FARFYAR RO MANWAWANSYA 12
12
Yakobus imar – Petrus isma faspar ro bui
12:1-19
1Indokada ro fafisu ani Wairek Herodes ryak kuker frur ḇepakrek faro snonkaku ono ro jemaat. 2Iwan fa smun Yakobus, Yohanes ḇeba ḇyedi, kuker sumber. 3Fafisu myam, mamun ani ifrur raryaḇ snonkaku Yahudi si sisnesna, inja ifrur pdef nyan ani ma iwan fa sfor Petrus. Fafisu ani ras ḇeba munara Mamami Ḇepisenba. 4#Kel. 12:1-27Petrus ḇyeḇefor kwar, Herodes iwan fa suni ro bui ma sordade syos rifiak siwaren i, syos oser sordade rifiak. Doḇo insa, munara Paskah isyof kwar duni ḇeḇarpon snonkaku ḇeḇor. 5Rarirya Petrus ismai ro bui. Ḇape kuker sneḇesiper jemaat ani sinadi kuker i faro Allah.
6Ro fafisu Herodes imarisen duni ḇeḇarpon snonkaku ḇeḇor ansi ro meserdi ḇayim, ro roḇ ani kako Petrus denef ro fandu sordade risuru, sfes i kuker wanka risuru. Sordade ḇeso sya sisya siwaren ro kedwa ya ḇarpondi. 7Kniko malaikat Allah ḇyesi oso dores fanam Petrus ma sasnai ḇyedi iyar sim ani. Malaikat ani ḇyan Petrus, ma ikofen: “Wakḇok fasaw!” Rarirya wanka ansi soḇes ro Petrus ḇrasi. 8Raimnai malaikat ani ikofen faroi: “Fes sifer bedi ma swower roḇesower besi!” Petrus ifrur rarirya. Raimnai malaikat ani ikofen faroi: “Swansun syatu ḇena ma waso aya!” 9Raimnai iso malaikat ani ḇo susasyar ḇape ifawiḇa, rosai malaikat ani ifrur faroi nkaku rarirya, snar kyara doḇoda myam mamam oso. 10Fafisu sumbranuk manwadwaren ḇepon si ma moḇ wadwaren ḇeḇesuru, sura ro ḇarpon kedwai ḇeba mankarmomen ḇewaiḇe mnu. Kedwai ani ḇyas ro mankundi faro su. Surandi kwar, sumbran isof ro nyan ḇaḇar ya, ma kniko malaikat ani iburi.
11Rofyor Petrus ḇyaḇir mankundi kwar, ma ikofen: “Insape yafawi kaku Manseren iwan kwar malaikat ḇyedi fa fyaspar aya ro Herodes ḇrasi ma snonkaku Yahudisya karkara sena.”
12Ma kyara knik fasaw kwar, ryaḇe Maria, Yohanes snari rum ḇyedi, Yohanes ine sapi kako ḇe Markus. Ro dia kawasa sibor siryur ma senadi. 13Ma rofyor nyuk kedwai ḇebaya, imfamyan ḇenirḇe Rode ryama imnafpan mansei ḇenuk ya. 14Ryower bir beri Petrus mkaren ḇyedi, ḇape snar raryaḇ ḇyedi inja syeḇen kedwai ḇeba aniḇa ḇoi syun randum fasau fa ikofen bayir, Petrus isya ro ḇarpon kedwai ḇebaya. 15Sikofen faro bin ani: “Swawo!” Ḇape fyaḇri ḇo doḇo, kaku ḇeri rarirya. Ma sikofen: “Rur ḇyediri.”
16Ḇape Petrus nyuk yayayu ḇesya kwar isof fafisu seḇen kedwai ya ma smami, skarsosen. 17Inja Petrus pyankai epen si insa sefasis, raimnai fyawar rariso Manseren fyarkini fa isasyar ro bui. Ikofen: “Mko kofen ḇayir roi ḇeḇesya nane faro Yakobus ma naek srar koḇansi.” Raimnai isasyar ma ryaḇe moḇ ḇeso.
18Meserdi sordade ansi searubiru. Sifuken yaesi rosai ḇeḇesya kwar kuker Petrus. 19Herodes iwan fa ssewar Petrus, ḇape sismai iba. Inja Herodes iwan fa skukeḇ sordade ansi ma smun si fa simar. Raimnai fyaryan ro Yudea ḇe Kaisarea ma kyain ro dia.
Herodes imar
12:20-23
20Herodes imsor fafayaḇa faro snonkaku Tirus ma Sidon. Inja sesne oser ḇo sra faro Herodes. Sisma nyan oso fa seḇaḇyuk Blastus, wairek faker ḇyesi oso, fa ifnoḇek si, insa sor aski, snar mnu sedi sisma roḇean ro supya mnuk wairek ḇyedi.
21Ma ro ras sap kwar ya, Herodes syansun sansun ḇaḇesasoser ḇyena, ma kyain ro karapesa nasan ya ḇo dawos faro si. 22Ma kawasa ḇyesi ssibras: “Ine Allah mkaren ḇyedi ma mkaren snonkaku ḇa!” 23Ma ro fafisu aniḇeri malaikat oso ḇyaserbosi snar ḇyesyowi Allah ḇa. Inja karom sya sani isof imar.
Siwan Barnabas ma Saulus
12:24–13:3
24Manseren wosya iryer ma snonkaku sibor simnafi.
25Barnabas ma Saulus sukaḇer ro Yerusalem rofyor sufrur posa fararur afuffarmyan suḇedi. Suyun Yohanes, sap kakobe Markus.
Actualmente seleccionado:
FARFYAR RO MANWAWANSYA 12: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión