Mothi 15
15
Hodaipiri rokni phwrwngma
(Mark 7:1-13)
1Jerw Jirusalemni kainwi kaitham Phorisirok arw kerongnal phwrangsa rok Jisuni dayw phaywi sakha, 2"Nini sagrirok tamani bagwi aguni hodaipirirokni phwrwngma paleya? Twmwi hinba bok chayoho suni yak suya tei kathar khalaiya."
3Phimwngbai Jisu sakha, "Halai nokh nokhni je phwrwngma tong obwnw paleni bagwi tani Kaitorni tholmanw hela khalai? 4Twmwi hinba Kaitor sajak, "Ma phanw borom rwdi' arw 'Je borogrok bokni kok lambai ma phanw seja khalai, boknw buthalwi mapairwnai.' 5Matwr Nokh sagwi tongw, kaisaswk jwtini bini ma eba phanw hinw, 'Ang jeba rwgwi nokhnw chubaman, obwnw Kaitorni dayw rwgwi rwjak.' 6Hai arw bini ma phanw borom rwni nangya. Nokhni araijar phwrwngmani bagwi Kaitorni koknw nokh gelan rwjiya. 7Phatrarok! Diyari Jisaiyo nokhnw lagwi daijw kokmuai sajak,
8I borogrok keber bukhokbai Anw borom rwgw,
matwr bokni bakha Ani daini kachalw tongw.
9Bok Anw alangkase lobw,
Twmwi himba bok keber borogni banainai ikimnwse kerongnal hinwi phwrwngw."
Tama khlaywi borogrok untha ong
(Mark 7:14-23)
10Jerw Jisu borogroknw Bini dayw ringkhogwi sakha, "Ani koknw khanadi arw bijidi. 11Borog bukhokbai jebw cha, obwbai borog untha ongya, matwr bukhok bisingni jeba akhogwi phai obwse borognw untha khalaiyw."
12Aiphuo Bini sagrirok phaywi Bwnw sakha, "Nwng tama siyw, Phorisirok Nini i koknw khanagwi bwswk lachima mankha?"
13Joba rwgwi Jisu sakha, "Ani chukhna hani Apha je bophangnw boljiya, obwrok phwywi kakholjanai. 14Bokni koknw yakhakgara, bok saklai kana, arwbw bok arw kaisa kananw lama phunukni nayw, kana jwtini kananw lama phunukni thangw, halai bok kainwibw hakorw kalainw.
15Aiphuo Pitor bwnw sakha, "Nwng je naisrwngnw sakha, obwnw chwnw biji rwdi."
16Jisu sakha, "Nokh tama tabokbw bijiya? 17Nokh tama nungdokya, jebw bukhok bisingw thang, obw ouk bisingbw thangw, tei jerw obw akhogwi thangw? 18Matwr bukhok daini akhogwi phainairok obwrok kha dainise phaiyw, tei obwrok borogroknw untha khalaiyw. 19Twmwi hinba chini kha dainise chaya oansokma, borog buthalnai, jatejar sinal tei beikim arw, khoknai, misa yakumu, seja akhogwi phayw. 20Imwrokse borognw untha khalayw, matwr yak suya bader chakhalai borog untha ongya."
Bejihudi birokmani paitokma
(Mark 7:24-30)
21Jerw Jisu Galil amchoinw yakarwi Sor tei Sidon jilagw thangkha. 22Arw atakkiya khalaywi odaini kaisa Konaniyoni birokma phaywi ibwnw sagwi chirikni nangkha, "Oh Subrai, Dayudni basala, anw khairokdi. Ani basa birok chaya phalabai rumjagwi kabangma tekto mandok."
23Matwr Jisu bwnw mwngsabw saliya. Aiphuo Bini sagrirok phaywi kabogwi sakha, "Bw chini ukhum ukhum phaidok arw chirikdok, bwnw kisa kachalw hodi."
24Jisu o birokmanw joba rwgwi sakha, "Anw keber Israyel bosongni kamajak merarokni daywse hojak."
25O birokma matwr Jisuni orw phaywi Bini sakangw yesu mokromwi Bwnw sakha, "Subrai, ani hamkar khalaidi."
26Jisu sakha, "Cherokrokni chamwngnw lagwi swini sakangw khibiywi rwmani gamya."
27Bw sakha, "Owk, Subrai, matwr hekphwng nophangni majwkni kalainai chamungnw swise chagw."
28Aiphuo Jisu bwnw sakha, "Birokma, kwbwi nini paitokma aise kabang. Nwng jetinjar nai obwtwijar ongthwk." Arw loge loge bini basachwk hamkha.
Brwi sai borognw Jisu charwmani
(Mark 8:1-10)
29Jerw Jisu o jeganw yakarwi Galil twithuni koretwi himkha arw hapongw kagwi kwrwngsa jegao achukkha. 30Kabangma borogrok bini dayw phaini nangkha, arw bok bokbai baksa boya, kana, nula, boba tei arw kabangma borognw Bini yathwi koriyw twbwgwi tonphaikha arw Bw boknw hamrwkha. 31Borogrok jephuo nungkha boba kok sakha, nula hamkha, khora himmankha, kanarok nungkha, aiphuo bok imwroknw nungwi amok chakha tei Israyelni Kaitornw lobni nangkha.
32Aiphuo Jisu Bini sagriroknw koreyw ringkhogwi sani nangkha, "I borog rokni bagwi Ani khakwl ongdok, twmwi hinba bok tini saltam kadok angbai baksa tongdok arw bokni dayw mwngsabw chamwng kwrwi. Arai khalaywi Ang boknw hamalai rwni naiya, araiyakhalai bok ukhirijalaywi lamao kebel ongwi himman galak."
33Sagrirok Bwnw sakha, "I phwrwk pharak jegao iswk borognw charwni bagwi chwng bwrwni chamwng manthai?"
34Jisu boknw sakha, "Nokhni dayw auan leb bwswk tong?" Bok sakha, "Leb sni auan arw maknwi maktham aa gira tongw."
35Aiphuo Bw borogroknw hagw achukdi hinwi tholkha. 36Obwni jerw Bw o auan leb sni arw o aa roknw lakha arw hambai rwgwi sapaikha tei sagriroknw rwkha arw bok obwnw borogroknw rwkha. 37Tei borogrok oukplwngsa chalaikha, arw je bechalarok bara turokkha obwroknw sagrirok tisagwi khopara khungsini kwplwng khalaikha. 38Jebwrok chajak bokni bisingni birok, cherokni bader orw brwi sai chalarok tongw. 39Obw phaikhalai Jisu borogroknw hamalai rwgwi rungw kagwi Mogdon jilagw thangkha.
Actualmente seleccionado:
Mothi 15: TPE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©️2025 Bible Students Fellowship of Bangladesh