FARFYAR RO MANWAWANSYA 15
15
Fananjur ro Yerusalem
15:1-21
1 #
Im. 12:3
Snonkaku ono sraker Yudea ḇe Antiokhia ma ssḇuk farkarkor faro naek srar ḇero dia: “Rofyor mko ḇeḇesofuk ḇaim imnis, rari Moses ḇyefa ḇeḇepusaka, nari mkopok ḇa fa mkosma koreri.” 2Ḇape Paulus ma Barnabas susampum karkara sena. Ḇarpurya sfasnai, Paulus ma Barnabas kuker snonkaku ono ḇeso wer ro jemaat ani insa sraḇe Yerusalem faro manwawan-manwawan ma penatua-penatua sya fa sawawos ro mnuk ani.
3Jemaat ani siyaker si isof ro mnu ya ḇandiri, raimnai simbrainuk Fenisia ma Samaria, ma ro moḇ anna sfarfyar ro marandor kawasa ḇeyakfawi Allah ḇa sya. Farfyar anna nafrur raryaḇ naek ansi sisnesna. 4Skora kwar ro Yerusalem jemaat ma manwawan sya kuker penatua-penatua, sisrow si ma sfarfyar faro si ro roi ḇeḇor kam Allah ifrur kuker si. 5Ḇape snonkaku ono ro rarwas Farisi, ḇekyar kwar sya, srama ma sikofen: “Snonkaku ro er ḇeso ḇekyar kwar sya nari seḇesofuk ma seuser Moses sasoser ḇyena.”
6Inja manwawan ansi ma penatua-penatua skankain fa sawawos ro mnuk ine. 7#Kis. 10:1-43Skara fyoro kwar ro mnuk ani, ḇarpur ya Petrus iyori ma ikofen faro si: “Ne, naek ma srar mko, mkofawi, ro randakya Allah kyinfir aya ro fandu mko, insa kuker sḇadon yedi er-er ḇeso sakmnaf ḇaryas ankankinem ḇeḇye ma sikyar. 8#Kis. 2:4, 10:44Ma Allah, ḇefawi snonkaku sisnesna, fyasnai marisen ḇyedi kwar insa daknasi snar byuk Rur Ḇesren ya kako faro si imnis ḇyuk faro ko, 9ma ipok ifrur rarwas osoḇa ro fandu ko kuker si, rofyor fyasren sisnesna kwar snar kakyar sena. 10Rariryaido, snaro mko marisen mko frowsbir Allah kuker mkorir ro erdai kawasa Kristen ansi kamnam oso, kpu koḇesi sipok sḇarḇa, isof baboine kokako? 11Rarirya, ko kyar, saswar-fakamaman Manseren Yesus Kristus nari kosma koreri imnis si kako.”
12Inja er ansi kam sefasis, ḇo simnaf Paulus ma Barnabas sufarfyar aḇyair ma fasasnai kanandor nakam Allah ifrur kwar kuker su fandu er-er ḇeso sya. 13Paulus ma Barnabas sumnai ro wawos suḇena kwar, Yakobus ikofen: “Ne, naek ma srar, mkomnaf aya: 14Simon fyarfyar kwar, ro randak ya Allah fyasnai fakamaman ḇyedi faro er-er ḇese, isoine kuker kankinfir er oso ro fandu si faro snonsnon ḇyedi. 15Mnuk ani imnis kuker fasfas ro nabi-nabi sya wos sena:
16 #
Am. 9:11-12
‘Ḇarpur nari yakaḇer ma yaḇawes wer aḇdares Daud ḇekarḇaken kwar,
ma bemkokna nari yaḇawesna wer ma nari yaḇefa nadworen,
17Insa kawasa ḇeso sya kam ssewar Manseren ma er-er kam ḇefawi
Allah ḇa sya, yorsi ḇekawasa yesi rarirya Manseren ḇefrur nakam wos ḇyedi,’
18ma neḇefawi ḇepon kwar ro awar madero.”
19“Inja yakara, imnis ḇa fa kofrur kandera faro er-er ḇeso ḇekaḇer faro Allah. 20#Kel. 34:15-17; Im. 17:10-16, 18:6-23Mboi kofas syap farosi, insa sḇinkwan bur roḇean sḇukfarser kwar faro amfyanir sya fa ḇearwarem, ma farbuk, ma aiwan ḇemaruk ma rik. 21Snar ro awar ḇepon iwara Moses sasoser ḇyena sḇaryasna ro mnu oser-oser, ma isof baboine sasoser anna siwasyana ro ras-ras Mananai Yahudi ro rum-rum nadi.”
Kankarem faro Antiokhia
15:22-34
22Inja manwawan ansi ma penatua-penatua kuker jemaat ḇesiper ansi sawos namuk fa skinfir ro fandusi snon ono fa nari siwan siḇe Antiokhia fnoḇek Paulus ma Barnabas, isoine Yudas sap i kakoḇe Barsabas ma Silas. Snonkaku ansuine semaf su ro fandu naek ma srar ansi. 23Ssḇuk syap oso farosi ḇerok radine: “Aski ro manwawan-manwawan ma penatua-penatua, ro naek srar mkoḇesi faro naek srar ro Antiokhia, Siria ma Kilikia ḇeḇeknam ro er-er ḇeso. 24Inko mnaf kwar, naek ono ro fandu inko, ḇesmai ankinem ro inkoḇa, mboi ḇerafa ḇefrur ḇirḇar mkosnemna kuker farkarkor sena. 25Eḇedari kuker sne ḇesiper inkawos namuk kwar fa inko kinfir ma inkowan snonkaku ono faro mko fnoḇek Barnabas ma Paulus inko swar ansu, 26isoine snonkaku risuru ḇeḇuk nyawa kwar snar snonsnon Manseren koḇedi Yesus Kristus. 27Inja inkowan Yudas ma Silas, insa suwos asuser anun ḇefas ro syap ine faro mko kako. 28Snar Rur Ḇesren ya imarisen ma inko kako inko marisen, insa korir awer faro mko kamnam ḇeḇor ro roi ḇeḇefandun nane: 29inja iḇye mko ḇinkwan bur roḇean ḇefarsarser faro karwar, ma rik, aiwan ḇemaruk ma farbuk. Rofyor mko sasor mko ro roi ḇeḇesya nane, mkoso pyum kwar. Irya kwar, aski ḇemko.”
30Siser siḇrasna kwar, Yudas ma Silas sumbran ḇe Antiokhia. Ro diwa sor jemaat ḇesiper fa siryur, raimnai skoḇuk syap ani farosi. 31Sewasya syap ani kwar, jemaat simarisen kaku snar rakrok ya ḇyuk sneprei. 32Yudas ma Silas, nabi suirya kako, inja fyoro kaku suḇuk swarepen faro naek srar ansya ma susonem sisnesna. 33Ma sukain fyoro knik ro dia, raimnai naek srar ansi srir su kuker aski fa sukaḇer faro ḇewan susya. [34Ḇape Silas kada imarisen kyain ro dia.]
Famfaḇri fandu Paulus ma Barnabas
15:35-41
35Paulus ma Barnabas sukain fyoro knik ro Antiokhia. Sufnoḇek kawasa ḇeso sibor, suḇuk farkarkor ma suḇaryas Manseren wosya.
36Ḇape ḇarpur ya ro fafisu ono Paulus ikofen faro Barnabas: “Iḇye ko kaḇer faro naek srar koḇesi ro mnu-mnu, moḇ ko ḇaryas Manseren wos ḇyena, insa komam rariso kankenem sena.” 37Barnabas imarisen dun kako Yohanes sap iḇe Markus; 38#Kis. 13:13ḇape Paulus ikofen bos, ipyumba fa kun snonkaku ḇebur ko kwar ro Pamfilia ma ḇemewer ḇefararur fnoḇek ko. 39Mnuk ani ḇyeknam famfaḇri ḇefnakḇa isof suḇe sisye ma Barnabas dun Markus kako fa isoi ḇo suyayun ḇe Siprus. 40Ḇape Paulus kyifir Silas, ma naek srar ansi srir sko faro saswar ma fakamaman Manseren. 41Ma skombran yar Siria ma Kilikia ḇo suḇuk sambraḇ faro jemaat-jemaat ro dia.
Actualmente seleccionado:
FARFYAR RO MANWAWANSYA 15: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión