FARFYAR RO MANWAWANSYA 17
17
Aru biru ro Tesalonika
17:1-9
1Paulus ma Silas suso nyan ḇeyunuk Amfipolis ma Apolonia isof sura ro Tesalonika. Ro dia rum ari Yahudi oso isya. 2Raris fararur ḇyedi Paulus syun ro rum ari ani. Ro ras Mananai Yahudi rikior iwawos kuker si ro mnuk oso ro Refo. 3Ikofen asuser faro si ma kyur fasnai, nari Wairek isma marindi ma diḇri fandu ḇemar sya, raimnai ikofen: “Ine Wairek, isoine Yesus, yaḇaryas faro mko.” 4Ono ro si sikyar ma seoser kuker Paulus ma Silas ma kawasa Yunani sibor kako ḇeyararyof faro Allah ma bin-bin ḇefawi ono sibor kaku.
5Ḇape kawasa Yahudi sya simsor ma sisma famfnoḇek ro snon ḇarḇor ono ro fandu ḇeḇekirḇa ro pasar, fa sifrur mbrus ma searubiru mnu ani. Soper Yason rum ḇyedi kuker swaruser fa ssun Paulus ma Silas ḇe ḇarpon fananjur kawasa ḇeḇor. 6Ḇape rofyor sisma su ḇa, sismer Yason kuker naek ono ḇe ḇarpon ḇebarara ro mnuya, ḇo ssibras, ḇo soḇo: “Snonkaku ḇefrur aru biru ro supswan ḇesiper srama kwar kako rodine, 7ma Yason dun si fa seryar ro rum ḇyedi. Sikam sisampum Kaisar sasoser ḇyena ma sikofen, wairek ḇeso oso isya, isoine Yesus.” 8Rofyor kawasa ḇeḇor ansi ma ḇebarara ro mnu simnaf wos anna kam, sikam sefesfyas. 9Ḇape sisma ḇaḇyak kwar ro Yason ma naek srar ono ḇeso inja srir si.
Paulus ma Silas ro Berea
17:10-15
10Ḇape ro roḇya beri naek srar ḇero dia siwan fasaw Paulus ma Silas fa suraḇe Berea. Sura kwar ro dia suraḇe Yahudi sya rum ari sedi. 11Kawasa Yahudi ro mnu ani sisnesna nfafir syadi kawasa Yahudi ro Tesalonika, snar sikada simnaf wosya kuker sne ḇemarisen syadi ma ras-ras kam sewasya Refoya fa ssḇuk karkara farkarkor simnaf na nkaku rariryake roḇa. 12Sibor kaku ro fandu si sikyar; ma bin-bin ḇefawi ono sibor kaku ma snon Yunani ono kako. 13Ḇape rofyor kawasa Yahudi ro Tesalonika sifawi, ro Berea kako Paulus ḇyaryas Allah wosya kwar, srama kako ro dia fa sfarkor ninyan ma searu biru snonkaku ḇeḇor ansi sisnesna. 14Ḇape naek srar ansi siwan fasaw kaku Paulus fa ryaḇe swan andir, ḇoi Silas ma Timotius sukada sukain kaker ro Berea. 15Kawasa ḇeyaker Paulus sya sisoi isof ro Atena, raimnai skaḇer kuker ankinem faro Silas ma Timotius, insa susamberen snari.
Paulus ro Atena
17:16-34
16Fafisu Paulus iwaf su ro Atena, sneri fyafayaf kaku snar myam mnu ani ifo kuker amfyanir-amfyanir karwar. 17Eḇedari i kuker kawasa Yahudi ma kawasa ḇeyararyof Allah sya skarkara ro rum ari, ma kuker snonkaku ras-ras kam isrow ro pasar sya. 18Ma kuker ḇefawinananem swaruser ono kako ro rarwas Epikuros ma Stoa sfamfaḇri swaruser kuker i ma ono sikofen: “Inja rosaiso mandaw ine imarisen ikofen ine?” Ḇape ḇeso sya sikofen: “Imbude ḇaryas farkarkor ro karwar mandaman.” Snar ḇaryas Ankankinem Ḇeḇye ro Yesus ma aḇiḇer ya. 19Inja ssuni ḇe ḇarpon kankain Areopagus ma sikofen: “Inko marisen fa inkakfawi farkarkor babo rosaiso farkor ine? 20Snar roi wakofen faro inko nane nafrur kanandor. Inja inko marisen inko fawi, rosai ḇeḇesya nakam.” 21Kawasa Atena ma kawasa mandaman ḇekain ro dia sisma mnis fafisuḇa faro roi ono mboi simarisen sawawos ma simnaf ro roi ḇeḇor ḇebabo.
22Paulus rya dores ro Areopagus ma ikofen: “Ne, kawasa Atena, yamam, ḇoi ro roi ḇeḇor kam mko myaren kaku mkoḇe ari faro karwar-karwar. 23Snar rofyor yambran mura-muma ro mnu mko ḇedi ma yamam roi mko sandik na, yasrow kako rokef farsarser oso kuker fas-fas: Faro Allah inko fawiḇa. Rosai mkofawiḇa ḇoi mko syom, iso yaḇaryas faro mko. 24#1Raj. 8:27; Yes. 42:5; Kis. 7:48Allah ḇefrur kwar supswan kuker roi ḇeḇor ḇeroina kam, i rya, Manseren ro nanki ma supswan, kyain ro rum karwar snonkaku sya sifrur kuker siḇrasna ḇa, 25ma kako suf farmyan kuker ḇramin snonkaku ḇa, imnis raris nyamnis roi onoḇa, snar iso ḇeḇuk kenem ma knaref ma roi ḇeḇor kam faro snonkaku sya. 26Ro snonkaku oser baken ifrur kwar er-er kam ma snonkaku fa skain ro supswan ḇesiper ma ryir kwar faro si wampasi wambarek ma yawek na ro kankain sena, 27insa ssewar i ma span ma sisrow i, mboi ḇyinkwan koḇa. 28Snar ro i kokenem, komararer, koisya, imnis raris moḇ manwarwor mko ḇesi sikofen kwar:
Snar koine koḇekpu ro Allah kako.
29Snar koine koḇeknam ro kpu Allah, rarirya kopok kokara awer, isoine ḇaḇe Manseren imnis raris brawen roḇa sarak roḇa karui, fararur kamasan ma fawawi snonkaku. 30Inja Allah myam werḇa faro awar fawawiḇa, mboi baboine Allah ḇyaryas faro snonkaku sya, ro moḇ nakam fa simbror. 31Snar fyasnai kwar ras oso, fafisu rosai kuker napnapes nari ḇyemankara supswan kuker snonkaku oser fyasnai kwar posa ḇyuk faro kawasa kam fasasnai oso kuker ḇyaws i bur ḇemar sya.”
32Rofyor simnaf aḇiḇer ro snonkaku ḇemar sya, ono skoryaye, ma ono ḇeso sikofen: “Fafisu ḇeso resari inko mnaf wawos wer ro mnuk ani.” 33Raimnai Paulus ibur si. 34Ḇape snon ono seoser kukeri ma sikyar, ro fandusi Dionisius, oso ro kankain Areopagus ma bin oso snori Damaris, ma snonkaku ono kako si fnoḇek sko.
Actualmente seleccionado:
FARFYAR RO MANWAWANSYA 17: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión