Levitiki 14
14
1N’agambi Yeôva gôre Môsès awulya inè:
2Vôna nte be dwaṉ’ivanga g’ômwanja w’ôma wi re ni nkaṉi ya gelô, gô ntyugu y’ijombunyô sè. E be bagô g’ôzô wi miṉisè. 3Miṉisè yi be kogwa avila g’ôlakô ko yè kèlagèl’ôma wi re ni nkaṉi ya gelô. Jog’ôma wi re ni nkaṉi ya gelô ajingyô avila gô ngalambô yi nkaṉi ya gelô, 4gambèṉè miṉisè e be sômbya gô bongô eza zi re ko jombunya g’ômwanji wè, nyoṉi mbaṉi sa bo na si nkèrè, ikôṉi s’ôkume, kiramwazi ni yisop. 5Ni miṉisè e be sômbya inè, nyoṉi mori yi ga yôṉô gw’evagô z’iwôṉô gw’aṉing’ambya mi nkèrè. 6Gambèṉè e be bonge nyoṉi ya bo, ikôṉi s’ôkume, kiramwazi ni yisop; n’ayè e be pundya sô ni nyoṉi ya bo ta gô ntyiṉa yi nyoṉi y’ajôṉô gw’aṉingw’ambya mi nkèrè. 7N’ayè e be nyènya yô nyongo ôrwageṉô gôr’ôma wi re ko jombunyô avila gô nkaṉi ya gelô. Avila vovo e be myeza inè are pupu, n’ayè e be puruṉe nyoṉi ya bo gô ntyaga.
8Ayè yi jombunyô e be jôvuṉ’ingoy sè, azèngiṉ’itwe sè sôdu ko yè sovuṉa gô mbeṉe; n’ayè be dwaṉa pupu. Avila vovo ayè ko jingiṉa g’ôlakô, ndô e be dwaṉe ntyugu ôrwageṉô gw’igala nyi nagô yè y’ikuku. 9Gô ntyugu y’ôrwageṉô e be sèngiṉ’itwe sè sôdu, ewônjô zè, elèlu zè, iguṉe yè, e be sèngiṉ’itwe sè sôdu, e be jôvuṉ’ingoy sè, ko yè sovuṉ’ôkuṽi wè gô mbeṉe, n’ayè be dwaṉa pupu. 10Gô ntyugu y’eṉanay e be bong’awaṉa w’adombè aṉôm̃e aṽaṉi wi re ntyèmbo fo n’idombè ny’ômpum̃’ôm̃ori nyi re ntyèmbo fo, ni mbèy ntyarô gw’igôm̃i s’efa si farinya mbya gô ntyagô y’inya yi re keziṉô pa n’agali, ni log y’agali. 11Gambèṉè miṉisè y’ijombunya yi be tum̃iny’ôma mè wi jombunyô ni ya mèyoṉo yôdu g’ôzô wi Yeôva, g’ômpômbala wi ñanja y’idataṉa.
12Ni miṉisè e be bong’ôm̃ori avila gw’awaṉa w’adombè, ko yè jira wô gô ntyagô yi jirô g’ômwanja w’ôgara, ta ni log y’agali; e be piṉa yô g’ôzô wi Yeôva. 13E be jôṉ’ômwaṉa w’idombè gô mbôra y’ôrunda yi jôṉô inyam̃a s’intyagô si taṽe mpungu y’ibe na s’intyagô si pezô gô mbôra y’ôrunda, konde gô ntyagô y’ômwanja w’ôgara, yi re ga gô ntyagô y’ôraṽô wi mpungu y’ibe, nyam̃a yi jirô ntyagô y’atweṉi yi miṉisè; yô ne eza z’ôrund’ômpôlômè. 14Gambèṉè miṉisè e be bonge ntyiṉa yi nyam̃a yi jirô ntyagô y’ômwanja w’ôgara; e be fwela yô g’ôm̃ôndô w’ôroy ôṉôm̃yè w’ôma wi jombunyô, g’ôm̃eṉô ômpôlô w’ôgo wè ôṉôm̃yè na g’ôm̃eṉô ômpôlô w’ôgôlô wè ôṉôm̃yè. 15Ni miṉisè e be bonga avila gw’agali mi log, ko yè jira mô gw’ileṽe ny’ôgo wè ônyantwè. 16Miṉisè e be pundy’ôm̃eṉô w’ôgo wè ôṉôm̃yè gw’agali mi re gw’ileṽe ny’ôgo wè ônyantwè, ko yè nyèny’agali n’ôm̃eṉô wè nyongo ôrwageṉô g’ôzô wi Yeôva. 17Gambèṉè miṉisè e be fwel’agali mi tigaṉè g’ôgo g’ôm̃ôndô w’ôrôy ôṉôm̃yè w’ôma wi jombunyô, na g’ôm̃eṉô ômpôlô w’ôgo ôṉôm̃yè na g’ôm̃eṉô ômpôlô w’ôgôlô ôṉôm̃yè, g’ôlômba wi ntyiṉa yi nyam̃a yi ntyagô y’ômwanja w’ôgara. 18Ni miṉisè e be fwel’agali mi tigaṉè g’ôgo gw’ewônjô z’ôma wi jombunyô ni miṉisè e be p’ôraṽô wi mpungu y’ibe g’ômwanji wè g’ôzô wi Yeôva. 19Ni miṉisè e be jire ntyagô y’ôraṽô wi mpungu y’ibe ko yè p’ôraṽô wi mpungu y’ibe g’ômwanja w’ôma wi jombunyô avila gw’ifwevi sè. Avila vovo e be jôṉe nyam̃a yi ntyagô yi pezô. 20Miṉisè e be jire myam̃a yi ntyagô yi pezô ni ntyagô y’inya gô mbôra yi jirô intyagô, ko yè pa g’ômwanja w’ôma mè oraṽô wi mpungu y’ibe, n’ayè be dwaṉa pupu.
21Jog’ ar’ôkuge ko yom̃i yè y’ageka, gambèṉè e be bong’ômwaṉ’ôm̃ori dadyè w’idombè, wi be jirô gô ntyagô yi jirô g’ômwanja w’ôgara, wô piṉô pa g’ôzô wi Yeôva, wô kè wi be pô g’ôraṽô wi mpungu y’ibe g’ômwanji wè. E be bonga dadyè mbèy y’igôm̃i yi farinya mbya bindô pa n’agali g’ômwanja wi ntyagô y’inya, ni log y’agali. 22E be bonga kè abemb’ambaṉi ntyo awaṉa w’imenga aṽaṉi, nt’are yè dènga pa, ôm̃ori g’ômwanja w’ôraṽô wi mpungu y’ibe, n’ôm̃ori g’ômwanja wi ntyagô yi pezô. 23Gô ntyugu y’eṉanay e be baga g’ômwanja w’ijombunyô sè yom̃a yiṉo yôdu gôre miṉisè g’ômpômbala wi ñanja y’idataṉa g’ôzô wi Yeôva.
24Miṉisè e be bong’ômwaṉa w’idombè g’ômwanja wi ntyagô y’ômwanja w’ôgara ni log y’agali ko yè piṉa yô g’ôzô wi Yeôva. 25Gambèṉè e be jôṉ’ômwaṉa w’idombè gô ntyagô y’ômwanja w’ôgara. Miṉisè e be bong’avila gô ntyiṉa yi nyam̃a yi ntyagô y’ômwanja w’ôgara; e be fwela yô g’ôm̃ôndô w’ôrôy ôṉôm̃yè w’ôma wi jombunyô na g’ôm̃eṉô ômpôlô w’ôgo ôṉômyè na g’ôm̃eṉô ômpôlô w’ôgôlô wè ôṉôm̃yè. 26Miṉisè e be jir’agali gw’ileṽe ny’ôgo wè ônyantwè. 27Gambèṉè miṉisè e be nyènya n’ôm̃eṉô w’ôgo wè ôṉôm̃yè agali mi re g’ôgo wè ônyantwè nyongo ôrwageṉô g’ôzô wi Yeôva. 28Miṉisè e be fwel’agali mi re g’ôgo wè g’ôm̃ôndô w’ôrôy ôṉôm̃yè w’ôma wi jombunyô na g’ôm̃eṉ’ômpôlô w’ôgôlô wè ôṉôm̃yè, gô mbôra yi re fwelô pe ntyiṉa yi nyam̃a y’ômwanja w’ôgara. 29Miṉisè e be fwel’agali m’atigaṉè g’ôgo gw’ewônjô z’ôma wi jombunyô, gô p’ôraṽô wi mpungu y’ibe g’ômwanji wè g’ôzô wi Yeôva. 30N’ayè be jir’ibemb’im̃ori ntyo ômwaṉa w’imenga ôm̃ori nt’are yè ko dènga. 31Ôm̃ori gô ntyagô y’ôraṽô wi mpungu y’ibe, na gô ntyagô mori yi pezô, ni ntyagô y’inya; ni miṉisè e be p’ôraṽô wi mpungu y’ibe g’ômwanja w’ôma wi jombunyô g’ôzô wi Yeôva.
32Nyiṉo ne ivanga g’ômwanja w’ijombunyô s’ôma wi re ni ngalambô yi nkaṉi ya gelô, wi re azele ni ngulu gô dèng’eza zi re ko jombunyè.
33N’agambi Yeôva gôre Môsès na gôr’Aarône, inè:
34Gô be jingiṉa ṉwè gô ntye yi Kanaan yi pa myè ṉwè gô niva, ja my’afwele ngalambô yi nkaṉi ya gelô gô nagô yi ntye yi be nivô ṉwè, 35gambèṉè ôma mè wi nive nagô e be kènda gô takilya gôre miṉisè ko yè bulya inè: mi jeṉa mpaṉi ga ngalambô gô nagô yam̃. 36Miṉisè yingiṉaga vovo ro gô kèlagèle ngalambô e be dônge sômbya inè, nagô yi ga lèke ntevô ko ezom̃y’ edu zi re gôgô z’aweva. Avila vovo miṉisè e be jingiṉa gô kèlagèle nagô.
37Miṉisè e be kèlagèle ngalambô ja ajeṉa inè, ngalambô yi re gw’izira yi nagô y’ôsolomèngèlè ntyo yi nyumbè, na nyi jeṉaṉa dônga vyagaṉô n’ôzira. 38Gambèṉè miṉisè e be kogwa avila gô nagô, na gô be kèndè g’ômpômbala, e be nunje nagô vo ntyugu ôrwageṉô. 39Ni miṉisè e be tô fwinya gôgô gô ntyugu ôrwageṉô; j’ajeṉa inè, ngalambô y’ajagayagi gw’izira yi nagô, 40gambèṉè e be sômbya inè, adô mi re kôtô pa ne ngalambô mi ga rômbô, ko mô falô gw’igala nyi nkala gô mbôra y’isèkè. 41E be pange gare ntye yi nagô yôdu gô kombô, gambèṉè nkizi yôdu yi kombô yi be falô gw’igala nyi nkala, gô mbôra y’isèkè. 42Wi be bong’adw’am̃ori, ko waô fwela mô gô mbôra y’adimbiṉa waô adw’alônga; gambèṉè wi be bonge lasô nyèṉè gô kemba yô gô nagô.
43Jogo ngalambô yi tô bya ayagayaga gô nagô ayè tômba p’adô, nagô kombô pa ni kembô pa, 44gambèṉè miṉisè e be tô fwinya gôgô. J’ajeṉa inè, ngalambô y’ajagayagi gô nagô, yô ne nkaṉi ya gelô nungu gô nagô, gambèṉè y’afwevi. 45E be jôṉe nagô, adô, ikôṉi ni lasô yôdu yi nagô ko yè kogunye ya yiṉo gw’igala nyi nkala gô mbôra y’isèkè. 46Ayè yi be jingiṉa gô nagô egômbe zôdu zi re yô nunjô pa, e be fweva kwange nkôlô. 47Ayè yi be dèwa gô nagô, e be jôvuṉ’ingoy sè. Ayè yi be nya gô nagô e be jôvuṉa kè ingoy sè.
48Jogo miṉisè yi re fwinya pa gô nagô ajeṉa inè, ngalambô yi pa jagayaga, nagô kombô pa, gambèṉè e be myeza inè, nagô mè yi re pupu, konde ngalambô y’ajingyô. 49E be bonge nyoṉi mbaṉi, ikôṉi s’ôkume, ni kiramwazi ni yisop gô jombunye nagô. 50E be jôṉe nyoṉi mori gw’evagô z’iwôṉô gw’aṉingw’ambya mi nkèrè. 51Gambèṉè e be bong’ikôṉi s’ôkume, yisop ni kiramwazi ni nyoṉi ya bo; e be pundya yô gô ntyiṉa yi nyoṉi y’ajôṉô na gw’aṉingw’ambya mi nkèrè, ko yè nyènya yô nyongo ôrwageṉô gô nagô. 52E be jombunye nagô ni ntyiṉa yi nyoṉi, n’aṉingw’ambya mi nkèrè, ni nyoṉi ya bo, n’ikôṉi s’ôkume, yisop ni kiramwazi. 53Ndô e be puruṉe nyoṉi ya bo gw’igala nyi nkala gw’intyaga. Yeṉo be pe ôraṽô wi mpungu y’ibe g’ômwanja wi nagô, ko yè dwaṉa pupu.
54Nyiṉo ne ivanga g’ômwanja wi ngalambô yôdu na g’ômwanja wi papakowa, 55g’ômwanja wi nkaṉi ya gelô y’ingoy na yi nagô, 56g’ômwanja w’itômbô, ikèṉi n’abôke, 57ny’arevi j’ezom̃a zi r’eṽe na ja zi re nkèrè. Nyiṉo ne ivanga g’ômwanja wi nkaṉi ya gelô.
Actualmente seleccionado:
Levitiki 14: MYE
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Published by the British and Foreign Bible Society in 1927.