FARFYAR RO MANWAWANSYA 23
23
1Paulus iknower ḇebarara Kankain Karkara Agama ansi, posa ikofen: “Ne, naek srar ayesi, isof ro ras ine yakenem kuker sneuser ḇesren ro ḇarpon Allah.” 2Ḇape Imam Ḇeba Ananias iwan fa snonkaku ḇeyores fanam Paulus ḇyaser Paulus sḇari. 3#Mat. 23:27-28Paulus ikofen faro i: “Allah nari ḇyaser au, ne, arsen kamara ḇepyoper! Kwain ro dine fa kwukeḇ aya raris sasoser Refo Yahudi, ḇesyaḇo ḇeyuk sasoser Refo Yahudi kwar ḇo swoser fa sḇaser aya.”
4Inja snonkaku ro dia sikofen: “Kworyae Allah Imam Ḇeba ḇyedi?”
5 #
Kel. 22:28
Paulus kyarem: “Ne, naek srar ayesi, yafawiḇa i kada Imam Ḇeba. Kaku fas-fas isya: Wonef awer oso ro ḇebarara manfarkin er mkoḇesi!”
6 #
Kis. 26:5; Flp. 3:5 Ma snar ifawi, ro fandu si ono ssun ro rarwas Saduki ma ono ssun ro rarwas Farisi, inja dor naba ro Kankain Karkara Agama ani, ḇo doḇo: “Ne, naek srar ayesi, aya ine snon Farisi, ḇeḇeḇarpur ro snon Farisi; mkun aya ḇe ḇarpon Kankain Karkara ine, snar yakyar nari aḇiḇer ro snonkaku ḇemar sya.” 7Rofyor dawos rarirya, serwas ḇesuru ro fandu kawasa Farisi ma Saduki ma snonkaku ḇeḇor ansi sirarwas si. 8#Mat. 22:23; Mrk. 12:18; Luk. 20:27Snar Saduki soḇo, aḇiḇer ḇa ma malaikat ḇa roḇaido rur ḇa, mboi Farisi sya kada skarem nakam. 9Rarirya sembrus ḇeba. Snon ḇefawinananem Refo Yahudi ro rarwas Farisi ono siyor si ḇebarpon ma sfamfaḇri, soḇo: “Nkosma sasar osoḇa ro snonkaku ine! Imbude rur roḇa malaikat oso ḇeyawawos faroi kwar.”
10Isof sifrur rakrok ḇeba, inja mananir sarar imkak, imbude spawakuk Paulus. Rarirya ḇyuk sasoser faro sarar ansi insa sado fa ssun Paulus ro fandu si ḇe ayar mamun.
11Ro roḇ riwer Manseren ryama dores fanami ma ikofen faro i: “Swambraḇser snembri, snar raris waḇri kuker aya ro Yerusalem, rarirya kako nari rwa besaksi ro Roma.”
Yahudi ono saw fa siḇe smun Paulus
23:12-22
12Ro fafisu isnai kwar, snon Yahudi ono saw ma ssowar ḇo sifras mankundi soḇo, nkomun Paulus ḇayim nkopok nkonan ba ma nkinem ba. 13Kawasa ḇeaw kwar fa ḇeḇe ḇemun Paulus ansi ḇarbor sedi isyadi ro snon samfur rifiak. 14Sra faro mananir-mananir imam-imam ma ḇebarara er Yahudi ma sikofen: “Nkosowar kwar, ma nkofras mankun nko, rofyor nkomun Paulus ḇayim, nkopok nkanan ba ma nkinem ba. 15Inja mkofnoḇek Kankain Karkara Agama ma mkor faro mananir sarar ani, ḇyuk Paulus faro mko wer farari mkoḇe mkokukeḇi, kuker aunos, ma rofyor ani nko kada nkofasos fa nkomun Paulus ro fyor ssuni faro mko ḇaim.”
16Ḇape Paulus fnori (sradi romawa ḇyedi), imnaf smai sansin ani. Inja ryaḇe ayar mamun ma fyor simarisen kwar fa syun, ikofen ḇadir faro Paulus. 17Rarirya Paulus dor mananir sordade oso ma ikofen faroi: “Wun romawa ine faro mananir sarar, snar ḇyefandun ikofen ḇadir roi oso faro mananir sarar ani.” 18Mananir sordade ani duni faro mananir sarar ani ma ikofen: “Paulus snon ḇesmai ani dor ro aya ma ikofen insa yun snonkbor ine faro au, snar ḇyefandun ikofen roi oso faro au.”
19Rarirya mananir sarar ani ikfin romawa snonkbor ani ḇeḇandi fa suyerer ma ifuken: “Rosaiso woḇo wakofen ḇadir faro aya?”
20Kyarem: “Snon Yahudi ono sna awi kwar fa sor ro au, insa meser buk Paulus wer ḇe ḇarpon Kankain Karkara Agama, Kankain Karkara ine imnis raris siḇe ssewar sananai fa sifawi kaku kuker aunos roi. 21Ḇape rwower awer si, snar isyadi ro snon samfur rifiak sfasos kwar fa sisin Paulus. Sowar kwar ma sifras mankunsi soḇo, smun Paulus ḇayim sipok sanan ma sinem ba; sisya sfasos kwar ḇoi si waf monda wos ḇepupes ro au.”
22Rarirya mananir sarar ani iwan romawa snonkbor ani fa ibur ma danun faro i: “Wakofen awer faro manseirya kaker, mboi auso ḇerama kwar fa ḇekofen ḇadir faro aya.”
Paulus suni ḇe Kaisarea
23:23-35
23Ḇarpur ya mananir sarar ani dor mananir sordade-sordade risuru ma ikofen ḇo doḇo: “Mufasos sordade utin risuru fa sraḇe Kaisarea fnoḇek snon ḇeyek kuda samfur rifik ma snon ḇeyuf bom, utin risuru indokada ro oras siw ro roḇ ine. 24Mufasos kako keledai snonkaku sakek ro ono faro Paulus ma mkun payamyumi faro gubernur Feliks.” 25Ma fyas syap oso, moḇ ryok raiso ine: 26“Aroo ro Klaudius Lisias faro gubernur Feliks ḇepyum.
27Snon ine Yahudi sya sfori ma fafisu siḇe smuni, yara kuker sarar ayesi nkodwarek ma nkofaspari, snar yamnaf snon anine ikada snon Roma rirya. 28Insa yafawi roi ḇefnai fa sḇuksofi, inja yuni ḇeḇarpon Kankain Karkara Agama sedi. 29Isnai faro aya fa yafawi roi sḇuksofi kuker ya, isoine mnuk ḇekur sasoser Refo Yahudi sedi, ḇape yasmaiḇa roi sḇuksofi fa ismai samamyai marmar roḇa samamyai bui. 30Snar sikofen ḇadir fa yafawi kwar, ono sna awi kwar fa siḇe smuni. Inja fasaw kaku yawan fa suni faro au, ma yakofen ḇadir faro ḇeḇuksof isya kwar, insa ssun wawos sena faro au.”
31Raimnai sordade ansi ssun Paulus imnis raris sasoser sisma ya, ma simbran ro roḇ ḇe Antipatris. 32Ro meserdi srir snon ḇeyek kuda ansi kuker Paulus fa simbran pdef, ḇoi sikada skaḇer ḇe ayar mamun. 33Sra kwar ro Kaisarea ssḇuk syap ani ma Paulus kako faro gubernur. 34Ma rofyor syap ani ḇyeḇewasya kwar, gubernur ani ifuken Paulus beknam ro propinsi rosai. Ma rofyor imnaf, Paulus ryaker Kilikia, 35inja ikofen: “Nari yakara wawos ḇena rofyor ḇeḇuksof au sya srama kwar ro dine.” Raimnai iwan fa siwaren Paulus ro Herodes rum ḇyedi.
Actualmente seleccionado:
FARFYAR RO MANWAWANSYA 23: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión