेच्गे, जिहुदा़ ओनको गेलबारको मोदरेन मित्टेन चेलाए हेच्एना, आर उनि तुलुच् आ़डि गादेल होड़ तारवाड़े आर मुता़कआनते माराङ नायकेको आर दिसा़म होड़कोरेन मुरुबिको। 48आर साप् ओक्चोयिच् दो मित्टेच् ओक्रोम चिनहा़इ एमात्को, सोपरोतेदिञकानिच् दोए सोर आकाना। जाहाँयटाक्गेञ चोक्आय, उनि कानगेयाय उनि हातेपे।
49आर जिसु ठेन हेच् गोत्एनतेये मेनकेदा, जोहार गुरु, आरे चोक् आदेया। 50जिसु दोए मेतादेया, “ए गाते, ओकाटाक् ला़गित्एम हेच् आकान, ओना ओनकायमे,” खानगे हेच्सोरेनते झुटिया़उसकेदेतेको साप्केदेया। 51आर ञेलपे, जिसु सोङगेतेन मित् होड़ दो ति तिया़रकाते आयाक् तारवाड़े बोच्काते माराङ नायकेरेन गुतिये उयुक् आदेया आर लुतुरे हेसेकेत् ताया। 52उनरे जिसुइ मेतादेया, “आमाक् तारवाड़े दो ओना रेयाक् जायगातेत् रे भोराव रुवा़ड़काम, एनते तारवा़ड़े चालावको दो जोतोगे तारवाड़तेको नोसटोक्आ। 53सेम बुजहा़वेदा आ़पुञ ठेन ओहोञ कोय दाड़ेलेया आर उनि दो नितगे गेलबार फा़द खोन बा़ड़ति दुत इञ ठेने कोलकेको? 54चेकाते एनडेखान सोसतोरको रेयाक् काथा दो पुरा़उकोक्आ बाङमा नोनका होयोक् दो जा़रुड़गेया?”
55इना़ घा़ड़िच्गे जिसु दो गादेल होड़कोय मेतात्कोवा, “डा़कु उपा़रते लेका तारवा़ड़े आर मुता़क आनते इञ सासाप् पे ओडोक हेच् आकाना? दिना़मगे कोयजोङ ओड़ाक्रे दुड़ुप्कातेञ चेत्आकोकान ताहेंकाना, आर बापे साप्लेदिञा।#लुक १९:४७; २१:३७ 56मेनखान ओना जोतो दो होय आकाना जेमोन ना़बिको रेयाक् सोसतोररे ओलाक्को पुरा़उक्,” खान जोतो चेलाको बा़गियादेतेको दा़ड़केदा।
जिसु माराङ बा़इसि सामाङरे
(मा़र १४:५३-६५; लु २२:५४-५५,६२-७१; जोहा १८:१३-१४,१९-२४)
57आर ओनको दो जिसु साप्काते माराङ नायके कायाफा ठेनको इदिकेदेया, ओने ओकारे सोसतोर बाडायको आर मुरुबिकोको जारवा आकान ताहेंकान। 58मेनखान पातरास दो फाराक फाराकते माराङ नायकेयाक् राचा हा़बिच् ए पाँजा इदिकेदेया, आर इना़काते चेत् होयोक्आ मेनते ञेलजोङ ला़गित् पाहरादारको तुलुच् भिता़र सेच् बोलोयेनतेये दुड़ुप् एना। 59आदो माराङ नायके आर सानाम माराङ बा़इसिरेनको दो जिसु गोजे रेयाङ उनि बिरुदरे एड़े गोहा ञाम ला़गित्को कुरुमुटुयेत् ताहेंकाना, 60आयमा गोहा एमोक्कोको हेच्एना, मेनखान ओनको दो ओका सा़बुत हों बाको ञामलाक्आ। मुचा़त्रे बार होड़ हेच्कातेकिन, 61मेनकेदा, “नुय होड़ दोए मेनआकादा, ‘इसोराक् कोयजोङ ओड़ाक् धाङधासेरकाते पे माँहाँरेञ बेनाव राकाबा।’”#जोहान २:१९
62आदो माराङ नायके बेरेत्एनते जिसुइ मेतादेया, “चेत् हों बाम रोड़ रुवा़ड़ेत्कान दो? नोको होड़ आम बिरुदरेको मेनेत् दो चेत्काना?” 63मेनखान जिसु दो हापेगेये ताहेंयेना। माराङ नायके दो जिसुइ मेतादेया, “जिवेत् इसोराक् ञुतुमरे किरिया़कातेञ मेताम काना, ला़इयालेमे चेत् आम दो इसोररेन होपोन मा़सि कानाम?”
64जिसु दो उनिये रोड़ रुवा़ड़ादेया, “आमेम मेनेदा, एनरेहों इञ मेतापेकाना, आपे दो मानवा होपोन सानाम दाड़ेयानिच् रेयाक् एतोमरे दुड़ुप् आकान आर सेरमा रेयाक् रिमिल कोरे हिजुक्कान पे ञेलेया।”#दानिएल ७:९
65आदो माराङ नायके आयाक् किचरिच् ओर ओड़ेच्कातेये मेनकेदा, “नुय होड़ दो इसोर हेनोसतावाक्ए रोड़केदा। आर गोहा रेयाक् चेत् दोरकाराबोना? इसोर हेनोसतावाक् ए रोड़केत्मा पे आँजोमकेत्गे।#लेबितिकुस २४:१६ 66चेत् पे मेनेदा?” रोड़ रुवा़ड़ादेयाको, “नुय दो गोच् ओचोक् लेक कानाय।”
67आदो मोचारेको थोआदेया, आरको कुहा़उकेदेया, आर आदोम आदोमको दो नोनका मेनकातेको थापाकेदेया,#जेसाया ५०:६ 68“ए मा़सि मा ना़बिमे, ओकोये दालकेत्मेया?”
पातरास जिसुइ बाङेकान
(मा़र १४:६६-७२; लु २२:५६-६२; जोहा १८:१५-१८,२५-२७)
69पातरास दो बाखेर राचारेये दुड़ुप् आकान ताहेंकानरे, मित्टेन का़मड़ि कुड़ि हेच्कातेये मेतादेया, “आम हों उनि गा़लिलरेन जिसु सोंगेतेनिच् कानाम?”
70मेनखान उनि दो सानाम होड़ सामाङरे बाङकेत्तेये मेनकेदा, “चेत्एम मेनेदा, बा़ञ बाडाया।” 71आदो दुवा़र ठेने ओडोक हेच्एनते एटागिच् का़मड़ि ञेलकेदेतेये मेतादेया, “नुय होड़ हों उनि नासारेतरेन जिसु सोंगेतेये ताहेंकाना।”
72पातरास दो आर हों किरिया़येनतेये मेनकेदा, “इञ दो उनि होड़ बाडाय हों बा़ञ बाडाय आकादेया।”
73मित् घा़ड़ि खानगे, ओंडे ताहेंकानको हों हेच्सोरकाते पातरासको मेतादेया, “सा़रिगे आम हों ओनको मोदरेन मित् होड़ कानाम, एनते आमाक् रोड़तेगेम बाडायोक् काना।”
74खानगे सारापोक् आर किरिया़क्ए एहोप् एना, “उनि होड़ बाडाय हों बा़ञ बाडाय आकादेया।” खानगे साटमेनते सिम सा़ंडिये राक् गोत्केदा। 75आर पातरास दो जिसुवाक् काथाय दिसा़ गोत्केदा ओनेये मेनलेत्, “सिम सा़ंडि आ़उरिये रागरे पे धावेम बाङेञा।” आदो बाहरेते ओडोक सेनेनते हुँक हुँक ए राक्केदा।
Actualmente seleccionado:
माथ 26: NTSPt25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Santhali Language © The Word for the World International and Santhali Translation Project, Nepal, 2025