Dôm Bruk Ngak 14
14
Phao-lô thong Ƀa-na-ƀa tak I-kô-ni
1Tak I-kô-ni, Phao-lô thong Ƀa-na-ƀa mưthong tamư thang nhom Yo Thaic bloh rao lang, ngak ka biak ralô urang Yo Thaic thong urang Bôl-Lingiu#14:1 ralô urang Yo Thaic... Bôl-Lingiu: Ngan nạn ralô urang Yo Thaic thong urang mưnuix đôm xap Hi-lap. dial Pô Yê-su. 2Min dôm urang Yo Thaic ôh dial yơ pacuh, ngak ka mat ar dôm mưnuix Bôl-Lingiu jhak hatai thong dei ai. 3Yau nan min, dwa Xêh Pachai khin hatai dok vơk tak nan tha tuk vag atah, rao lang ka Pô; Pô angui tangin khol nhu ngak dôm nưm crih thong thunau ginrơh piêh ngak kaxan ka anga karun hanim Bhô. 4Min bôl bhap dalam dhan klah nưh gaup: tha kavôm tui mưnuix Yo Thaic, kavôm dêh tui dwa Xêh Pachai. 5Tuk nan, dôm mưnuix Bôl-Lingiu thong mưnuix Yo Thaic thubik dôm kar pan akok khol nhu anngak coh brah thong glam patau dwa Xêh Pachai. 6Bihu khao nan, dwa Xêh Pachai pleh tapa Lit-trơ thong Đet-ƀơ nạn dôm dhan bha di Li-kao-ni thong nưgar jek taphia, 7bloh rao lang Khao Siam tak nan.
Phao-lô thong Ƀa-na-ƀa tak Lit-trơ
8Tak Lit-trơ hu tha urang gok pran dwa gah takai; nhu joh mưng tuk birau mưnưk, ô ka tuk halei nao bihu. 9Nhu dok pangik pang Phao-lô lang. Phao-lô mong ƀlan ƀlan xaai nan thong ƀôh xaai hu sagar piêh bihu pajru dhit 10birau mưng prong xap: “Xang dang tapak takai tagôk!” Xaai plong tagôk thong yam nao. 11Bôl bhap ƀôh bruk Phao-lô ngak yơ prêu tagôk mưng xap Li-kao-ni: “Dôm yang krung hu mưk thek mưnuix biđang trun mưthong khol drei!” 12Khol nhu iêu Ƀa-na-ƀa nạn yang Yu-bi-tê,#14:12 Yu-bi-tê: Angan tha yang glong yatha anưd mưnuix Hi-lap. Dok iêu nạn Yang Yơt. dok Phao-lô nạn yang Met-ku-rơ#14:12 Met-ku-rơ: Angan tha pakat yang Hi-lap nạn mưnuix rakxa drơh yau tha kaphwari mưng dôm yang. Dok iêu nạn Het-me. kaywa ong nạn mưnuix rao lang hajat. 13Gru mưliêng anưd yang Yu-bi-tê hu huji dok gah lingiu dhan ba limo tano thong ƀul bingu mai anak baƀang, ưng thubik thong bôl bhap limah tha panôja ka dôm Xêh Pachai. 14Min dwa Xêh Pachai Ƀa-na-ƀa thong Phao-lô hamit kabha nan yơ hak ao drei, blāk tamư di krưh tapôr ralô thong đôm prong xap: 15“Dei ai lơy! Habar dei ai gilaic ngak kabha nan? Khol dahlak ciêt nạn mưrôxak, drơh yau dei ai. Khol dahlak lang Khao Siam piêh ka dei ai parah klāk yang ôh lingai dêh bloh gilaic mai thong Pô Lingik bhian diup, nạn Dê krung hu padak padang lingik, tanưh, tathik, thong rim pakar dalam nan. 16Dalam dôm rai rak dahlau, Bhô lôi ka graup paran nao tui jalan ƀāk karei drei. 17Kanê yau nan, Bhô takung ngak kaxan ka êng drei mưng ganap ƀai brei dhar phôl, ngak hajān mưng thôr riga trun, ƀai brei bal mưnik ralô athal jiơng, kaya ƀang dalah dalai, ngak ka tian dei ai mưthik mưdar pakal bui.” 18Kanê krung hu đôm abih panôic, dôm Xêh Pachai lijang xang kan lô mưng ghak drưh bihu bôl bhap ƀai panôja ka dwa ong.
19Kal nan, hu hadôm mưnuix Yo Thaic mưng An-ti-ôt thong I-kô-ni mưrai pacuh bôl bhap. Khol nhu glam patau di Phao-lô; đaka ong krung hu mưtai, birau mưng hwa ong tabiak lingiu dhan. 20Min tuk dôm anưk xêh krưh dok tom nhom tom dar Phao-lô yơ ong bruh tagôk thong nao tamư dhan. Harei hadei, Phao-lô nao mưthong Ƀa-na-ƀa mưrai Đet-ƀơ.
Phao-lô thong Ba-na-ba gilaic mai An-ti-ôt
21Tuk dwa Xêh Pachai krung hu rao pahơh Khao Siam dalam dhan nan thong ngak ka gilaic jiơng anưk xêh ralô urang yơ gilaic mai Lit-trơ, I-kô-ni, thong An-ti-ôt. 22Dwa ong ngak kajap hatai dôm anưk xêh, paxơh khol nhu khik kajap sagar, thong đôm laic: “Khol drei xang tapa ralô kabha raƀah raƀưp mưng tamư bihu Dit Biya Pô Lingik.” 23Hadei di tuk pabak rapajan dôm ginôr taha dalam yāup Nhom Nưbi, dwa Xêh Pachai lang kar, ikak tian ơk thong jao kloh dôm urang nan ka Pô nạn Dê drei padul. 24Dwa Xêh Pachai thrang tapa Pi-si-đi, mưrai Pam-phi-li; 25hadei di tuk krung hu lang anga tak Pet-yê bloh, khol nhu trun At-ta-li. 26Mưng libik nan, dwa ong trun gilai nao An-ti-ôt, libik dahlau di nan khol nhu bihu jao kloh ka karun hanim Pô Lingik piêh ngak gruk hit khol nhu birau pathik.
27Tuk tal libik, Phao-lô thong Ƀa-na-ƀa daa patom Nhom Nưbi, lak vơk abih bruk bloh Pô Lingik krung hu ngak tapa khol nhu, thong bruk Bhô krung hu pơh baƀang sagar ka dôm mưnuix Bôl-Lingiu. 28Dwa ong mưdok vơk tak nan thong dôm anưk xêh tha tuk vag biak livik.
Actualmente seleccionado:
Dôm Bruk Ngak 14: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.