BILANGAN 31
31
Porang pamaloson tu halak Midian
1Didok Tuhan ma tu si Musa, 2“Uhumi ma halak Midian, hara ni pambaenan ni halahi tu halak Israel. Dung salpu i, ale Musa, marujung ma ngolumu.”
3Dung i didok si Musa ma tu bangso Israel, “Marhobas ma hamu laho marporang, angkon poranganmunu do halak Midian laho manguhum halahi, hara ni sude pambaenan ni halahi maradopkon Tuhan. 4Sian ganop marga ni Israel angkon adong saribu halak kehe marporang.”
5Jadi dipili ma saribu halak sian ganop marga ni Israel, sude dua bolas ribu halak bahatna na dung hobas marporang. 6Disuru si Musa ma kehe halahi marporang na niuluhon ni si Pinehas anak ni Malim Eleasar. Si Pinehas do na manjago barang-barang na badia dohot angka sarune laho mangalehen tanda-tanda. 7Songon na niparentahon ni Tuhan i tu si Musa, diporangi halak Israel ma halak Midian jana dibunu halahi sude halaklahi, 8dohot ma disi lima raja ni Midian, i ma: Si Ewi, si Rekem, si Zur, si Hur dohot si Reba. Si Bileam anak ni si Beor i pe dibunu do.
9Ditaban halak Israel ma dadaboru dohot angka anak ni halak Midian, jana dirampas halahi ma sude pahan-pahanan dohot sude hamoraon ni halahi. 10Angka kota dohot bandar ni halahi pe disurbu sude. 11Dung dibuat halak Israel sude na nirampas i dohot ma i halak na nitaban dohot pahan-pahanan, 12dioban halahi ma i tu si Musa dohot tu si Eleasar dohot tu sude halak Israel. Di hatiha i dompak marbandar do halahi di tano na hornop ni Moab donok tu Batang aek Jordan paadop-adop dohot kota Jeriko.
Mulak ma tentara ni Israel i
13Dung i kehe ma si Musa, si Eleasar dohot angka pamimpin na asing sian Israel maninggalkon undung-undung i laho mangalo-alo tentara ni Israel. 14Dimuruhi si Musa ma angka pamimpin dohot kapala ni saribu tentara dohot kapala ni saratus tentara na baru mulak sian parporangan i. 15Disapai ia halahi, “Biasi dipadiar hamu mangolu sude dadaboru i? 16Nada he diingot hamu, angka dadaboru i do na mangihutkon sipaingot ni si Bileam. Dielek-elek halahi halak Israel maninggalkon Tuhan di Peor, jana hara ni i do dibaen na diparo Tuhan hamatean di tonga-tonga ni halak Israel. 17Antong bunu hamu ma saonnari sude anak halaklahi dohot sude dadaboru na dung jungada marcampur.
18Tapi sude dadaboru na laing bujing-bujing dope buat hamu ma i di hamu. 19Jadi saonnari hamu na dung mamunu sada-sada halak jana na dung dais tu bangke angkon tinggal hamu di balian ni parbandaran pitu ari honokna. Di ari patoluhon dohot papituhon sude hamu dohot dadaboru na nitaban i, angkon paiaskon diri. 20Ganop pakean bope sanga aha pe tehe na nipauli sian bobak, imbulu ni hambeng sanga hayu angkon paiason.”
21Dung i didok si Eleasar ma tu angka halak na baru mulak sian parporangan i, “On ma angka paraturan na nilehen ni Tuhan tu si Musa. 22-23Sude na tahan tu api, songon sere, perak, tumbaga, bosi, simbora na bontar dohot simbora na lomlom, angkon nipaias marhite na manutung tu api. Sude barang na asing i na so tahan tu api, angkon dipaias dohot aek. 24Di ari papituhon angkon basuonmunu do pakeanmunu, disi pe anso ias hamu, dung i tola ma hamu masuk tu bagasan parbandaran i.”
Pambagi ni barang na nirampas
25Didok Tuhan ma tu si Musa, 26“Ho dohot si Eleasar, rap dohot pamimpin na asing na sian halak Israel, etong hamu ma sude barang na nirampas i dohot angka na nitaban bope pahan-pahanan. 27Sude barang na nirampas i angkon dibagi dua, dos bahatna, sabagian ma i tu tentara jana sabagian nari di rayat i. 28Bagian ni Tuhan i, buat ma sian bagian ni tentara i sada sian lima ratus, bope sian halak na nitaban, bope sian lombu, halode, biri-biri dohot hambeng. 29Lehen ma tu si Eleasar gabe silehen-lehen na mardohonan tu Tuhan. 30Sian bagian na nilehen tu halak na bahat i, angkon buatonmunu sada sian lima pulu, bope sian halak na nitaban, bope sian lombu, halode, biri-biri dohot hambeng. Lehenon ma i sude tu halak Levi na manjago Bandar Parmianan Ni Tuhan.” 31Dipatulus si Musa dohot si Eleasar ma sude na niparentahon ni Tuhan i.
32-35Asing sian angka na nibuat ni angka tentara di halahi sandiri, sude na nirampas i bahatna: 675.000 biri-biri dohot hambeng, 72.000 lombu, 61.000 halode dohot 32.000 bujing-bujing. 36-40Satonga sian i dilehen tu tentara, songon on ma bilanganna: 337.500 biri-biri dohot hambeng sian i 675 ma silehenon tu Tuhan, 36.000 lombu, 72 ma i tu Tuhan, 30.500 halode, 61 ma i tu Tuhan; 16.000 bujing-bujing, 32 halak ma i tu Tuhan. 41Dung i dipasahat si Musa ma bagian ni Tuhan i tu si Eleasar gabe silehen-lehen na mardohonan tu Tuhan, songon na niparentahon ni Tuhan i.
42-46Bagian ni rayat i dos do bahatna dohot bagian ni tentara: 337.500 biri-biri dohot hambeng, 36.000 lombu; 30.500 halode dohot 16.000 bujing-bujing. 47Songon na dung diparentahon Tuhan i dibuat si Musa ma sada sian lima pulu halak na nitaban dohot pahan-pahanan, lalu dilehen ia tu halak Levi na markarejo di Bandar Parmianan Ni Tuhan.
48Dung i ro ma angka kapala ni tentara ni halak Israel manopot si Musa 49paboahon, “Tuan, madung hami etong sude tentara na di toru ni parentanami, disi do halahi sude nada adong na mago. 50Saonnari adong do hami oban angka barang sere, golang tangan, golang pat, tintin, anting-anting dohot borgok na hami buat be. Sudena i hami haulkon tu Tuhan songon garar ni hosanami anso tongtong didongani Ia hami.” 51Dung i dijagit si Musa dohot si Eleasar ma sere i, sudena i marrupahon barang parhiasan. 52Na nilehen ni kapala ni tentara i giot adong ma dua ratus kilogram boratna. 53Angka parajurit na so kapala mambuat barang na nirampas i di halahi sandiri. 54Dung i dioban si Musa dohot si Eleasar ma sere i tu Bandar Parmianan Ni Tuhan, anso dijagohon Tuhan i bangso Israel.
Actualmente seleccionado:
BILANGAN 31: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society