Matayo 1
1
Khamu la Yesu Kilisito
Luka 3:23-38
1Yaya ni maina ya khamu la Yesu Kilisito mbadwa wa Daudi uyo wadali mbadwa wa Ibulahimu.
2Ibulahimu wadambala Isaka, Isaka wadambala Yakobo, Yakobo wadambala Yuda ni abale wake. 3Yuda wadambala Pelesi ni Zela yawo maye wao wadali Tamali. Pelesi wadambala Hesilomu, Hesilomu wadambala Alamu. 4Alamu wadambala Aminadabu, Aminadabu wadambala Nashoni, Nashoni wadambala Salimoni, 5Solomoni wadambala Boazi. Maye wake Boazi wadali Lahabu. Boazi ni Lutu adambala Obedi, Obedi wadambala Yese.
6Yese wadambala mfumu Daudi. Nayo Daudi wadambala Solomoni. Maye wake Solomoni wadali Batisheba mkazake wa Uliya. 7Solomoni wadambala Lehoboamu, Lehoboamu wadambala Abiya, Abiya wadambala Asa. 8Asa wadambala Yehoshafati, Yehoshafati wadambala Yolamu, Yolamu wadambala Uzia. 9Uzia wadambala Yotamu, Yotamu wadambala Ahazi, Ahazi wadambala Hezekia. 10Hezekia wadambala Manase, Manase wadambala Amoni, Amoni wadambala Yosia.
11Yosia wadambala Yekonia ni abale wake. Imeneyo idali nyengo ya Ayahudi yapo adapelikedwa kupita ku Babuloni uko adasamuchidwila.
12Ayahudi yapo adali ku Babuloni, Yekoniya wadambala Shealitieli, Shealitieli wadambala Zelubabeli. 13Zelubabeli wadambala Abiudi, Abiudi wadambala Eliakimu, Eliakimu wadambala Azoli, 14Azoli wadambala Sadoki, Sadoki wadambala Akimu, Akimu wadambala Eliudi. 15Eliudi wadambala Eliazali, Eliazali wadambala Matani, Matani wadambala Yakobo. 16Yakobo wadambala Yusufu. Uyu Yusufu wadali mmunake wa Maliya. Uyu Maliya ndeuyo wadambala Yesu uyo watanidwa Kilisito.
17Chimwecho kudali mibadwa khumi ni inayi kuyambila Ibulahimu mbaka Daudi. Mibadwa khumi ni yanayi kuyambila ndhawi ya Daudi mbaka ndhawi ya Ayahudi yopelekedwa kupita ku Babuloni uko adasamuchidwa. Ni kudali mibadwa khumi ni inayi mbaka kubadwa kwa Kilisito.
Kubadwa kwa Yesu Kilisito
Luka 2:1-7
18Kubadwa kwa Yesu Kilisito kudali chimwechi. Maliya maye wa Yesu wadachumbidwa ni Yusufu. Nambho akali osakhale pamojhi ngati mundhu ni mkazake, Maliya wadaonekana wali ni pathupi kwa mbhavu za Mzimu Woyela. 19Yusufu mmunake Maliya wadali mundhu uyo wamachita yayo yavomelezeka pamaso pa Mnungu. Siwadafune kumlengecha njhoni. Chimwecho wamafuna kumusiya kwa chisisi. 20Yusufu yapo wamaganizila chindhu ichi, Mtumiki wa kumwamba wa Ambuye wadamjhela kumaloto kumkambila Yusufu mwana wa Daudi, Usadaopa kumtenga Maliya kukhala mkazako pakuti pathupi pake pajha kwa mbhavu za Mzimu Woyela. 21Nayo siwabale mwana wa mmuna. Nawe siumtane jhina lake Yesu pakuti uyu nde uyo siwaombole wandhu wake kuchoka ku machimo yao.
22Vonjhevi vachitika kukwanilicha ivo adakamba Ambuye kupitila mlosi wake kuti 23mbeta siwakhale ni pathupi ni siwabale mwana wammuna uyo wandhu samutane Emanuweli ni mate yake, Mnungu pamojhi ni ife.
24Chimwecho, Yusufu yapo wadauka wadachita ngati umo wadakambilidwa ni mtumiki wa kumwamba wa Ambuye wadamkwata Maliya. 25Nambho Yusufu siwadagone ni Maliya mbaka yapo wadabala mwana wammuna, Yusufu wadamtana jhina Yesu.
Actualmente seleccionado:
Matayo 1: NTNYBL2025
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament in Nyanja @The Word for The World International and Nyanja Language translation, 2025. All rights reserved.