Лыдпусъёс 12
12
12-тӥ ЛЮКЕТ
1Эфиоп нылэз кышно басьтэмез понна Моисеез Мариамен Аарон пыкылӥзы, уго со эфиоп нылэз аслыз кышно басьтӥз, – 2соос шуизы: «Моисейлы огназлы гинэ шат Кузё-Инмар вералляз? Асьмелы но Со ӧз вералля-а?» Тае Кузё-Инмар кылӥз. 3Нош Моисей дунне вылысь вань адямиослэсь зӥбыт-востэм вал.
4Шӧдтэк шорысь Кузё-Инмар Моисейлы, Ааронлы, Мариамлы вераз: «Вӧсяськон скиния доры тӥ куиньнады ик потэ». Соос куиньназы ик потӥзы. 5Пилем юбо пушкын Кузё-Инмар васькиз но скинияе пырон ӧс доры султӥз, Ааронэн Мариамез ӧтиз, соос кыкназы ик потӥзы. 6Со шуиз: «Кылзэ Мынэсьтым верам кылъёсме: Кузё-Инмарлэн пророкез тӥ дорын вань ке, солы Мон возьматскисько, Асме солы усьтӥсько, уйвӧт пыр соин вераськисько; 7но Моисей ляльчиеным озьы уг лэсьтӥськы, – Мынам быдэс юртам со оскиськымон: 8ваче ымныр сылыса, Мон соин вераськисько, мадёнъёс-мадиськонъёс пыр уг вераськиськы, валамон кылын соин вераськисько, Кузё-Инмарлэсь тусбуйзэ со адӟе, кызьы нош тӥ ӧд кышкалэ Мынэсьтым Моисей ляльчиме пыкылыны?» 9Кузё-Инмарлэн вожпотонэз соос вылэ пурӟиз, Со соос дорысь кошкиз. 10Пилем скиния дорысь кошкиз но, тани, Мариамлэсь вылтырзэ лымыен кадь гижлочер шобыртӥз. Аарон Мариам шоры учкиз но адӟиз: со гижлоен шобырскемын. 11Соку Аарон Моисейлы шуиз: «Кузёе! Тэльмырыса курисько: милемыз та укылтэм вераськеммы, сьӧлыкаммы понна вӧсь эн кары; 12тазьы луыны эрик эн сёты: анаезлэн пушкысьтыз потыкуз ик ини кулэм, ӝыны мугорыз сисьмем вож нуны кадь медаз луы». 13Соку Моисей Кузё-Инмарлы тэльмырыса вазиськиз: «Инмаре, бурмыты сое!» 14Соку Кузё-Инмар Моисейлы шуиз: «Солэн атаез солэн ымныраз сялӟысал ке, сизьым нунал ӵоже возьдаськыса улоно ӧй луысал-а со? Озьыен, сое сизьым нунал ӵоже станлэн сьӧраз ворсаса возёно, нош собере со станэ нош ик мед берытскоз». 15Соку Мариам станлэн сьӧраз ворсэтын сизьым нунал улӥз; Мариам берытскытозь, калык сюрес вылэ ӧз вырӟы.
Actualmente seleccionado:
Лыдпусъёс 12: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016