ROMA 7
7
Sasoser fakawawin ḇye fasasnai
7:1-13
1Naek srar ayesi mko! Mkokam mkofawi sasoserya kwar. Inja mkofawi papoik ro sasoserya isya faro snonkaku oso, rofyor snonkaku ani isya ikenem kaker? 2Imnis bin oso isma yaḇyaḇek kuker sasoser faro swari rofyor swari isya ikenem kaker. Rofyor swari imar kwar bin ani imkeibur sasoser ḇefesepeni faro swa ḇyani. 3Rofyor bin ani ikenem kuker snon oso ḇese rofyor swa ḇyedi isya ikenem kaker, bin ani skoriḇe ḇefrur farbuk. Ḇape rofyor swari imar, raris sasoseryanido, bin ani imkei kwar. Ma rofyor fyakawin kuker snon oso ḇese werido, skoriḇe ḇefrur farbukḇa. 4Rarirya kuker mko, naek srar ayesi. Faro sasoser agama Yahudi naek srar mkomar kwar, snar mkoḇe oser kwar kuker Kristus baken ḇyedi snar marmar ḇyedi, ma nya mko kwar. Ḇyeḇeḇawes ro marmarya insa koḇe fainda faro Allah ro kankenem koḇena. 5Snar ro randakya, kokenem imnis rari snonkaku. Rofyor ani rmomen ḇesasar, naiso ḇeyek ro kosnesna snar sasoser agamaya iso ḇeyufepenko. I ḇeḇewar fa kofrur roi ḇeyun faro marmarya. 6Ḇape baboine koḇe ḇefesepen kuker sasoser agama Yahudi anna werḇa. Komarbur papoik ro sasoser randakya ḇeyaḇek ko kwar. Inja koḇe manfyan faro rari ḇekwarnaḇa kwar, imnis sasoser ḇeser fasfasna. Inja baboine koḇe manfyan koso rari babo Allah Rur ḇyedi fyasna maḇe konya.
7 #
Kel. 20:17; Ul. 5:21 Rarirya ido, rosai koḇe kokofenya? Sasoser Refo Yahudi nbarḇorke? Roḇa kaku! Ḇape sasoser anna naiso ḇefarkor aya ro sasarya. Yafawiḇaḇeri rosaiso rmomenya, rofyor sasoser Refo Yahudi anna nakofen pyan iḇa, “Warmomen awer.” 8Imnis raris sasoser Refo Yahudi anna, sasarya isma nyan fa ḇyawes marisen famfnom ḇeyek ro sneri; snar rofyor sasoser anna naisyaḇa, sasarya kako nari imar. 9Ro randakya, yakenem kuker sasoser agamayaḇa. Ḇape rofyor sasoser agamaya isya kwar sasarya kako isya ḇeri 10ma yamar. Inja sasoser agama ro randakya kokara nari ḇeḇuk kankenem, ḇesyaḇo nbuk marmar maḇe aya. 11#Kej. 3:13Snar sasoser agama anna, sasarya kako isma nyan fa ifrowes aya ma myun aya.
12Sasoser agama anna neknam ro Allah, ma sasoser anna ndama ro Allah, inja nanapes ma naḇye. 13Inja, rarirya ido roi ḇeḇye anna nun marmar maḇe ayake? Oroḇaḇeri! Mboi sasarya iso ḇeyun marmarya. Kuker roi ḇeḇye anna, sasarya dun marmar maḇe aya, insa rari ḇesasarna nfasna bos kaku. Kuker sasoser Allah ḇyena sasarya ḇarḇor ḇyena nasna bos kaku.
Famfaḇri sasoser Refo Yahudi ma sasarya
7:14-25
14Kofawi sasoser agama Yahudi anna neknam ro Allah Rur ḇyedi, ḇape aya inekada snonkaku ḇesamḇraḇ ḇa. Yaḇe ḇeḇoḇ kwar fa yaḇe women faro sasarya. 15#Gal. 5:17Snar aya ḇardi yafawi roi yafrurnaḇa. Snar roi yamarisen na yafrur naḇa, ḇape rosai yayin na, naiso yafrur na. 16Inja, rofyor yafrur rosai ḇefasasye marisen ayena ido, irya yakarem mboi sasoser agama Yahudi nanapes. 17Rarirya ayai ḇefrur nayaḇa ḇoi, papoik sasar ḇero baken ayejaya. 18Yafawi kaku, mboi roi ḇeḇye oso isya roi baken ayejaḇa; isoine ro rari ḇaḇesnonkaku ayedi. Snar yamarisen fa yafrur roi ḇeḇye, ḇape yasambraḇ fa yafrur naḇa. 19Roi ḇeḇye yamarisen fa yafrurna yafrur naḇa; mboi roi ḇeḇarḇor yamewer naiso yafrur na. 20Inja rofyor yafrur roi yamewer naido, irya fyasna ḇadir ayaiso ḇefrur nanyaḇa ḇoi, papoik sasar ḇero baken ayejaya.
21Inja, yun kakara ro mankundaya ḇo yoḇo, sasoser ine iso ḇefasnaya; isoine rofyor yamarisen yafrur roi ḇeḇyeido, roi ḇeḇarḇor naiso ḇeyek ro aya na. 22Sneri kada imarisen faro Allah sasoser ḇyena, 23ḇape yafawi kaku ro baken ayeja sasoser oso ḇese isya ḇeyufepen aya – isoine sasoser ḇesampum kuker sasoser raris kakara fawawi ayena. Iso ebedari sasoser sasarya iyabek aya. 24-25Inja, yakenem radine: Yasouser Allah sasoser ḇyena kuker fawawi ayena, ḇape kuker rari ḇaḇesnonkaku ayeja, yakenem faro sasarya. Aya ine snonkaku ḇeroë! Mansei nari ḇemarisen ḇefaspar ayabur baken ine ḇeyun aya faro marmarya? Kasumasa faro Allah! Snar imarisen fyaspar aya kuker Yesus Kristus.
Actualmente seleccionado:
ROMA 7: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión