Matthew 12
12
Sabbath huvau Dokna
(Mark 2:23-28; Luke 6:1-5)
1Tua zawk khuangeingawlin Jesus in Sabbath ni khat zungtaang lo sungah vak hi. A nungzuite a ngilkial ahikom zungtaang huite hiat in a humte ne uh hi.#Thkna 23:25 2Pharisee te in hi bang a ngamtat uh a mu ciangin Jesus munah, “En in, Sabbath ni in na nungzuite hi bangin a ngamtat sia ih thukham taw kileebul hi,” ci hi.
3Jesus in, “David le a mite a ngilkial uh laitak a ngamtatna thu a ki atte sim ngeingawl nu ziam?#1 Sa 21:1-6 4Ama in Pathian inn sungah a mite taw tum in, amate neak tu a kilawm ngawl thiampite bek neak tu kilawm anluum thiangtho a neakna thu sim ngeingawl nu ziam?#Thiam 24:9 5Tua ahibuale thiampite in Sabbath sim ma in Biakinn sungah Sabbath thukham khial napi in, mawsakna a nga tuan ngawlna thu Moses thukham sungah sim ngeingawl nu ziam?#Mi 28:9-10 6A tatakin kong ci ciang, hi sungah Biakinnpi sangin a lianzaw khat om nginge hi. 7Laithiangtho in, ‘Thuthiamna ka dei a, sangaw biaknate ka dei bua hi,’ a ci sia he tatak hi le uhte, a maw ngawl khat sia mawsak lalai ngawl tu nu hi.#Mt 9:13; Hos 6:6 8Banghang ziam cile Mihing Tapa sia Sabbath ii Topa ahi hi,” ci hi.
Pasal Khut langzaw Khat
(Mark 3:1-6; Luke 6:6-11)
9Jesus in tua mun nusia in Synagogue inn khat ah pai hi. 10Tua munah pasal khat sia khut langkhat zaw in om hi. Mihing pawlkhat in, Jesus ii ngamtat khialna encik in, a maw natu zong nuam ahikom hi bangin dongh uh hi, “Sabbath ni in ciina damsak tu sia ih thukham taw kileebul ziam?” ci uh hi.
11Jesus in, “Note sungah mihing khat in tuu khat nei le a, tua tuu sia Sabbath ni in dum sungah taaksuk le ama in dum sungah zamh suk in pusua ngawl tu ziam?#Lk 14:5 12Mihing sia tuu khat sangin manh neizaw pek hi! Tua ahiciang ih thukham in, Sabbath ni in mihing khat pawpo ih hu tu sia hong oai hi,” ci hi. 13Tua zawkciang a khutzawpa ii munah, “Na khut vaan in,” ci hi.
Ama in a khut vaan a, a khut langkhat sang bangma in, a khut dam thiang hi. 14Tuasia ciangin Pharisee te pusuak in Jesus a thalup thei natu vaihawm uh hi.
Pathian Teal sa Naseampa
15Jesus in ama a kithasawmna thu a zaak ciangin, tua mun panin ama mundang zuan a, mihon tam mama in zui uh hi. Ama in ciina theampo damsak hi. 16Tuaciangin, kei thu kuama munah son heak vun, ci in thupia hi. 17Hi bangin a vawtna sia kamsaangpa Isaiah ii a sonkhol sa teng a taangtut natu ahi hi.
18“Hi sungah ka tealsa
ka naseampa om hi.
Ka lung hong kimsak
ka itpa ahi hi.
ama tungah ka Thaa
ka pia suk tu a,
tuaciang ama in, ka thukhenna
minam tuatuamte tungah thangsak tu hi.#Is 42:1-4
19Ama in thu nial ngawl tu a,
a au buatu hi.
Lampi lian tungah au vazakin
thu a son buatu hi.
20Ama in a kikuaikhum sa
pumpa a thiaktan buatu a,
a mit dek tak meiinn zongh
a mit buatu hi.
Ama in thutang khenna ii
zawna a ngasak dong hanciam tu hi.
21Tuaciang ama ii tungah
minam theampo in
lametna nei tu hi”.
Jesus le Beelzebul
(Mark 3:20-30; Luke 11:14-23)
22Tua zawkciang mihing pawlkhat in Jesus kungah doai a vei hu in mittaw a, a pau thei ngawl pasal khat hong paipui uh hi. Khuamu thei a, a pau thei natu in, Jesus in damsak hi. 23Jesus sep teng a mu uh ciang mipite in lamdang sa uh hi. Amate in, “David tapa hi takpi tu ziam?” ci in dongh uh hi.
24Pharisee te in hi thu a zaak uh ciang “Doaite a ukpa Beelzebul in ama ii vaangletna pia a tua hu in doaite notkeak thei hi thong zam,” ci uh hi.#Mt 9:34; 10:25
25Jesus in amate khua ngaisutnate tel ahikom amate tungah, “Ngam khat pawpo pawl tuatuamin kikhen hen a, kidawdo le tua ngam a kip ngei buatu hi. Khuapi khat ahizong innkuan khat ahizong, pawl tuatuamin kikhenin, kihau siasua le a kitamhtham tu hi. 26Tua ahikom Satan ngamsung zongh ah pawl tuam khat in, a dang pawltuam dangkhatte do in a om uh le Satan ngam a kikhen tham hi zo a, hai ngawlin zaantham tu hi. 27Beelzebul hong piak vaangletna taw doaite notkeak hi hong ci nu hi. Pha hi, tua ahile na nungzuite akua in doai nawkeak theina vaang pia ziam? Na nungzuite ngamtatna panin, na khial hunlam kitel hi! 28Hi ngawl hi. Doai nawkeak natu vaangletna hong pia sia Beelzebul hi ngawl a Pathian Thaa ahi hi. Tua ahikom hi thu mama in, Pathian Ngam sia note tungah hong theng zo hi,” ci in kitelsak hi.
29“Kuama in mihing thahatpa inn sungah tumin, a neisa ol takin a laaksak thei bua hi, tua mihing a thahatpa sia a letheen cip phot kul hi. A letheen zawkciang bekma in, a inn kiphuul thei pheang tu hi.
30“Khat pawpo kei sang a hong pang ngawl sia in kei hong langpan pa ahi hi; khat pawpo hong kaikhawm pui ngawl sia in, a thezau tatak pa ahi hi.#Mk 9:40 31Hi thu hangin kong ci in ah, mihingte mawna le kamsia paunate kimaisak thei hi; ahizong Thaa Thiangtho sonsiate kimaisak zo ngawl tu hi. 32Mihing Tapa a sonsiate kimaisak thei hi; ahihang Thaa Thiangtho a sonsiate tu hun ahizong, maisang a tawntung ahizong kimaisak ngawl tu hi.#Lk 12:10
Thingkung khat le A nga thu
(Luke 6:43-45)
33“Thingnga pha a pian natu in, thingkung ciidam kul hi; thingkung ciidam ngawlte panin thingnga mannung ngawlte piang hi. Thingkungte a nga panin kihe hi.#Mt 7:20; Lk 6:44 34No ngul ngilo suante awng — mihing ngilote na hi uh ciang, bangbangin thupha son thei tu nu ziam? Banghang ziam cile thinsung pan a, a dimleet teng sia kam panin kipau ahi hi.#Mt 3:7; 23:33; 15:18; Lk 3:7; 6:45 35Mihing phate in a thinsung a ngaisutna pha a kholsa te sung panin pau uh a; mihing ngilote in a thinsung thusia a kholte panin kamsia pau hi.
36“A tatakin kong ci ciang, Thukhenna Ni ciangin, mihing sim in, phattuamna hong pia ngawl kammal khat a paute tungtawnin, thusitna thuak tu hi. 37Noma kammalte mama in, na maw uh le na tan uh thu hong khen tu hi.”
Nalamdang khat Ngetna
(Mark 8:11-12; Luke 11:29-32)
38Tua zawkciangin Thukham hil syate le Pharisee te pawlkhat in, “Syapa awng, nalamdang lakna na vawt ka mu nuam uh hi,” ci hi.#Mt 16:1; Mk 8:11; Lk 11:16
39Jesus in, “Tu hun mihingte sia, bangzata in sia a, Pathian nei ngawl ziam! Nalamdang lakna hong ngen na hi uh ziam? Hong pia ngawl tu khi hi! No tung a hong kipia tu nalamdang lakna in kamsaangpa Jonah, nalamdang lakna sia bek hi tu hi.#Mt 16:4; Mk 8:12 40Jonah in sun thum le zan thum ngasa lian ii ngil sungah a om bangin, Mihing Tapa zongh sun thum le zan thum leithukna sungah om tu hi.#Jn 1:17 41Thukhenna Ni ciangin Nineveh khua mite hong ding tu a, note hong mawsak tu hi, banghang ziam cile amate in Jonah thuhilna a zaak uh ciangin a mawna uh pan kisiik kik hi; a maan tak kong ci ciang in hi sungah Jonah sangin a lianzaw khat om hi.#Jn 3:5 42Thukhenna Ni ciangin, Sheba kumpinu zongh hong ding tu a, note hong mawsak tu hi, banghang ziam cile, ama in a khuala mama ngam pek pan in, Solomon kumpipa ciimna taw thuhilna ngai tu in khual hong haw hi; a maan tak kong ci ciangin, hi lai ah Solomon kumpipa sangin a lianzaw khat om hi.#1 Kum 10:1-10; 2 Khang 9:1-12
Thaa Ngilo hong Heak kikna
(Luke 11:24-26)
43“Mihing khat sung pan doai ngilo khat sia a pusua ciang a tawlngak natu zongin, munko ngawtaakna ngam ah vak kawkoai hi. 44A mu ngawl ciang, ‘Ka inn zuan kik ka heu tong,’ ama le ama kici a, a inn ah a cia kik le a inn awng a, kipua thiang sa in a om mu hi. 45Tuasia ciangin ama pusuak in, ama sangin a siazaw lai doai a dang sali hong tumpui a, tua munah teang uh hi. A tawpna ah tua doai ii teenna mihing sia a kipat lai sangin lawmawk zaw hi. Tu lai mihing siate tungah hi bangma piang tu hi,” ci hi.
Jesus Nu le A Suapuipate
(Mark 3:31-35; Lk 8:19-21)
46Jesus in mihonpite thu a hil laitakin, A nu le a suapuipate hong theng hi. Amate in paupui nuam in doipua ah ding uh hi. 47Tua munah a om mihing khat in ama munah “En in! Na nu le na suapuipate in hong paupui nuamin doipua panin hong ngak hi,” ci hi.
48Jesus in, “Ka nu akua ziam? Ka suapuite akua teng ziam?” ci hi. 49Tuaciang, a nungzuite kawkin, “En vun! hite sia ka nu le ka suapuipate ahi uh hi. 50Vantung ah ka Pa deina bang a ngamtate sia ka suapuipa, ka suapuinu le ka nu ahi hi,” ci hi.
Actualmente seleccionado:
Matthew 12: SCB2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Siyin Chin Bible © Bible Society of Myanmar, 2016