ROMA 16
16
Aroo ro aya ḇardi
16:1-16
1Yamarisen yakofen ḇadir srar koḇedi, Febe. Ifnoḇek jemaat ro Kengkrea. 2Mkonai imnis snonkaku oso rofandu Manseren kawasa ḇyesi. Mboi rarirya kawasa ḇekyar faro Allah snayae si. Mkofnoḇeki rofyor ḇyefandun famfnoḇek ro mko, snar i ḇardi ifnoḇek snonkaku sibor kwar ma aya kako.
3 #
Kis. 18:2
Mkokofen ḇadir aroo ayena faro Priska ma Akwila, min ayesi ḇefararurkam faro Yesus Kristus. 4Indokada simar sadwer aya, snar simarisen sfaspar aya. Yakofen kasumasa farosi – ma yererḇa ḇoi, jemaat-jemaat er ḇese ḇeḇe Yahudiḇasya kako sikofen kasumasa faro su. 5Mkokofen aroo ayena kako faro jemaat ḇefanjur ro rum subedi.
Aroo faro Epenetus yaswar kaku. Iso bekyar randak faro Kristus ro sup Asia. 6Aroo ayena kako faro Maria. Snar ifararur sambraḇ kaku faro mko kwar. 7Mkokofen ḇadir aroo ayena kako faro Andronikus ma Yunias. Sukada su ḇekeret ma er oser kuker aya ma su yaksun bui kwar fnoḇek aya. Rofyor yakyar faro Kristus ḇaim, sukada sukyar ḇepon kwar. Manwawansya sifawikam su.
8Aroo faro Ampliatus, yaswar kaku ani snar i kuker aya nuḇe oser kwar kuker Manseren. 9Mkokofen jow ayena faro Urbanus, min koḇedi ḇefararur fnoḇek ko faro Kristus. Ma jow ayena kako faro Stakhis yaswar kaku ani. 10Aroo faro Apeles. Snar ḇaḇeyuser ḇyena faro Kristus nbair kwar. Aroo kako faro Aristobulus kina ḇyesi, 11ma faro Herodion. I kuker aya nuna keret ma er oser. Aroo kako faro naek srar ḇena kakyar oser ro Narkisus kina ḇyesi.
12Aroo ayena kako faro Trifena ma Trifosa ḇefararur sambraḇ kaku ro afuffarmyan faro Manseren, ma faro Persis yaswar kaku ani. I kako ifararur sambraḇ faro Manseren kwar. 13#Mrk. 15:21Aroo faro Rufus ma snari, imnis sna ayedirya kako. Rufus snonkaku Manseren kyinfir ma ḇesma sanandik rirya. 14Mkokofen ḇadir aroo ayena faro Asinkritus, Flegon, Hermes, Patrobas, Hermas ma kawasa kam ḇesma kakyar oser fnoḇeksi. 15Aroo faro Filologus ma Yulia; faro Nereus ma srar ḇyedi; faro Olimpas ma faro snonkaku ḇekyar fnoḇeksya kam.
16Mkoḇe arooyae mko kuker saswar, imnis naek Kristus. Kristus Jemaat-jemaat ḇyenakam sikofen aroo sena faro naek srar.
Ananun ḇepupes
16:17-24
17Naek srar! Yor kaku ḇeri mkoḇesasor mko ro snonkaku ḇefarkor ninyan ma ḇefrowes mko ro kakyar mkoḇena faro Manseren. Roi ḇerarirya, nasampum farkarkor ssḇuk kwar faro mko. Mkoḇinkwanbur snonkaku ansi. 18Snar snonkaku ḇefrur rarirya ansi sifararur faro Kristus Manseren koḇediḇa, mboi sifararur faro rmomen mankunsi sena monda. Kuker ḇaḇyuk ma wosman sḇeankar snonkaku ḇefawi royoḇasya. 19Snonkaku sifawikam kwar, mboi mkomarisen faro farkarkor ro Ankankinem Ḇeḇye ro Allah. Ma yamarisen snar roi ḇerarirya faro mko. Yamarisen insa naek srar mkofawinanem ro roi ḇeḇye ma mkofawi royoḇa ro roi ḇeḇarḇor na. 20Allah ḇeḇuk aski faro snonkaku, nari ḇyuk papoik faro mko fa mkoḇuki dawef Ibirisya.
Manseren koḇedi Yesus Kristus ḇyeḇok naek srar mko ḇesya kwarkada!
21 #
Kis. 16:1
Min ayedi Timotius, ḇyuk aroo faro naek srar. Rarirya kako Lukius, Yason ma Sosipater, ḇeḇekeret ma er oser kuker aya.
22Befas syap ine aya Tertius. Yakofen aroo faro naek srar mko.
23 #
Kis. 19:29; 1 Kor. 1:14; 2 Tim. 4:20 Gayus fyarem aroo faro naek srar. Yaḇeryar ro rum ḇyedi ma nkoḇeari ro rum ḇyedi kako. Erastus ḇeḇe ḇukor ro ḇaḇepipi ro mnuya, fyarem aroo faro naek srar. Rarirya kako naek kobedi Kwartus. [24Manseren koḇedi Yesus Kristus ḇyeḇok naek srar, mko ḇesya kwarkada. Amin!]
Wos ḇesisen syap
16:25-27
25Sanandik faro Allah! Ikada ipok ḇyuk samambraḇ ma kakyar faro naek srar imnis Ankankinem Ḇeḇye ro Allah yaḇaryas kwar ro Yesus Kristus. Yaḇaryas ḇararyas ani imnis rosai Allah fyasna kwar; isoine roi Allah daw kwar ro wampasi wambarek utin-utin snonkaku sifawiḇa. 26Ḇape baboine raris Allah sasoser ḇyedi, aw ani ḇyeḇefasna ma ḇyeḇeḇaryas faro er-er kam kuker fas-fas ro nabi-nabisya, insa sikam sikyar ma sisoyuser Allah.
27Ikada Allah oser monda befawinanem syadi.
Iḇyekada mkobesyowi Allah, isof fyoro-fyoro ro Yesus Kristus! Amin.
Ro aya, Paulus, manfamyan ro Yesus Kristus
Actualmente seleccionado:
ROMA 16: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión