Lu-ka 1
1
Panôic ba
1Pathau ong The-o-phi-los taka ranam, hu ralô urang krung hu ran twôk twak tha blah lak ka dôm bruk krung bihu klan krưh khol drei, 2njaup yau dôm urang krung hu bhian ƀôh di mưta thong ragxa anga Pô mưng phunti tathit vơk ka khol drei. 3Ywa nan ka, hadei di tuk rôh dwah tani tanat abih bruk mưng tamưrơp, dahlak xanưng laic lijang hajiơng tui danak bloh vak ka ong, 4piêh ong thau dôm kabha drei krung hu baic nạn kardak.
Gruk jrang mưnưk thong kal paneh dam anưd Pô Yê-su
(1:5 – 2:52)
Panôic hôr ka gruk tabiak di rai anưd Yâng Bap-tit
5Dalam rai Hê-rôt, patao nưgar Yu-đê,#1:5 patao nưgar Yu-đê: Patao Hê-rôt Patao prong pakrang abih nưgar Pa-let-tin harung tom nưgar Yu-đê, nưgar Sa-ma-ri, nưgar Ga-li-lê, nưgar I-du-ma-ia thong dôm bhum tanưh pakan. hu gru mưliêng gah mông A-bi-ya angan nạn Xa-ca-ri; hadiup angan nạn Ê-li-xa-ƀet bha di talei pajeh A-rôn. 6Abih dwa jang nạn mưnuix kahanôt di anak Pô Lingik, pang khik abih vahi thong adat caƀat Pô tha ganap thampuranư. 7Khol nhu ôh hu anưk, kaywa Ê-li-xa-ƀet trak di anưk thong bih dwa urang jang prong thun.
8Kadha mưjiơng tabiak tuk Xa-ca-ri tui ƀan gah mông drei ngak gruk hit mưliêng pak anak Pô Lingik. 9Tui tana dôm gru mưliêng, ong krung hu njaup patik bihu tamư huji Pô piêh ƀai harum. 10Dalam tuk ƀai harum, abih tapôr bôl jang dok lingiu lang kar. 11Kal nan hu tha umat Pô bhat mưrai thong Xa-ca-ri, dang gah hanuk jaban ƀai harum. 12Ƀôh umat, Xa-ca-ri tarung tarang thur mưk. 13Min umat đôm thong ong: “Mưni, Xa-ca-ri jôi hôic! Kaywa panôic lang kar hư krung bihu hamit. Ê-li-xa-ƀet hadiup hư, mưca mưnưk tha anưk likei; hư xang patah angan nạn Yâng. 14Mưca anưk likei nan ngak ka hư bui ôn ôt mưnôt, thong ralô urang mưca xơh bui tuk anưk rineh tabiak di rai. 15Kaywa anưk rineh nan mưca bihu pôkja di anak Pô, ôh mưnhum alag nho hai kaya mưnhum hu boh tapei, thong mưca bihu bak lamak Pô Nưbi Ginrơh mưng tuk dok dalam tian amek. 16Mưca anưk rineh nan ba ralô urang I-sra-ên gilaic vơk mưthong Pô nạn Pô Lingik khol nhu; 17mưca anưk nan mưk ritdhi thong gon xagta anưd Ê-li nao dahlau di Pô, piêh ba tian amư gilaic mai thong anưk bik, ba urang ôh pang tui tal gruk jag karag di mưnuix kahanôt, thong piêh thrap gap tha paran thudia ka Pô.” 18Xa-ca-ri pathau thong umat: “Ngak habar dahlak thau bruk ni mưca mưjiơng tabiak? Kaywa dahlak krung hu taha bloh, hadiup dahlak krung hu prong thun pajơ.” 19Umat thuuk: “Ita nạn Gap-ri-ên bhian dok di anak Pô Lingik. Ita bihu pachai mai đôm thong hư thong akhan khao siam ni ka hư. 20Mưni, mưca hư gok kamlo, ôh mưda đôm bihu, ka tal harei dôm kabha nan mưjiơng tabiak, kaywa hư ôh dial panôic ita, nạn mưca panôic bihu thit njaup tanut vagtu.”
21Dalam tuk nan, bôl bhap dok cang Xa-ca-ri; khol nhu plơng kadơng, kaywa ong dok livik dalam huji. 22Tuk tabiak nao, Xa-ca-ri ôh đôm bihu thong bôl bhap yơ khol nhu mưng thau laic ong krung hu ƀôh tha catôi dalam huji. Ong tabiak habang ka khol nhu kaywa jang dok kamlo. 23Tuk dôm harei ragxa krung hu kloh, ong gilaic mai thang.
24Hadei dôm harei nan, hadiup ong nạn Ê-li-xa-ƀet bak tian thong padaup rup dalam limư bilan. Muk đôm laic: 25“Pô krung hu brei karun ka dahlak. Dalam dôm harei ni, Bhô athur alim dahlak thong ramik klāk gruk mưlau mưlit dahlak di krưh abih drei.”
Umat akhan khao Pô Yê-su jrang mưnưk
26Tal bilan ya nam, Pô Lingik pachai umat Gap-ri-ên tal dhan Na-xa-ret nưgar Ga-li-lê, 27#Mat 1:18.gōk tha urang kamei kanưrup krung hu cek xanôi thong tha urang likei angan nạn Yô-sep, gah talei pajeh patao Đa-vit. Kamei kanưrup nạn angan Ma-ri. 28Umat mưrai gōk nai thong đôm: “Hơic mưnuix bihu karun, tadhau ôn ka nai! Pô mưdok mưthong nai!” 29Min Ma-ri biak tarung tarang ka dôm panôic ni thong êng tanhi panôic xalam nan hu ar haget. 30Umat đôm: “Hơic Ma-ri, jôi hôic kaywa nai krung bihu karun di anak Pô Lingik. 31#Mat 1:21.Mưni, mưca nai bak tian, mưnưk tha anưk likei thong patah angan nạn Yê-su. 32Anưk likei nan mưca bihu pôkja, bihu iêu laic Anưk Dê Glong Yatha. Pô nạn Pô Lingik mưca ƀai brei ka Bhô thing mưnga Đa-vit, muk kei Bhô. 33Mưca Bhô pakrang rit rai bangxa Ya-kôp; dit biya Bhô dok kađong miêt miêt.” 34Ma-ri thuuk thong umat: “Dahlak ô ka ƀang đih thong urang likei halei ô yơ ngak habar hu kabha nan?” 35Umat thuuk: “Mưca Pô Nưbi Ginrơh biđang ngok nai thong gon xagta Dê Glong Yatha mưca tulam nai, nan yơ anưk nưbi mưnưk tabiak mưca bihu iêu nạn Anưk Pô Lingik. 36Dêh, Ê-li-xa-ƀet, gaup patian nai, lijang krung hu linhang tha anưk likei dalam tuk taha ramư. Urang nan takrung hu tiêng trak di anưk bloh urak ni krung hu bak tian nam bilan bloh. 37Kaywa ôh hu bruk haget Pô Lingik ôh ngak bihu.” 38Ma-ri thuuk: “Dahlak sani nạn halun kamei Pô. Likau kabha nan mưjiơng tabiak ka dahlak yau panôic ong thurah!” Bloh umat niga truh Ma-ri-a.
Ma-ri ravang Ê-li-xa-ƀet – Panôic Ma-ri pôk mưyom
39Dalam dôm harei nan, Ma-ri bruh tagôk, bhưng bhưng nao gah nưgar cơk, mưrai tha dhan Yu-đê, 40tamư thang Xa-ca-ri thong xalam Ê-li-xa-ƀet. 41Ê-li-xa-ƀet birau hamit xap Ma-ri xalam yơ linhang dalam tian binhêt plong xôt. Ê-li-xa-ƀet bihu bak lamak Pô Nưbi Ginrơh; 42muk prêu tagôk laic: “Nai biak hu phôl dalam kavôm kamei, linhang dalam tian nai lijang bihu phôl. 43Gađi gadha halei dahlak bihu laƀang ƀok ni, nạn amek Pô mưrai ravang dahlak? 44Kaywa tuk tangi dahlak birau hamit xap nai xalam yơ linhang dalam tung dahlak binhêt plong ôn. 45Phôl ka nai krung hu dial, kaywa panôic Pô bican thong nai mưca bihu thit!”
Ma-ri doh pôk mưyom
46Ma-ri đôm:
“Xwan diup dahlak tahamid Pô,
47Mat xwan dahlak bui ôn dalam Pô Lingik nạn Dê Dong Paklah dahlak.
48Kaywa Bhô krung hu athur alim than jhak kanjah halun kamei Bhô.
Mưni, mưng ni tal hadei mưca abih rai mưyom dahlak nạn mưnuix hu phôl;
49Kaywa Dê Xagta Abih krung hu ngak dôm bruk prong ka dahlak.
Angan Bhô nạn likam,
50Thong Bhô athur alim dôm urang hôic taka di Bhô,
Mưng rai ni tapa rai dêh.
51Bhô krung hu angui tangin Bhô ngak dôm bruk gon xagta;
Ngak cah côt dôm ra hu thangka ganan dalam tian.
52Bhô krung hu toh thing mưnga dôm ra pakrang,
Thong pôk vơh dôm urang aneh drei tagôk.
53Bhô krung hu ngak ka mưnuix ơk bihu ralô kaya bingi,
Thong tiaup urang ginup mưda mưrai tangin thoh.
54Bhô krung hu pajup vơh I-sra-ên halun Bhô,
Thong kanal vơk gruk athur alim anưd Bhô,
55Yau krung hu bican thong muk kei khol drei,
Gam Ap-ra-ham thong talei pajeh ong tal rit rai.”
56Ma-ri dok thong Ê-li-xa-ƀet nôic klau bilan, bloh gilaic mai thang drei.
Yâng Bap-tit tabiak di rai
57Kal nan, tal harei mưnưk, Ê-li-xa-ƀet mưnưk tha kei xit likei. 58Hamit khao Pô krung hu sahadah tian athur alim prong pabha thong muk, jek taphia thong gaup patian jang mưrai bui harung thong muk. 59Tal harei ya dalipan, khol nhu mưrai khao tan ka anưk rineh bloh patah angan nạn Xa-ca-ri tui angan amư. 60Min amek đôm laic: “Ôh njaup! Xang patah angan nhu nạn Yâng.” 61Khol nhu đôm: “Dalam gaup patian muk ôh thei hu angan nan.” 62Khol nhu ngak tha habang tanhi amư ưng patah anưk angan haget. 63Xa-ca-ri pađar mưk loh xit thong vak: “Angan nhu nạn Yâng.” Abih drei lijang plơng kadơng. 64Binhêt, pabah ong pơh tabiak, dalah njôl njaic, ong đôm thong pôk mưyom Pô Lingik. 65Abih mưnuix jek taphia jang thur mưk, thong mưnuix urang xin biai thong gaup ka dôm bruk nan graup bhum ƀôn cơk Yu-đê. 66Abih drei hamit jang đom kanal dalam tian, bloh đôm: “Tal harei hadei, anưk rineh ni mưca yau halei?” Kaywa biak tangin Pô krung hu dok mưthong anưk rineh nan.
Xa-ca-ri đôm hôr
67Xa-ca-ri amư ban xit nan, bihu bak lamak Pô Nưbi Ginrơh đôm hôr laic:
68“Tahamid Pô nạn Pô Lingik I-sra-ên,
Kaywa Bhô krung hu ravang thong dong tabuh bôl Bhô,
69Bhô krung hu paƀlong tagôk ka khol drei, dalam talei pajeh Đa-vit, halun Bhô,
Tha Dê Dong Paklah bak gon xagta!
70Yau Bhô krung hu angui pabah dôm pakat hôr nưbi
Bican he mưng kal dahlau,
71Bhô dong khol drei truh dôm ra thutruh,
Thong truh di tangin abih drei mưbai limuk khol drei.
72Bhô sahadah tian athur alim muk kei khol drei,
Thong kanal vơk panôic jan ji likam Bhô,
73Yau panôic Bhô krung hu hapah thong Ap-ra-ham,
Nạn muk kei khol drei,
74Laic tuk khol drei krung bihu dong paklah truh di tangin ra thutruh,
Mưca Bhô brei ka khol drei bihu ragxa Bhô ôh thur mưk di haget,
75Dalam gruk thah nưbi thong kahanôt
Di anak Bhô abih rai drei.
76Hơic anưk rineh, mưca mưnuix urang iêu anưk nạn pakat hôr anưd Dê Glong Yatha;
Mưca anưk nao dahlau di anak Pô dagah jalan ka Bhô,
77Piêh ka bôl Bhô nhơ di gruk ampun glaic
Bloh thau gruk dong paklah.
78Kaywa tian athur alim Pô Lingik khol drei
Bloh tanrak pok bhông mưng ngok glong mưca ravang#1:78 mưca ravang: Dalam tha thanôn blah vak tangin nạn krung hu ravang. khol drei,
79Piêh pachang hadah dôm urang dok di libik xup palup thong dalam binguk gruk mưtai,
Mưthong ba khol drei tamư jalan thug siam.”
80Anưk rineh prong tagôk, rup pabhap cak rôk, mat xwan tati katang, dok dalam bhum kamrang ka tal harei bhat tabiak di anak bôl I-sra-ên.
Actualmente seleccionado:
Lu-ka 1: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.