Bilangan 4
4
Ap Kehat pam weiyelak a’ge en togulom wene
1At Allah en Musa Harun emin mo’gulentasulat, 2Is Lewi a’ge pema me’gerik is Kehat a’ge ena’gul onuk emin, dogoma a’ge enebe lo’bok emin, enebe wenak onobogulat, 3An nemin hwedik togumu nowi sabo werikmu eba, yabuk togwi a’ge enemin yabuk togu lomok oluk wagai a’ge ebano, dogo oruakhwe, tahun 30 tak a’ge hwerli en ’bekhit, erabu tahun 50 pam tak a’ge hwerli ap nak enebe wenak onobogulat, togu lemis o.
4Nemin hwedik togumu nowi werikmu is ap Kehat a’ge en eniabuk togulom e, di a’ge yu a’ge modok omu degelak a’ge ebano degelogu lemak o.
5His honowi moluksogo poluk, momu lo a’ge ago holuk, at Harun emin, eiyagai emin en, an nowi werikmu ’gwilotluk, sum ’burl tepnik a’ge ano horoksogo wouwarik, an niak wene tak a’ge ’balogo yagarak a’ge ano, o’borl pam lo’boksogo sepnik poluk, 6hiane ’gela’ge lok a’ge onuk lumba-lumba agap o dum akhit saplisogo salogulat pogulat, sum il borlu werak a’ge ano o’borl pam saplisogo selak pogulat, takpoluk, e ye soluk lagai a’ge ano ele’gwe perakpogulat tuak o.
7An nebe welagoma oluk, roti nebaget pogwi a’ge e delak a’ge ano pam roti ebe oruakhwe sum kain ’bogorl lalu iltak a’ge pam demogo poluk, piring-piring emin, ik hele’gik emin, sogoluak a’bosu na’gogwi a’ge emin, an nebaget a’bosu lu’gwatil lo a’ge sogoluak emin, at ebaget takpoluk, 8sum lalu a’ge o’borl pam sebelogulat, takpoluk, agap il sakho tak a’ge pam e o’borl pam sebelogo meja e yetholuk lo a’ge paget e ’biagan ’gwelabogulat, tuak o.
9Is en sum lalu a’ge wik-wok, atiarak pasu a’ge esaga heberlogo pogwi a’ge emin, odouk edip heling-heling legenak tik, herle ologun ’baliso a’ge emin, esaga pam togwi a’ge di a’ge yu a’ge emin esaga heberlu a’ge minyak zaitun a’bosu ne’gak a’ge di sogoluak yu sogoluak emin, o’borl pam sebelak poluk, 10pobuk odouk heberlogo pogwi a’ge emin, di a’ge yu a’ge heberlogulat, togwi a’ge emin, hiane laut a’ge oluk lumba-lumba hetsogo poluk, agap pam hettak poluk, woluk lo a’ge e yesogo pouwak o.
11An nebaget wusogo woknoum a’ge emas a’ge pam hele’gik a’ge ano, sum kain ’bogorl lalu iltak a’ge pam ebam erla’golik pogulat, takpoluk sum hiane laut pam a’ge onuk lumba-lumba agap il sakho tak a’ge ano pam erla’golik pogulat takpoluk, e yesogo woluk lagai a’ge ebano ’gwelabogo pouwak o.
12O asua owi ano paget til lagalat, togwi a’ge di a’ge yu a’ge ’berlegat wogu lemarik, sum kain ’bogorl lalu iltak a’ge ano pam lo’boktak pogulat, asogo takpoluk, hiane laut pam a’ge onuk lumba-lumba agap no’gorlak a’ge il sakhorak a’ge mesik o’borl pam saplisogo sebelak poluk e, woluk lo a’ge e yesogo pouwak o.
13An nebaget wusogo woknogumu tembaga a’ge pam hele’gikmu re, ul ’biso a’ge ebano, hosogo lebikpoluk, sum kain il ’borlu serak a’ge o’borl pam erla’gulik pouwak o. 14Takpoluk, an nebaget wusogo woknogulat togulom a’ge di a’ge yu a’ge odouk e’gen orlok togwi a’ge emin, eino yegerlogwi a’ge heil emin, ul orlok togwi a’ge sang emin, ik ’belabogwi a’ge igi’be emin, at ebam poluk hiane laut a’ge onuk lumba-lumba agap no’gorlak sakho tak a’ge ano o’borl pam sebelak poluk, e yesogo woluk lo a’ge ebano e pasogo pouwak o.
15“Ap Harun eiyagai enemin en asuama ebano di a’ge yu a’ge welago a’ge ebano leik-louk takpogulat, asuama ebano di ebele yu ebele togulat togwi a’ge omu poluk a’ge ebano, ’berlegat ’geralogo-’geralogo pogulat, takpoluk, Is Israel a’ge onowi sabo moluksogo poluk, o momu lagalat, holuk is ap Kehat a’ge en di a’ge yu a’ge ebano woluk louwagoluk, wa’guak o. Wa’gogulat nak e, waromma re, di ebele yu ebele togulat ebaget polik a’ge ebano re, wau wagaimu no ye o. Di bele yu bele togwi a’ge nemin hwedik togumu oruak a’ge ebano re, is ap Kehat a’ge en nak woluk laga lemak o.
16Esaga heberlu a’ge minyak emin, e’ben op ago a’ge emin, e’gen hwelilogo pogwi a’ge an nebaget pogwi a’ge emin, ap edigonobogulat a’bosu ena’gul pam pogwi a’ge emin, ebano re, ap an nebe eiye a’ge Harun omlogo Eleazar enat eiye welemak o. At en nak Allah owi sabo werik emin, asua takma di a’ge yu a’ge ogola oruak a’ge ebano emin, di a’ge yu a’ge togwi a’ge omu polik a’ge ebano emin, ’berlegat at eiye welemak o,” oluk, mo’gulesi.
17At Allah en Musa Harun emin mo’gulentasulat, 18Ap Kehat a’ge pam en weiyelak a’ge enebe lo’bok logolak mesik en tu mia a’ge oruakhweat de togwi holuk e, is ap Lewi a’ge ene ’gerlakma en ena’guluak erlagapsogo pasumu no oluk, pobi togu lemis o. 19Is Kehat a’ge en di a’ge yu a’ge omu polik oruakma horok lau wagaiam e, warom erlakma en enelaluk welemagoluk, his en togulom ano re yuat o. At Harun eiyagai enemin en nak asuama ano is naduk libotluk, eniabuk hun-hun togulom a’ge emin, di a’ge yu a’ge woluk lagalom a’ge emin, pulogo pil-pil laga lemak o. 20Asogo tu a’geat de, is Kehat a’ge en di a’ge yu a’ge modok omu polik a’ge ebano, we enil abunpan hogwi holuk we warat emama re, ’gwelakhouwogoluk, o eba ’gwi lagaimu no yo, “oluk, mo’gulentesi.
Ap Gerson pam weiyelak a’ge en togulom wene
21At Allah en Musa mo’guleselat, 22Is Gerson a’ge ena’gul onuk emin, dogo’gwe a’ge enebe lobok emin motluk enebe wenak enebiselat, 23Nemin hwedik togumu nowi werikmu eba yabuk togwi a’ge emin togu lomok oluk, wagai a’ge ebano, dogo oruakhwe tahun 30 tak a’ge hwerli en ’bekhit, toluk tahun 50 pam tak a’ge hwerli ap nak wenak enebiselat tip o.
24Is Gerson pam weiyelak a’ge en eniabuk togulat, di a’ge yu a’ge e’gin holuk woluk lagalat togulom ano re, 25nowi werikmu sum sepnik a’ge ano emin, an nemin hwedik togumu sum sepnik a’ge ano emin, nowi werik a’ge o sel u’gwa domba agap ’gela’ge sebelak a’ge emin, ai o’borl pam hiane laut ogola welago a’ge onuk lumba-lumba agap il sakhorak a’ge pam selak a’ge emin, nemin hwedik togumu nowi werikmu ’goduk ’gogumu sum tepnik a’ge emin, 26Nowi werik a’ge ebe emin, nebaget wusogo e narlogumu tak a’ge emin, odip o’gwe weling-waling sum erla’gulik ebano emin, nowi werik a’ge odip ’goduk ’gogulomma sum sepnik emin, e pam erlelil legenak a’ge herle emin nowi werikmu en togwi a’ge di a’ge yu a’ge ’berlegat woluk lagalom a’ge re isat eiyetak welat di a’ge yu a’ge togulom a’ge ai pam en mesik tu a’ge holuk, ai pam e is enat togulat, togu lemak o. 27Ap Gerson a’ge en eniabuk til lagalat, di a’ge yu a’ge woluk lagai a’ge de a, yabukmu a’ge hwiak ontogwi holuk, togwi a’ge de a, ebano re, at Harun eiyagai enemin ’gwelagentarokhwe, togu lemak o. Di a’ge yu a’ge ’berlegat woluk lo ai re, is onomuatma re, mo’gulentasu lomup o. 28Nemin hwedik togumu nowi werik a’ge degelogulat, is Gerson pam en weiyelak a’ge en togulom a’ge aiatma re, ap Allah eiye Harun omlogo Itamar en wene lekelogo mo’gulentasukhwe togu lemak o,” oluk, mo’gulesi.
Ap Merari pam weiyelak a’ge en togulom wene
29At Allah en Musa mo’guleselat, “Hat en is ap Merari a’ge ena’gul onuk emin, dogo ’gwe a’ge lo’bok emin, motlugat enebe wenak enebiselat, 30Nemin hwedik togumu nowi werikmu yabuk togwi a’ge enemin yabuk togu lomok oluk, wagai a’ge ebano, dogo oruakhwe tahun 30 tak a’ge hwerli en ’bekhit, erabu tahun 50 tak hwerli ap nak wenak enebiselat, tip o. 31Nemin hwedik togumu nowi werikmu degelogulat, is en togulom a’ge eniabuk ai re, e ’gagalak emin, e no’gorlik pei lo a’ge emin, uak dain tu a’ge, emin, oyuk emin, woluk lo a’ge re, isat eiye welat, 32O ano wali’gogo wetil wagalat, o uak dain tu a’ge emin, uak dain tu a’ge oyuk emin, herle hettu a’ge e emin, herle emin, nowi worogulat togwi a’ge ’berlegat woluk lo a’ge isat eiye welat, togulomma re, yu a’geat woluk laga lomup o, oluk, hun-hunat pul enebise lomup o. 33Nemin hwedik togumu nowi werik a’ge degelogulat, is Merari pam en weiyelak a’ge en togulom e aiatma re, ap Allah eiye Harun omlogo Itamar en wene le’gelogo mo’gulentasukhwe, togu lemak o,” oluk, mo’gulesi.
Ap Lewi a’ge enebe wenagenebegei wene
34Mo’gulesimu Musa emin, Harun emin, is Israel oruak a’ge ’berlegat onuelak enemin, en is Kehat a’ge ena’gul onuk emin, dogo ’gwe a’ge emin, mugonobolugat enebe wenak enebegisama re. 35Allah emin hwedik togumu owi werikmu en togwi a’ge enemin en togu lomok oluk, waga legesa a’ge ebano, dogo oruakhwe tahun 30 tak a’ge hwerli en ’bekhit, tahun 50 tak a’ge hwerli ’berlegat ap nak 36ena’gul motluk enebe la’bolik e, 2.750 at o. 37At Allah en is mo’gulontouwak oluk, Musa mo’gulesi ano hegitsogo, is ap Kehat pam en weiyelak a’ge Allah emin hwedik togumu owi werikmu en, togu legesa a’ge ’berlegat enebe labulogo Musa Harun emin en wenak enebegisa ano re aiat o. 38Is ap Gerson a’ge ena’gul emin, dogo ’gwe a’ge emin, motlugat enebe wenak enebegisama re, 39Allah emin hwedik togumu owi werikmu eba togwi a’ge emin togu lomok oluk wegesa a’ge ebano, dogo oruakhwe tahun 30 tak a’ge hwerli en ’bekhit, tahun 50 tak a’ge hwerli ’berlegat ap nak 40ena’gul a’ge emin dogoma a’ge enebe lo’bok emin, motluk enebe la’bolik wonogo re, 2.630 aiat o. 41At Allah en Musa mo’gulesi ano hegitsogo is ap Gerson pam en weiyelak a’ge Allah emin hwedik togumu owi werikmu togu legesa a’ge enebe la’buksogoat Musa Harun emin en wenak enebegisa ano re, aiat o,
42Is ap Merari a’ge ena’gul emin, dogo ’gwe a’ge lo’bok emin, motlugat wenak enebegisema re, 43Allah emin hwedik togumu owi werikmu en togwi a’ge emin togu lomok oluk, waga legesa a’ge dogo oruakhwe tahun 30 tak a’ge hwerli en ’bekhit tahun 50 tak a’ge hwerli ’berlegat ap nak 44ena’gul motluk enebe la’bolik wonogo re, 3.200 aiat o. 45At Allah en Musa mo’gulesi ano hegitsogo, is ap Merari pam en weiyelak Allah emin hwedik togumu owi werikmu togu legesa a’ge enebe la’bulogoat Musa Harun emin en wenak enebegisa ano re, aiat o.
46Musa emin, Harun emin, is Israel a’ge onuelak emin en is ap Lewi a’ge ena’gul emin dogo ’gwe a’ge enebe lo’bok emin, mugonobolugat enebe wenak enebegisama re, 47Allah emin hwedik togumu owi werikmu togwi a’ge mesikmu lo a’ge ago holuk, ebe woluk lagalat, togu lomogoluk, togu legesa a’ge ebano dogo oruakhwe tahun 30 tak a’ge hwerli en ’bekhit hwerli tahun 50 tak a’ge hwerli ’berlegat ap nak enebe la’bulogo 48Wonogo re, 8.580 aiat o. 49At Allah en Musa mo’gulesi a’ge hegitsogo, Allah owi werikmu ebano degelogulat, eniabuk togulat, moluksogo woluk lo a’ge mo’gulontogwi holuk, woluk lagalat, togu lemagoluk, onomu onomuat ’balentil legesa. At Allah en Musa mo’gulesi a’ge hegitsogoat enebe wenakho enebegesa ano re, aiat o.
Actualmente seleccionado:
Bilangan 4: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión