Psom 89
89
Kantik pou letan dir
Instriksion Etann.
1SEGNER, mo pou touzour sant to lamour infini;
mo pou servi mo lavwa pou proklam to fidelite ar zenerasion fitir.
2Mo kone ki to lamour infini li etabli pou touletan;
ki to fidelite li eternel ek permanan kouma lesiel.
3To ti dir, “Mo finn fer enn lalians ar enn dimounn ki mo finn swazir.
Ala ki mo finn promet mo serviter David:
4"Lor tronn pou ena touletan to desandan;
dinasti David pou dire eternelman.”
5Bann kreatir dan lesiel sant bann mervey ki to fer;
bann anz dan zot lasanble sant to fidelite, O SEGNER.
6Pena personn dan lesiel ki kouma twa;
parmi bann kreatir dan lesiel pena ki konparab ar twa.
7Tou kreatir lesiel per Bondie;
zot tou respe Bondie ki redoutab.
8SEGNER Bondie Toupwisan,
personn pena lafors kouma twa;
to fidelite li touletan prezan, O SEGNER.
9Se twa ki kontrol losean pwisan
e zis twa ki kapav kalme lakoler bann vag.
10Se twa ki ti kraz latet Raab#89:10 Dapre vie zistwar babilonien Raab enn mons losean ki reprezant dezord ek lemal kouma enn karkas;
se to lafors san born ki ti fer to lennmi manz lapousier.
11Lesiel pou twa, later osi li pou twa;
lemond e tou seki ena ladan, twa ki finn kree zot.
12To finn kree lenor, to finn kree Lesid;
Montagn Tabor ek Ermon sant to grander dan lazwa.
13To pouvwar li bien gran,
to lafors li san limit.
14To rwayom finn konstrir lor drwatir ek lazistis;
lamour ek fidelite prezan dan tou seki to fer.
15Bienere bann ki priye twa ar zoli sante;
bann ki viv dan lalimier to prezans, SEGNER.
16Gras-a twa zot viv lazwa tout lazourne,
e zot redrese dan louanz akoz to lazistis.
17Tomem ki donn zot laglwar par to pwisans;
gras-a to bonte ek to lamour nou finn gagn laviktwar.
18O SEGNER, to finn swazir nou protekter;
Bondie ki Sin ki Izrael adore, nou lerwa depann lor twa.
19Dan enn vizion to ti dir bann profet
“Mo finn donn pouvwar enn zom for;
parmi lepep mo finn swazir enn lerwa.
20Mo finn met mo serviter David lor tronn
e mo finn beni so latet ar delwil sakre.
21Lafors mo lame pou touletan akonpagn li,
pouvwar mo lebra pou rann li bien for.
22So lennmi pa pou ena viktwar lor li;
move dimounn pa pou kapav imilie li.
23Mo pou kraz so lennmi
e detrir bann ki deteste li.
24Mo fidelite ek mo lamour infini pou avek li,
me plis ki sa, li pou touletan sorti vinker akoz mo nom.
25Lotorite so lame pou lor bann lamer,
lotorite so lame drwat pou lor tou larivier.
26Li pou dir mwa, ‘Tomem mo Papa,
mo Bondie, mo protekter ek mo Sover.’
27Mo pou fer li vinn mo premie garson,
pli gran parmi bann pli gran lerwa.
28Mo pou touletan fidel anver li;
mo pou respekte mo lalians ar li.
29So dinasti pou dire osi lontan ki ena lesiel;
so desandan pou touletan asiz lor tronn.
30Me si so desandan dezobeir mo lalwa;
si zot abandonn mo instriksion;
31si zot bliye mo lansegnman
e pa respe mo bann komannman,
32lerla mo pou fer zot peye pou zot pese.
Mo pou fer zot soufer pou ditor ki zot finn fer.
33Pa krwar ki mo pou aret kontan David;
ki mo pou kas promes mo fidelite.
34Non! Mo pa pou renie mo lalians ar li;
Mo pa pou rezet okenn promes ki mo finn fer ar li.
35Promes ki mo finn fer li, lor mo nom sakre,
zame mo pou fer fos ar David.
36So tronn pou touletan ena eritie;
mo pou vey so rwayom tanki soley briye;
37tanki ena lalinn, touzour la, solid,
enn temwin permanan dan lesiel.”
38Me to ankoler ar lerwa ki to finn swazir;
to finn abandonn li, to finn les li tonbe.
39To finn kas lalians ar to serviter lwayal
e to finn zet so kouronn dan labou.
40Miray so lavil finn grene;
sitadel ek fortres an-rwinn.
41Bann pasan pe depouy li;
so bann vwazin pe sikann li.
42So lennmi pe triyonfe;
bann adverser dan lazwa.
43Zarm nou lerwa konpletman initil;
to pe les li perdi lager.
44To finn ras sinbol so pouvwar
e so tronn finn devir anba-lao lor later.
45To finn fer li vinn vie avan so ler
e to finn kouver li ar laont.
46SEGNER, to pou kontinie get lot kote? Pou touzour?
To pou les to lakoler kontinie flanbe mem?
47Rapel ki mo lavi bien kourt;
To finn kree nou mortel pou nanye ditou.
48Ki dimounn kapav viv san ki li trouv lamor?
Ki dimounn kapav sap dan grif lamor?
49Segner, kot to finn met lamour infini ki to ti ena?
Kot to finn met bann promes to ti fer David?
50Rapel, Segner, mwa to serviter fidel, mo gagn bann insilt;
tou bann lezot nasion modi mwa.
51To lennmi insilte lerwa ki twa to finn swazir, SEGNER.
Partou kot li pase li gagn zot insilt.
52Anou loue LESEGNER pou touletan!
Amen! Amen!
Actualmente seleccionado:
Psom 89: KMNT
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Nouvo Testaman Kreol Morisien Harmonisation NTPS KM © Bible Society of Mauritius, 2021.