Mitengo 10
10
Mipundru mivili nya parata
1 Pfhumu Nungungulu a di engedza a ganela ga Mosi, khuye: 2“Gira mipundru mivili nya parata; u na yi gira khu parata nya gupfhudwe, u na yi thumisa gu tombanisa khiyo mitshangano ni gu tivisa gukhuga nya mazumbo. 3Ya gu wombwa ya mivili, tshangano watshavbo wu na ta tombana gwago vbamwanyatunu nya Tshatsha nya Tshangano. 4Aholu wa gu wombwa moyo basi, khavbovbo gu na ta tshangana avbo gwago, manganagana ni vathangeli vatshavbo nya sikwata nya likhumi mazana (1.000) ya na Israyeli. 5Avbo wu na gu wombwago pundru, khavbo avbo avo va zumbidego khu Khugadambo va na khuga va gimbila. 6Aholu mwa gu womba pundru khu gikhati nya wuvili, va na khuga avo va ghovidego lizumboni khu phuvbo ga Marandzi; wu na wombwa pundru khu wughoveloni, gasi va khuga. 7Aholu mwa gu vbweta gu tombanisa tshangano, mu na womba mipundru, aholu khu mambe mawombelo.
8Avo va yelago gu womba mipundru yeyi, khu vaphasi nya mhamba nya livelego la Aroni. Nayo yoyu khwa gu kala gupindruga, wu na simama kala ga sanana sanu. 9Mwa gu soma nyimbi tigoni gwanu guya dwana ni valala vanu vatago va ta mi dhumela, gu vbweta mu womba mipundru yi dzuma ngudzu. Khu guralo, Eni Pfhumu Nungungulu, nyi na mi alakanyani nyi mi vbulugisa ga valala vanu. 10Gutsakani gwanu gambe, matshigu nya mibuzo nya yikhongolo ni litshigu nya guphele nya ngima, avbo mu girago miphaso nya guvbiswe numo nya miphaso nya gubonge, mu na womba mipundru. Isoso si na bani siri gialakanyiso, gasi Nungungulu wanu a mi dundrugani. Eni kheni Pfhumu Nungungulu wanu.”
II. KHU SINAYI KALA VBINGANONI WA MOWABHI
Va na Israyeli va ngu khuga khu giwulani ga Sinayi
11Khu mwaga nya wuvili, khu litshigu nya magumavili nya ngima nya wuvili, lipfhi li di khuga khu vbatshani nya Tshatsha nya Tshangano. 12Va na Israyeli va di khuga va phara ndzila va hongola, va diga giwula gya Sinayi. Lipfhi li diya ema giwulani ga Parani. 13Gu diri gikhati nya guhegule va nga khugago, khu gu yingisa sileletelo sa Pfhumu Nungungulu, a nga leletelago Mosi.
14Guhegula gu di thanga mbeli lihundzu la Judha khu sikwata na vari ni ngavbya yawe na va gu thangedwa khu Nasoni, mwamana wa Aminadhabhi. 15Nataniyeli, mwamana wa Sowari, a diri muthangeli nya lihundzu la va na Isakari. 16Avbo nya gikwata nya lihundzu la Zabhuloni, va di thangedwa khu Eliyabhi, mwamana wa Heloni. 17Va di tshula Tshatsha nya Wulanga nya Guage, va na Gerisoni ni va na Merari khavo va nga rwala Tshatsha.
18Khu hwane gu di khuga ngavbya ya lizumboni la na Rubheni, khu sikwata sawe; na va gu thangedwa khu Elizuri, mwamana wa Sedhewuri. 19Gikwala nya lihundzu la na Simiyoni, va di thangedwa khu Selumiyeli, mwamana wa Surisadhayi. 20Gasi gikwata nya lihundzu la na Gadhi, va di thangedwa khu Eliyasafi, mwamana wa Dheweli. 21Khu hwane gu di khuga va na Khowati, va rwala sombo nya guage; avo va thangidego va diri ni fanelo nya guvbiredzele gu tsitsa tshatsha gasi va na Khowati va tago khu hwane, vata wu mana na wu tsitsidwe.
22Khu gulandrela, gu di khuga situgulwana nya lihundzu la na Efrayimi, khu sikwata sawe na va pharide ngavbya nya lihundzu lawe, na va gu thangedwa khu Elisama, mwamana wa Amiyudhi. 23Avbo nya gikwata nya lihundzu la na Manasi, va di thangedwa khu Gamaliyeli, mwamana wa Pedhasuri. 24Gikwata nya lihundzu la na Bhejami, va di thangedwa khu Abhidhani, mwamana wa Gidheyoni.
25Khu hwane gu khuga ngavbya ya lizumboni la va na Dhani, gasi gu sega mazumbo yatshavbo, na va gu thangedwa khu Ayezeri, mwamana wa Amisadhayi. 26Gikwata nya lihundzu la na Aseri, gi di thangedwa khu Pagiyeli, mwamana wa Okarani. 27Ayira, mwamana wa Enani, a di thangela gikwata nya lihundzu la na Nafitali. 28Aya khayo makhugelo ya sanana sa Israyeli, gukhedza khu sikwata sawe, avbo va nga bani va gu khuga.
Mosi a ngu lomba Obhabhi gu hongola naye
29Khavbo avbo, Mosi a di embela Obhabhi, mwamana wa Reweli, nya Mumedhiyani, sade wa Mosi, khuye: “Olu ethu hi ngu hongola ga wulanga, Pfhumu Nungungulu a ganedego, khuye: Nyi na mi ningani; hongole hatshavbo hi na ya gu phara gwadi; kholu Pfhumu Nungungulu tumbiside silo nya sadi ga va na Israyeli.”
30 # Wona gambe: Eks 18:27. Uye a di hakha, khuye: “Eni kha nyi na hongola; aholu nyi na hongola tigoni gwangu ni gwa gilongoni gyangu.”
31Mosi a di ganela, khuye: “U nga hi digi, nya gu gu lomba, kha nga olu u yitigo mipfhuka yathu giwulani momu, uwe u na khala maho yathu. 32Kholu uwe wa gu longoloka ni ethu, esi nya sadi a na gu hi girelago Pfhumu Nungungulu, ethu nethu hi na gu girela.”
33Khu guralo, va di khuga khu gigomoni gya Pfhumu Nungungulu, va dzega pfhuka nya matshigu mararu; Ngasa nya Gidzumeledzwano gya Pfhumu Nungungulu, yi di thanga mbeli gwawe, pfhuka nya matshigu mararu gasi gu vbweta wulanga nya guhefemule avbo. 34Vbamihanitunu lipfhi la Pfhumu Nungungulu li diri vbatshani gwawe, gukhugani gwawe khu lizumboni.
35 # Wona gambe: Dzind 68. Sikhati yi khugago Ngasa, Mosi a di ganela, khuye:
“Khuga Pfhumu Nungungulu
U phalalegisa valala vago,
vatshavbo vale va gu zondrago va na tutume mbeli gwago.”
36Gikhati va rulago Ngasa a di ganela, khuye:
“Wuya Pfhumu Nungungulu,
vbakari ga mazanazana ya va na Israyeli!”
Actualmente seleccionado:
Mitengo 10: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.