Psalms 25
25
1အို ဘုရားရှင်၊ အကျွန်ုပ်၏စိတ်နှလုံးသည် ကိုယ်တော်အား မှီဝဲဆည်းကပ်ပါ၏။ 2အကျွန်ုပ်၏ ဘုရားရှင်၊ ကိုယ်တော်ကို အကျွန်ုပ်ယုံကြည်ကိုးစားပါ၏။ အကျွန်ုပ်အား အရှက်မကွဲရပါစေနှင့်။ အကျွန်ုပ်၏ရန်သူတို့သည် အကျွန််ုပအပေါ် အောင်ပွဲမခံကြရပါစေနှင့်။ 3အမှန်စင်စစ် ကိုယ်တော်အားစောင့်မျှော်နေကြသူ အားလုံးတို့သည် အရှက်ကွဲကြရလိမ့်မည်မဟုတ်။ အကြောင်းမဲ့ သစ္စာဖောက်ကြသောသူတို့သည်သာ အရှက်ကွဲကြရလိမ့်မည်။ 4အို ဘုရားရှင်၊ ကိုယ်တော်၏ လမ်းတို့ကို အကျွန်ုပ်အား ပြသတော်မူပါ။ ကိုယ်တော်၏လမ်းစဉ်တို့အား အကျွန်ုပ်အား သင်ကြားပေးတော်မူပါ။ 5ကိုယ်တော်၏ သမ္မာတရားထဲ၌ အကျွန်ုပ်ကို ဦးဆောင်လမ်းပြ၍ အကျွန်ုပ်ကို သင်ကြားပေးတော်မူပါ။ အကြောင်းမူကား ကိုယ်တော်သည် အကျွန်ုပ်အား ကယ်တင်တော်မူသော ဘုရားရှင်ဖြစ်ပါ။ အကျွန်ုပ်သည် ကိုယ်တော်အား တစ်နေ့လုံးစောင့်မျှော်နေပါ၏။ 6အို ဘုရားရှင်၊ ကိုယ်တော်၏ ကြီးမားသောကရုဏာတော်နှင့် ချစ်ခြင်းမေတ္တာကို အောက်မေ့တော်မူပါ။ အကြောင်းမူကား ထိုအရာတို့သည် ရှေးကာလမှစ၍ တည်ခဲ့ကြပါ၏။ 7အကျွန်ုပ် ငယ်ရွယ်စဉ်ကပြုခဲ့သော အပြစ်ဒုစရိုက်များနှင့် အကျွန်ုပ်ကျူးလွန်မိသော အပြစ်ဒုစရိုက်များကို အောက်မေ့တော်မမူပါနှင့်။ ကိုယ်တော်သည် ခိုင်မြဲသော မေတ္တာရှိတော်မူ၍ ကောင်းမြတ်တော်မူသည်နှင့်အညီ အကျွန်ုပ်အား အောက်မေ့သတိရတော်မူပါ။ 8ဘုရားရှင်သည် ကောင်းမြတ်၍ ဖြောင့်မတ်တော်မူသဖြင့် အပြစ်ဒုစရိုက်ပြုသူတို့အား လိုက်လျှောက်သင့်သည့်လမ်းကို ညွှန်ပြတော်မူ၏။ 9စိတ်နှလုံးနှိမ့်ချသူတို့အား လမ်းမှန်သို့ ပို့ဆောင်တော်မူလျက် ကိုယ်တော်၏အလိုတော်ကို သွန်သင်တော်မူပါ၏။ 10ကိုယ်တော်၏ ပဋိညာဉ်တော်နှင့်ပညတ်တော်တို့ကို စောင့်ထိန်းကြသူအပေါင်းတို့အား ကိုယ်တော်သည် မေတ္တာတော်နှင့်လည်းကောင်း၊ သစ္စာတော်နှင့်လည်းကောင်း လမ်းပြပို့ဆောင်တော်မူ၏။ 11အို ဘုရားရှင်၊ အကျွန်ုပ်၏ အပြစ်ဒုစရိုက်များသည် များပြားလှသောကြောင့် ကိုယ်တော်၏ နာမတော်ကိုထော်ရှု၍ ခွင့်လွှတ်တော်မူပါ။ 12ဘုရားရှင်အားကြောက်ရွံ့သောသူတို့သည် မည်သူတို့နည်း။ ကိုယ်တော်သည် ထိုသူတို့ရွေးချယ်ရမည့်လမ်းကို သူတို့အအားသွန်သင်ပြသတော်မူလိမ့်မည်။ 13သူတို့သည် အစဉ်ပင် ကောင်းစားကြလျက် သူတို့၏သားစဉ်မြေးဆက်တို့သည်လည်း ပြည်တော်ကို အမွေဆက်ခံကြရလိမ့်မည်။ 14ဘုရားရှင်သည် မိမိအားကြောက်ရွံသောသူတို့နှင့် ရင်းနှီးကျွမ်းဝင်တော်မူ၏။ မိမိ၏ပဋိညာဉ်တော်ကိုလည်း သူတို့အား သိစေတော်မူ၏။ 15ဘုရားရှင်သည် အကျွန်ုပ်၏ခြေထောက်ကို ပိုက်ကွန်ထဲမှ ထုတ်ပေးတော်မူမည်ဖြစ်၍ အကျွန်ုပ်သည် ကိုယ်တော်ကို အစဉ်မျှော်ကြည့်လျက်ရှိပါ၏။ 16အကျွန်ုပ်သည် တစ်ကိုယ်တည်းဖြစ်လျက် အဖိနှိပ်ခံရသောကြောင့် အကျွန်ုပ်ဘက်သို့လှည့်၍ အကျွန်ုပ်အား သနားတော်မူပါ။ 17အကျွန်ုပ်၏ စိတ်ဒုက္ခများသည် များပြားလာသဖြင့် အကျွန်ုပ်၏ပူပင်သောကထဲမှ အကျွန်ုပ်အား ထုတ်ဆောင်တော်မူပါ။ 18အကျွန်ုပ်ခံစားနေရသော စိတ်ဖိစီးမှုများနှင့် အခက်အခဲပြဿနာများကို ကြည့်ရှု၍ အကျွန်ုပ်ထံတွင်ရှိသော အပြစ်အားလုံးတို့ကို ခွင့်လွှတ်တော်မူပါ။ 19အကျွန်ုပ်၏ရန်သူတို့သည် မည်မျှများပြားသည်ကိုလည်းကောင်း၊ အကျွန်ုပ်အား မည်မျှရက်စက်ကြမ်းကြုတ်သည့်မုန်းတီးမှုဖြင့် မုန်းတီးကြသည်ကိုလည်းကောင်း ကြည့်ရှုတော်မူပါ။ 20အကျွန်ုပ်၏အသက်ကိုစောင့်ရှောက်၍ အကျွန်ုပ်အား ကယ်တင်တော်မူပါ။ အကျွန်ုပ်သည် ကိုယ်တော်ထံတွင် ခိုလှုံသည်ဖြစ်၍ အရှက်မကွဲရရပါစေနှင့် 21အကျွန်ုပ်သည် ကိုယ်တော်ကို စောင့်မျှော်နေသည်ဖြစ်၍ တည်ကြည်ခြင်းနှင့် ဖြောင့်မတ်ခြင်းသည် အကျွန်ုပ်အား ကာကွယ်စောင့်ရှောက်ပါစေ။ 22အို ဘုရားရှင်၊ အစ္စရေးလူမျိုးအား ခပ်သိမ်းသော ဆင်းရဲဒုက္ခထဲမှ ကယ်တင်တော်မူပါ။
Actualmente seleccionado:
Psalms 25: TPV-RV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.