EPESUS 3
3
Paulus Bera Yahudi Gom Nim Emba Welemok Yuba
1Ban nenesa leboka, ugun Yahudi gom nim enyek, nara Paulus bera Kristus Yesus amba leboka gasa ek henga gouboka beibnyeknya bedya, ugunsamba mololesin. 2Ugunuk perob dangasin danasa, Imik Neyung ara, alja yuba lero yaban wa nera nak eleganyokaʾ ara, ugunda seleb kelelumaʾ anyaʾ senelamna. 3Imik Neyung adyaʾ unuwanamna senewoka men doknomokaʾ ara, nak an seleb laga nenewoka eleganyok. Damok era, men eini sam mekaʾ momnya doboka beiyisinaʾ ara ella ublum.
4 #
Kol. 1:26-27
Kristus adya blebsinaʾ damoka nidyaʾ doknomokaʾ ara, nadya ganya olowoka ella dasaʾ ara, ugumbabya anyek einiwanalum dara, ella danalum. 5Imik Neyung adyaʾ ban yub enera, youmaʾ dara, doknomokaʾ adya, anyek unuwanasin aboka nim ek laga aawanggusuk bok, wenyek dara, Imik Neyung Geisinya adya dara, Imik Neyung alja yuba lenaʾ gak nang ak hnon, ununumnaʾ len nang ak hnon, laga aawousuk. 6Ban men doknomokaʾ ara, Imik Neyung adyaʾ perob lero yanggan yuba pik uboka, Imik Neyung adyaʾ misaʾ era, perob eleknaʾ youmaʾ dara, Yahudi nim emba ok beillilemok bok, wenyek dara, nimi Yahudi gom nim emba hnon beillilesil. Wera nimi Yahudi gom nim eneba, Imik Neyung adya neik mabo silibaʾ nenewoka, Imik Neyung adya Yesus Kristus pik uboka, eleganesin amokaʾ perobaʾ era, neikaʾ dobnemak aboka wen leb elegousuk.
7Imik Neyung adya nak wanaʾ uboka eleksinaʾ eleganyokaʾ ara, perob lero yanggan yuba lel elekna wa nek hnonok eleganyok. Nara wa nen eleganyokaʾ dobsaʾ ara, Imik Neyung migiba nadya nong lomok ono welenel migib pik eleganyokaʾ ak, yuba len wa nera dobsa. 8Nimi munaʾ Imik Neyung mab ulumakaʾ gangganek ara perob nim ek ulumak bok, nak dara, hyak meilinya bek ulumna. Bok anyek babya, Imik Neyung adya aljaʾ perobaʾ eleksinaʾ ara nak eleganyokaʾ ara, Kristus adyaʾ nidyaʾ olowoka ella damenggom ununaʾ yuba ugunda Yahudi gom nim ek lel eleknaʾ wa nek hnonok eleganyok. 9Yokaʾ-yokaʾ nidyaʾ ulumlaʾ uyimoknya Imik Neyung adya, alja unuwanamna senemokaʾ ara, youmaʾ ekaʾ mouruwoka doknomokaʾ ara, nak pik uboka eleganyokaʾ ara, nimi nidyaʾ ara Imik Neyung ara hekaʾ huboka alja wen unuwanamna senemokaʾ ara ella danamak aboka eleganyok.
10Imik Neyung adya seinimoknya nera, wenera yuba donaʾ nimi pik uboka, imik sam wenewoka bo usin nang, senenggom dub nang ulumakaʾ ara, Imik Neyung adyaʾ hyak senenggomaʾ yok-yok geremsenga boboka, wa welemlaʾ anyek ella danokaʾ aboka seinimok. 11Ban unumoknya nera, men orowek unuwanamnaʾ senemokaʾ sunuwoka, nunjaʾ Wenelesilnya Kristus Yesus pik uboka unusuk. 12Nunda Kristus ak dib senewoka, alab ganya kwebdangoka ulumabaʾ adya, glob lobsuk pik biniboka, asaʾ ganya boboka Imik Neyung berem balamab. 13Ugun nong anyek, na pik uboka perobaʾ nenewosuknya nenesa leboka, nak an igina kweboka malya nenelenelaʾ anara, ugunuk si perobaʾ dolulumaʾ aboka ulumnaʾ anasa, ugunda angwei senewoka, ganya hmenga neneldanaʾ hnon ara, mem aboka moloweisin.
Kristus Adya Ok Wanaʾ Ubsuk Yuba
14Wera ban nenesa leboka, nara nunjaʾ neyung Imik Neyung ak koma lumugoka mololesin. 15Ban Imik Neyung enyek anyeb, alja mab imik ulumak nim eb, sokok sam ulumak nim eb dara, alja si nidyaʾ munaʾ gobdo ella dangoka dolomak. 16-17Ugunda Kristus ak dib senelelumaʾ adya, Kristus enyek ugunjaʾ ganya lomok ulusululaʾ aboka, Imik Neyung ara senenggomaʾ ulumlaʾ anyek sunuwoka, alja Geisinya bedya, ugunja ganya lomok migibaʾ nenewosulul senen ganya boboka mololesin. Ugunja nong unaʾ era wanaʾ unaʾ adya ok oulyanga lokoka goluwoka bo uboka, 18ugunda yok munaʾ Imik Neyung mab ab, nidyaʾ hiboka Kristus adya wanaʾ unaʾ ara, har so waran ulumla, har so denebaʾ ulumla, har so imik ulumla, har so sokok ulumlaʾ anyek, olowoka ella dolululumaʾ aboka mololesin. 19Anya Kristus adya wanaʾ ulusilaʾ ara, nimi ganya sirikaʾ adya dara, nidyaʾ pe olowoka ella danggunusengnya nenyek, ugunda ella dolulum aboka mololesin. Dara, ugun nong ara, Kristus adya wanaʾ unaʾ pe olowoka ella ulumunukanya, Imik Neyung hnonok ok ulumla nong unaʾ enyek, deknewousululaʾ aboka mololesin.
20Imik Neyung migiba nunjaʾ ganya lomok sam seleb welemlakanya, nunja ganya seiniwoka mololemabnya nera mek so bok, Imik Neyung adya dara, hyak nauba so sounuwoka yokaʾ perobaʾ nidyaʾ unululanya bek, 21Kristus Yesus pik uboka, nim Imik Neyung yuba donaʾ nimi pik uboka, sounuwoka likoka sobaʾ gibgiga balanok. Amin!
Actualmente seleccionado:
EPESUS 3: LAINLC
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión