Matayo 6
6
Kuvalhaari vahuye
1Wesiani musirezaboi miboire kaghu mikulho he vahe kalo ite vamuakho. Kwaite mkuboi to, Aba kaghu eaha are ana neri tekamuo kitumulilo. 2“Kwato mkuvalhaari vahuye, musiyo he muhe sacho valame veboi he minda ja kusaheia Vayahudi nahe kwalhi kalo vayoiwe kikulho ni vahe. Kweri nimubaya, kavo vaafiriti kudoria kitumulilo kini. 3Mira ari mkumlhaari mhuye, boini kwa kumatu neri muharegha kechi wa hina usiile hucho muharegha wa sughano uboi, 4kalo kivulu kechi chisiiliwe ni muhe mhali. Niho Aba kechi waare ana eakho vimatuike enekuo kitumulilo.”
Mahinyo ya kumuaresi Kiumbi na kulhati
Luka 11:2-4
5“Mkuaresi, musikhwa sa vahe vakusa vekuaija ite ni vakulho. Vo vedumuu kuuma na kuaresi hodi vesahea Vayahudi na kakera he kwalhi kalo vahe vavaakho. Kweri nimubaiya, kavo vaafiriti kudoria kitumulilo kini. 6Mira kune mkuaresi, buuni za he minda kaghu naho mulhati maluhige mumuaresi Aba kaghu esiakhoika. Naka Aba kaghu eakho yematuike, enemuo vitumulilo kaghu.” 7“Kune mkuaresi, msiyo viome vikumure sa vahe vesimuilie Kiumbi. Kwaite vetoti ite Kiumbi enevako kwa mburi ya viome kini vikumure. 8Musikhwa muaresi sakigi vo vearesi, kwaite Aba kaghu ereila yo myadumu neri musina mlhawa”. 9Kwato mkumuaresi Kiumbi, muba to,
“Aba kanu uaha are ana,
Ilhe kechi likowe.
10Udilao kechi ulita,
Hucho udumu nachikhwa wato, ii he idi saare ana.
11Utuo viaghu kanu kira muaze.
12Utukaaie makusa kanu,
Sakigi nne tuvakaaiya vakusa kanu.
13Usituro tukagaliwe
Mira utukaa hehu mkusa. Kwaite Udilao ni mkechi na umuruisho na ugiru, maaze makhabuna. Nachikhwa to.”
14Kwaite mkuvakaaiya vahe makusa kini, Aba kaghu eaha ana enemukaaya na kune. 15Mira iji mkusaavakaaiya vahe makusa kini, naka Aba kaghu eaha are ana tekamukaaiye kune makusa kaghu.
Mahinyo ya kulhati kusaa kigi
16“Mukulhati kusaa kigi, musiaije uhuye sacho veboi vahe vakusa vekuboi vakulho. Kwaite vo vekoma vubasa kini kalo vamuru kuakhoika he vahe ite tevae. Nimubaya kweri, kavo vaafiriti kudoria vitumulilo kini. 17Mira kune mukulhati kusaa kigi, muonhi vubasa kaghu naho mulhomi malhoma he mia kaghu, 18kalo kulhati kaghu kusaa kigi kusiiliwe ni vahe vahali, mira Aba kaghu bi waare ana esiakhoika niu edumuwa aile, naka Aba kaghu eakho mburi jo muboi jimatuike enemuo kune vitumulilo kaghu.”
Kukeiyeni uzuri kaghu are ana he Kiumbi
Luka 12:33-34
19“Musikukeiye uzuri kaghu he idi kwaite vunyongole na nkanga vineoni, naho vagwalo venebuu na kugwa. 20Kukeiyeni uzuri kaghu ana he Kiumbi areho vunyongole na nkanga tevimuru kuoni neri vagwalo tevemuru kubuu kugwa. 21Kwaite ho uzuri kechi unekhwa uaha niho na swaho kechi ho inekhwa iaha.”
Iila nisa kijari cha msa
Luka 11:34-36
22“Iila nisa kijari cha msa. Iji kai iila kechi ni izime, msa kechi mkhabuna unekhwa na luatame. 23Mira kai iila kechi ligae, msa kechi mkhabuna unekhwa na kidughu. Iji kai luatame luaha za kechi ni kidughu, ka kidughu chinekhwa kigirusha.”
Kiumbi na uzuri
Luka 16:13; 12:22-31
24“Tehelo neri muhe muwe emuru kunyamarikia madilao vanu, enemsanuiya muwe naho enemdumu mhali, enekhwa mkulho he muwe na kukhwa na kumfwa mhali. Kune temkamuru kumnyamarikia Kiumbi na uzuri.”
25Kwato nimubaya, musibughenu mburi ya mifufuire kaghu ite munea kiakhoni hile munewaha kiakhoni hile muneoro kiakhoni. Ho, mifufuire simikulhosha kutakho viaghu na msa sikutakho gomae? 26Wesiani vuhimeno tevulha mbeyu, naho tevuloja naho tevulo mami'a yakukea, mira Aba kaghu waare ana eyao viaghu. Ho, kune temvakulho kutakho mahimeno? 27Niji he kune ii ekukunyamarisha emuru kukususu neri kela we yahe mifufuire kuu? 28Niakhoni mukunyamarisha kwa mburi ja gomae? Wesiani malua ya maeza hucho yelheru. Teyeboi nyamalo neri teyekuboiya gomae. 29Mira nimubaiya, neri Dilao Sulemani salaghe na uzuri kuu mkhabuna tenaraa oro gomae kulho saya malua. 30Mira chikukhwa Kiumbi eyaoroija kikulho to ya mahako he mbuva yeaha wai na lhenu yetabibiwe he mwalha, ho tekamuoro kikulho kune musilo kudarisha kufurue? 31Kwato musitoti nakuba ite, “Tunea kiakhoni?” Hile, “Tunewaha kiakhoni? Hile, tuneoro kiakhoni? 32Kwaite vahe vesimulie Kiumbi nivo vedaa vigi saka, mira Aba kaghu waare ana ereila ite mudumue ka vigi vikhabuna. 33Mira kune rongadaani Udilao wa Kiumbi nakuboi huyo edumu yaboike, naka makhabuna mnesusuwe. 34Kwato musitoti kwa mburi ya lhenu, kwaite lhenu inekunyamarikia salaghe. Kunyamarika kwa iaze iwe kumuagha.”
Actualmente seleccionado:
Matayo 6: NTMBL2025
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament in Mbugu @The Word for The World International and Mbugu Language translation, 2025. All rights reserved.