Logo de YouVersion
Icono de búsqueda

انجیلِ مَرقُس 12

12
مَثَلِ باغِوُونیا شرور
1اوسِه عیسی وا مَثَل‌یا نِئا واشُو وِ قِصَه‌کِردِه وَ گُت: «پیائی مُوئِسُونی غِرَس کِرد وَ دُورِش دیواری کَشی وَ حُوض کُچکِه‌ای سی تِلقَنِه‌نِ اَنگیر سی گِرِتِه‌نِ شِرُو دِش کَن وَ بُرجی سی ناتوری بِنا کِرد. اوسِه مُوئِسُو نِه اِجارَه دَه وِ چَن باغِوُو وَ خُوش رَت وِ سفر وِ مملکتی هَنی. 2دِ مُوسِم چیئِه‌نِ اَنگیر، غُلِمی کِل کِرد وِ تِه باغِوُونیا تا بَرِشِه دِ میوَه مُوئِسُو بَسُونَه. 3وِنُو غُلِمِ نِه گِرتِن، زَن وَ دَسِ پَتی وِرگَردَنِن. 4اوسِه صِحو باغ غُلِمی هَنی کِل کِرد وِ تِه‌شُو، اما باغِوُونیا سَرِشِه اِشکِنان وَ واش وا بیشَرمی رفتار کِردِن. 5دُوارَه غُلِمی هَنی کِل کِرد، اما اونَم کُشتِن. وَ هِه وِ ایی صورت وا باقی چِنُو کِردِن؛ قَری نِه زَن وَ قَری نِه کُشتِن. 6او هَنی یِه نفر هَنی داشت کِه کِل بَکَه وَ او کُرِ عزیزِش بی. آخِرسَر او نِه رائی کِرد وَ وا خُوش گُت: ”قُرپِ کِرِمِه نِئَه میارَن.“ 7اما باغِوُونیا وا یَکتِری گُتِن: ”یَه وارث اَ؛ بیایت او نِه بَکُشیم تا میراتِش بَرَسَه وِ اِیما.“ 8پس او نِه گِرتِن، کُشتِن وَ دِ مُوئِسُو وَنِن وِ دَر. 9ایسِه، صِحُو مُوئِسُو چی می‌کَه؟ او می‌آیَه وَ باغِوُونیا نِه می‌کُشَه، مُوئِسُو نِه مِی‌ئَه وِ کَسُونی هَنی. 10مَر یَه نِه دِ کِتُویا مقدس نَحَنیتَه کِه:
«‌” بَردی کِه معماریا رَد کِردِن،
بَردِ اصلی بِنا بی‌یَه؟
11یَه کارِ خداوند بی‌یَه
وَ دِ چَشِ اِیما بِلاجی اَ“؟
12وِنُو دِ دُمِ یَه بییِن تا عیسی نِه بُونَن دِ گیر، سی یَکِه فَمِسِن کِه ایی مَثَلِه دِبارَه وِنُو گُتَه، اما دِ مردِم زَلَه‌شُو مِی‌رَت؛ پس او نِه وِل کِردِن وَ رَتِن.
سؤال دِبارَه خراج دِئِه
13اوسِه قَری دِ علما فِرقَه فَریسی وَ قَری دِ لادِراریا هیرودیسِ نِه کِل کِردِن وِ تِه عیسی تا او نِه وا قِصَه‌یا خُوش بُونَن وِ‌ دام. 14وِنُو اُومان وِ تِه عیسی وَ گُتِن: «اُستاد، دُونیم پیا ری‌راسی هیسی وَ زَلَه‌ت دِ کَس نِمِی‌رَه، سی یَکِه گولِ ظاهِرِ نِه نِمُوحُوری، بلکِم رَه خدا نِه وِ دُرِسی یای مِئی. یعنی دِئِه‌نِ خراج وِ قیصر جایز اَ یا نَه؟ 15یعنی بایِس خَراج بِئِیمُو یا نَه؟» اما عیسی وِ ریاکاریشُو پِی بُرد وَ گُت: «سی چی مِه نِه اِمتحُو می‌کیت؟ دیناری بیاریت سیم تا وَه نِه بِئینِم.» 16سکه‌ای اُوِردِن. دِشُو پُرسی: «نقش وَ نُومِ کی ها وِ ری ایی سکَه؟» جُئُو دَن: «نقش وُ نُومِ قیصر.» 17عیسی وِشُو گُت: «پس مالِ قیصرِ نِه وِ قیصر بِئیت وَ مالِ خدا نِه وِ خدا.» وِنُو دِ قِصَه‌یا او ماقِشُو بُرد.
سؤال دِبارَه زِنَه‌بی‌یِه‌نِ مُردَه‌یا
18اوسِه علما فِرقَه صَدوقی کِه می‌گُتِن مُردَه‌یا زِنَه نِموئَن، اُومان وِ تِه عیسی وَ سؤالی دِش کِردِن، گُتِن: 19«اُستاد، موسی سی اِیما نیسَن کِه اَر بِرارِ پیائی بَمیرَه وَ آفِرَتِش بچه‌ای نائاشتوئَه، او پیا بایِس او آفِرَتِ نِه نِکا بَکَه تا نسلی سی بِرارِش بَنِیئَه وِجا. 20ایمدال، هفت بِرار بییِن. بِرارِه اولی زِئنِه‌ای حاس، وَ اُجاق کور مُرد. 21بِرارِ دوئِم، او آفِرَتِ نِه نِکا کِرد، اما او هَم اُجاق کور مُرد. بِرارِ سِئِم هَم هِه چِنی. 22هِه وِ ایی ترتیب، دِ هیچ‌ کُوم دِ هفت بِرار بچه‌ای نَمَن وِ جا. آخِرسَر، او آفِرَت هَم مُرد. 23ایمدال، دِ قیامت کِه مُردَه‌یا زِنَه موئَن، او زَ، زِئنَه کُوم دِشُو موئَه، سی یَکِه هَر هفت بِرار او نِه نِکا کِردینی؟»
24عیسی وِشُو گُت: «مَر ایی قِصَه شِما خُوش دَلیل بَر یَه نی کِه شِما چَنی هایت دِ اشتباه، سی یَکِه شِما نَه نیسَنَه‌یا مقدسِ نِه دُونیت وَ نَه قدرتِ خدا نِه؟ 25سی یَکِه هِه کِه مُردَه‌یا زِنَه بان، نَه زَ می‌حان وَ نَه شی می‌کَن؛ بَلکم موئَن چی فرشتَه‌یا آسمُو. 26اما دِبارَه زِنَه‌بی‌یِه‌نِ مُردَه‌یا، مَه دِ مینِ توراتِ موسی نَحَنیتَه کِه دِ حَکاتِکَه بُتَه تَش، چطور خدا وِش گُت: ”مِه هیسِم خدای ابراهیم وَ خدای اسحق وَ خدای یعقوب“؟ 27خدا خدای مُردَه‌یا نی، بَلکم خدای زِنَه‌یا اَ. شِما سَراپا هایت دِ اشتباه!»
گَپتِرین حُکم
28یَکی دِ معلم‌یا تورات اُوما وِ نِزیک وَ گَپ‌وُگُفتِشُو نِه اِشنَفت. هِه کِه دی کِه عیسی جُئُو خوئی وِشُو دَه، دِش پُرسی: «کُوم دِ حُکم‌یا خدا، دِ همَه مهمتِر اَ؟» 29عیسی وِش گُت: «مهمترین حُکم یِنَه‌آ: ”بَشنُو اِ اسرائیل، خداوند خدای اِیما، خداوندِ یکتا اَ. 30خداوند خدای خُوتِه وا تمُومیِ دِل وَ وا تمُومیِ جُو وَ وا تمُومیِ فکر وَ وا تمُومیِ قُوَتِ خُوت دوس داشتو.“ 31دوئِمین حُکم یِنَه‌آ: ”هُمساتِه هِه چی خُوت دوس داشتو.“ گَپتِر دِ ایی دوتا، حُکمی نی.» 32او معلمِکَه تورات وِش گُت: «دُرِس گُتی، اُستاد! وِ راسی کِه خدا یَکی اَ وَ غیرِ او خدائی نی، 33وَ وِ او وا تمُومیِ دِل وَ وا تمُومیِ فهم وَ وا تمُومیِ قُوَتِ خُوت دوس داشتِه، وَ هُمساتِه هِه چی خُوت دوس داشتِه، مهمتِر اَ دِ گِردِ پیشکَش‌یا سوختِنی وَ گِردِ قُرُونی‌یا.» 34هِه کِه عیسی دی کِه عاقِلُونَه جُئُو دَه، وِش گُت: «دِ پاتشائی خدا دیر نیسی.» دِ اوسِه وا دِما دَ هیشکَه جرأت نَکِرد چیئی دِش بَپُرسَه.
مسیح کُرِ کیَه؟
35هِه کِه عیسی دِ مینِ صحنِ معبد تعلیم می‌دَه، پُرسی: «چطور اَ کِه معلم‌یا تورات مُوئَن مسیحِ موعود کُرِ داوود پاتشا اَ؟ 36داوود، خُوش وِ الهامِ روح‌القدس گُتَه:
«‌”خداوند وِ خداوندِ مِه گُت:
«وِ دَسِ راسِ مِه بَنشی
تا اوسِه کِه دُشمِه‌نیاتِه بُونِم وِ زیرِ پات.»“
37اَر داوود خُوش، او نِه خداوند مُوحُونَه، او چطور تُونَه کُرِ داوود با؟» گِردِ جمعیت وا هَوَس وِ حرف‌یا او گوش مِی‌دَن.
هُشتار دِبارَه رهبریا دینی
38پس دِ تعلیمِ خُوش گُت: «دِ معلم‌یا تورات دیری بَکیت کِه دوس دارَن وا قَبا بُلِن رَه رُوئَن وَ مردِم دِ کیچَه وَ بازار وِشُو سِلام بَکَن، 39وَ دِ کنیسَه‌یا بِتَرین جا نِه داشتوئَن وَ دِ جَشت‌یا بَنشینَن دِ جایا بالا مجلس. 40دِ یِه لا حُونَه‌یا آفِرَت‌یا نِه غارت می‌کَن وَ دِ لائی هَنی، سی خودنِمائی، دعاشُو نِه کَش مِی‌ئَن. مکافاتِ یِنُو خیلی سخت‌تِر موئَه.»
پیشکَشِ آفِرَت
41عیسی نِشِسی دِ وَرِ صَنُوقِ بِیت‌المالِ معبد وِ سِیل کِردِه‌نِ مردِمی کِه پیل می‌وَنِن دِ صَنُوقِ پیشکَش. خیلی دِ پیلداریا پیلِ زیادی می‌وَنِن. 42ایمدال آفِرَتِ ژاری اُوما وَ دُو قِرُو، وَن دِ صَنُوق. 43اوسِه عیسی شاگردیاش هِنا کِرد وَ وِشُو گُت: «وِ راسی وِتُو مُوئِم، ایی آفِرَت دِ گِردِ وِنُو کِه پیل وَنِن دِ صَنُوق بیشتِر پیل وَن. 44سی یَکه گِردِ وِنُو دِ زیادی داراییشُو دَن، اما ایی زَ دِ دَستَنگی خُوش، هَر چی کِه داشت دَه، یعنی تمُومیِ روزیشِه.»

Actualmente seleccionado:

انجیلِ مَرقُس 12: NLB

Destacar

Compartir

Copiar

None

¿Quieres tener guardados todos tus destacados en todos tus dispositivos? Regístrate o inicia sesión