Лыдпусъёс 13
13
13-тӥ ЛЮКЕТ
1Та бере Асирофысь калык сюрес вылэ вырӟиз но, Фаран луоё кыр дуннее вуыса, отчы дугдӥз. 2Кузё-Инмар Моисейлы тазьы вераз, тазьы шуиз: 3«Израиль пиослы сётоно Ханаан музъемме учкыны-чакланы ас котырысьтыд адямиосты ысты; атайёссылэн выжыысьтызы одӥгзэ адямиез ыстэ, соос ваньзы кивалтӥсьёс пӧлысь мед луозы». 4Кузё-Инмарлэн косэмезъя Моисей соосты Фаран луоё кыр дуннеысен келяз, вань та воргоронъёс израиль пиослэн йыръёссы вал. 5Тани соослэн нимъёссы: Рувим выжыысь – Закхурлэн Саммуа пиез, 6Симеон выжыысь – Хорийлэн Сафат пиез, 7Иуда выжыысь – Иефоннийлэн Халев пиез, 8Иссахар выжыысь – Иосифлэн Игал пиез, 9Ефрем выжыысь – Навинлэн Осия пиез, 10Вениамин выжыысь – Рафулэн Фалтий пиез, 11Завулон выжыысь – Содийлэн Гаддиил пиез, 12Иосиф бордысь потэм Манассия выжыысь – Сусийлэн Гаддий пиез, 13Дан выжыысь – Гемаллийлэн Аммиил пиез, 14Асир выжыысь – Михаиллэн Сефур пиез, 15Неффалим выжыысь – Вофсийлэн Нахбий пиез, 16Гад выжыысь – Махийлэн Геуил пиез. 17Тани та Моисейлэн музъем учкыны-чакланы ыстэм воргоронъёслэн нимъёссы. Моисей Навинлэсь Осия пизэ Иисус шуыса нимаз.
18Моисей соосты [Фаран луоё кыр дуннеысен] Ханаан музъемез учкыны-чакланы ыстӥз но тазьы шуиз: «Мынэлэ со лымшор шаере, отысен гурезь йылэ тубе, 19учке-чаклалэ, кыӵе отын музъем, отын улӥсь калык кужмо-а, ляб-а, калыксы трос-а, ӧжыт-а? 20Соослэн улоно музъемзы кыӵе – ӟеч-а яке начар-а? Кыӵеесь соослэн улоно городъёссы? Балаганъёсын-а яке юнматэм каръёсын-а соос уло? 21Кыӵе отын музъем – удалтӥсь-а, удалтӥсьтэм-а? Писпуосыз вань-а, ӧвӧл-а? Кышкасьтэмесь луэ, со музъемын будэм емышъёсты татчы вае». Та вал виноград кисьман вакытэ. 22Соос мынӥзы но, Сӥн луоё кыр дунне бордысен кутскыса, Емаф вӧзысь Рехов дорозь музъемез учкизы-чаклазы; 23лымшор люкетаз мынӥзы но Енаклэн Ахиман, Сесай, Фалмай пиосызлэн улоно Хеврон городзы дорозь вуизы; Хеврон Египетысь Цоан [городлэсь] сизьым арлы азьвылгес пуктэмын вал; 24Есхол нёжалэ вуыса, отысь [музъемез учкизы-чаклазы но] виноградпудысь одӥг пурызэ вандӥзы, сое, сюры вылэ шедьытыса, кык ӵошен нуизы; гранатпуысь улмоос, смоквапуысь мульыос басьтӥзы; 25израиль пиос отысь виноград пурыез вандыса басьтӥзы бере, та интыез «Есхол#13:25 Есхол – «виноград пуры» шуэм луэ нёжал» шуыса нимазы. 26Татысь музъемез учкемзы-чакламзы бере, ньыльдон нунал ортчыса, соос станэ берытскизы. 27Татчы вуэм беразы соос Моисеен Аарон доры, Фаран луоё кыр дуннее, Кадес нимо интые интыяськем вань израиль калык доры лыктыса, соослы, вань калыклы адӟемзы сярысь ивортӥзы, отысь музъемлэсь емышъёссэ возьматӥзы; 28Моисейлы мадизы, тазьы веразы: «Тынад ыстэм музъемад ми ветлӥмы; отын зэмзэ ик йӧлын чечы бызе, тани солэн емышъёсыз; 29но со музъемын кужмо калык улэ, городъёссы туж бадӟымесь, юнматэмын, енак#13:29 енак – туж ӝужытэсь адямиос пиосты но ми отысь адӟимы; 30амалик калык улэ та музъемлэн лымшор люкетаз, хеттейёс, [евейёс,] иевусейёс, аморрейёс гурезьын уло, нош хананейёс уло зарезь дурын но, Иордан дурын но». 31Халев калыкез Моисей азьын буйгатыны вырыса шуиз: «Ойдолэ, мыныса сое люкетлы басьтоме, сое киултыны быгатомы ук». 32Нош соин ӵош ветлэмъёс шуизы: «Со калыклы пумит мыныны ум быгатӥське, соос асьмелэсь кужмоесьгес ук». 33Израиль пиос пӧлы та учкем-чаклам музъемзы сярысь урод ивор вӧлмытӥзы, шуизы: «Учкыны-чакланы ветлэм музъеммы, со сыӵе – отын улӥсьёсты со сие; отысь адӟем калыкмы ваньзы ӝужыт мугороесь; 34отысь ми туж ӝужытэсь адямиосты, енак пиосты, адӟимы, соос укыр ӝужыт мугоро выжыысь; соосын ӵошатыса, асьмелэн син азямы ми саранчаос кадесь адӟиськимы, соослэн син азязы но ми саранчаос кадесь адӟиськимы».
Actualmente seleccionado:
Лыдпусъёс 13: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016