I Kô-rir-tô 14
14
Karun đôm dôm xap pakan thong đôm hôr
1Xang pagui tui jalan tiak anit ranam; xang cong takrư dôm karun bha nưbi ginrơh, dahlau nạn karun đôm hôr. 2Kaywa mưnuix đôm xap pakan ôh đôm thong mưrôxak, min đôm thong Pô Lingik nạn ka ôh thei thau bihu, kaywa urang nan đôm dôm kabha palih kabal dalam Pô Nưbi Ginrơh. 3Dok mưnuix đôm hôr nạn đôm thong mưnuix piêh darap, paxơh thong pajiông. 4Mưnuix đôm xap pakan êng patom dak drei, dok mưnuix đôm hôr darap Nhom Nưbi. 5Dahlak cong ka abih dei ai jang đôm xap pakan, min gilaic bik cong takrư dei ai đôm hôr hơl. Mưnuix đôm hôr yơ glong banrik hơl di mưnuix đôm xap pakan, thalaic hu mưnuix mưlih, piêh Nhom Nưbi bihu darap. 6Pathau dei ai, mưyah dahlak mưrai tom dei ai, đôm mưng dôm xap pakan, thong mưyah panôic đôm dahlak ôh hu gruk pơh catôi halei, ôh hu gruk kalimah halei, ôh hu hôr halei, ôh gruk pato pakai halei yơ hu hanim haget ka dei ai? 7Bahkan abih kaya phling ôh hu xwan, yau pi ngan kanhi, mưyah ôh papar tabiak yava xap karei di gaup ngak habar krưn hu bihu xap pi ngan kanhi? 8Mưyah kadêt brôk xap ôh jalang jalôi yơ mưca thei thrap gap piêh mưthuh kalin? 9Dei ai lijang yau nan rei, mưyah dalah ôh đôm dôm kabha hu mưda dul bihu yơ ngak habar mưnuix urang dul kabha dei ai đôm? Kaywa panôic dei ai đôm ôh lingai. 10Dalam dunya ni hu ralô xap, yāup xap jang hu gimnit ar. 11Yau nan mưyah dahlak ôh thau gimnit ar anưd xap nan ka mưnuix đôm xap nan mưca mong dahlak yau mưnuix diya lingiu, thong dahlak lijang mong khol nhu nạn mưnuix diya lingiu. 12Dei ai lijang yau nan rei, kaywa tathrưg mưhu dôm karun bha nưbi ginrơh, dei ai xang pachang dwah ka bihu dalah dalai karun nan piêh darap Nhom Nưbi.
13Ywa nan ka, mưnuix đôm xap pakan, xang lang kar piêh mưlih bihu xap nan. 14Mưyah dahlak lang kar mưng xap pakan yơ mat xwan dahlak lang kar, min mat ar dahlak ôh tôk bihu athal jiơng haget. 15Ywa nan ka dahlak xang ngak haget? Mưca dahlak lang kar mưng mat xwan, min lijang lang kar mưng mat ar; mưca dahlak doh mưng mat xwan, min lijang doh mưng mat ar. 16Mưyah thoh, tuk xaai pôk mưyom mưng mat xwan yơ ngak habar dôm urang gahêh bhian dok pang hu mưda đôm “A-men” thong panôic đwa karun anưd xaai bihu, mưyah khol nhu ôh thau xaai đôm haget? 17Kanê panôic đwa karun anưd xaai biak siam, min ôh darap ka urang pakan. 18Đwa karun Pô Lingik, dahlak đôm bihu dôm xap pakan ralô hơl abih dei ai. 19Yau nan min, dalam Nhom Nưbi, dahlak dak đôm limư boh panôic mưng mat ar piêh pato pakai mưnuix pakan, hơl di tha pluh ribau boh panôic mưng xap pakan.
20Pathau dei ai, ka gruk dul thau, jôi hajiơng yau rineh xit; min di kabha ag, xang hajiơng yau rineh xit. Ka gruk dul thau, xang hajiơng yau mưnuix prong. 21Dalam hakum jakar hu vak:
“Pô bican: Mưca Ita bican thong bôl ni tapa dôm urang đôm xap pakan,
Thong caƀôi dalah mưnuix diya lingiu; yau nan min, mưca khol nhu ôh ciup pang Ita.”
22Yau nan, dôm xap pakan ôh njaup nạn habang ka mưnuix dial, min brei ka mưnuix ôh dial; min panôic hôr ôh njaup nạn habang ka urang ôh dial, min brei ka urang dial. 23Yau nan, tuk bih Nhom Nưbi nhom gaup vơk thubik, abih jang đôm xap pakan, bloh hu mưnuix gahêh bhian thong mưnuix ôh dial yam tamư yơ khol nhu ôh đôm laic dei ai hanrôi ô? 24Min mưyah abih jang đôm hôr, bloh hu mưnuix ôh dial thong mưnuix gahêh bhian yam tamư yơ mưca khol nhu gok pahalar thong gok jamrah kaywa abih dôm panôic hôr. 25Dôm kabha padaup dađaup dalam tian khol nhu bihu parang tabiak; mưca khol nhu pam rup trun bhuktik Pô Lingik, thong pađang akhan laic:
“Pô Lingik biak dok di krưh dei ai.”
Nôk dak dalam tuk nhom
26Pathau dei ai, xang ngak habar ni? Tuk dei ai nhom vơk, urang yơ hu psal-mos, urang yơ hu panôic pato pakai, urang yơ hu gruk catôi, urang yơ hu xap pakan, urang yơ hu gruk mưlih dôm xap pakan. Xang angak hu abih piêh darap Nhom Nưbi. 27Mưyah hu urang đôm xap pakan, yơ ciêt dwa ngan klau urang nạn ralô pajơ. Yāup urang đôm tui danak, thong xang hu mưnuix mưlih. 28Mưyah ôh hu thei mưlih yơ mưnuix đôm xang gađang, ciêt đôm thong êng drei thong Pô Lingik. 29Lijang ciêt hu dwa ngan klau urang đôm hôr mek, dok dôm urang pakan yơ tabang kabha khol nhu đôm. 30Min mưyah hu thei dok tak nan tôk bihu gruk catôi yơ mưnuix krưh đôm xang gađang. 31Kaywa yāup urang dalam dei ai hu mưda dak rah đôm hôr piêh abih drei jang bihu baic, abih drei lijang bihu paxơh. 32Mat xwan anưd dôm pakat hôr xang halar tui dôm pakat hôr. 33Kaywa Pô Lingik nạn ôh njaup laic Pô Lingik anưd gruk takaplung, min anưd gruk thug siam#14:33 thug siam: Ngan nạn nôk dak..
Yau dalam abih Nhom Nưbi anưd dôm xêh nưbi, 34urang kamei xang khik gađang dalam Nhom Nưbi. Khol nhu ôh bihu idin đôm min xang halar tui yau hakum jakar krung hu pato. 35Mưyah ưng dwah thau kabha haget, khol nhu xang tanhi pathang drei pak thang; kaywa urang kamei đôm krưh Nhom Nưbi nạn kabha đang tachaup ƀok.#14:35 Dalam tha thanôn blah vak tangin, dôm kanen 34-35 bihu cek hadei kanen 40. 36Hu njaup Panôic Pô Lingik tabiak mưng dei ai ngan ciêt mưrai tom karei dei ai min habar?
37Mưyah thei xanưng laic drei nạn hôr, ngan hu dôm karun bha nưbi ginrơh, yơ urang nan hajat thau laic, dôm haget dahlak vak ka dei ai ni, nan panưđar anưd Pô. 38Mưyah thei paong kabha nan yơ jôi angat tal khol nhu.
39Nan yơ, dei ai lơy, xang cong takrư karun đôm hôr, thong jôi kađah kađe bruk đôm dôm xap pakan. 40Min xang ngak abih gruk tha ganap ligeh mưkrư thong nôk dak.
Actualmente seleccionado:
I Kô-rir-tô 14: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.