Лыдпусъёс 6
6
6-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Израиль пиослы тазьы ялыса шу: пиосмурт яке кышномурт Кузё-Инмар азьын назорей луыны сӥзиськыса кыл сётӥз ке, 3соку со вина, кудӟытӥсь макеосты юонлэсь утиськыны кулэ, виналэсь лэсьтэм уксусэз но, мукет юонъёслэсь лэсьтэм уксусэз но, виноградлэсь лэсьтэм нокыӵе но юонэз юыны кулэ ӧвӧл; виноград мульыосты – ыльёссэ но, куасьтэмъёссэ но – сиыны со кулэ ӧвӧл; 4назорей луыса вань улоно нуналъёсаз со, мар лэсьтэмын виноградлэсь, сое сиыны но, [юыны но] кулэ ӧвӧл – тысьсэ но, выл кузэ но медаз сиы. 5Назорей луыны сӥзиськем нуналъёсаз солэн йырсиез борды бритва медаз йӧтӥськылы; Кузё-Инмар азьын назорей луыны сӥзиськем нуналъёсыз быдэсмытозь, со дун-чылкыт; йырсизэ будэтыны кулэ, ӵышкыны кулэ ӧвӧл. 6Кузё-Инмарлэн назореез луыны сӥзиськем дырысеныз вань нуналъёсыз ӵоже со кулэм муртлэн мугор дораз лыктыны кулэ ӧвӧл: 7Кулэм беразы – атаез борды, анаез, агай-выныз, сузэрез, апаез борды йӧтӥськыса – со ассэ саптаны кулэ ӧвӧл, уго Инмар азьын сӥзиськонэз солэн йыр вылаз улэ; 8назорей луыса вань улон нуналъёсаз со Кузё-Инмар азьын дун-чылкыт. 9Назорей азьын кин ке но шӧдтэк шорысь кулӥз ке, назорей луон йырзэ со саптаз ке, чылкытатӥськон-сузяськон нуналаз – сизьыметӥ нуналэ – со йырзэ ӵышкыны кулэ, 10тямысэтӥ нуналаз со курбонлы кык кыр дыдыкъёсты яке кык пинал гурт дыдыкпиосты священник доры, вӧсяськон скиниялэн ӧс дораз вайыны кулэ; 11одӥгзэ тылобурдозэ священник сьӧлык понна курбон сётоз, нош мукетсэ, тылын сутыса, курбон мед сётоз; озьы священник со адямиез кулэм муртлэн мугор бордаз йӧтӥськыса саптаськемезлэсь сузялоз-чылкытатоз, со нуналэ солэсь йырзэ дун-чылкыт кароз; 12та бере со назорей луыса улонлэсь нуналъёссэ выльысен кутскыны кулэ, Кузё-Инмар азьын сётэм сӥзиськонъёссэ быдэсъяса улыны кулэ, янгыш уж лэсьтэм понна со одӥг аресъем ыжпиез курбонлы вайыны кулэ; азьвыл нуналъёсыз ышизы-быризы, малы ке шуоно солэн назорей луонэз саптаськиз. 13Назорей луонлэн нуналъёсыз йылпумъясько ни ке, назорей луон законъя вӧсяськон скиниялэн пырон дораз сое вайыны кулэ, 14соку со Кузё-Инмарлы тылын сутыса курбон сётыны одӥг аресъем чик шектэм одӥг ыжпи ваёз, сьӧлык понна курбон сётыны одӥг чик шектэм одӥг аресъем мес ыжпи ваёз, тупаса улонлы сӥзем курбон сётыны чик шектэм одӥг така ваёз, 15чабей пызьлэсь пыжем одӥг мушко юмал нянь, вӧйын пыжем няньёс, вӧйын зырам юмал куарняньёс ваёз, соос борды ватсано на салам нянь, кисьтоно курбон-салам вина но. 16Тае священник Кузё-Инмар азе пуктоз но сьӧлык понна курбон сётоз, тылын сутӥськись курбон сётоз; 17мушкое тырем юмал няньёсын ӵош Кузё-Инмарлы тупаса улонлы сӥзем курбон сётыны така ваёз, священник со вӧзы салам нянь, кисьтоно курбон-салам вина сётоз на. 18Назорей вӧсяськон скинияе пырон азьын назорей луонэзлэсь йырсизэ мед ӵышкоз, назорей луонэзлэсь йырсизэ мед басьтоз но, тупаса улонлы сӥзем курбон сётыку, тыллэн пушказ мед сутоз; 19соку священник пӧзьтэм така пельпумез, мушкоысь одӥг юмал нянь, одӥг юмал куарнянь басьтоз, собере назорей луонэзлэсь йырзэ ӵышкем муртлэн кияз таосты поноз; 20священник сое Кузё-Инмар азьын сэзъяса вылэ ӝутоз: сэзъяса вылэ ӝутэм курбонлы сётэм мӧляен пельпум сяна, та святыня но священниклы сётӥське. Та бере назорей вина юыны быгатэ». 21Тани сӥзиськыса кыл сётэм назорей пумысен тупатэм закон, тани солэн назорей луэмез понна Кузё-Инмарлы сётоно курбонэз, со сяна, мар со ас мылкыд каремезъя сётэ на; назорей луонэз пумысен законэн тупатэм курбонъёс сяна, со кыӵе курбон вайыны сӥзиськиз, сое ик со вайыны кулэ.
22Кузё-Инмар Моисейлы тазьы вераз, тазьы шуиз: 23«Ааронлы но солэн пиосызлы тазьы шу: израиль пиосты тазьы бакель каре, тазьы соослы шуэ: 24”Кузё-Инмар тонэ бакель мед кароз, мед утёз тонэ! 25Аслаз югыт-чылкыт ымнырыныз Кузё-Инмар тон шоры мед учкоз, Аслаз гажан-жалянэныз Со тонэ мед утёз! 26Кузё-Инмар тон пала Аслэсьтыз ымнырзэ мед берыктоз но тыныд каньыллык мед сётоз!” 27Озьы израиль пиос вылэ Мынэсьтым нимме ӧтьыса мед ваёзы, соку Мон [Кузё-Инмар] соосты бакель каро».
Actualmente seleccionado:
Лыдпусъёс 6: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016