Потон 39
39
39-тӥ ЛЮКЕТ
1Вӧсяськон интыын служить карон дӥськут чагыр, нап-горд, пеймыт-горд ыжгон шортлэсь куизы, Кузё-Инмарлэсь Моисей пыр верамзэ санэ поныса, Ааронлы но вӧсяськон дӥськут куизы. 2Зарнилэсь, чагыр, нап-горд, пеймыт-горд ыжгон шортлэсь, етӥн шортлэсь ефод куизы; 3зарниез куар кадь векчи карыса дуризы, сӥньыс нюжаослы укшась каризы но чагыр, нап-горд, пеймыт-горд шортъёс, етӥн сӥньысъёс вискы бырттылӥзы, быгатыса пужыос пуктылӥзы. 4Пельпумвыл пуктэтъёс лэсьтӥзы, соосын ефодлэсь кык люкетъёссэ огазе герӟазы. 5Ефод вылэ кускерттон лэсьтӥзы, со но ефод кадь ик зарнилэсь, чагыр, нап-горд, пеймыт-горд ыжгон шортлэсь, етӥн шортлэсь лэсьтэмын вал, кыӵе косон сётӥз Кузё-Инмар Моисей пыр. 6Волятыса оникс изъёсты зарни гопъёсы-гутёосы пуктӥзы, та изъёс вылэ, печать вылэ кадь, Израильлэн пиосызлэсь нимъёссэс гожтӥзы. 7Израильлэсь пиоссэ тодэ ваён понна Кузё-Инмарлэсь Моисей пыр сётэм косонзэ быдэстыса, таосты ефодлэн пельпум вылъёсаз понӥзы.
8Ефодэз кадь ик быгатыса муресазез но лэсьтӥз – зарни сӥньысъёслэсь, чагыр, нап-горд, пеймыт-горд ыжгон шортлэсь, етӥн шортлэсь сое лэсьтӥз; 9со ньыль сэрего вал; муресазез кык полэсо лэсьтӥзы, кузьдалаез вись пасьта, пасьталаез но вись пасьта, со кык полэсо вал. 10Со вылэ ньыль чур дуно изъёс бырттылӥзы; нырысетӥ чуре: рубин, топаз, изумруд; 11кыкетӥ чуре: карбункул, сапфир, алмаз; 12куинетӥ чуре: яхонт, агат, аметист; 13ньылетӥ чуре: хризолит, оникс, яспис; зарни гопъёсы-гутёосы соос пуктылэмын вал. 14Израильлэн кӧня пиосыз, сомында изъёс пуктылэмын – дас кык пиос, дас кык изъёс, – нимлы быдэ из, котькуд из вылэ, печать вылэ кадь, дас кык выжыослэн нимзы гожтэмын. 15Муресазь борды чылкыт зарнилэсь, гозы кадь пуныса, шедьытон жильыос лэсьтӥзы; 16кык зарни гоп-гутё, кык зарни кульчо лэсьтӥзы, кык кульчоосты муресазьлэн мыд-мыд палаз шедьытӥзы. 17Зарни сӥньыслэсь пуныса лэсьтэм кыксэ ик жильыосты муресазьлэн мыд-мыд палаз юнматэм кульчоосы бырттӥзы, 18нош кык жильыослэсь кык пумзэс кык гопъёс-гутёос борды юнматӥзы, соосты ефодлэн азьдорин палтӥз кык пельпумвыл пуктэтъёсыз борды шедьытӥзы. 19Эшшо кык зарни кульчоос лэсьтӥзы но соосты муресазьлэн мукет мыд-мыд палаз, ефодлэн пуш палаз, юнматӥзы; 20эшшо кык зарни кульчоос лэсьтӥзы но ефодлэн кык пельпумвыл пуктэт бордаз ул палтӥз, азьдориназ, ефод кускерттонлэн вылӥяз, бырттэм интызы вӧзы юнматӥзы. 21Муресазьлэсь кульчооссэ ефодлэн кульчоосыз борды чагыр ыжгон шортэн думизы, соин ик ефодлэн кускерттонэзлэн вылӥысьтыз муресазь ӝик-ӝик ефод борды кариськыса улӥз, кызьы Кузё-Инмар Моисей пыр лэсьтыны косӥз. 22Быдэссэ чагыр ыжгон шортлэсь ефод улын нуллон риза выл дӥсь куизы. 23Риза выл дӥсьлэн шораз йыр понон пасез вал, ожгарчиослэн дӥсянзылэн кадь, медаз кесяськы шуыса, котыртӥз басма вурыса понэмын. 24Выл дӥсьлэн улытӥз чагыр, нап-горд, пеймыт-горд ыжгон шортъёслэсь лэсьтэм улмоос ошылэмын; 25чылкыт зарнилэсь чингыли гырлыос лэсьтӥзы но выл дӥсьлэн улытӥз улмоос вискы соосты ошылӥзы: 26чингыли – соин артэ улмо, чингыли – соин артэ улмо, – вӧсяськон выл дӥсьлэн ултӥз котырак тазьы шедьытъямын, кызьы косӥз Кузё-Инмар Моисей пыр.
27Ааронлы но солэн пиосызлы етӥн шортлэсь дэрем куизы, 28етӥн дэралэсь кидар, йыркерттэтъёс, пӧлэстыса етӥн шортлэсь улдэрем вуризы, 29етӥн шортлэсь, чагыр, нап-горд, пеймыт-горд ыжгон шортлэсь пужыё кускерттон куизы, кызьы Кузё-Инмар Моисей пыр косӥз.
30Чылкыт зарнилэсь пластина, святынялэсь диадимзэ, лэсьтӥзы но со вылэ, печать вылэ кадь, таӵе кылъёс гожтӥзы: «Кузё-Инмарлэн Святыняез». 31Со борды сое кидар борды вылтӥз юнматон понна чагыр ыжгон шортлэсь пунэм векчи гозы шедьытӥзы, кызьы Кузё-Инмар Моисей пыр косӥз.
32Тазьы быдэстэмын вал вӧсяськон скинияысь ужъёс; кызьы Кузё-Инмар Моисей пыр косӥз, израиль пиос ваньзэ озьы лэсьтӥзы. 33Моисей доры скинияез, солэсь шобретсэ, вань люкетъёссэ вайизы: каптырнаос, вӧлэм пулъёс, сюрыос, юбоос но соослэсь пыдул кутэтъёссэс но. 34Посэм, горд буям така куослэсь шобрет, лыз куослэсь шобрет, пыран-потан пасез ворсась катанчи вайизы, 35сӥзён-косонэн ковчегез, солэсь сюрыоссэ, шобретсэ вайизы, 36ӝӧк но солэн бордысьтыз вань тӥрлыкъёсты, со вылын возёно курбон няньёс вайизы, 37чылкыт зарнилэсь лэсьтэм югдытон арбери, солэсь лампадаоссэ, со вылэ пуктылоно лампадаос, вань кулэ тӥрлыкъёсты, лампадаосы тырон вӧй вайизы, 38зарниен шобыртэм курбон сётон ӝӧк пуктӥзы, зырӟонлы дасям вӧй, ӵындытыны ческыт зын поттӥсь арбериос, скинияе пырон доры ошоно катанчи вайизы, 39ыргонлэсь лэсьтэм курбон сётон ӝӧк пуктӥзы, со пушкы пононо ыргон решётка, сюрыос, вань кулэ арбериос, мисьтӥськон но солы сылон инты вайизы, 40азбаре ошоно ынъёс, юбоос, пыдул кутэтъёс, азбар ӟезьы азе ошиськись катанчи, гозыос, ыргон майыгъёс, вӧсяськон скинияын служить карыны кулэ луись вань тӥрлыкъёсты вайизы, 41вӧсяськон интыын служить карон дӥськутъёс, Аарон священниклы вӧсяськон дӥськут, солэн пиосызлы служить карон дӥськут вайизы. 42Кызьы Кузё-Инмар Моисей пыр косонъёс сётӥз, озьы ик израиль пиос вань ужъёссэс быдэсъязы. 43Моисей учкиз но адӟиз: Кузё-Инмарлэн вань косэм ужъёсыз быдэстэмын озьы, кызьы Со лэсьтыны косӥз. Моисей соосты бакель кариз.
Actualmente seleccionado:
Потон 39: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016