Bilangan 23
23
At Bileam en pobuk om a’ge paget wene mo’gulesi wene
1Asogo yerentesirik, at Bileam en Balak disogo mo’gulesi,
“O yema an en Allah paget wam di a’ge yu a’ge wusogo odouk narlik ebaikmu logon ebale sabiren hele’gik tik e, wam sapi ierak a’ge ebe sabirenat, ye, domba ierak a’ge ebe sabirenat pulogo pomup o,” oluk mo’gulesi.
2Asogo mo’gulesimu, at Balak en e, Bileam en mo’gulesi hegitsogoat tegei. Asogo tegeirik, wam di a’ge yu a’ge wusogo Allah ebaget narlik oboma ano ebe lo’bok wam sapi ierak a’ge mesigat, ye, domba ierak a’ge mesigat emin-emin uthegeik wusogo narlegisa. 3Asogo narlik poluk, at Bileam en e, Balak disogo mo’gulesi,
“An naik ’gain Onuk Logo a’ge en ne’birek sarlok tultik wene mesik mo’gulnema ya? Erlak a, oluk lagarik, oruakhwe re, hat hebe wam hat hebaget wusogo odouk narligema eragam eriayat wolomup o. An laiktik, naik ’gain Onuk Logo a’ge en di wene yu wene logon mo’gulnoso holuk, mo’gulhosueik o,” oluk mo’gulesirik e, Bileam ebe dom mesik duk pam emategat ligaga.
4Ligagoam, Allah at e’bek ’bu agama re, Bileam en Allah disogo mo’gulesi,
“An en hat hebaget wam wusogo narlikhebaikmu ebale sabiren hele’gik poluk e, ebe lo’bok o’borl pam e, wam sapi ierak a’ge mesigat nak, ye, domba ierak a’ge mesigat nagat emin lo’bokhegeik wusogo narlik poluk wegi o,” oluk mo’gulesi. 5Asogo mo’gulesimu, at Nenaik ’gain Onuk Logo a’ge en Bileam en wene Balak mo’gulum a’ge mo’gulesirik e, at en Balak mo’gulosu ’bumagoluk ’belakpou waga. 6Asogo ’belakpou wagama ’bu aga ’gal e, at Balak ebe at ebaget wam wusogo odouk narlik pegesema erianoat edik oruakhwe, is aphwami Moab a’ge onuelak ebano ’berlegat enemin oruakma ensa ’bu aga. 7Asogo ensa ’bu agarik e, at Bileam en wene aga a’ge emin, pobuk ema a’ge emin, yu mo’gulesi,
“O Aram dom mo orlu ago eba hegit oruakma,
ap ’gain Balak aphwami Moab a’ge,
onue ’gain onuk logo a’ge en,
an disogo oluk worlniesimu wegi.
An nebaget aphwami Israel a’ge
hweim enebagun en suk o, oluk worlniesimu wegi o.
8A’ge re, at Allah en hweim onobo erlak a’geat de,
an en hweim enebaik no?
Ye, Allah en e, wene enebam po erlak a’geat de,
an en wene enebam po no?
9An nebe dom a’gul pam en,
is enebe nil yerentasulat ’gwelagentasulat tegis o.
Aphwami ena’gul onuk mu a’ge,
logon enemin erlak o.
We, ena’gul is a’ge nak enemategat etli yerentemit o!
10Ap Yakub en dogo ’gwe a’ge,
enebe ene’gik wenaru modok mia en e,
’gwiang ollong ’gela’ge modok a’bigat egesa.
Aphwami ena’gul onuk Israel a’ge enebe wei ye, erlak,
modok a’bigat egesa o.
An en hegitsogo nak tagalomtik,
nebe warom ai re, obat o.
Ye, aphwami hegitsogo togwi a’ge,
waragai ’gela’ge warom e, op o,”
oluk mo’gulesi. 11Asogo mo’gulesimu, at Balak en e, Bileam disogo mo’gulesi,
“An nebaget e, no’gosogo egen. An en hat yema wokhoboluk orlu egi ’gal e, an neselei a’ge ai hweim enebanogoluk wokhoboluk wegi epegi. Asogo a’geat de, Allah en is obap onobuagoluk e’gen eba re,” oluk mo’gulesi. 12Asogo mo’gulesimu, at Bileam en e,
“An en e, wene naik Onuk Logo a’ge en,
In o, oluk mo’gulnoso a’ge nagat u o,” oluk mo’gulesi.
Wene pobuk ema a’ge naduk mesik egeitik e, pobuk mesik egei wene
13Pobuk at Balak en Bileam disogo mo’gulesi,
“Nis nemin e, o dom agaikhenma louwok o. Eba en aphwami Israel a’ge enebe pema akhit nak hil yerentasulat hweim enebagun o,” oluk mo’gulesi. 14Asogo mo’gulesirik, at Balak en Bileam woluk e, o leimu aphwami erlakma onuk Zofim leimu lagarik, dom yat onuk Pisga ai pam ligagarik at en wam di a’ge yu a’ge Allah paget wusogo narlik oboma ebano ebale sabiren hele’gegeitik e, ebe lo’bok o’borl pam e, wam sapi ierak a’ge mesigat, ye, domba ierak a’ge mesigarat, emin uthegeigat wusogo narlegei.
15Asogo tegeimu, at Bileam en e, Balak disogo mo’gulesi,
“An naik ’gain Onuk Logo a’ge emin sarlok tuogoluk etleba lasukhwe re, hat hebe huam wusogo odouk narligenma eriayat edik wolomup o,” oluk mo’gulesirik e, laga.
16Lagama re, at Nenaik ’gain Onuk Logo a’ge Bileam e’birek sarlok tigisarik e, wene at en Balak mo’gulum a’ge mo’gulesirik, wene ai ebe Balak mo’gulosumagoluk togolik perakpou waga.
17Asogo perakpou wagama waga ’gal e, Balak ebe uam wusogo odouk narlik pesimu erianoat edikmu, is aphwami Moab a’ge onuelak ebano enemin oruakma ensau wagama, at Balak en e, wene nenaik Onuk Logo a’ge en egei a’ge mo’gulontuagoluk hin wokhesi. 18Asogo mo’gulesimu, at Bileam en e, wene pobuk om a’ge disogo mo’gulesi,
“Balak Zipor omlogo yu. Yethemen!
Wene an en mo’gulheik a’ge ai,
opsogo hologun en hebe ya suk o.
19Allah re, aphwami en,
Ne’bigene egi o, ogulat,
eniak eseiyat ogulat,
ogwi ai ’gela’ge oso modok erlak o.
At Allah re,
An en disogo tik, oluk obok mo’gulontoluk e,
ebe demat hegitsogoat tago yo.
Ye, at en osoam ebe demat nak ago yo.
20An en e, Allah en obap onobua a’ge uagoluk mo’gulnesimu,
is enebaget egi ai o.
Ye, at Allah en e,
obap enebisoam, an en e,
Hiak uak womup o, oluk u re, modok mia o.
21At Yakub en wiak mesik tegeimu,
oluk ogu lomul erlak o.
At Israel aik ’gain Onuk Logo a’ge,
Allah en ’gwelakharok oruakhwe,
at en di a’ge yu a’ge logon,
wiak aga lema ogo erlagat o.
Is en e,
Nenaik ’gain Allah oruak o,
oluk eniak amitmit supsogo erliktogwi ai o.
22Allah en, is o Mesir en wogonoboluk liplau wagarik,
at ebabut sapi maro ierak ebabut wiak a’ge ’gela’ge welat,
is oruak o’gwe otluk onoweim ebiso yo.
23Is logon en Yakub eiyagai a’ge hweim onobogwiam,
enebe wiak om erlak o.
Is Israel a’ge ai wiagap onobuogoluk,
onolu’gwa seni sorogwiam e, demat ema erlak o.
Is aphwami ena’gul onuk ai a’ge paget,
aphwami logon en e,
Allah en e,
is elalin a’ge lerentasu ai yethemit! oluk ogu lema ani o.
24Is aphwami ena’gul onuk ai a’ge re,
mene orlomene onuk singa maro a’ge,
inago ’gela’ge inagalat,
ierak a’ge edik modok welago ’gela’ge erlak welat,
tagalat e, singa ai en tue ’baik logon at nasu a’ge,
ebe wusogo ’berlek perlengsogo
emep emin no erlak welat,
ebe ’bou oso erlak ano ’gela’ge togwi o,”
oluk mo’gulesi. 25Asogo mo’gulese lagama at Balak en e, Bileam disogo mo’gulesi,
“Arat e’gen o. Hat en is ena’gul onuk ai a’ge hweim enebagun erlak holuk e, is obap onobuagoluk u re, modok erlagat o,” oluk mo’gulesi. 26Asogo mo’gulesimu, at Bileam en e,
“An en e, Nenaik ’gain Onuk Logo a’ge en,
Disogo asogo ip o, oluk mo’gulnoso a’ge nak u o, oluk mo’gulhoum erlak no? Arat mo’gulhegis epegi,” oluk mo’gulesi.
Wene pobuk om a’ge e’gik ’birenam mo’gulesirik, pobuk mesik mo’gulesi
27Pobuk at Balak en e, Bileam disogo mo’gulesi,
“Nis o momu louwok o. O eba en, hat en aphwami Israel a’ge an nebaget hweim enebagun en Allah en wene ’balu erlakma en mo ua hwi a. Sa aluk,” oluk mo’gulesi. 28Asogo mo’gulesirik, Bileam woluk e, dom Peor olukhwe re, o lei aphwami erlakma hegit eba welago a’ge ai pam ligagarik duk a’gul ebe pam ligaga. 29Asogo woluk ligagama, at Bileam en Balak disogo mo’gulesi,
“Yema wam Allah paget wusogo narlik obogumu ebale sabiren logon hele’gik poluk, wam sapi ierak a’ge sabiren, ye, domba ierak a’ge sabirenat pulogo po yo,” oluk mo’gulesi. 30Asogo mo’gulesimu, at Balak en Bileam en mo’gulesi hegitsogoat tegei. At en e, wam di a’ge yu a’ge Allah paget wusogo narlumu ebale hele’gegei a’ge ebano ebale lo’bok o’borl pam e, wam sapi ierak a’ge mesigat, ye, domba ierak a’ge mesigarat emin uthegeik wusogo narlegei.
Actualmente seleccionado:
Bilangan 23: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión