مرقس 3
3
سِيذِيثْنغ عِيْسَى يسْݣنْفَا يج ورْيَاز ذِي نْهَار ن سّبْث ن لْعِبَادَا
1يُوْذف عِيْسَى عَاوذ غَار يِجّن ن ثمْزِيذَا ن أَيث-إِسْرَائِيل يُوْفَا ذِنِّي يجّن ن ورْيَاز فُوْس نّس يمُّوْث. 2تْلَاحَاضن خَاس مَا ٱث يسْݣنْفَا مَا لَّا ذِي نْهَار ن سّبْث ن لْعِبَادَا حمَا اَث تَاهْمن. 3ينَّا-ٱس عِيْسَى إِ ورْيَاز نِّي إِي غَار يدْجَا فُوْس يمُّوْث: "بدّ ذِي ڒْوسْط." 4ئِسّقْسَا-ثن عِيْسَى ينَّا-ٱسن: "نْهَار ن لْعِبَادَا مَا حَلَال أَ نݣّ ڒْخِير نِغ أَ نݣّ شَّرّْ؟ أَ نْسنْجم نّفْس نِغ اَث نْنغ؟" وَلَكِن نِثْنِي سْقَارن. 5ئِخْزَر غَارْسن يعصّب، ئِخيّق ڒَاحقَّاش ؤُڒَاون نْسن قسْحن. ينَّا-ٱس إِ ورْيَاز نِّي: "سَرّح فُوْس نّش." يسَرّح-يث أُوْشَا يذْوڒ وفُوْس نّس يݣنْفَا. 6ڒخْدّنِّي فّْغن ڒْحِزب ن يفَرِّيسِيْين مُوْنن اَك يِوْذَان زِي ڒْحِزب ن وزدْجِيذ هِيرُوْدُس، مْشَوَارن مَامّش إِي غَا ݣّن اَذ نْغن عِيْسَى.
أَطَّاس ن يِوْذَان ذفَّارن سِيذِيثْنغ عِيْسَى
7ئِفّغ عِيْسَى اَك يمحْضَارن نّس يهْوَا غَار شّطّ ن ڒبْحَر، ئِذْفَار-يثن يجّن ن لْعَدَد ذ اَمقّْرَان ن يِوْذَان زِي ثْمُوْرْث ن لْجَلِيل ذ ثْمُوْرْث ن يَهُوْذِيَا، 8ذ ثنْذِينْت ن لْقُدْس ذ ثْمُوْرْث ن إِدُوْمْيَا ذ ؤُجمَّاض-ين إِ يغْزَار ن لْأُرْدُن، عَاوذ زِي جْوَايه ن صُّوْر ذ صَيْدَا. ؤُسِين-د غَارس اَطَّاس ن ڒْغَاشِي وَامِي د اَرِّين ڒخْبَار إِ مَارَّا مِين يݣَّا.
9ينَّا-ٱسن عِيْسَى إِ يمحْضَارن نّس: سْوجْذم-اَيِي يجّن ن ثْغَرَّابُوْت حمَا وَار خَافِي تمْزِيحِيمن ڒْغَاشِي-يَا. 10مِينْزِي نتَّا تُوْغَا يسْݣنْفَا اَطَّاس ن يِوْذَان اَڒ وَامِي مَارَّا يِنِّي ذِي يدْجَا ڒحْرِيق مْزَاحَامن خَاس، خْسن اَث حَاذَان. 11جْنُوْن يعفَّانن مڒْمِي مَا ࢲْرِين عِيْسَى، وطَّان غَار يضَارن نّس سْنكَّرن ثْغُوْيّث قَّارن: "آ شك ذ مِّيس ن أَربِّـي." 12ئِوصَّا-ثن عِيْسَى اَطَّاس ينَّا-ٱسن: "وَار سَّاوَاڒث شَا حمَا وَار تْوَاسِّينغ شَا."
سِيذِيثْنغ عِيْسَى يخْضَر ثنْعَاش ن اَرُّسُل
13ئِݣَعّذ عِيْسَى غَار وذْرَار يڒَاغَا-د خ يِنِّي يخس أُوْشَا ؤُسِين-د غَارس. 14ئِخْضَر زَّايْسن ثنْعَاش، ئِݣِّي-ثن ذ اَرُّسُل حمَا اَكِذس يڒِين اَثن يسّكّ اَذ حدّْثن، 15اَغَارْسن ثِيڒِي سُّلْطَا حمَا اَذ سُوْفْغن جْنُوْن. 16ثنْعَاش-أَ إِݣ يݣَّا نِثْنِي ذ سِمْعَان، يسمَّا-ث بُطْرُس، 17ذ يَعْقُوْب ذ يُوْحَنَّا ثَارْوَا ن زَبَادِي، ئِسمَّا-ثن بُوْنَرْݣس (مَانَايَا يخس اَذ يِينِي ثَارْوَا ن وَاجَّاج)، 18ذ أَنْدْرُوْس، ذ فِيلِيـپَّـاس، ذ بَارْتُوْلُوْمَاي، ذ مَتَّى، ذ تُوْمَا، ذ يَعْقُوْب مِّيس ن حَلْفَى، ذ تَدِّي، ذ سِمْعَان ؤُمِي قَّارن <لْمُنَاضِل>، 19ذ يَهُوْذَا إِسْخَرْيُوْطِي يعْنِي ونِّي يزّنْزن عِيْسَى.
سِيذِيثْنغ عِيْسَى يتْوَاجَاه يِنِّي يدْجَان ضد نّس
20ئِروّح-د عِيْسَى غَار ثدَّارْث، مُوْنن-د عَاوذ ڒْغَاشِي اَڒ وَامِي وَار يزمَّر عِيْسَى ذ يمحْضَارن نّس اَذ شّن ؤُڒَا ذ اَغْرُوْم. 21وَامِي سْڒِين ڒحْبَاب نّس خ مَانَايَا، ؤُسِين-د حمَا اَث اَوِين اَكِذْسن نَّان قَا يرُوْح-اَس ڒَعْقڒ.
22ئِمْسڒْمَاذن ن شَّرِيعَا إِي د يُوْسِين زِي لْقُدْس نَّان: "ذَايس بْعَلْزَبُوْل اَرَّايس ن جْنُوْن. ئِسُوْفُوْغ جْنُوْن مِينْزِي بْعَلْزَبُوْل يُوْشَا-يَاس جّْهذ-أَ."
23ئِڒَاغَا-د خَاسن عِيْسَى يسِّيوڒ اَكِذْسن س ڒمْعَانِي ينَّا-ٱسن: "مَامّش يݣَّا شِّيطَان اَذ يسُوْفغ شِّيطَان؟ 24لْممْلَكَا إِي ذِي تْمنْغَان اَيْثْبَاب نّس يجّن اَك ونّغْنِي وَار ثْزمَّر اَذ تقِّيم. 25ثَدَّارْث إِي ذِي تْمنْغَان اَيثْبَاب نّس يجّن اَك ونّغْنِي وَار ثْزمَّر اَذ تقِّيم. 26مڒَا شِّيطَان يكَّر اَذ يقْضَا خ شِّيطَان، وَار يتْغِيمِي شَا، أَذ يفْنَا. 27وَار يزمَّر حَدّ اَذ يهْجم خ ثدَّارْث ن شَان يِجّن يجْهذ بَاش اَذ يَاشَار اَݣْڒَا نّس إِلَّا مڒَا يشدّ-يث ذ اَمزْوَارُو. أُوشَا اَذَاس يَاوِي مَارَّا مِين غَارس ذِي ثدَّارْث. 28أَقَا تسْڒَام ڒْحَقّ: أَذ تْوَاغْفَرنْت مَارَّا ڒْمُعْصِيَاث إِي تݣّن يِوْذَان ذ كُڒ اَوَاڒ نِّي وَار يحْڒِين إي قَّارن خ أَربِّـي. 29وَلَكِن ونِّي غَا يِينِين شَان وَاوَاڒ وَار يحْڒِين خ أَرُّوْح يقدّْسن، وَار ذَاس يغفَّر لَّا ذِي دُّنشْت-أَ أُو لَّا ذِي لْأَخِيرَا." 30مِينْزِي قَّارن قَا عِيْسَى ذَايس يجّن ن جّنّ ذ اَعفَّان.
31ثُوْسَا-د غَارس يمَّاس ذ اَيْثْمَاس، بدّن بَارَّا إِ ثدَّارْث سّكّن غَارس ڒَاغَان-د خَاس. 32ڒْغَاشِي نِّي قِّيمن نّْضن-اَس نَّان-اَس: "أَقَا يمَّاش ذ اَيْثْمَاش ذ سُوْيْثْمَاش ذِي بَارَّا رزُّوْن خَاك." 33ئِنْدق-د ينَّا-ٱسن: "مِين عْنَان يمَّا ذ اَيْثْمَا؟" 34ئِخْزَر غَار يِنِّي يقِّيمن نّْضن-اَس أُوشَا ينَّا: "أَقَا يمَّا ذ اَيثْمَا." 35ينَّا-ٱسن: "ونِّي يتݣّن س مِين يخس أَربِّـي، أَتَاف نتَّا ذ ؤُمَا ذ وتْشْمَا ذ يمَّا."
Actualmente seleccionado:
مرقس 3: ريف
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión