Mitengo 20
20
Gufa ga Miriyamu
1Khu ngima nya guhegule, tshangano watshavbo wa na Israyeli, wu di vboha giwulani gya Zimi, Vathu va diya ghova Kadesi; Miriyamu a difa, va mu dzinga vbale.
Mosi a ngu pandra giwindri Meribha
(Ekisodha 17:1-7; Dzindzimo 95:8-11)
2Vbale gu diri mwalo mati nya gusele, khu guralo, vathu vatshavbo va di tombana va wugela Mosi ni Aroni. 3Vathu va di phela gu gu ganedzisana ni Mosi, khavo: “I tshukwana na hi fude gumogo ni vandriyathu mbeli ga Pfhumu Nungungulu. 4Khu ginani u residego tshangano wa Pfhumu Nungungulu giwulani momu, gasi hi tafa umo, ethu ni sifuyo sathu? 5Khu ginani u hi dusidego khu Egipito u hi resa wulanga wowu nya guvbise kharati? Wulanga nyamba buga mbewu, nyambana mihandro, nyambana vhinya, madimwa ambari mati nya gusele?”
6Khavbo avbo, Mosi ni Aroni, va di khuga vbatshanganotunu, va hongola vbamwanyatunu nya Tshatsha nya Tshangano va ya thega vbavbatshi khu dzikhovbe dzawe; gungangamela ga Pfhumu Nungungulu gu di wonega vbakari gwawe. 7Pfhumu Nungungulu a di ganela a embela Mosi, khuye: 8Dzega ndronga u rana tshangano, uwe ni ndriyago Aroni, mu na ganela ni giwindri na mu gu wonwa khu vatshavbo, igyo gi na dusa mati; khu guralo, u na va dusela mati khu giwindrini, u ninga tshangano wu sela avo ni sifuyo sawe.
9Khavbo avbo, Mosi a di dzega ndronga mbeli ga Pfhumu Nungungulu, kha nga idzo a nga leletedwago khidzo. 10Mosi ni Aroni va di tombanisa Tshangano mbeli nya giwindri, a va embela, khuye: “Enu vawugeli nenu, olu yingisani. Ina hi ngu dzi kodza gu dusa mati giwindrini momu mu selani, gani?” 11Mosi a di khusa mandza yaye a veta giwindri nyondro mbili khu ndronga yaye. Khavbo avbo, ma di duga mati nya mangi; tshangano wu di sela gumogo ni sifuyo sawe.
12 Pfhumu Nungungulu a di embela Mosi ni Aroni, khuye: “Kholu mu ngamba khodwa gwangu, gasi mu nyi agisa mbeli ga va na Israyeli, kha mu na bedza tshangano yoyu ga litigo nyi na gu va ninga.”
13Aya khayo mati ya Meribha,#20:13 Meribha: Gutshamusela gupwani guyeyisa; wulanga va nga ganedzisana ni Pfhumu Nungungulu, avbo Uye a nga va yeyedza wuwadi waye. avbo va na Israyeli va nga ganedzisanago ni Pfhumu Nungungulu, Uye a va yeyedzide wuwadi waye khu ayo.
Mosi a ngu tivisa gutsemakanya khu tigoni ga Edhomi
14Mosi nari tigoni ga Kadesi, a di rumela myango ga mufumeli wa Edhomi#20:14 Edhomi khu lina la situgulwana sa Esawu, ndruye wa Jakobe (wona Gen 25:30). Litigo la Edhomi la gu khala Marandzi nya Yiphwa nya Gufe, khilo litigo leli li ranwago umo nya Testamenta nya Yiphya pwani Idhumeya. gu ya mu embela, khavo: “Ndriyago Israyeli a ngu ganela, kharati: Uwe u ngu siti gwadi sigaradzo satshavbo hi si manidego. 15Vababe vathu va relede tigoni ga Egipito, umo va nga ya vbanyago gikhati nya gulaphe ngudzu, aholu Vagipiti va hi tshaniside ethu gumogo ni vababe vathu.
16Ethu hi lide ga Pfhumu Nungungulu; Uye pwide lito lathu, a hi rumela Ngilozi mweyo, gasi gu ta hi dusa khu Egipito. Olu, ethu hi womo Kadesi, ga lidhoropa li guromo vbafuvbi ni vbinganoni nya litigo lago. 17“Hi dige hi tsemakanya khu tigoni gwago; kha hi na vbindra khu mahangeni, mwendro umo nya vhinya ambari gu sela mati ya milamboni; hi na gimbila khu ndzila; kha hi na phawuga nyambade mwendro nyamudye, kala hi tsemakanya tigoni gwago.”
18Aholu, Edhomi a di hakha, khuye: “U nga vbindri khu tigoni gwathu nyi nga gu khinga nyi ta dwana nago khu matshari.”
19Va na Israyeli va di hakha, khavo: “Hi na bela khu ndzila nya likondro, ha gu ta sela mati yanu eni gumogo ni mitshambi yangu, hi na livba tengo u na wunago; u nga kanakani khu gu hi diga hi vbindra.”
20Aholu uye a di va hakha, khuye: “Mu nga vbindri khavba.” Edhomi a di duga khu guvbiredza a mu khinga nari ni vathu nya vangi va somidego. 21Avbo va na Israyeli va nga wonago gukhavo va ngu himbedzedwa khu Edhomi gu bela tigoni gwaye, avo va di bela khu yimbe ndzila.
Gufa ga Aroni
(Mitengo 33:38-39)
22Va di khuga khu Kadesi gumogo ni tshangano watshavbo wa na Israyeli, va vboha gigomoni gya Hori. 23Pfhumu Nungungulu a di embela Mosi ni Aroni gigomoni gya Hori, mivbinganoni nya litigo la Edhomi, khuye: 24“Aroni a na ya lala gumogo ni vakokwe vaye, kholu kha na bela tigoni eli nyi ningidego sanana sa Israyeli, kholu mu ngamba yingisa lito langu matini ya Meribha. 25Dzega Aroni ni mwanaye Eleyazari, u gwela navo gigomoni gya Hori. 26Tshula dzingandzu dza Aroni u ambagisa mwanaye Eleyazari; kholu Aroni a na ya tshangana gumogo ni va na gyawe afela kamwe vbale.” 27Mosi a di gira kha nga idzo Pfhumu Nungungulu a nga mu leletelago: Va di gwela gigomoni gya Hori na va gu wonwa khu tshangano watshavbo. 28#Wona gambe: Eks 29:29; Mit 33:38; Dhet 10:6. Mosi a di tshula dzingandzu dza Aroni a ambagisa mwanaye Eleyazari. Aroni a di fela vbale, tshokani nya gigomo. Mosi ni Eleyazari va di tshiga khu vbatshani nya gigomo. 29Tshangano watshavbo khu gu wona nya gukhavo Aroni fude, vatshavbo va na Israyeli va di lila Aroni gipimo nya magumararu matshigu.
Actualmente seleccionado:
Mitengo 20: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.