John 5
5
1အဲနော့ ဂျူးလူမျိုးဒွေရဲ့ ပွဲတော်တခုရှေ့ရိတွက် ကိုယ်တော်ယေရှုဟ ဂျေရုဆလင်ဗြို့ဝို ကြွတော်မူလေရယ်။ 2ဂျေရုဆလင်ဗြို့မှာ သိုးဒွေဝမ်ဝို့ ခေါ့ပေါ့နီးမှာ မုဒ်ဆော်၅ဆော်န ဝမ်းရံရားဝို ရေကန်တကန်ရှေ့ပီး အဲမိုရေကန်ဝို ဗေသေသဒဆိုပီးဟေဘရူးဘာသာဂါးန ခေါ်လေရယ်။ 3အဲမိုနေရာမှာ မျစ်စိဗြင်ဘဲဝိုလူဒွေ၊ ခေလက်သန်စွမ်းဘဲဝိုလူဒွေန လေဖြတ်နေဝိုသူဒွေ နေကောဘဲ့ဖြစ်နေဝို လူများကီး လဲလျောနေဂေ့လေရယ်။ အဲမိုလူဒွေဟ ရေလှုပ်ရှားဇာဝို စော့နေဂေ့ရယ်။ 4ဟဲဂျော့ဆိုဝါ ဘုရားရှင်ရဲ့နတ်ဒေဝါဟ ခါတလေရေကန်ထဲဝိုဆင်းပီး ရေဒွေလှုပ်ခတ်အော် လုပ်လေ့ရှိရိတွက်ဖြစ်ရယ်။ အဲမျိုးရေလှုပ်ခတ်ပီးနော့ ရေထဲဝိုရင်ဦးဆုံးဆင်းသူဟ သူ့ဆီမှစွဲကပ်နေဝိုရောဂါဒွေ ပျော့ကမ်းသွားလေရယ်။ 5အဲနေရာမှာ သုံးဆယ့်ရှစ်နှစ်ပတ်လုံး နာမကျန်းဖြစ်နေဝို သူတယော့ဟ လဲလျောပီးနေနေလေရယ်။ 6ကိုယ်တော်ဟ အဲမိုလူ လဲလျောနေဇာဝို ဗြင်ခါမှာ နေမကောဖြစ်နေဇာ ရားဒိုင်းကြာနေပီဆိုဇာဝို သိရိတွက် အဲမိုလူဝို “သင်နေပလန်ကောလိုလော” ဆိုပီး မိတော်မူလေရယ်။ 7နေမကောဖြစ်နေဝိုလူဟ “ဆရာ၊ ရေလှုပ်ရှားလာဝိုခီမှာ ကျော့်ဝို ရေကန်ထဲဝို ကူညီပီးခလပေးဝို့လူမှေ့ရ။ ကျော် ရေကန်ထဲဝို ဆင်းဝို့ကြိုးစားခီမှာ တယော့ယော့ဟ ကျော်ထက် ရင်ဦးဆုံးဆင်းရားဂေ့ပါရယ်” ဆိုပီး ရှော့တံလေရယ်။ 8အဲခါ ကိုယ်တော်ဟ အဲလူဝို “ထလော့၊ သင့်ဖျာဝိုယူပီး လမ်းလျှော့ပါ” ဆိုပီး မိတော်မူရယ်။ 9ချင့်ချင်းဘဲ့ အဲမိုလူဟ နေပလန်ကောသွားပီး သူ့ဖျာဝိုယူပီး လမ်းလျှော့သွားလေရယ်။ အဲမိုဖြစ်ပျစ်ဟ ဥပုသ်နေ့ရစ်မှာ ဖြစ်ပျစ်ဇာဖြစ်ရယ်။ 10အဲမို နေကောသွားဝိုလူဟ သူ့ဖျာဝိုယူပီး သယ်ရားဇာဝို ဂျူးလူမျိုးခေါ်ဆော်ဒွေဟ ဗြင်ခါမှာ “အယ်နေ့ဟ ဥပုသ်နေ့ဖြစ်ရိတွက် သင့်ရဲ့ဖျာဝို သယ်သွားဇာဟ ဘုရားရှင်ရဲ့ ပညတ်တရားတော်န ကိုက်ညီရ” ဆိုပီး ပြောဂေ့လေရယ်။ 11အဲမိုလူဟလဲ “ငါ့ဝို နေကောစေဝိုလူဟ ငါ့ဝို ‘ထလော့၊ သင့်ဖျာဝိုယူပီး လမ်းလျှော့လော့’ ဆိုပီး ပြောတော်မူဂျော့” ဆိုပီး ဖြေလေရယ်။ 12ဂျူးခေါ်ဆော်ဒွေဟလဲ “သင့်ဝို ‘ဖျာဝိုယူပီး လမ်းလျှော့လော့ဆိုပီး’ ပြောထားဝိုလူဟ ဟယ်သူနူး” ဆိုပီး မေးဂေ့လေရယ်။ 13အယ်ဘေမဲ့ နေကောသွားဝိုလူဟ ကိုယ်တော်ယေရှုဟ ဟယ်သူဆိုဇာဝို သိလိုက်ရဟ။ ဟဲဂျော့ဆိုဝါ အဲမိုနေရာမှာ လူများကီးရှေ့နေဂေ့ပီး ကိုယ်တော်ဟလဲ တိတိရားထွက်သွားရိဂျော့ ဖြစ်ရယ်။ 14အဲနော့ ကိုယ်တော်ဟ အဲမိုလူဝို ဗိမာန်တော်မှာ တွီ့ဗြင်ရိတွက် “အခုသင် နေကောလာဇာဝို ဗြင်ပီမုဝလော။ မုဘဲနေဆိုဝါ အဲမိုထက် ပိုပီး ဆိုးဝါးဝိုဘေးဒုက္ခဒွေန တွီ့ကြုံရဘဲ့နေအော် နော့ထပ်ပျစ်ဒုစရိုက်ဒွေ လုပ်နော်ဝေါ့” ဆိုပီး အဲမိုလူဝို မိတော်မူလေရယ်။ 15အဲမိုလူဟလဲ ကိုယ်တော်ယေရှုဆီဟ ထွက်ခွာလာပီး ဂျူးလူမျိုးခေါ်ဆော်ဒွေဆီမှာ သူ့ဝို ရောဂါပျော့ကမ်းအော် လုပ်ပေးလူဟ ကိုယ်တော်ယေရှုဖြစ်ကြော ပြောပြလေရယ်။ 16အဲဂျော့ ဂျူးလူမျိုးခေါ်ဆော်ဒွေဟ ဥပုသ်နေ့မှာ အဲမိုမျိုးကုသပေးရစ်ဝို ကိုယ်တော်ယေရှုဝို စပီး လိုက်နှော့ရှစ် 17အယ်ဘေမဲ့ ကိုယ်တော်ယေရှုဟ “ငါ့ရဲ့အဖဘုရားရှင်ဟ မြဲတမ်း လုပ်လုပ်နေဝိုသူဖြစ်ရိတွက် ငါလဲ လုပ်လုပ်နေဇာဖြစ်ရယ်” ဆိုပီး သူ့နို့ဝို မိတော်မူလေရယ်။ 18အဲမိုမျိုးပြောဆိုလိုက်ဂျော့ ဂျူးလူမျိုးခေါ်ဆော်ဒွေဟ ကိုယ်တော်ဝိုသတ်ဝို့ ပိုပီး ကြိုးစားဂေ့လေရယ်။ ဟဲဖြစ်နူးဆိုဝါ ဥပုသ်နေ့ရဲ့ပညတ်ကျမ်းဝို ချိုးဖော့ရုံမက ဘုရားရှင်ဝို သူ့ဖခမည်းတော်ဆိုရိမိတော်မူပီး သူ့ကိုယ်သူဘုရားရှင်နတန်းတူ ပြုလုပ်ထားရှေ့ဂျော့ဖြစ်ရယ်။ 19အဲဂျော့ ကိုယ်တော်ယေရှုဟလဲ သူ့နို့ဝို “နန်းနို့ဝို ငါမှန်တိုင်းပြောမယ်ဆိုဝါ သားတော်ဟ သူ့ရဲ့ဆန္ဒန ဟဲရာဝိုလဲပြုလုပ်နိုင်ရ။ အဖဘုရားရှင် ပြုလုပ်ဝိုရာဒွေဝိုသာ ဗြင်ပီး ပြုလုပ်ဇာဖြစ်ပီး အဖဘုရားရှင်ပြုလုပ်သမျှဝို သားတော်ပြုလုပ်နေဇာဖြစ်ရယ်။ 20အဖဘုရားဟ သားတော်ဝိုရှစ်မြတ်နိုးရိတွက် သူပြုဇာမှန်သမျှဝို သားတော်ဝိုပြသပီး အဲမိုအံ့ဖွယ်မှု့ထက်ပိုပီး မြင့်မြတ်ဝိုမှုဒွေဝို အဖဘုရားရှင်ရ သားတော်ဝို ပြသလိမယ်ဖြစ်ရယ်။ အဲခါ နန်းနို့အားလုံး ရဒိုင်းအံ့ဩရားဂေ့လိမယ်။ 21အဖဘုရားရှင်ဟ သေရားပီးလူဝို သက်ပလန်ရှင်စေမျိုး သားတော်ဟလဲ သူလိုရှေ့မယ်ဆိုဝါ သူ့နို့ရဲ့သက်ဝို ပလန်ရှင်စေပါရယ်။ 22အဖဘုရားရှင်ဟ ဟယ်သူဝိုမှ ရားစီရင်ဇာလုပ်ဘဲန ရားစီရင်တွက် ခွမ့်အာဏာအာလုံးဝို သားတော်ဝို ပေးအပ်ထားပြီဖြစ်ရယ်။ 23အဲမိုမျိုးဘဲ့ လူပေါဒွေဟ အဖဘုရားဝိုရိုသေမျိုး သားတော်ဝိုလဲရိုသေဂေ့ပီး သားတော်ဝိုရိုသေဘဲဝို သူဒွေဟ သားတော်ဝိုစေလွှတ်တော်မူဝို အဖဘုရားရှင်ဝို ရိုသေဘဲဝိုလူဖြစ်ရယ်။ 24နန်းနို့ဝို မှန်တိုင်းပြောရမယ်ဆိုဝါ လူအားလုံးဂူဟ ငါ့ဂါးဝိုကြားပြီး ငါဆော်ယူလာဝို မြင်ဂလာဒန်းဝို ကြားရရိတွက် ငါ့ဝိုစေလွှတ်လိုက်ဝိုအရှင်ဝို ယုံကြည်ဂေ့ဝိုဟယ်သူမဆို နိစထာဝရသက်ဝို ရရှေ့ဂေ့လိမယ်ဖြစ်ရယ်။ သူ့နို့ဟ ရားစီရင်ဇာခံရဝို့မုဘဲ သေဆုံးခြင်းဟနေကျော်ပီး ထာဝရသက်ရှင်ခြင်းဝို ကူးပလောဂေ့လိမယ်ဖြစ်ရယ်။ 25နန်းနို့ဝို ငါမှန်တိုင်းပြောရမယ်ဆိုဝါ သေပီးဝိုလူဒွေဟ ဘုရားရှင်ရဲ့သားတော်သံဝို ကြားဝိုခီ ကလရော့လိမယ်ဖြစ်ပီး ဘုရားရှင်သားတော်ရဲ့သံဝို ကြားဂေ့ဝိုသူဒွေဟလဲ သက်ရှင်လာလိမယ်ဖြစ်ရယ်။ သက်ရှင်ဂေ့ဝိုခီခါဟလဲ အခု မှန်ဘဲ့ ရော့ရှေ့လာပီဖြစ်ရယ်။ 26ဟဲဂျော့ဆိုဝါ အဖဘုရားရှင်ကိုယ်တော်တိုင် ရာအားလုံးရဲ့သက်ဝို ပိုင်ဆိုင်တော်မူမျိုး သားတော်ဝိုလဲ မူလသက်ဝို ပိုင်ဆိုင်ဝို့တွက် ခွမ့်ပြုတော်မူရားရိတွက်ဂျော့ ဖြစ်ရယ်။ 27အဲမိုနမကဘဲ့ သားတော်ဟ လူသားတော်ဖြစ်ရိတွက်ဂျော့ အဖဘုရားရှင်ဟ လူဒွေဝိုရားစီရင်ပိုင် ခွမ့်အာဏာဝိုလဲ သားတော်ဝို ပေးထားပီးသားဖြစ်ရယ်။ 28နန်းနို့ ငါမိဆိုရစ်ဇာဒွေဝို အံ့ဩဂေ့န။ သန်းခလိုင်းဂူဒွေထဲမှာရှေ့ဝို လူပေါဒွေဟ သားတော်ရဲ့သံဝိုကြားရပီး 29သန်းခလိုင်းထဲဟ ထွက်လာဂေ့မဲ့ခီဝို ရော့ရှေ့လာဂေ့လိမယ်ဖြစ်ရယ်။ ကောဇာဝို ပြုလုပ်ဝိုလူဒွေကလော သေရာမှသက်ပလန်ရှင်လာပီး နိစ္စထာဝရသက်ဝို ရရှေ့လိမယ်ဖြစ်ပီး မကောဇာဝို ပြုလုပ်ဝိုလူဒွေကလော ရားစီရင်ဇာဝို ခံဂေ့ရလိမယ်ဖြစ်ရယ်” ဆိုပီး မိတော်မူလေရယ်။ 30ကိုယ်တော်ယေရှုဟ ထပ်ပီး “ငါ့ရဲ့ဘောဆန္ဒန ဟဲရာဝိုလဲ ပြုလုပ်နိုင်ရ။ ငါကြားဝိုတိုင်းဘဲ့ ငါတရားစီရင်ပြီး ငါ့ဆန္ဒအလျောက်မုဘဲန ငါ့ဝိုစေလွှတ်လိုက်ဝို သူရဲ့လိုတော်တိုင်းဘဲ့ ရားစီရင်ဇာဖြစ်ရိတွက် ငါ့ရဲ့စီရင်ဆုံးဖြစ်ချင့်ဟ မှန်ကန်ပါရယ်။ 31ငါဟ ကိုယ့်ကြောဝို ငါကိုယ်တိုင်ဘဲ့ သက်သေထွက်ဆိုနေမယ်ဆိုဝါ ငါ့ရဲ့သက်သေထွက်ဆိုချင့်ဟ မှန်မှာမုဝ။ 32အယ်ဘေမဲ့ ငါ့ကြောဝို သက်သေထွက်ဆိုပေးဝို့လူ တယော့ဟ ပြောမယ်ဆိုဝါ အဲမိုလူရဲ့ သက်သေထွက်ဆိုချင့်ဒွေဟ မှန်ကန်ရယ်ဆိုဇာ ငါသိရယ်။ 33နန်းနို့ဟ ငါ့ကြောဝိုမေးဝို့တွက် ရေနှစ်မင်္ဂလာဆရာယောဟန် ဆီဝို နန်းနို့ရဲ့လူဒွေဝို စေလွှတ်ပီးမေးမြန်းခိုင်းပီဖြစ်ရယ်။ ယောဟန်ဟလဲ မှန်တရားဝို သက်သေခံရစ်ရယ်။ 34အယ်ဘေမဲ့ ငါ့တွက် သက်သေခံဝို့ လူတယော့ရဲ့ သက်သေထွက်ဆိုချင့်ဝို ငါလက်ခံဇာမုဘဲန နန်းနို့ ကယ်တံဇာခံရဝို့တွက်ဘဲ့ ငါအယ်မျိုး မိတော်မူရစ်ဇာဖြစ်ရယ်။ 35ငါ့ဂျော့ ယောဟန်ရဲ့ဒန်းဂါးဟ ထွန်းလန်းတော့ပနေဝို မီးအီနတူပီး နန်းနို့ဟလဲ သူ့ရဲ့ဒန်းဂါးဒွေဂျော့ ရှစ်သား ပျော်ရွှင်ဂေ့ရယ်။ 36အယ်ဘေမဲ့ ယောဟန်ရဲ့သက်သေထွက်ဆို ချင့်ထက် ကီးမြတ်ဝို သက်သေခံချင့်ဒွေငါ့မှာရှေ့ရယ်။ ဟဲဂျော့ဆိုဝါ အဖဘုရားရှင်ဟ ငါ့ဝိုပေးအပ်ရစ်ဝို အခုငါပြုလုပ်နေဝိုတာဝန်ဒွေဟ အဖဘုရားရှင်ဟ ငါ့ဝို စေလွှတ်တော်မူကြောဝို သက်သေခံပြနေဇာဖြစ်ရယ်။ 37ငါ့ဝိုစေလွှတ်တော်မူဝို အဖဘုရားရှင်ဟ ငါ့ကိုယ်စား သက်သေခံတော်မူရယ်။ သူ့သံဝို နန်းနို့ဟယ်ခါမှ ကြားသိဇာမှေ့ဘဲမျိုး သူ့ရဲ့ပုံသဏ္ဌန်ဝိုလဲ နန်းနို့ဗြော်ဖူးမှာမုဝ။ 38နန်းနို့ဟ ဘုရားရှင်စေလွှတ်လိုက်ဝိုလူဝို ယုံကြည်ဘဲရိတွက်ဂျော့ သူ့ရဲ့နှုကပတ်တော်ဒွေဝိုလဲ နန်းနို့မယုံကြည်ဂေ့ဇာဖြစ်ရယ်။ 39နန်းနို့ဟ ကျမ်းစာဒွေထဲဟနေ နိစထာဝရသက်ဝို ရဂေ့လိမယ်ဆိုရိထံပီး ကျမ်းစာဒွေဝို ဂရုစိုက်လေ့လာဂေ့ပေမဲ့ အဲမိုကျမ်းစာကလော ငါ့ကြောဝို သက်သေခံနေဖြစ်ရယ်။ 40အယ်ဘေမဲ့ နန်းနို့ဟ နိစထာဝရသက်ဝို ရဝို့တွက် ငါ့ဆီဝို လာလိုဂေ့သေးရ။ 41ငါဟ လူဒွေရဲ့ချီးမွမ်းဂုဏ်ပြုဇာဝို ဂရုစိုက်ရ။ 42အယ်ဘေမဲ့ နန်းနို့ဟ ဟဲမျိုးလူမျိုးဒွေဖြစ်ကြောဝို ငါသိရယ်။ နန်းနို့မှာ ဘုရားရှင်ဝို ရှစ်မြတ်နိုးတော်မူဝိုစိနှလုံး မှေ့ဘဲဇာဝိုလဲ ငါသိရယ်။ 43အဖဘုရားရှင်ရဲ့ခွမ့်အာဏာန ငါကြွလာပေမဲ့ နန်းနို့ဟ ငါ့ဝိုလက်ခံဂေ့ရ။ ဇုံတယော့ဟ သူ့ကိုယ်ပိုင်ခွမ့်အာဏာန လာမယ်ဆိုဝါ နန်းနို့ဟ သူ့ဝို လက်ခံဂေ့လိမယ်ဖြစ်ရယ်။ 44ချင်းချင်း ချီးမွမ်းဂုဏ်ပြုဇာဝိုဘဲ့ လိုရှင်နေဂေ့ပီး ဘားတည်းဖြစ်ဝို ဘုရားရှင်ဆီဟလာဝို ချီးမွမ်းဂုဏ်ပြုဇာဝို မလိုရှင်ဘဲဝို နန်းနို့ဟ ငါ့ဝို မယုံကြည်ဇာဖြစ်ရယ်။ 45အဖဘုရားရှင်ရဲ့ရှေ့တော်မှာ နန်းနို့ဝို ငါပြစ်တံမယ်ဆိုပီး ထံဂေ့န။ နန်းနို့ယုံကြည်ခဲ့ဝို မောရှေဟ နန်းနို့ဝိုပြစ်တံဝို့သူဖြစ်ရယ်။ 46မောရှေဟ ငါ့ကြောဝို ရေးသားရစ်ဇာဖြစ်ရိတွက် နန်းနို့ဟ မောရှေဝို မှန်ဘဲ့ယုံကြည်ရယ်ဆိုဝါ ငါ့ဝိုလဲ ယုံကြည်ဂေ့လိမယ် ဖြစ်ရယ်။ 47အယ်ဘေမဲ့ မောရှေရေးရစ်ဝို ကြောရာဒွေဝို နန်းနို့မယုံကြည်ရဆိုဝါ ငါပြောဝိုဂါးဒွေဝိုလဲ နန်းနို့ဟဲမျိုးယုံကြည်ဂေ့မယ်နူး' ဆိုပီး မိတော်မူလေရယ်။
Actualmente seleccionado:
John 5: ttpv-rv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.