Bilangan 21
21
Aphwami Israel a’ge en aphwami Kanaan a’ge logon mabenap onoboluk enanni egesa wene
1 #
Bil. 33:40
Asogo welegesarik, o Kanaan ik o’but hegitsogo eba wagoam, is aphwami en e,
“Aphwami Israel a’ge ebela o Atarim o’gwe en wagai o,” oluk egesema ap ’gain o kota mesik onuk Arad a’ge esa’go hwelegeirik e, aphwami Israel a’ge enemin weim obogulat, enebe logon herle wusogo enebesi. 2Asogo enebesimu, is aphwami Israel a’ge en e,
“Nis en disogo tul,” oluk, Nenaik ’gain Onuk Logo a’ge obok disogo mo’guligisa,
“Nenaik. Hat en aphwami ena’gul onuk ai a’ge mabenap onobuak, oluk epagun holuk e, nis en aphwami enebe emin, onowi kota emin, modok wollo’gen dagalogo erlagap pul o, naik,” oluk ho’buk ’balogo mo’guligisa. 3Asogo mo’gulegisema, at Nenaik ’gain Onuk Logo a’ge en aphwami Israel a’ge en ’gonu mo’guligisa a’ge ano eniak esa’go hwelegeirik e, lerentesimu, aphwami Kanaan a’ge ebano mabenap enebegesa. Asogo mabenap onobogulat, enebe emin, onowi kota emin, modok erlagap enebegesarik, o ebano onuk Horma tualigisa.
Herlegetle tembaga a’ge heli’gogo lagabegei wene
4 #
Ula. 2:1
Asogo toluk, aphwami Israel a’ge ebano o dom Hor ano eba ukpoluk, o Edom eragam o’gwe ebela wali’gogo louwogoluk, ebela ik Akaba ye’gelak omugwe o’gwe louwogoluk lagai o’gwe ano legesa. Asogo legesa a’geat de, enepe mosogo lo mia agama re,
5 #
1Kor. 10:9
“Degenikmu yema nenebit e,” oluk Allah emin, Musa emin, onogola en mi-miaragonoboluk, disogo egesa,
“Nis o Mesir en woknonoboluk wegen ai nopaget. O leimu aphwami erlakma so’boru emin, ik emin, modok erlakma yema nenebe modok waremagoluk en woknonoboluk wegen a? Oduk modok erlak namuk a’ge ai nak nil-nil yema modok nenebit e,” oluk lal-’balsogo mo’guligisa.
6Asogo ogu legesema, at Nenaik ’gain Onuk Logo a’ge en e, herlegetie aphwami enebe warenebiso a’ge a’bigat is aphwami Israel a’ge ene’gerlakma perakpou waga. Asogo perakpou wagama, iak en aphwami Israel a’ge lebilenebegeimu enebe a’bigat waretil legesa. 7Asogo waregesema, is aphwami Israel a’ge logon Musa e’bek wegesarik e, disogo mo’guligisa,
“Nis en e, Nenaik ’gain Onuk Logo a’ge nonogola en mi-miarak poluk,
Degenikmu yema nenebit e, oluk Allah emin, hat emin, lalhenebige ai wiagat tige o, naik. Holuk e, Nenaik ’gain Onuk Logo a’ge en herlegetie ebano nis nene’bek en perakpoumagoluk, se’ban nis nenebaget inogoluk mo’gulhosu ege o, nenaik,” oluk mo’gulegisema, at Musa en se’ban is enebaget egei. 8Asogo egeimu, at Nenaik ’gain Onuk Logo a’ge en, aphwami enebe lo’bok herlegetie iak en lebilenebisoma enil herlegetie tembaga a’ge likhouwa a’ge enebe lo’bok op aga lemagoluk, Musa en herlegetie tembaga a’ge mesik heli’gogo, e pam lagabuagoluk mo’gulesi. 9#2Raj. 18:4; Yoh. 3:14Asogo mo’gulesimu, at Musa en herlegetie tembaga a’ge ano asogo heli’gogo e pam lagabak pesimu, aphwami enebe lo’bok herlegetie iak en lebilenebisoma herlegetie tembaga a’ge ano asogo enil likhogwi holuk, arat op aga legesa o.
Dom Hot pam en o Moab legesa wene
10Asogo toluk, is aphwami Israel a’ge ebano ’berlegat o Obot eba legesarik, onowi sabo werik pagathorloluk welat, 11pobuk, o Obot en o Moab o mo orlu ago akhit o’gwe hegit eba oruakhwe, o leimu o moluk-moluk begeimu Abarim ebano legesarik, onowi sabo uthorloluk welat, 12eba en o Zered dogoma ebano legesarik ebanoat onowi sabo utholuk welat, 13eba en aphwami Amori a’ge emin, Moab a’ge emin, ono’gwiang hwerli pam ik Arnon aphwami Amori a’ge welagaimu en o lei wagoma ik iak pam onowi sabo uthorloluk welat, asogo modogat til nak no’gu legesa.
14Asogo til no’gu legesa ai pam, Buku onuk Allah emin weim tegei, ano pam odo ’baliselat,
“O Sufa o wei lok desa Waheb emin, o Sufa wi-waling o dogo lasegeimu eba emin, ik Arnon non emin
15Ye, o dogo en toluk ’bekhit eso’go-eso’go hwerli-hwerli pil lagama o kota at en ’bekhit, o Moab ono’gwiang hwerli o,”
oluk, odo balegei ano re, aiat o.
16Ik Arnon en ’bekhit hwerli ik ’gwiang delakma o Beer ebanoat legesa. O bet legesa ai re, at Allah en Musa mo’guleselat, “Is aphwami Israel a’ge odoktak pasuam e, ik wogentaik o,” oluk, mo’gulentesi ano arat odoktagonoboluk, ik wogentasuam e.
17-18Is Israel a’ge weni worogulat,
“Hat ’gwiang ele delak a’ge yu o wa e ik elaruk porlolu sogo lebik pisuk o ap lok enaluk agai a’ge onua’gun pam, onua’gun senak a’ge ano pam is ap ononuk logo a’ge en delogo hobogulat, nonuelak ’gain a’ge en ik yu herlage ’belak hobogulat, takhebegesema re, weni e’gerlem weni woruok o,”
oluk, weni worogumu ebanoat legesa. Asogo toluk o leimu ebano en ’bekhit o matana ebano lagalat,
19o Matana en o Nahaliel lagalat, o Nahaliel en o Bamot lagalat,
20Ye, o Bamot en dom Pisga eragam o leimu lagalat o dogo Moab ebano lagalat, til legesa.
Aphwami Israel a’ge en ap onue ’gain Sihon sebelak pegesa wene
21Asogo toluk, is Israel a’ge en aphwami amori a’ge onue Kain a’ge Sihon oruakma wene wusogo Perakpogwiam, legesarik, mo’gulogulat.
22Nis ebela hat welegen o’gwe yu wagalat, hat hiabuk gandum yogo ’gwe emin. Anggur yogo ’gwe emin, ’gwe ai lagalat, ik ’gwiang ele delakma eba na’gogo no’gulat, nonolukhwe erabu akhit ogobu akhit eden-peden ho, erlakma en, ebela lok o’gwe ai nagat ’bekhit til-til ho’gwiangma lip lail lagun en e, mo’gulhosu ege ai o.
23Mo’gulegisema en e, at ap ’gain Sihon ano en, ebela ’go yu wom mia o, oluk, mo’gulentesirik, osilak enesegen oruak a’ge enebe a’bigat odoktegisarik, is Israel a’ge enemin weim tuogoluk, o leimu ebano lip lail legesarik, o Yahas loluk, Israel a’ge enemin weim tegisa.
24Asogo togulat, is aphwami Israel a’ge en wa’gun pam ap Sihon osilak enemin ’berlegat wusogo onoboluk, ono’gwiang ik Arnon pam en ’bekhit ik Yabok hwerli Amon a’ge ono’gwiang hwerli ’belak anni modok welago a’ge ai hwerliat sebeligisa. 25Is aphwami Israel a’ge ebano en aphwami Amon a’ge oruak o’gwe kota-kota ’berlegat sebelil lagalat, o Hesybon wi-waling kota wei-wei a’ge ebano emin, ’berlegat sebelak poluk, o ebanoat sebel egesarik welegesa. 26Is aphwami Amori a’ge onue ’gain a’ge Sihon ano en is Moab a’ge onue ’gain naduk welaga a’ge ano emin weim tagalat, o’gwiang ik Arnon hwerli sebelegei a’ge ano o Hesybon ebayat eiye welaga.
27-30 #
Yer. 48:45,46 Edip asogo tegei ai pam is ap weni pelalogwi a’ge en,
“Ap Hesybon a’gul weni worogulat, odouk o Sihon wagalat, ap Sihon welago ’gwe en odouk magale dadain wagalat, asogo tagokhwe, o Moab dogo ano e nil lasulat, o Arnon ho’gorlak ebano welagai a’ge ’berlegat perlengsogo erlagap pasulat, tegeimu re, his aphwami Moab a’ge yu, erlagap henebegesama re, henebe nede o! heneiyagai logomalik ebano dalong-yalong hweiye ’bogolil lagalat, henemalik hwelani a’ge holuk hogul wogonoboluk lagalat, togu lemagoluk, ap amori a’ge onue ’gain a’ge Sihon ano wogeigep a’geat de, nis en is Amori a’ge sebelak onobogulat, o Hesybon en ’bekhit, o Dibon hwerli erlagap onobogulat, o Hesybon en ’bekhit, o Nofah ’gwiang Medeba hwerli eba ’berlek ’balogo pogwi til legesema re, o Hesybon eba Manis o, woroguptik ai ebalema worogulat, ye, ap Sihon welagama ebalema ’balhorlogulat tip o,”
oluk, weni pogu legesa.
Ap onue ’gain a’ge onuk Og sebelogo pegesa wene
31Is aphwami Israel a’ge en ap ’gain Sihon ano sebelak poluk, aphwami Amori a’ge onowi pam ebano han egesarik welegesa.
32Oruakma, at Musa en o kota Yaezer enil ’gogoli louwak oluk, ap Yenal louwak oluk perak enebegesa a’ge ano togolik wegesarik Musa mo’gulosuagai am e, is Israel a’ge weim til legesarik, o kota Yaezer esa’go-esa’go kota wei-wei a’ge is aphwami amori welagai a’ge ebano mukho lebik onoboluk, o ebano isat sebelhwerlegesa. 33Ai sebelak poluk, pobuk sogulogo ebela o babel o’gwe lagaihwe, aphwami Basan a’ge onue ’gain Og ano osilak enesegen oruak a’ge emin, o Edrei akhit ebane Israel a’ge enemin weim tuogoluk, liplau wegesa.
34Liplau wegesema, at Allah en Musa mo’guleselat, “Ap Og ebe emin, at osilak weim togwi a’ge enebe emin, o no’gwiang emin, ’berlegat hat he’gikmu pegimu re, aphwami Amori a’ge onue ’gain Sihon o Hesybon ’gwelagentarok oruakhwe takpegen ano ’gela’geat tak pagunmu re, at ebe paget hogorlok hagun no yo.”
35Mo’gulentesimu, is Israel ogo inagalat, ap ’gain Og ano emin, at osilak emin, at osilak enesegen oruak a’ge emin, ’berlegat ado pema modok ugonobo erlakma en ’berleksogoat werak onoboluk, o’gwiang ano pam is aphwami Israel a’geat eiye egesarik welegesa.
Actualmente seleccionado:
Bilangan 21: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión