Psalms 44
44
1အို ဘုရားရှင်၊ အကျွန်ုပ်တို့၏ဘိုးဘေးတို့သည် သူတို့၏လက်ထက် ရှေးကာလ၌ ကိုယ်တော်ပြုတော်မူခဲ့သည့်အမှုတို့ကို အကျွန်ုပ်တို့အား ပြောပြကြ၍ အကျွန်ုပ်တို့၏ နားဖြင့် ကြားကြရပါ၏။ 2ကိုယ်တော်သည် လူမျိုးခြားတို့အား ကိုယ်တော်၏လက်တော်ဖြင့် နှင်ထုတ်ပြီး ဘိုးဘေးတို့ကို အခြေချစေတော်မူ၏။ လူမျိုးခြားတို့၏ တိုင်းသူပြည်သားတို့အား နှိမ်နင်း၍ ဘိုးဘေးတို့အား ပြန့်ပွားစေတော်မူ၏။ 3အမှန်စင်စစ် ဘိုးဘေးတို့သည် ထိုတိုင်းပြည်အား ဓားလက်နက်ဖြင့် သိမ်းယူခဲ့ကြသည်မဟုတ်ပါ။ သူတို့ အောင်ပွဲကြသည်မှာ သူတို့၏လက်ရုံးကြောင့်လည်း မဟုတ်ပါ။ ကိုယ်တော်၏လက်ယာလက်တော်၊ ကိုယ်တော်၏လက်ရုံးတော်နှင့် ကိုယ်တော်၏မျက်နှာတော်အလင်းကြောင့်သာဖြစ်ပါ၏။ အကြောင်းမူကား ကိုယ်တော်သည် သူတို့အား နှစ်သက်တော်မူ၏။ 4အို ဘုရားရှင်၊ ကိုယ်တော်သည် အကျွန်ုပ်၏ ရှင်ဘုရင်ဖြစ်တော်မူ၏။ ယာကုပ်၏အောင်ပွဲကို စီမံတော်မူပါ။ 5အကျွန်ုပ်တို့သည် အကျွန်ုပ်တို့အား ရန်ဖက်ပြုကြသောသူတို့ကို ကိုယ်တော်အားဖြင့် တွန်းလှန်ကြပါ၏။ အကျွန်ုပ်တို့၏တစ်ဖက်၌ ထကြွနေကြသူတို့ကို ကိုယ်တော်၏ နာမတော်အားဖြင့် နင်းချေကြပါ၏။ 6အကြောင်းမူကား အကျွန်ုပ်သည် အကျွန်ုပ်လေးကို ယုံကြည်ကိုးစားခြင်းမရှိပါ။ အကျွန်ုပ်၏ဓားသည်လည်း အကျွန်ုပ်ကို မကယ်တင်နိုင်ပါ။ 7ကိုယ်တော်သာလျှင် အကျွန်ုပ်တို့အား ရန်သူတို့လက်မှ ကယ်တင်တော်မူ၏။ အကျွန်ုပ်တို့အား မုန်းတီးကြသောသူတို့ကိုလည်း အရှက်ကွဲစေတော်မူ၏။ 8အကျွန်ုပ်တို့သည် ဘုရားရှင်ထံ၌ တစ်နေ့လုံး ဂုဏ်ယူဝင့်ကြွား၍ ကိုယ်တော်၏နာမတော်ကို အစဉ်အမြဲချီးမွမ်းကြပါမည်။ 9သို့သော် ကိုယ်တော်သည် အကျွန်ုပ်တို့ကိုငြင်းပယ်၍ နိမ့်ကျစေတော်မူခဲ့ပြီ။ အကျွန်ုပ်တို့၏စစ်တပ်များနှင့်လည်း အတူတကွ ချီတက်တော်မူခြင်းမရှိတော့ပါ။ 10ကိုယ်တော်သည် အကျွန်ုပ်တို့ကို ရန်သူများထံမှ နောက်ဆုတ်စေတော်မူ၍ အကျွန်ုပ်တို့ကို မုန်းတီးကြသောသူတို့သည် အကျွန်ုပ်တို့အား တိုက်ခိုက်လုယက်ကြပါ၏။ 11ကိုယ်တော်သည် သတ်စားစရာသိုးများကဲ့သို့ အကျွန်ုပ်တို့ကိုလိုက်၍ လူမျိုးခြားတို့၏အလယ်တွင် အကျွန်ုပ်တို့အား တကွဲတပြားဖြစ်စေတော်မူ၏။ 12ကိုယ်တော်သည် မိမိ၏လူမျိုးတော်ကို အဖိုးအနည်းငယ်ဖြင့်ရောင်းချပြီး သူတို့အားရောင်းချခြင်းမှ မည်သည့်အကျိုးအမြတ်မှ ရရှိတော်မမူခဲ့ပါ။ 13ကိုယ်တော်သည် အကျွန်ုပ်တို့အား အကျွန်ုပ်တို့၏အိမ်နီးချင်းများအတွက် ကဲ့ရဲ့ ပြစ်တင်စရာ၊ အကျွန်ုပ်တို့၏ ပတ်လည်၌ရှိသောသူတို့အတွက် အထင်အမြင်သေးစရာနှင့် ပျက်ရယ်ပြုစရာ ဖြစ်စေတော်မူပါ၏။ 14ကိုယ်တော်သည် အကျွန်ုပ်တို့အား တိုင်းနိုင်ငံတို့၏အလယ်တွင် လူအများပြောစရာဖြစ်စေပြီး လူတို့အလယ်တွင် လှောင်ပြောင်ရယ်မောစရာ ဖြစ်စေတော်မူ၏ 15ကဲ့ရဲ့ပြစ်တင်သောသူ၊ စော်ကားပြောဆိုသူများ၏အသံကြောင့်လည်းကောင်း၊ ရန်သူနှင့်လက်တုံ့ပြန်သူရှိနေခြင်းကြောင့်လည်းကောင်း 16အကျွန်ုပ်သည် တစ်နေ့လုံးအသရေပျက်ရပါ၏။ အကျွန်ုပ်၏မျက်နှာသည်လည်း အရှက်ကွဲခြင်းနှင့် ဖုံးလွှမ်းလျက်ရှိပါ၏ 17ဤအရာအားလုံး အကျွန်ုပ်တို့အပေါ်သို့ ကျရောက်ခဲ့သော် အကျွန်ုပ်တိုသည် ကိုယ်တော်ကို မေ့လျော့ခြင်းမရှိခဲ့ပါ။ ကိုယ်တော်၏ ပဋိညာဉ်တော်ကိုလည်း ဖောက်ဖျက်ခြင်းမရှိခဲ့ပါ။ 18အကျွန်ု့၏စိတ်နှလုံးသည် နောက်ပြန်မဆုတ်ခဲ့ပါ။ အကျွန်ုပ်တို့၏ခြေလှမ်းများသည်လည်း ကိုယ်တော်၏လမ်းစဉ်မှ သွေဖည်မသွားခဲ့ပါ။ 19သို့သော် ကိုယ်တော်သည် အကျွန်ုပ်တို့အား ခွေးအတို့နေသောအရပ်တွင်ကြေမွစေ၍ သေခြင်း၏အရိပ်ဖြင့် အကျွန်ုပ်တို့ကို ဖုံးလွှမ်းခဲ့ပါ၏။ 20အကျွန်ုပ်တို့သည် မိမိတို့၏ဘုရားရှင်၏နာမတော်ကို မေ့လျော့ခဲ့လျှင်သော်လည်းကောင်း၊ တိုင်းတစ်ပါးသားတို့၏ ဘုရားများထံသို့ ဆုတောင်းခဲ့ကြလျှင်လည်းကောင်း 21ဘုရားရှင်သည် ထိုအမှုအား မစစ်ဆေးဘဲနေတော်မူမည်လော။ အကြောင်းမူကား ကိုယ်တော်၏စိတ်နှလုံးသည် လျှို့ဝှက်ချက်များကို သိတော်မူ၏။ 22အကျွန်ုပ်တို့သည် ကိုယ်တော်အတွက် တစ်နေ့တာလုံး သေခြင်းနှင့်ရင်ဆိုင်နေကြရပါ၏။ အကျွန်ုပ်တို့သည် သတ်ရန်လျာထားသည့် သိုးများသို့ မှတ်ယူခြင်းခံရပါ၏။ 23အို ဘုရားရှင်၊ နိုးထတော်မူပါ။ အဘယ်ကြောင့် ကျိန်းစက်နေတော်မူပါသနည်း။ ထတော်မူပါလော့။ အကျွန်ုပ်တို့ကို အစဉ်ငြင်းပယ်တော်မမူပါနှင့်။ 24ကိုယ်တော်သည် အဘယ်ကြောင့် မျက်နှာလွှဲတော်မူပါသနည်း။ အကျွန်ုပ်တို့ခံစားနေရသည့် ဖိစီးနှိပ်စက်မှုနှင့် ညဉ်းပန်းမှုကို အဘယ်ကြောင့် မေ့လျော့တော်မူပါသနည်း။ 25အကြောင်းမူကား အကျွန်ုပ်တို့သည် မြေမှုန့်ထဲသို့ လဲကျရပြီး အကျွန်ုပ်တို့၏ ခန္ဓာကိုယ်များသည်လည်း မြေကြီးပေါ်တွင် ပြားဝပ်နေပါ၏။ 26ထတော်မူပါ။ အကျွန်ုပ်တို့ကို ကူညီမစတော်မူပါ။ ကိုယ်တော်၏မေတ္တာကရုဏာတော်ကိုထောက်၍ အကျွန်ုပ်တို့ကို ကယ်တင်တော်မူပါ။
Actualmente seleccionado:
Psalms 44: TPV-RV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.