Luke 6
6
1ဂျူးလူမျိုးဒေရဲ့ ဥပုသ်နေ့တရစ်မှာ ကိုယ်တော်ယေရှုန တပည့်တော်ဒေက ဂျုံခင်းတချို့ဂို ဖြတ်သွားခီမှာ တပည့်တော်ဒေက ဂျုံသီးနှံအချို့ဂို ဆွတ်ခူးလိုက်ရယ်။ သူနို့ရဲ့ လတ်ဒေန ဂျုံစေ့ဒေရဲ့ အခွံဒေကို ပွတ်တိုက်ဖယ်ရှားပီး ဂျုံဆံဒေဝို စားကေ့ရယ်။ 2အယ်ပေမဲ့ ဖာရိရှဲတို့က " ဥပုသ်နေ့မှာ မလုပ်ရဘူလို ပဉာဏ်ထားတဲ့ အရာဒေကို မင်တို့ မလုပ်သင့်ဘူလို ပြောခဲ့ရယ် 3ကိုယ်တော်က "ဘုရင်ဒါဝိဒ်က သူ့တပည့်ဒေ ဆာလောင်လာခီမှာ ဟဲ့မျိုးဆိုတာ နန်တို့ ဖတ်ဖူးကေ့ရယ် မဟုတ်လာ 4သူက ဘုရားရဲ့ အီတော်ထဲဂိုဝမ်သွားပီးတော့ ဘုရားဂို လှူထားတဲ့(ပါမု ဒေဂို) ယူစားလိုက်ရယ် အဲမို ပါမုဒေက ပရေဖက် စားခွင့်ဆိုပေမဲ့ သူကယူစားလိုက်ပီးတော့ သူအဖော်ဒေကိုပါ ကျွေးလိုက်တဲ့လို ဖာရိရှဲဂို ပြောခဲရယ် 5အဲနောက် ကိုယ်တော်က " လူ့သားတော်ယေရူက ဥပုသ်နေ့ရဲ့ အရှင်သခင်ဘဲ ဖြစ်ပါရယ်" လို့ပြောပြလိုက်ပြီး စဂါးကို အဆုံးသတ်လိုက်လေရယ်။ 6ဂျူးလူမျိုးဥပုသ်နေ့တစ်နေ့မှာ ကိုယ်တော်ယေရှုက လူဒေဂို ဓမ္မာရုံထဲမှာ တရားဟောသွန်သင်နေခဲ့ရယ် လေဖြတ်နေတဲ့ ညာလတ်တဖတ် ယွတ်ကျားတဦးရှိနေလေရယ်။ 7ဖာရိရှဲအချို့န မောရှေဥပဒေကျမ်းတတ်ပညာရှင်အချို့က အဲလူနာဝို ကိုယ်တော်က ကုသပေးမလား စော့ကေ့နေလေရယ်။ သူနို့က ကိုယ်တော်က အမှားတစုံတခု ပြုလုပ်မီမယ်ဆိုတာဂို စွန်စွဲချက်တင်လိုရိကြော့ စော့ကေ့နေဇာဖြစ်ရယ်။ 8ကိုယ်တောက သူနို့ ဟဲမျိုးတွေးနေတာကို သိထားတော်မူပြီးဖြစ်ရယ်။ အဲကျော့ ဒီလူနာဝို လူတိုင်းဗျင်စေရန် မတ်တပ်ရပ်စေရယ်။ အဲလူလည်း မတ်တပ်ရပ်လိုက်ရယ်။ 9အဲဒီနော့ ကိုယ်တော်က လူပရိတ်သတ်ဒေဝို " ဥပုသ်နေ့မှာ ကွန်းမှုကုသိုဟ်ဒေ လုပ်ရဝို့လား၊ အဲလိုမဟုတ် မကွန်းမှုဒုစရိုက်ဒေ လုပ်ရဝို့လား၊ ကျွန်ုပ်လေဟာ လူတရွတ်ရွတ်ရဲ့ အသက်ကို ကယ်တင်ရဝို့လား၊ အဲလိုမဟုတ် ဖျက်စီးရဝို့လား" လို့မေးလိုက်ရယ်။ 10အဲလိုမေးပြီးနော့ လူအပွန်းဒေဝို လှည့်ကိလိုက်ပြီး အဲလူဝို နန့်ရဲ့လက်ဒေဆန့်ထုတ်လိုက် ဆိုပြီး" မိန့်တော်မူလိုက်လေရယ်။ အဲလိုမိန့်တော်မူပြီးခါ အဲလူရဲ့ လေဖြန်ထားတဲ့လတ်က အကောင်းပကတိ ပြန်ဖြစ်ာသွားလေရယ်။ 11အဲဒိအခါ ဖာရိရှဲဒေန မောရှေကျမ်းတတ်ဒေက "ငါနို့လေက ဒီယေရှုဝို ဟဲ့မျိုးလုပ်ကေမလဲ" လို့အချင်းချင်း အပြင်းအထန် တိုင်ပင်ကေလေရယ်။ 12အဲဒီခီမှာ ကိုယ်တော်က တောင်ပေါ်က ဆုတောင်းရန် ကြွတော်မူခဲ့ပြီး အဲဒီညဉ့်တညဉ့်လုံး အဲနေရာမှာဘဲ ခီကူခဲ့လေရယ်။ 13နော့တနေ့ မိုးလန်းတဲ့ခါ ကိုယ်တော်က တပည့်တော်ဒေကိုခေါ်ရိ စုဝေးပြီး အဲလူဒေထဲက ဆယ့်နှစ်ရွတ်ဝို တမန်တော်ဒေအဖြစ် ရွေးချယ်ခဲ့ရယ်။ 14ရှိမုန်ဝို ပေတရုလို့ ခေါ်တွင်စေရယ်။ ပေတရုရဲ့ ညီ အန္ဒြေ၊ ယာကုပ်၊ ယောဟန်၊ ဖိလိပ္ပုန ဗာသောလမဲ၊ 15မဿဲန သောမ၊ အာလဖဲရဲ့သား ယာကုပ်၊ မျိုးချစ်စိတ်ပြင်းထန်သူ ရှိမုန်၊ 16ယာကုပ်ရဲ့သား ယုဒန နောင်တခီ ကိုယ်တော်ကို သစ္စာဖောက်သူ ယုဒရှကာရုတ်တို့ ဖြစ်လေရယ်။ 17ကိုယ်တော်က သူ့ရဲ့တမန်တော်ဒေနဲ့အတူ အဲဒီတောင်ပေါ်မှ မြေပြန်ဆီနား ဆင်းလာကေလေရယ်။ အဲနေရာမှာ တပည့်ဒေနအတု ယုဒပြည်၊ ယေရုရှလင်။ ဇိဒုန်န တုရုဒေသ ကမ်းပါးတရွှတ်လုံးရှိ ဗြို့တွေမှ များစွာရှိ လူထုပရိသတ်ဂီးကလည်း အဲနေရာဆီ ရောက်ရှိနေကေရယ်။ 18သူနို့ဒေက ကိုယ်တော်ယေရှုရဲ့ ဟောပြောသွန်သင်ချက်ဒေကို နာယူရန်န များစွာသော ရောဂါသည်ဒေကို ကုသပေးစေလိုရိဖြစ်ရယ်။ မကွန်းဆိုးဝါးပူးကပ်ရိ ဒုက္ခရောက်နေသူ အားလုံးလည်း အနာရောဂါ ကင်းငြိမ်းသွားကေလေရယ်။ လူတိုင်းက ကိုယ်တော်ယေရှုဝို တို့ထိဝို့ ကြိုးစားကေရယ်။ 19လူတိုင်းက ကိုယ်တော်ယေရှုဝို ထိတို့ရန် ကြိုးစားကေရယ်။ ဟဲ့မျိုးကျော့ဆို ကိုယ်တော်မှာ အနာရောဂါကင်းငြိမ်းစေနိုင်တဲ့ တန်ခိုးတော်ဒေ ရှိပြီး သူနို့အားလုံးကို ရောဂါပျောက်ကင်းအွန် ကုသပေးနေဇာဖြစ်ရယ်။ 20ကိုယ်တော်က သူ့ရဲ့တပည့်တော်ဒေကို ကေ့ပြီး ဒီလိုမျိုး ပြောလိုက်ရယ်။ " ဖရားရှင်က ဆင်းရဲသူအပွန်းဝို ကွန်းချီးမင်္ဂလာအဖြာဖြာ ပေးသနားတော် မူလိမ့်မယ်။ ဖရား သာသနာတော်က နန့်တို့န သက်ဆိုင်ရယ်။ 21ဖရားရှင်က ဆာလွန်သူအပွန်းဝို ကွန်းချီးမင်္ဂလာအဖြာဖြာ ပေးသနားတော်မူလိမ့်မယ်။ နန့်နို့လည်း အစားအသော့ဒေ ပေါကြွယ်ဝီး ရရှိလာပါလိမ့်မယ်။ ဖရားရှင်က ငိုကြွေးနေသူအပွန်းဒေဝို ရယ်မောစေပြီး ကွန်းချီးမင်္ဂလာဖြာဖြာန ပြည့်ဝလိမ့်မယ်။ 22အခြားလူဒေက နန့်နို့ဝို မုန်းသောခါန လကွန်း၊ ပစ်ပယ်ခံရအခါန လကွန်း၊ နန့်နို့ဝို ကောင်းချီးမင်္ဂလာပေးပါလိမ့်မယ်။ နန့်နို့က နှိစက်ညှဉ်းပန်းခံရပြီး ရိုင်းစိုင်းစွာ ပြောဆိုခံရလည်း ဖရားရှင်က နန့်နို့ဝို ကောင်းချီးမင်္ဂလာပေးပါလိမ့်မယ်။ ဟဲကျော့ဆိုဟာ နန့်နို့က "လူ့သားတော်"ရဲ့ တပည့်တော်ဒေ ဖြစ်ရိကျော့ ဖြစ်ရယ်။ 23ရှေးဒူးခါက နန့်ရဲ့ မိသားစု ဘိုးဘွားဒေလည်း ပညာရှိပရောဖက်ဒေကို အဲဒီနည်းတိုင်းပဲ ပြုမူခဲ့လေရယ်။ အဲကျော့ အဲလိုဖြစ်ပျက်ပါက ဝမ်းမြောက်ဝမ်းသာ ကခုန်ကေပါ။ နန့်နို့က နိဗ္ဗာန်ရွှေဗြို့တော်ထဲမှာ ကီးမြတ်တဲ့ ဆုထူးဝို ပန်ဆင်ကေရလိမ့်မယ်။ 24အပေမယ့် ချမ်းသာသူဒေ ဆင်းရဲသွားပါက ဒုက္ခန ကြုံတွေ့လိမ့်မယ်။ သူနို့က ယခု သတ်သတ်သာသာ ဘဝကို ရရှိထားရိဖြစ်ရယ်။ 25ကွန်းမွန်စွာ စားသော့ နေထိုင်သူဒေက ဆာလောင်မွတ်သိပ်လာခါ ဒုက္ခဆိုပြီး သိလာလိမ့်မယ်။ အခု ရယ်မောပျော်ရွှင်နေသူဒေ ပူဆွေးငိုကြွေးခြင်းနဲ့ ကြုံရအခါ ဒုက္ခလို့ သိရလိမ့်မယ်။ 26လူအပွန်းဒေက နန့်နို့ကွန်းကျွန်းဝို ပြောကေရင် နန့်နို့ ဒုက္ခကြုံတွေ့ရလိမ့်မယ်။ ဟဲကျော့ဆိုဟာ နန့်နို့ က အယွန်ဆွန် ပရောဖက်တို့ရဲ့ သွန်သင်ချက်အတိုင်း ပြောဆိုကျင့်ကြံ နေကေသောကျော့ဖြစ်ရယ်။ 27ငါပြောတာဂို နားထော်နေသူအပွန်းတို့ ရန်သူအပေါ် မေတ္တာထားကေပါ။ မင်းဂို မူးတီးနေသူဒေအပေါ် သူနို့ရဲ့ ကွန်းကျိုးဂိုပြုပေးလိုက်ပါ။ 28သင့်ဂို ကီဆဲနေသူဂိုလဲ ဘုရားရှင်က ကွန်းချီးပေးသနားဝို့ ဆုတွန်းပေးပါ။ သင့်ဂို ရက်စက်တဲ့သူအပွန်းဒေဂိုလဲ ဆုတွန်းပေးလိုက်ပါ 29တစုံရွတ်က သင့် ပါးတဖက်ဝို ရိုက်ကိုလည်း နောက်ပါးတဖက်ဝိုပါ ရိုက်ခိုင်းလိုက်ပါ။ တစုံတရွတ်က သင့်ရဲ့ အပြင်ဝတ်ရုံဂို လာတွန်းရင်လဲ သင့်ရဲ့ထဲကအင်္ကျီကိုပါ ပေးလိုက်ပါ။ 30မင်းဆီမှ လာတောင်းခံသူ အပွန်းဒေဂိုလဲ ပေးကမ်းလိုက်ပါ။ မင်းရဲ့ပစ္စည်းဥစ္စာဒေဂို ယူထားရင်လဲ သူဆီမှပြန်ရိ မတွန်းပါန။ 31မိမိကိုပြုမူဆက်ဆံစေလိုတဲ့တိုင်း သူတပါးဒေပေါ် ပြုမူဆက်ဆံပေးပါ။ 32ကိုယ်ပေါ်မေတ္တာထားသူဂိုဘဲ ချစ်ခင်နေရင် အဲလူဂို ဘုရားရှင်က ဟဲမျိုးချီးမွမ်းနိုင်မလဲ။ ပုထုစဉ်လူသားဒေက ဘာဖြစ်လဲဆိုတော့ အပြစ် ဒုစရုတ်သမာတွေတောင် ကိုယ်ကို မေတ္တာထားသူဝိုသာ ပြန်ရိ မေတ္တာထားနိုင်ကေရယ်။ 33နန့်ဝို သနားကြင်နာသူဝိုပဲ နန်ကသနားကြင်နာနေရင် ဖရားရှင်က နန့်ဝို ဟဲမျိုးကျေနပ်နှစ်သက်မလဲ။ ပုထုစဉ်လူသားဒေဘဲ နန့်ဝို ကြင်နာသနားသူဒေဝို ပြန်ရိ သနားကြင်နာကေလိမ့်မယ်။ 34တကဲ့လိုသာ ပြန်လည်ပေးဆပ်နိုင်သူဂိုဘဲ သင်က ငွေချေးငှားရင် ဘုရားရှင်က သင့်ဂို ဟဲမျိုးနှစ်သက်မလဲ။ အပြစ်ဒုစရုတ်သား အချင်းချင်းဒေဘဲ ပြန်လည်ပေးဆပ်နိုင်မယ့်သူဒေဝို ချီးငှားကေ့ရယ်။ 35အယ်ပေမဲ့ သင်တို့က ရန်သူဒေကိုချစ်ခင်ပါ။ သူတို့ကွန်းကျိုးဆွန်ရွတ်ပါ။ ပြန်လည်ပေးဆပ်ရန် မျှော်လင့်ချက်မထားဘဲ ချီးငှားပါ။ အဲမှသာ ကီးမြတ်တဲ့ အထူးဆုဝို ရရှိကေ့ပီး သင့်တို့က နိဗ္ဗာန်ရွှေမြို့တော်မှာ ဘုရားရှင်ရဲ့ သားသမီးအစစ်မှန်ဖြစ်လာကေပါမယ်။ အရှင်က ကျေးဇူးတရားမသိတတ်ရိ ဆိုးယုတ်တဲ့သူဒေအပေါ် ကီးမြတ်တော်မူပါရယ်။ 36သင့်အပေါ် သင့်ဖခင်က သနားညှာတာလိုမျိုး တခြားလူဒေပေါ်မှာလည်း သနားညှာတာကေ့ပါ။ 37ကိုယ်တော်ယေရှုက မိန့်တော်မူခဲ့တာက "တခြားသူဒေဝို မဝေဖန်ခြင်း မပြုပါန။ အဲမှပဲ ဘုရားရှင်ကလည်း သင့်တို့ဂို မဝေဖန်ခြင်း ပြုမှာမဟုတ်။ သူတပါးဝိုခက်ခဲအွန် မပြုမိစေန၊ အဲမှသာ ဘုရားရှင်ကလည်း သင့်ဂိုခက်ခဲအွန် ပြုလုပ်မယ်မဟုတ်။ အခြားသူဒေဝို ခွက်လွှတ်ပေးရင် ၊ ဘုရားရှင်ကလည်း သင့်ဂိုခွက်လွှတ်ပေးပါလိမ့်မယ်။ 38သင်က အခြားသူဒေဝို ရက်ရောစွာ ပေးကမ်းစွန့်ကြဲရင် သင်တို့ ပေးကမ်းထားတဲ့ ပမာဏထက် ပိုလျှံရိ ဘုရားက ပြန်ပေးလိမ့်မယ်။ အဲအလှူဝို ထုတ်ပိုးပြီး နန့်ရဲ့ရင်ထဲမှာ အပြည့်အဝ သိမ်းဆည်းထားပါ။ သင်တို့ အခြားသူဒေအပေါ် ပြုမူဆက်ဆံတဲ့အတိုင်း ဘုရားကလည်း သင့်အပေါ် ပြုမူဆက်ဆံပါလိမ့်မယ်။လို ကိုယ်တော်က မိန်တော်ခဲ့လေရယ်။ 39အဲဒီနော့ ကိုယ်တော်က အဲသူဒေဝို ပုံပြင်ဥပမာတစ်ခုဂို ဆွန်ရိ ဟောတော်မူရယ်။ မျက်စိကန်းတရွတ်က အခြားမျက်စိကန်းတရွတ်ဝို ဦးဆွန်လမ်းပြနိုင်မလား။ အဲနှရွတ်လုံး ချောက်ထဲဂို ပြုကလာ့(လ်)လိမ့်မယ်။ 40တပည့်က ဆရာထက်ပိုပီး တော်နိုင်ပါမလား၊ အယ်ပေမဲ့ သူနို့ဝို အပြည့်အဝ လေ့ကျင့်ပေးရင် သူနို့က ဆရာလိုဘဲ ဖြစ်လာလိမ့်မယ်။ 41 သင်က သင်ရဲ့မိတ်ဆွေ မျက်လုံးထဲက အမှုန်မွှားလေးဝို ဗြော်တွေ့နိုင်ပီး။ အယ်ပေမဲ့ သင်ရဲ့မျက်စိထဲမှာ သစ်တုန်းဂီးလော့ရှိတဲ့ သတိမထားမနိုင်ဘူး။ 42သင်မျက်လုံးထဲမှာ သစ်တုန်းဂီးလော့ရှိတဲ့အရာဒေဂို မဗြော်ဘဲန ၊ " မိတ်ဆွေ သင်မျက်စိထဲက အမှုန်မွှားလေးဂို ထုပေးမယ်" လို့ ဟဲမျိုးပြောမနူး။ အဲလိုပြောရင် နန်ဟန်ဆွန်နေဇာဖြစ်ရယ်။ နန့်မျက်လုံးထဲက သစ်တုန်းဂီးလော့ရှိတဲ့ဒေဂို သင်အရင် ဖယ်ရှားလိုက်။ အဲမှသာ သင်မိတ်ဆွေရဲ့ မျက်လုံးထဲမှာရှိတဲ့ မှုန်မွှားလေးဂို ဟဲမျိုးထုယူရမယ်နူဂို သိလာလိမ်မယ်။ 43ကွန်းတဲ့သစ်ပန်က မကွန်းတဲ့အသီးဝို မသီးနိုင်ရ။ မကွန်းတဲ့ပန်ကလည်း အသီးကွန်းလေဝို သီးဝိုမှူဝါ့။ 44နန့်နို့က အသီးဝိုကေပြီးရာ အပန်အကျွန်းဝို ပြောနိုင်ရယ်။ နန့်နို့က ဆူးချုံပန်က ရှီးကိုသီး၊ သဖန်းသီး၊ စပျစ်သီးဒေဝို ခူးဆွတ်ဝို့ရာမှူဝါ့။ 45သူတော်ကွန်းဒေက ကွန်းဇာဒေပဲ ပြုလုပ်ကေယ်။ သူ့နို့ဒေလည်း ကွန်းမြတ်တဲ့ စိနှလုံးသား ရှိကေရိ ဖြစ်ရယ်။ လူယုတ်မာဒေက ဆိုးယုတ်တဲ့အမှုဝို ပြုကေခြင်းကလည်း သူ့နို့မှာ ယုတ်ညံ့တဲ့ စိနှလုံးသားရှိရိဖြစ်ရယ်။ နန့်နို့ရဲ့ စဂါးလုံးဒေက နန့်နို့ရဲ့ စိနေစိထားဝို ဖော်ပြလိုက်ဇာဖြစ်ရယ်။ 46နန့်နို့က ကိုယ်တော်ရဲ့စဂါးဝို နားမထွန်ဝဲ ဟဲမျိုးကျော့ ကိုယ်တော်ဝို "အရှင်" လို့ ခေါ်ကေသလဲ။ 47ကိုယ်တော်ဆီလာပြီး နာကြားတဲ့အတိုင်း လိုက်နာသူက 48မြေဝို နစ်အွန်တူးပြီးမှ ကလော့(လ်)လုံး ကလော့(လ်)ခဲဒေန အုမြစ်ခလာ့(လ်)ပြီး အီဆော့သူနတူရယ်။ ရေလွှမ်းမိုးခြင်း၊ မြစ်ရေတိုက်စားခြင်းဒေဖြစ်တဲ့ခါ အဲအီက ကွန်းမွန်စွာ တည်ဆော့ထားတဲ့ကျော့ လှုပ်ခါမှုမေ့ပဲ ကြံ့ကြံ့ခံနိုင်ရယ်။ 49အာပေမယ့် ငါရဲ့တရားတော်ဒေဝို နာကြားပြီး မလိုက်နာသူက ကလော့(လ်)စိုင် ကလော့(လ်)ခဲဒေန အုမြစ်မခလာ့(လ်)ပဲ အီဆော့သူနတူရယ်။ ရေလွှမ်းမိုးခြင်းန ရေတိုက်စားခြင်းဒေဖြစ်ပေါ်လာရင် အဲဒီအီက ချက်ချင်း ပြိုလဲလိမ့်ရမယ်။
Actualmente seleccionado:
Luke 6: ttpv-rv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.