Лыдпусъёс 9
9
9-тӥ ЛЮКЕТ
1Египет музъемысь потэмзылэн кыкетӥ арезлэн нырысетӥ толэзяз Сӥнайысен, кыр дуннеысен, Кузё-Инмар Моисейлы тазьы вераз, тазьы шуиз: 2«Израиль пиос Пасхаез тупатэм дыре мед ортчытозы: 3та толэзьлэн дас ньылетӥ нуналаз, ӝытазе, тупатэм дыре, Пасхаез мед ортчытозы. Вань пуктон-косонъёсты, вань сямъёсты-йылолъёсты чакласа-утьыса сое ортчытоно». 4Моисей израиль пиослы вераз, Пасхаез мед ортчытозы шуыса. 5Нырысетӥ толэзьлэн дас ньылетӥ нуналаз ӝытазе Сӥнай луоё кырын Пасхаез ортчытӥзы: кызьы Кузё-Инмар Моисей пыр лэсьтыны косӥз, израиль пиос ваньзэ озьы ик каризы.
6Пӧлазы вал кулэмъёслэн шӧй бордазы йӧтӥськыса саптаськем муртъёс, соос со нуналэ Пасхаез ортчытонэ пыриськыны ӧз быгатэ; со нуналэ соос Моисеен Аарон доры лыктӥзы но 7тазьы шуизы: «Кулэм муртъёслэн шӧйзы борды йӧтӥськыса, ми чылкыттэмесь луимы, нош малы милемыз люкыны кулэ тупатэм дыре Кузё-Инмарлы израиль пиос пӧлын салам-кузьым ваёнлэсь?» 8Соку Моисей соослы шуиз: «Дугдэ ай, мон кылзӥсько, тӥ пумысен мар вералоз Кузё-Инмар».
9Кузё-Инмар Моисейлы тазьы вераз, тазьы шуиз: 10«Израиль пиослы тазьы шу: ”Кин ке но тӥ пӧлысь яке вуоно выжыосты пӧлысь кин ке но, кулэм мурт мугор борды йӧтӥськыса, чылкыттэм луиз ке, яке кузь сюрес вылэ потэме учыраз ке, со но Кузё-Инмарлэсь Пасхазэ ортчытыны кулэ; 11кыкетӥ толэзьлэн дас ньылетӥ нуналаз ӝытазе таӵеос Пасхаез мед ортчытозы, юмал няньёсын, курыт турынъёсын сое мед сиёзы; 12курбон сӥльзэс ӵукнаозьлы медаз кельтэ, лыоссэ медаз пыргытэ; Пасха пумысен кутэм вань пуктон-косонъёсты быдэсъяса, сое мед ортчытозы; 13нош кин чылкыт вал, [кузь] сюрес вылэ потэмын ӧй вал – Пасхаез ӧз ортчыты ке, сыӵе мурт ас калыкез пӧлысь быдтэмын луоз, уго со ас дыраз Кузё-Инмарлы салам-кузьым ӧз вайы, со понна таӵе адями ас вылаз сьӧлык басьтоз. 14Палэнысен лыктэм мурт тӥ дорын улэ ке, со но Кузё-Инмарлэсь Пасхазэ ортчытыны кулэ: Пасхалэн пуктон-косонъёсызъя, солэн сямъёсызъя-йылолъёсызъя сое со ортчытыны кулэ; сьӧрлось лыктэм мурт понна но, та музъемын пырак улӥсь мурт понна но законды одӥг кадь мед луоз”».
15Скинияез пуктон нуналэ сӥзён-косонэн скинияез пилем шобыртӥз, ӝытазеысен кутскыса ӵукнаозь скиния йылын тыл кадь маке адӟиськыса улӥз. 16Ялан тазьы вал: [нуназе] сое пилем шобыртыса возиз, нош уйин – тыллы укшась маке. 17Скиния вылысь пилем ӝутскем бере израиль пиос сюрес вылэ потылӥзы; пилем кытчы дугдӥз, отчы израиль пиос станэнызы дугдылӥзы. 18Кузё-Инмарлэн косэмезъя израиль пиос сюрес вылэ потылӥзы, Кузё-Инмарлэн косэмезъя дугдылӥзы но: скиния йылын пилем кӧня дыр ӵоже сылӥз, сомында ик соос но сылӥзы; 19скиния йылын пилем кема дыр ӵоже улӥз ке, израиль пиос но, Кузё-Инмарлэсь косонзэ быдэсъяса, сюрес вылэ ӧз потылэ; 20куке-соку пилем вакчи дыр ӵоже гинэ скиния йылын возиськылӥз: соку израиль пиос Кузё-Инмарлэн косэмезъя дугдылӥзы но Кузё-Инмарлэн косэмезъя ик сюрес вылэ потылӥзы; 21кытӥ-отӥ пилем ӝытазеысен ӵукнаозь гинэ сылӥз, ӵукна вуэм бере пилем ӝутскылӥз, соку соос но сюрес вылэ вырӟылӥзы; яке нуналбыт, уйбыт пилем сылӥз, нош куке со ӝутскиз, соку таос но сюрес вылэ вырӟылӥзы; 22яке: кык нунал яке быдэс толэзь, яке кӧня ке нунал ӵоже пилем скиния йылын возиське ке, соку израиль пиос но интыязы сылӥзы, сюрес вылэ ӧз потылэ; нош со ӝутске ке, соку таос но сюрес вылэ потыны ӝутскылӥзы; 23Кузё-Инмарлэн косэмезъя дугдылӥзы, Кузё-Инмарлэн косэмезъя сюрес вылэ вырӟылӥзы: ваньзэ Моисей пыр Кузё-Инмарлэн верамезъя, Кузё-Инмарлэн косэмезъя лэсьтӥзы.
Actualmente seleccionado:
Лыдпусъёс 9: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016