Matayu 1
1
Lukolo lwa Yesu Kilisito
Lukasi 3:23-38
1Aki ndo kitabho kya mahina gha lukolo lwa Yesu Kilisito ywa kibheleko kya Daudi, ywa kibheleko kya Abulahamu.
2Ibulahimu kakinlela Isaka, na Isaka kakinlela Yakobu, na Yakobu kakinlela Yuda na alongo bhake. 3Yuda kakinlela Pelesi papamu na Zela, bhene mama ywabhe kakibhegha Tamali, na Pelisi kakinlela Hesiloni, na Esiloni kakinlela Alamu, 4Alamu kakinlela Aminadabu, na Aminadabu kakinlela Nashoni, na Nashoni kakinlela Salimoni, 5Salimoni kakinlela Boasi, na mama ghwake Boasi kakibhegha Lahabu, Boasi kakibhegha tate ghwake Obedi na mama ghwake Obedi kakibhegha Luti, na Obedi kakinlela Yese. 6Yese kakinlela Mutwa Daudi.
Daudi kakinlela Selemani, kwa yula nhumbu ywa Ulia 7Selemani kakinlela Lehoboamu, na Lehoboamu kakinlela Abiya, na Abiya kakinlela Asafu. 8Asafu kakinlela Yehoshafati, na Yohoshafati kakinlela Yolamu, na Yolamu kakinlela Usia. 9Usia kakinlela Yotamu, na Yotamu kakinlela Ahasi, na Ahasi kakinlela Hesekia. 10Hesekia kakinlela Manase, na Manase kakinlela Amoni, na Amoni kakinlela Yosia. 11Yosia kakinlela Yekonia na alongo bhake, Mumanjubha gha kuhamihwa kughenda ku Babeli. 12Mbole ya Akaayahudi kuhamihwa kughenda ku Babeli, Yekonia kakinlela Shealitieli, na Shealitieli kakinlela Selubabeli. 13Selubabeli kakinlela Abihudi, na Abihudi kakinlela Eliakimu na Eliakimu kakinlela Asoli. 14Asoli kakinlela Sadoki, na Sadoki kakinlela Akimu, na Akimu kakinlela Eliudi. 15Eliudi kakinlela Eliasali, na Eliasali kakinlela Matani, na Matani kakinlela Yakobu, 16naywo Yakobu kakinlela Yosefu ywakabheghite nngwana ghwa Malia mama ghwake Yesu, na Yesu ndo ywakakemwa Kilisito. 17Habhu, hibheleko hyoha kutandila Abulahamu mbaka Daudi kukibhegha hibheleko kumi na ncheche, kangi kutandila Daudi mbaka kihamo kila kya ku Babeli kukibhegha hibheleko hingi kumi na ncheche, na kangi kutandila kihamo kya ku Baneli mbaka Kilisito kukibhegha hibheleko hingi kumi na ncheche.
Kubhelekwa kwa Yesu Kilisito
Lukasi 2:1-7
18Kubhelekwa kwa Yesu Kilisito kukibhegha naha, Malia mama ywake Yesu pakaluhitwe na Yosefu, peni kukali na kughonja papamu, Malia kakibhonekana kabhegha na ndumbo kwa makakala gha Nhuki ywa Chapanga. 19Naywo Yosefu nngwana ghwake, kiyaha kakibhegha mundu ywakughatughila ghala ghakaghapala Chapanga, kakipala ng'obhe kumpegha honi Maliamu pakindabhanji, ndo kakilamula kunleka kwa mbwepo. 20Basi, pakabheghite mukuwacha kutenda nnando aghwo, lihoka lya Bambo likinbwitukila mumaloto na kakinng'ombela, “Yosefu mwana ywa Daudi, ghukotoke kuyoghopa kuntola Malia kabheghe nhumbu ghwako, kiyaha mata ghakamilite ndo kwa makakala gha Nhuki ywa Chapanga. 21Katapapa mwana nnume, na ghwenga ghwanpegha mwana aywo lihina lyake Yesu, kiyaha mwene ndo kataalopoha bhandu kubhuka mu ulemwa ghwabhe.”
22Basi, agha ghoha ghatulukila ili ghatwihilike ghala ghakalongelite Bambo kwa njila ya mbuye ywa Chapanga. 23Nnole, “Nhinja kamwali katakamula ndumbo, naywo katapapa mwana nnume, Mwana aywo katakemwa lihina lyake Emanueli.” Fwambulo yake, “Chapanga papamu na twenga.”
24Naywo Yosefu pakayumukite mung'ono, kakitenda handa lihoka ywa Bambo pakanng'ombilite, kakintola nhumbu ywake. 25Peni kanatyanga naywo ng'obhe mbaka Malia pakapapite mwana nnume. Naywo Yosefu kakinkema yula mwana lihina lyake Yesu.
Actualmente seleccionado:
Matayu 1: NTNBL2025
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament in Ndwewe @The Word for The World International and Ndwewe Language translation, 2025. All rights reserved