I Kô-rir-tô 10
10
Kadha baic xagkarai mưng bôl I-sra-ên
1Pathau dei ai, dahlak ôh ưng ka dei ai ôh thau laic abih muk kei khol drei jang krung bihu mưdok ala halong taganum; abih lijang thrang tapa tathik. 2Abih jang bihu ƀap-tem dalam halong taganum thong dalam tathik piêh tui Mô-se; 3Abih ƀang thubik tha kaya ƀang keramat; 4abih lijang mưnhum tha kaya mưnhum keramat; kaywa khol nhu mưnhum tha kaya mưnhum pak tha can patau keramat nao thong khol nhu; can patau nan êng nạn Dê Krist. 5Yau nan min, nôk ralô dalam thanôn khol nhu ôh bui tian Pô Lingik nan ka krung hu gok jalơh mưtai dalam bhum kamrang. 6Abih kabha ni krung hu mưjiơng tabiak yau tha kadha patayơt ka khol drei, piêh khol drei ôh patui hatai dôm hag takrư jhak rumưk yau dôm muk kei drei. 7Lijang jôi xambah hayap yang, yau tha thanôn urang dalam khol nhu, yau panôic krung hu vak:
“Bôl bhap dok vơk ƀang mưnhum,
Bloh dang tagôk tamia plong.”
8Khol drei jôi payar yau tha thanôn urang dalam khol nhu, piêh ciêt tha harei hu dwa pluh klau ribau urang jalơh. 9Lijang jôi long iơk Dê Krist#10:9 Dê Krist: Dalam tha thanôn blah vak tangin nạn Pô. yau tha thanôn urang dalam khol nhu, piêh bloh gok ula thubang. 10Thong lijang jôi thok drak yau tha thanôn urang dalam khol nhu, piêh xang mưtai kaywa umat thubang.
11Abih kabha ni mưjiơng tabiak ka khol nhu yau tha kadha baic, thong bihu vak vơk piêh patayơt khol drei nạn dôm urang dok diup tal luic dôm vagtu. 12Yau nan, thei đaka drei dang, xang khik ô mưca jalơh. 13Dôm long iơk#10:13 long iơk: Ngan nạn palwô ngal. mưrai tom dei ai, ôh hu kabha halei tapa di prưn mưrôxak. Pô Lingik nạn Dê khik panôic, Bhô ôh lôi dei ai gok long iơk tapa di prưn drei ô! Min dalam long iơk, mưca Bhô pơh jalan ka tabiak truh, piêh dei ai hu mưda ciup nôi.
Jaban Pô padhag thong jaban lingiu agama
14Yau nan, pathau dei ai anit ranam, xang pleh atah bruk xambah hayap yang. 15Dahlak đôm thong dei ai yau đôm thong dôm urang jag karag; dei ai xang êng xanưng iơk kabha dahlak đôm. 16#Mat 26:26-28; Mag 14:22-24; Lu 22:19,20.Panhin dhar phôl bloh khol drei đwa karun ôh njaup nạn tamưbha nôk dalam darah Dê Krist ô? Tapei bloh khol drei pek tabiak ôh njaup laic tamưbha nôk dalam rup Dê Krist ô? 17Kaywa ciêt hu tha kleh tapei, thong abih khol drei thubik klah rabha gaup kleh tapei nan, birau mưng khol drei kanê ralô lijang ciêt nạn tha rup pabhap. 18Xang iơk bôl I-sra-ên: Ôh njaup dôm urang ƀang rilo athur limah krung hu tamưbha nôk thong jaban nan ô? 19Dahlak đôm yau nan hu gimnit haget? Kaya limah hayap yang hu lingai haget, ngan êng hayap yang hu tabiak haget lei thoh? 20Ôh tabiak haget trah! Dôm haget bloh dôm mưnuix ôh dial Pô ƀai limah nạn ƀai limah ka dôm ajin, mih ôh njaup ƀai tagôk ka Pô Lingik. Yau nan, dahlak ôh ưng ka dei ai tamưbha thong dôm ajin. 21Dei ai ôh mưda mưnhum panhin Pô bloh thong lijang mưnhum panhin dôm ajin. Dei ai ôh mưda tamưbha đam payak anưd Pô thong lijang tamưbha đam payak dôm ajin. 22Ngan khol drei ưng ngak ka Pô xang mưrau mưdau? Khol drei khang hơl di Bhô habar?
Than pajan pajup urang kre
23 #
I Kô 6:12. “Abih gruk jang bihu idin ngak,” min ôh njaup abih gruk jang hu hanim. “Abih gruk jang bihu idin ngak” min ôh njaup abih gruk jang patom dak. 24Jôi thei dwah hanim karei ka drei, min xang dwah hanim ka urang pakan. 25Dôm haget pablei pak klơng rilo nạn dei ai kưk ƀang, jôi kaywa di tung hatai bloh tanhi haget; 26kaywa “boh tanưh thong rim pakar dalam nan jang bha di Pô.” 27Mưyah hu mưnuix ôh dial Pô Yê-su daa dei ai, thong dei ai ưng nao yơ kưk ƀang abih haget khol nhu thai tabiak, jôi kaywa di tung hatai drei bloh tanhi haget, 28min mưyah hu thei đôm thong dei ai laic: “Kaya ni limah bloh” yơ jôi ƀang, kaywa urang krung hu akhan khao ka dei ai, thong kaywa di tung hatai gêk. 29Dahlak ôh đôm ka tung hatai dei ai, min ka tung hatai urang nan. Kaywa habar gruk salalah dahlak gilaic gok tung hatai ra pakan jamrah. 30Mưyah dahlak đwa karun bloh ƀang yơ habar dahlak gilaic gok xayok ka vār ƀang bloh dahlak krung hu đwa karun? 31Yau nan, dei ai ƀang, mưnhum, ngan ngak pathar pathar bruk haget, xang ngak abih kaywa di xêh mưlang Pô Lingik. 32Jôi ngak karơh jhak ka pathar pathar urang halei, kanê nạn mưnuix Yo Thaic hai mưnuix Bôl-Lingiu hai nạn Nhom Nưbi Pô Lingik. 33Xang drơh yau dahlak, mưrat prưn ngak bui tian abih drei dalam abih bruk, ôh dwah hanim karei ka drei, min ka ralô urang piêh khol nhu mưda bihu dong.
Actualmente seleccionado:
I Kô-rir-tô 10: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.