2 TIMOTE 4
4
1Mithi le minungte thula a khantu Khrih Jesuh hmai le Pathian hmaiah a hnia lamai bangin heh bawn tuhin roh ngai in na forh ing; zaimantifangin Khrih tu kumpibawi bangin uktu cang tuhin hleng leh tuh i. 2Ciamanin Thuthangpha phuang tu, can a rem inkhai ituseh, rem lo inkhai ituseh, phuang tu tengteng law; amahte lung fiang tuhin rel tulai hau a kul fangin hau tulai forh a kul fangin forh tu; cen thinsau in zirh tu. 3Mi in a dikmi zirhhnak heh hlun nuam loin amahte daihhnak sawn hlun can hleng leh tuh i. Cen ling a hiamhnak lek phuang tuhin zirhtu saya tampui amahte caah lang tlang tuh i. 4Thutak tu ngai nuam nawn loin zangtak tlang tuhai a dik lomi tluanthu menma sawn ngai nuam tlang tuh i. 5Ikhalselai nang tu zaibang hmun le tikcucan ahkhai thu sau ruat in uk dun ben zuam tu. Harhnak tuar ben zuam tulai Thuthangpha a phuangtu ai naper heh per tu. Cen Pathian naruaihtu na i bangin na ṭuanvo heh a khimniu in bawn tu sio law.
6Kai tu hibawlhnak ai sel tuh can i hleng ihang. Hemi laivum nunhnak heh i zam can cu zo ihang. 7Dawp zuamhnak ah i ti ben tawp in dawp zo ing; dawp zuamhnak a tawp tian dawp zo ai i sanghnak khai zam zel loniu in kho ngai in pom zo ing.#4:7 I sanghnak khai kho ngai in pom zo ing tihnak tu I thutiamhnak bangin khimruai zo ing, tikhai i thai i. 8Tun tu i Bawipa, a dikcang thukhantu Bawi in cia Nia ai i pe tuhhnak nehhnak lehsawng kaimah caah i dah sah ciahnak iang ing. Ciami lehsawng heh dikcanghnak sui lukhuk i ai kaimah ca lek ilo i, ithnak thawn amah a lar tuhhnak a iangtu hmuahhmuah ca ahkhai i.
Pumpak Thucah
9A cang thai tawp in i hnenah kawi cing tuh zuam tu. 10Demas tu he laivum daih sawn manin i hlum ai Thessalonica khua ah feh zo i. Crescens tu Galati peng ah feh zo ai Titus khai Dalmatia peng ah feh ve i.#Col 4:14; Phim 24; 2Cor 8:23; Gal 2:3; Tit 1:4 11Luke pakhat lek i hnenah um i. Mark khai sawm tulai fehpui tu ve, naperhnak i bawmthaitu i.#Col 4:14; Phim 24; Nal 12:12, 25; 13:13; 15:37-39; Col 4:10 12Taikhikas tu Ephesa khua ah fehruai ing.#Nal 20:4; Eph 6:21-22; Col 4:7-8 13Na kawi fangin Troas khua Karpas hnenah i hlumhnak i korfual i phurh kong tu. Laibute khai phur tu; saphaw ai bawnhnak laihnahzualte heh hai hrimhrim mah.#Nal 20:6
14Dar pumsutu Alexander in harsahnak roh ngai i pe i. Bawipa in a bawnhnak bangin rulthun leh tuh ngawn i.#1Tim 1:20; Saam 62:12; Rom 2:6 15Nangmah khai ralring tu; zaimantifangin ani tu kin Thuthangpha heh thi ngam in a eltu i.
16Thurelhnak ai i suak hmasaber ṭum ah aisu inkhai i ṭanpui lo i. Amahte veksen in i hlum sek i. Anite tu Pathian in mawhhluk hram maseh. 17Ikhalselai Pathian tu i hnenah um ai thazang i pe i; ciamanin kin thuthang tu a khimliang in Gentile mite hmuahhmuah za tuhin rel thil ing. Cen thihhnak songin i luat i. 18Bawipa in hnophnak hmuahhmuah lak songin i hum tuhai a vancung Ukhnak songah himniu in i lutpui tuh i. Amah hnenah songlawihnak tu kumzangza in um tu ngio selaw. Amen.
Hnuataber Hnuksathnak
19Prisilla le Aquila le Onesiforas innsangte hnuk ning sat ing.#Nal 18:2; 2Tim 1:16-17 20Erastus tu Corinth khua ah um ai Trophimus tu a ur manin Miletus ah hlum ing.#Nal 19:22; Rom 16:23; Nal 20:4; 21:29 21Khuasik cu hlanah kawi tuhin zuam tu.
Zubulas, Pudens, Linas le Claudia in hnuk ning sat ai a dang Khristian unaute inkhai hnuk ning sat i.
22Bawipa khiah na rauhla hnenah um tu hram seh. Pathian ai ninghiohnak tu ning veksen hnenah um tu hram seh.
Actualmente seleccionado:
2 TIMOTE 4: RZB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Zanniat Bible © Bible Society of Myanmar, 2018.