Dôm Bruk Ngak 9
9
Sau-lơ dial Pô Yê-su
1Kal nan, Sau-lơ kưk gham tam thong pamưtai dôm anưk xêh Pô. Ong mưrai tom gru mưliêng glong yatha, 2likau harak paha xakrưn mưrai dôm thang nhom pak Đa-mac piêh mưyah gōk mưnuix halei bha di Agama Pô Yê-su, ô hakê urang likei kamei, yơ mưk girak ba mai Yê-ru-sa-lem. 3Min tuk Sau-lơ krưh dok nao tal jek dhan Đa-mac, asak hu tanrak hadah mưng lingik tanrak tom dar ong. 4Ong libuh trun di haluk thong hamit xap bican thong drei: “Hơic Sau-lơ, Sau-lơ habar hư phak pabrai Ita?” 5Ong thuuk: “Pô lơy, Pô nạn thei?” Pô bican: “Ita êng nạn Yê-su bloh hư dok phak pabrai. 6Min xang tagôk dang, tamư dalam dhan, mưca mưnuix urang pađar hư abih kabha xang ngak.” 7Dôm urang nao thubik thong ong jang dang vơk plơng kadơng, kaywa khol nhu hamit xap đôm min ôh ƀôh thei trah. 8Sau-lơ mưng di tanưh tagôk dang, mưta dok ƀlak, min ôh ƀôh haget. Mưnuix urang pan tangin ong dui tamư dhan Đa-mac. 9Dalam klau harei, ong ôh ƀôh, ôh ƀang thong lijang ôh mưnhum haget trah.
A-na-nia ngak ƀap-tem ka Sau-lơ
10Kal nan, tak dhan Đa-mac hu tha anưk xêh angan A-na-nia. Bhô bican thong ong dalam catôi laic: “Hơic A-na-nia!” Ong pathau: “Pô lơy, hu dahlak ni.” 11Pô bican: “Xang tagôk dang, nao mưrai thang Yu-đa tak jalan iêu nạn Tapak Lwơng, dwah tha urang angan Sau-lơ palei pak Tat-sơ. Dêh, urang nan dok lang kar, 12thong [dalam catôi]#9:12 [dalam catôi]: Dalam tha thanôn blah vak tangin ôh hu dôm akhar ni. krung hu ƀôh tha urang angan A-na-nia yam tamư cek tangin ngok drei piêh bihu hadah mưta vơk.” 13A-na-nia pathau: “Pô lơy, dahlak hu hamit ralô urang đôm ka urang ni krung hu ngak utan thau hadôm xêh nưbi Bhô tak Yê-ru-sa-lem. 14Urak ni urang nan tak ni, hu kloh gon anưd dôm gru mưliêng prong jao kloh piêh mưk girak abih mưnuix kanư likau di angan Bhô.” 15Min Pô bican: “Nao mek, kaywa Ita krung hu rwah urang ni ngak kaya angui ka Ita piêh ba angan Ita nao ka dôm mưnuix Bôl-Lingiu, dôm patao, thong bôl I-sra-ên; 16Ita mưca gilaic brei ka urang nan thau xang ciup riƀah kaywa di angan Ita tal nưm halei.” 17A-na-nia tabiak nao; ong yam tamư thang bloh cek tangin ngok Sau-lơ bloh đôm: “Hơic xaai Sau-lơ, ngok jalan mưrai sani, Pô nạn Pô Yê-su, krung hu bhat tabiak thong xaai, Bhô pađar dahlak mưrai piêh brei ka xaai bihu hadah mưta vơk thong bihu bak lamak Pô Nưbi Ginrơh.” 18Binhêt hu haget yau kakah mưng mưta Sau-lơ lek trun thong ong bihu hadah mưta; bloh ong dang tagôk thong tôk ƀap-tem. 19Hadei di tuk ƀang mưnhum bloh, ong bihu thulih prưn.
Dôm kadha lang tamưrơp anưd Sau-lơ
20Sau-lơ dok vơk hadôm harei thong dôm anưk xêh tak Đa-mac. Binhêt ong pablo dalam dôm thang nhom laic Pô Yê-su nạn Anưk Pô Lingik. 21Thei pang yau nan jang plơng kadơng, đôm laic: “Sani ôh njaup nạn ra krung hu bhian pamưtai dôm urang kanư likau angan nan tak Yê-ru-sa-lem, bloh lijang mưrai tak ni piêh girak khol nhu ba mưrai ka dôm gru mưliêng prong ô?” 22Min Sau-lơ bik paƀlwak kati katang, jajek thong dôm urang Yo Thaic dok tak Đa-mac, thong paxakrưn laic Pô Yê-su nạn Dê Krist.
23 #
II Kô 11:32,33. Hadei ralô harei, mưnuix Yo Thaic padang anngak pamưtai Sau-lơ. 24Min hu mưnuix brei khao ka Sau-lơ thau anngak khol nhu. Khol nhu khik baƀang dhan luic harei mưlam piêh pamưtai ka bihu Sau-lơ. 25Min tuk mưlam, dôm anưk xêh mưk lii pateng ong trun di lingiu daning dhan.
Sau-lơ tak Yê-ru-sa-lem
26Tuk mưrai Yê-ru-sa-lem, Sau-lơ ưng atadha thong dôm anưk xêh, min abih jang hôic, ôh dial ong nạn anưk xêh biak. 27Ƀa-na-ƀa pajup ba ong mưrai tom dôm Xêh Pachai, lak ka khol nhu thau bruk Pô krung hu bhat tabiak bican thong ong ngok jalan yau halei, thong ong krung hu khin hatai rao lang angan Pô Yê-su tak dhan Đa-mac yau halei. 28Mưng nan, Sau-lơ tamư tabiak thong anưk xêh tak Yê-ru-sa-lem, 29thong nưmax angan Pô Yê-su bloh rao lang ganap khang hatai. Ong lijang đôm pôic thong jajek thong dôm urang Yo Thaic đôm xap Hi-lap, nan ka khol nhu dwah ganap pamưtai ong. 30Hamit khao nan, dei ai binhêt ba Sau-lơ trun Sê-sa-rê, thong ba ong nao Tat-sơ.
Ê-nê bihu pajru dhit
31Yau nan, Nhom Nưbi dalam abih nưgar Yu-đê, Ga-li-lê thong Sa-ma-ri bihu liêng gruk thug siam, darap, yam nao dalam gruk hôic taka di Pô; nhơ di Pô Nưbi Ginrơh pajup, thanôn mưnuix dial Pô bik harei bik cak rôk.
32Kal nan, Phi-e-rơ nao graup libik, lijang mưrai tom dôm xêh nưbi tak dhan Li-đa gêk. 33Tak nan ong gōk tha urang mưtai arak angan nạn Ê-nê, đih ngok katong krung hu dalipan thun kalah. 34Phi-e-rơ đôm thong xaai laic: “Hơic Ê-nê, Pô Yê-su Krist pajru dhit ka xaai; xang dang tagôk, rami ramik katong mek! Nhu binhêt dang tagôk.” 35Abih bôl pak Li-đa thong Sa-rôn ƀôh yau nan jang gilaic mai mưthong Pô.
Gruk diup vơk anưd Ta-ƀi-tha
36Tak dhan Yôp-bê, hu tha anưk xêh kamei angan Ta-ƀi-tha, dok iêu nạn Đô-ka; muk ngak ralô bruk siam thong bhian dakhah dakhat. 37Dalam dôm harei nan, muk jalơh rwak bloh mưtai. Mưnuix urang mưnei ka atau muk, bloh cek dalam tha kati glong. 38Dôm anưk xêh hamit Phi-e-rơ krưh dok tak Li-đa, jek Yôp-bê, nan ka pađar dwa urang mai rok daa ong: “Likau daa ong mưrai ka drah.” 39Phi-e-rơ tagôk dang nao thong dwa urang. Tuk tal libik, mưnuix urang ba Phi-e-rơ tagôk kati glong. Abih urang kamei bilau jang dang ganak ong bloh hia, thong yêr ka ong iơk hadôm blah ao lingiu thong ao khan pakan bloh Đô-ka krung hu jhik ka khol nhu tuk muk dok diup. 40Phi-e-rơ pađar abih drei tabiak lingiu bloh khôi lang kar. Hadei di nan, ong payơng tapa atau bloh đôm: “Hơic Ta-ƀi-tha, xang bruh tagôk!” Muk ƀlak mưta ƀôh Phi-e-rơ, binhêt dok tagôk. 41Phi-e-rơ yêr tangin vơh muk tagôk, bloh iêu dôm xêh nưbi thong dôm urang kamei bilau mưrai, pato ka khol nhu ƀôh muk dok diup. 42Bruk nan ravak graup Yôp-bê, hajiơng hu ralô urang dial tui Pô. 43Dok Phi-e-rơ dok vơk Yôp-bê ralô harei thong tha urang ragei pajhul kalik angan nạn Si-môn.
Actualmente seleccionado:
Dôm Bruk Ngak 9: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.