Psalms 19
19
1မိုးကောင်းကင်သည် ဘုရားရှင်၏ ဘုန်းအသရေကို ပေါ်လွင်စေ၍ ကိုယ်တော်၏ လက်တော်ဖြင့်ပြုလုပ်သော အရာတို့ကို ထင်ရှားစွာဖော်ပြသည်။ 2ထိုအကြောင်းအရာတို့သည် တစ်နေ့ပြီးတစ်နေ့ မြွက်ဟပြောဆို၍ တစ်ညပြီးတစ်ည အသိပညာကိုပြသကြ၏။ 3နှုတ်မှမြွက်ဆိုခြင်းလည်းမရှိ၊ ပြောစရာစကားလုံးလည်းမရှိ၊ သူတို့၏အသံကိုလည်း မကြားရ။ 4သို့သော် သူတို့၏အသံသည် ကမ္ဘာမြေတစ်ခွင်လုံးသို့ ပျံ့နှံ့သွား၍ သူတို့၏စကားသည် ကမ္ဘာလောက၏အစွန်းထိတိုင်အောင် ရောက်လေ၏။ ကိုယ်တော်သည် ကောင်းကင်၌ နေအတွက် ဗိမာန်တော်ကို တည်တော်မူသဖြင့် 5နေသည် မိမိအခန်းထဲမှထွက်လာသော သတို့သာကဲ့သို့ဖြစ်ပြီး ပြေးလမ်းတွင် ပြေးတော့မည့် အောင်နိုင်သူကဲ့သို့ ရွှင်မြူးလျက်ရှိ၏။ 6ထိုအရာသည် ကောင်းကင်အစွန်းတစ်ဖက်မှ ထွက်လာ၍ အခြားအစွန်းတစ်ဖက်တိုင်အောင် လှည့်ပတ်သွားသည်။ ထိုအရာ၏ အပူရှိန်မှ ပုန်းရှောင်နိုင်သောအရာဟူ၍ တစ်စုံတစ်မျှမရှိ။ 7ဘုရားရှင်၏ ပညတ်တရားတော်သည် ပြည့်ဝစုံလင်၍ စိတ်ဝိညာဉ်ကို လန်းဆန်းစေ၏။ ဘုရားရှင်၏ သက်သေခံချက်သည် အသိပညာနည်းပါးသူတို့အား ပညာရှိစေ၏။ 8ဘုရားရှင်၏ ဥပဒေသတို့သည် ဖြောင့်မှန်၍ စိတ်နှလုံးကို ဝမ်းမြောက်စေ၏။ ဘုရားရှင်၏ ပညတ်တော်သည် မြင့်မြတ်သန့်ရှင်း၍ မျက်စိအား အလင်းပေး၏။ 9ဘုရားရှင်အား ကြောက်ရွံ့ရိုသေခြင်းသည် စင်ကြယ်သည်ဖြစ်၍ ထာဝစဉ်တည်မြဲလိမ့်မည်။ ဘုရားရှင်၏ စီရင်တော်မူချက်တို့သည် ဖြောင့်မှန်သည်ဖြစ်၍ ကာလအစဉ်အဆက် တရားမျှတပေ၏။ 10ထိုအရာတို့သည် ရွှေထက်မက သန့်စင်သောရွှေများစွာထက်ပင် နှစ်လိုဖွယ်ကောင်းပြီး ပျားရည်ထက်မက ပျားလဘို့မှ ပျားရည်ထက်ပင် ချိုမြိန်၏။ 11ထိုအရာတို့အားဖြင့် ကိုယ်တော်၏အစေအပါးသည် သတိပေးခြင်းကိုခံရပါ၏။ ထိုအရာတို့အား လိုက်နာစောင့်ထိန်းခြင်း၏ အကျိုးသည် ကြီးမားလှပေသည်။ 12သို့သော် မည်သူသည် မိမိ၏အမှားကို သိနားလည်နိုင်ပါသနည်း။ ကျွန်ုပ်၏ ကွယ်ဝှက်နေသောအပြစ်များအား ခွင့်လွှတ်တော်မူပါ။ 13ကိုယ်တော်၏ အစေအပါးအား တမင်ကြံစည်၍ ကျူးလွန်သော အပြစ်များနှင့်လည်း ကင်းလွတ်စေတော်မူပါ။ ထိုအပြစ်များသည် အကျွန်ုပ်အား မအုပ်စိုးပါစေနှင့်။ သို့မှသာ အကျွန်ုပ်သည် အပြစ်ကင်း၍ ကြီးမားသော အပြစ်ကျူးခြင်းမှလည်း ကင်းလွတ်ပါလိမ့်မည်။ 14အကျွန်ုပ်၏ကျောက်ဆောင်၊ အကျွန်ုပ်ကို ရွေးနှုတ်တော်မူသောအရှင်၊ အို ဘုရားရှင်၊ အကျွန်ုပ်၏ နှုတ်ထွက်စကားများနှင့် အကျွန်ုပ်စိတ်နှလုံး၏ အကြံအစည်များသည် ရှေ့တော်၌ နှစ်သက်ဖွယ်ဖြစ်ပါစေ။
Actualmente seleccionado:
Psalms 19: TPV-RV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.