Потон 38
38
38-тӥ ЛЮКЕТ
1Сӥттимпулэсь тылын сутӥськись курбон сётон ӝӧк лэсьтӥз, кузьдалаез вить гырпум кузьда, пасьталаез вить гырпум кузьда, ньыль сэрего, ӝуждалаез куинь гырпум кузьда. 2Ньыляз ик сэрегаз сюръёс лэсьтӥз, озьы: солэн пушкысьтыз сюръёс мычиськыса улӥзы, сое ыргонэн шобыртӥз. 3Курбон сётон ӝӧк котырын кутӥськись арбериосты лэсьтӥз: горшокъёс, лопаткаос, чашаос, вилкаос, эгыр тыронъёс; вань та арбериосты со ыргонлэсь лэсьтӥз. 4Курбон сётон ӝӧклы ыргонлэсь сеткалы укшась решётка лэсьтӥз, курбон сётон ӝӧклэн дуртӥз, улысен шорозяз сое юнматыса понӥз; 5ыргон решёткалэн ньыль сэрегаз ньыль кульчо юнматӥз отчы сюрыосты донгон понна. 6Сюрыосты сӥттимпулэсь лэсьтӥз но ыргонэн шобыртӥз, 7курбон сётон ӝӧклэн урдэсаз юнматэм кульчоос пушкы сюрыос понӥз курбон ӝӧкез ӝутыса нуллон понна; та ӝӧк пулъёслэсь лэсьтэмын, пушкыз буш вал.
8Ыргонлэсь мисьтӥськон лэсьтӥз, пыдул пуктэтэз но ыргонлэсь лэсьтӥз, синмаськымон чеберъянъёс бордаз лэсьтэмын, вӧсяськон скинияе пырон дорез чебер карыса уло.
9Азбар лэсьтӥз: лымшор палтӥз ошыны етӥн шортлэсь ын куиз – кузьдалаез сю гырпум кузьда. 10Сое кутыса возьыны кызь юбо, юболы быдэ ыргонлэсь пыдул кутэтъёс лэсьтӥз; юбоослэн шедьытъянъёссы но, герӟетъёссы но азвесьлэсь лэсьтэмын. 11Азбарлэн уйпалтӥз но ын ошемын – сю гырпум кузьдалаез; сое кутыса возьыны кызь юбо пуктэмын, юболы быдэ ыргонлэсь лэсьтэм пыдул кутэтъёс лэсьтэмын; юбоослэн шедьытъянъёссы но, герӟетъёссы но азвесьлэсь лэсьтэмын. 12Шундыпуксён палтӥз но витьтон гырпум кузьдаем ын ошемын, сое кутыса возьыны дас юбо, юболы быдэ пыдул кутэтъёс лэсьтэмын; юбоослэн шедьытъянъёссы но, герӟетъёссы но азвесьлэсь лэсьтэмын. 13Азьпалтӥз, шундыӝужан палтӥз но ын ошемын, солэн кузьдалаез витьтон гырпум кузьда. 14Азбаре пырон ӟезьылэн огпалтӥз ынъёс ошемын – дас вить гырпум кузьдалазы, соосты кутыса возьыны куинь юбо пуктэмын, юболы быдэ пыдул кутэт лэсьтэмын; 15азбаре пырон ӟезьылэн мукет палтӥз но ынъёс ошемын – дас вить гырпум кузьдалазы, соосты кутыса возьыны куинь юбо пуктэмын, юболы быдэ пыдул кутэт лэсьтэмын. 16Азбарлэн котыртӥз ошоно ынъёс ваньмыз етӥн шортлэсь куэмын вал, 17нош юбоослэн пыдул кутэтъёссы ыргонлэсь лэсьтэмын; юбоослэн шедьытъянъёссы но, герӟетъёссы но азвесьлэсь лэсьтэмын; вылӥзы азвесен шобыртэмын, азбарысь вань юбоос ог-огенызы азвесь герӟетъёсын герӟамын. 18Азбар ӟезьы азе ошыны пужъятыса чагыр, нап-горд, пеймыт-горд ыжгон шортъёслэсь, етӥн шортлэсь куэмын катанчи, солэн кузьдалаез кызь гырпум, ӝуждалаез вить гырпум, азбарысь ынъёс музэн ик быдэс кузьдалаяз соос возъямын вал. 19Сое кутыса возьыны ньыль юбо пуктэмын, ыргонлэсь лэсьтэм пыдул кутэтэз но ньыль; юбоослэн шедьытъянъёссы азвесьлэсь лэсьтэмын, вылӥзы азвесен шобыртэмын, герӟетъёссы но азвесьлэсь лэсьтэмын. 20Скиниялэн котырысьтыз но, азбарысь но майыгъёс ыргонлэсь лэсьтэмын.
21Тани сӥзён-косонэн скинияез пуктонэ мар но мар кутэмын, та лыдъян-ӵотанэз Моисейлэн косэмезъя левитъёс Ааронлэн Ифамар пиезлэн, священниклэн, учкем-чаклам улсаз лэсьтӥзы. 22Ваньзэ тае Кузё-Инмарлэн Моисей пыр косэмезъя лэсьтӥз Иуда выжыысь Орлэн Урий пиезлэн Веселеил пиез, 23соин ӵош Дан выжыысь Ахисамахлэн Аголиав пиез, лэсьтӥськыны-вӧлӥськыны, куиськыны, чагыр, нап-горд, пеймыт-горд ыжгон шортлэсь, етӥн сӥньысъёслэсь куэм басма вылэ пужыос пуктылыны кибашлы мурт ужаз. 24Вӧсяськон интыез пуктонэ, отысь арбериосты лэсьтонэ кутэмын вал калыклэн салам-кузьым карыса ваем кызь укмыс талантэз но, вӧсяськон скинияысь сӥкльлэн секталаеныз мертаса, сизьым сю куамын сӥкль зарниез. 25Нош азвесез бичазы лыдъям-ӵотам калыклэсь – сю талант но, вӧсяськон скинияысь сӥкльлэн секталаеныз мертаса, сюрс сизьым сю сизьымдон вить сӥкль; 26куать сю куинь сюрс вить сю витьтон лыдъян-ӵотан пыр потэм муртъёслэсь, кызь но солэсь тросгес арлыдоослэсь, котькудӥзлэсь ӝыны сӥкль бичазы, вӧсяськон скинияысь сӥкльлэн секталаеныз мертаса. 27Вӧсяськон интыысь юбоослэсь но катанчиез кутӥсь юбоослэсь пыдул кутэтъёссэс ӵыжатонэ сю талант азвесь уже кутэмын; сю юболы сю талант – котькуд пыдул кутэтлы одӥг талант. 28Сюрс сизьым сю сизьымдон вить азвесь сӥкль мынӥз юбоослы шедьытъянъёс лэсьтыны, юбо йылъёсты шобыртонэ, каптырнаос лэсьтонэ. 29Сизьымдон талант но кык сюрс ньыль сю сӥкль ыргон саламлы-кузьымлы вайизы; 30солэсь со вӧсяськон скинияе пырон дорысь юбоослы пыдул кутэтъёс лэсьтӥз, курбон сётон ӝӧклэсь решётказэ, татысь вань сосудъёсты но ыргонлэсь лэсьтӥз, 31быдэс азбарысь вань юбоослы пыдул кутэтъёс, азбаре пырон ӟезьылэн юбоосызлы пыдул кутэтъёсты, скиниялэсь, азбар котырысь вань майыгъёсты ыргонлэсь лэсьтӥз.
Actualmente seleccionado:
Потон 38: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016