Matthew 24
24
Jesus in Biakinnpi Lalthap natu Son
(Mark 13:1-2; Luke 21:5-6)
1Biakinn pan Jesus a pusua zawkciang a nungzuite in Biakinn huang sung a inn dangte lak nuam in neak uh hi. 2Jesus in, “Hi hi, en tek vun. A tatakin kong ci ciang, hi sungah suangte khat zongh a omna ngei san ah om nawn ngawl tu hi; a vekpi kilawn keak siat tu hi,” ci hi.
Ngimna le Vawtsiatna
(Mark 13:3-13; Luke 21:7-19)
3Jesus in Olive Mual tungah a to laitakin, a nungzuite ama kungah hong pai tuam uh hi. “Hi thu sia bang hun ciangin hong tung tu a, tuaciang nong pai kik tu hun le hun bo tu hun, a lak tu in bang hong piang tu ziam?” ci in dongh uh hi.
4Jesus in, “Kidawm tavun, kuama in theamsak heak vun. 5Banghang ziam cile mihing tam mamate kei min zanghin hong pai tu a, ‘Keima in Messiah ka hi hi’ ci tu a mihing tam mama theam tu hi. 6A naina ah ngal kidona aw na za tu uh a, a khualana ah ngal kidona thu hong kison tu hi; ahihang patau heak vun. Tuabangte hong piang nanak tu a, ahihang hun bona hong theng zo hi, cina hi ngawl hi. 7Ngam khat le ngam khat kisim tu hi; kumpi khat le khat kido tu hi. Mun theampo ah kialpi tung tu a, zinliing tu hi. 8Hite theampo sia nautut kipat ciang, a nat bang ahi hi.
9“Tua zawkciang note hong kiman tu a, daan piak tu le thalup tu in hong ki aap tu hi. Keima hu in mihing theampo in note hong ngaimaw tu hi.#Mt 10:22 10Mihing tam mama in tua hun ciangin, a upna uh nusia tu hi; amate khat le khat kileeheak tu a, khat le khat kingaimaw tu hi. 11Tua zawkciang leilot kamsaang tam mama piang tu a, mihing tam mama theam tu hi. 12Tuabangin siatna hong kizel tu a, mihing tam mamate ki itna kiam tu hi. 13Ahihang a tawp dong a thumaante kingum tu hi.#Mt 10:22 14Tuaciangin, hi Kumpingam Lungdamna Thupha sia, leitung theampo ah tetti tu in minam theampo tungah kihil kawkoai tu hi; tua zawkciang hun bona hong theng tu hi.
A Kiitakhuai Mama Thu
(Mark 13:14-23; Luke 21:20-24)
15“Kamsaangpa Daniel ii son ‘A kiitakhuai mama sia’ na mu tu uh hi. Tua in a thiangthona munah ding tu hi.” (Hi lai a sim sia in tel tahen!)#Dan 9:27; 11:31; 12:11 16“Tuaciang Judea a omte in mual tungah tai tahen. 17Innkhum tung a om mihing khat in ama ii vanhte la tu in tuaksuk nawn heak hen.#Lk 17:31 18Lo sungah a om mihing khat in a laktong puasilh la tu in, heak kik nawn heak hen. 19Tua hun sungah a om numei naupaaite le nau noailuaite atu in bangza he huai tu ziam? 20Na tai tu uh hun sia phalbi lai le Sabbath ni ahi ngawl natu in Pathian tungah thungen vun. 21Banghang ziam cile tua hun ah ngimna sia leitung a kipat pan kipan, tuni dong a piang ngei ngimnate theampo sangin nasia zaw pek tu hi. Tuabang ngimna sia maisang zongh ah om kik ngei nawn ngawl tu hi.#Dan 12:1; Tpl 7:14 22Ahihang Pathian in a ni sia khiamsuk zo hi; tua hi buale kuama a suakta buatu hi. Ahitazong a tealtuam mihingte atu in Pathian in a ni khiam tu hi.
23“Tuasia ciang khat po in, ‘En in, hi sungah Messiah om hi!’ ci in ahizong, ‘Zia sungah om hi!’ ci in ahizong hong cile um heak vun. 24Banghang ziam cile Messiah theam le kamsaang theamte hong piang tu hi; hi thei hile Pathian tealsa mihingte ngawngawn a theam natu in, amate in nalamdang lakna liante le a tumdang nate tam mama hong vawt tu hi. 25Ngai vun! a hun hong thet ma in hong sonkhol zo khi hi.
26“Tua ahibuale mihingte in, ‘En vun, ama sia sennealngam sungah om hi!’ hong cile zong, tua munah pai heak vun; tua ahibuale ‘En vun, ama sia hi sungah buu hi,’ hong cile zong na um heak vun.#Lk 17:23-24 27Banghang ziam cile Mihing Tapa sia van buppi ah nisuana pan nitumna dong a kaantan khualeng taang bangin hong pai tu hi.
28“Mithi luang omna mun po ah vaciikte kikhawmtua tu hi.#Lk 17:37
Mihing Tapa hong Paina
(Mark 13:24-27; Luke 21:25-28)
29“Tua hun ngimnate zawk a hai ngawlin, ni hong taang nawn ngawl tu a, tha zongh taang nawn ngawl tu hi, aksite van panin taaksuk tu a, van ah a om nate sia amate ii zin tek panin kipialsak siat tu hi.#Is 13:10; 34:4; Eze 32:7; Jol 2:10,31; 3:15; Tpl 6:12 30Tuasia ciang Mihing Tapa ii lim sia van ah hong kilangh tu hi; Mihing Tapa sia van ah meeikaai tung pan vaangletna le minthanna lianpi taw hong pai a mu uh ciangin, leitung mihing theampo kap tu uh hi.#Dan 7:13; Zec 12:10-14; Tpl 1:7 31Lemlepui aw hong nging tu a, tuaciang ama in leimong king lite ah a vantunglalangte sawl in, amate in ama tealsa mite leimong khat pan mong khat dongin khawmtua tu hi.
Theikung taw Thuheak theina
(Mark 13:28-31; Luke 21:29-33)
32“Theikung in hilsak tavun. A baakte zongh hingin hong moisua ciangin, a teeno meang tu in kithoai a, tuasia ciang khuakhaal hun hong nai hi ci in na he uh hi. 33Tuasia bangma in, hite theampo na mu uh ciangin, a hun hong nai a, hong kipapan zo hi, ci in na he tu uh hi. 34Tu laitak a nungta mihingte a thi siat ma in, hi thu sia hong piang tu hi ci in phawk tavun. 35Vantung le simlei a bo tu hi, ahihang ka kammalte a bo ngei buatu hi.
Kuama in a Ni le a Nai He ngawl
(Mark 13:32-37; Luke 17:26-30; 34-36)
36“Ahitazong tua a ni le a nai tu sia kuama in he ngawl hi — vantung ah vantung mite ahizong, Tapa ahizong, he ngawl hi; Pa bek in he hi. 37Mihing Tapa hong pai natu sia Noah hun lai thupiang bang hi tu hi.#Pian 6:5-8 38Tuipi liim ma in mihingte an ne tui dawnin om a, numei le pa kiteangin, Noah ii teambaw sungah a tum tatak ni dong sia tuabangin om uh hi. 39Tua hi napi tuiliim a, tui ii a taikeak dongin, bang thu piang ziam ci in amate in a phawk bua uh hi. Mihing Tapa hong pai ciang zong tuabang ma hi tu hi.#Pian 7:6-24 40Tua hun laitakin pasal nii sia lo sungah naseam khawm tu hi: khat kila tu a khat kikhe tu hi. 41Numei nii an ngoaina ah diang tu hi: khat kila tu a, khat kikhe tu hi.
42“A kingingta sa in om vun, banghang ziam cile Topa hong pai tu ni sia na he bua uh hi. 43Inn neipa khat in ngutate ii hong pai hun tu he le, mu ngawlin om tu a, ngutate in inn a phuulsak buatu hi, ci in na heak uh ahi hi.#Lk 12:39-40 44Tua ahiciang no zongh, a tawntung kinging sa in om vun, banghang ziam cile Mihing Tapa in na muanmawk ngawl hun laitakin hong pai tu hi.
Thumaan Ahibuale Thumaan ngawl Naseampa
(Luke 12:41-48)
45“Thumaan a, a ciim naseampa sia akua bangte ziam? Ama sia naseam dangte a uk tu le a hun a hun in an a pia tu in a kikoipa ahi hi. 46A topa hong cia laitakin a kisawl bang a naseam hi ci in a topa ii mu naseampa sia bangza in lungdam tu ziam? 47A tatakin kong ci ciang, a topa in tua naseampa sia a neisa theampo uk tu in koi tu hi. 48Ahihang tua naseampa sia a ngina ngawl khat ahile, a topa sia hong cia hak lai vak, ci in ama le ama kitheam tu a, 49tuaciangin a nasep khoppui naseam dangte saatin, zukham theite taw, an ne zu ne in om tu hi. 50Tuaciangin tua naseampa ii topa sia a muanmawk ngawl hun le a heak ngawl ni hun khat ciang hong cia tu hi. 51A topa in ama sia nasia takin ngim pia tu a, a kihitheamsakte ii thuak tu teng thuaksak tu hi. Tua munah ama sia kap in ha ngoai tu hi,” ci hi.
Actualmente seleccionado:
Matthew 24: SCB2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Siyin Chin Bible © Bible Society of Myanmar, 2016