BILANGAN 23
23
1Didok si Bileam ma tu si Balak, “Pajongjong ma di inganan on pitu langgatan di au jana oban ma tuson pitu lombu jantan dohot pitu biri-biri jantan.”
2Dipatulus si Balak ma sude na nidok ni si Bileam tusia. Jadi rap ma ia dohot si Bileam manghaulkon sada lombu jantan dohot sada biri-biri jantan di ganop sada be langgatan i. 3Dung i didok si Bileam ma tu si Balak, “Jongjong ma ho dison, donok tu haul situtungonmi. Hatiha songon i kehe ma au mangaligi, betak na ra do Tuhan i marsuo dohot au sanga nada. Hupaboa pe di ho sude sanga aha didok Tuhan i tu au.” Dung i kehe ma si Bileam sada ia tu puncut ni sada tor 4disi ma ro Tuhan i tusia. Ninna si Bileam ma tu Tuhan i, “Tuhan! Madung hupajongjong pitu langgatan, jana huhaulkon do sada lombu jantan dohot sada biri-biri jantan di ganop langgatan i.”
5Dung i dipaboa Tuhan i ma tu si Bileam sanga aha na angkon dohononnia, lalu disuruSa anso mulak ia tu si Balak pabolkaskon tona ni Tuhan i tusia. 6Dung i mulak ma si Bileam jana didapotkon ia ma si Balak na laing jongjong donok tu haul situtungonnia i, rap dohot sude pamimpin ni halak Moab.
7Dung i didok si Bileam ma panurirangonna i songon on,
“Sian Aram, sian dolok-dolok di Habincaran an,
si Balak, raja ni Moab marpio au mandok,
‘Ro ma ho burai ma si Jakob, jana ro ma ho burai ma Israel!’
8Patut ma he au mamurai,
anggo so diburai Tuhan?
Patut ma he au manguhumi i,
anggo so diuhum Tuhan?
9Sian angka dolok na gincat,
tarida ma bangso i.
Sian puncut ni angka tor,
huida halahi.
Diboto halahi do na nipasupasu halahi
so adong bangso na asing mangalobi i.
10Pomparan ni Israel songon abuan,
nada taretong, songon i bahatna.
O Tuhan, sugari hupaujung ngolungku
songon sada halak sian halakMu.
Tunduk tu Debata di sude pangalaho;
di bagasan hasonangan au mate.”
11Jadi didok si Balak ma tu si Bileam, “Aha do na nibaenmi tu au? Huoban pe ho tuson laho mamurai angka musungku do. Hape gabe mur dipasupasu ho do halahi.”
12Dialusi si Bileam ma, “Sanga aha na nisuru ni Tuhan dokkononku, hum i do na tardokkon au.”
Panurirangon padua nolihon
13Dung i didok si Balak ma tu si Bileam, “Beta ma rap kehe hita tu inganan na asing, anggo sian i hum saotik do tarida ho halak Israel, disi ma burai halahi.” 14Jadi dioban si Balak ma si Bileam tu Zopim, di puncut ni Dolok Pisga. Disi pe dipajongjong ia muse pitu langgatan jana dihaulkon ia sada lombu jantan, sada biri-biri jantan di ganop langgatan i.
15Didok si Bileam ma tu si Balak, “Dison ma ho tinggal, donok tu haul situtungonmi, anso kehe au marsuo dohot Tuhan di adu.”
16Didapotkon Tuhan ma si Bileam, jana dipaboa Tuhan ma sanga aha na giot dohononnia, lalu disuru ia mulak tu si Balak paboahon tona ni Tuhan i. 17Dung i mulak ma si Bileam mandapotkon si Balak na laing jongjong donok tu haul situtungonnia i, rap dohot angka pamimpin ni Moab. Disapai si Balak ma sanga aha didok Tuhan i, 18dung i didok si Bileam ma panurirangonna,
“O Balak, anak ni si Zipor, ro ma.
Adong na giot dohononku, tangihon ma!
19Nada dos Debata dohot jolma na ringgas margabus,
na momo muba pikiranna.
Muda dung Dijanjihon Debata,
sudena pasti Dipatulussa!
Muda Ia mangkuling,
sude angkon tarjadi!
20Disuru do au mamasumasusa,
jana muda dipasupasu Debata
nada tartarik au mulak.
21Huida ari pangapudian ni Israel na marbungaran;
nada hona bala dohot mara
Tuhan, i do Debatana.
Tudia pe tongtong do dohot Ia.
Didok halahi: Ibana do Raja!
22Sian Mesir dioban Debata halahi haruar,
marporang halahi songon lombu riar.
23Gogo ni ajimat sanga elmu sihir,
nada hasaya mangalo halak Israel.
Bangso i ma na gabe hobaron ni bibir,
hahomangan do pambaen ni Debata ni Israel!
24Suman do halak Israel tu singa na gogo;
manyosop mudar ni musuna na disoro,
salolot so songon i nada ra ia marongok.”
25Dung i mangkuling ma si Balak tu si Bileam, “Tuk ma i, muda so ra ho mamurai halak Israel, pinomat ma ulang pasupasu halahi.”
26Alus ni si Bileam, “Nada he na dung hudok di ho, bahaso na angkon hukarejohon sude parenta ni Tuhan i tu au?”
Panurirangon patolu nolihon
27Didok si Balak ma, “Beta ma tu inganan na asing. Binoto i, betak na paloason ni Debata do buraanmu halak Israel, hara ni au di inganan on.” 28Dung i dioban ia ma si Bileam tu puncut ni Dolok Peor na adop parhorsihan i. 29Ninna si Bileam ma tu si Balak, “Pajongjong ma pitu langgatan dison, dung i oban ma tuson pitu lombu jantan dohot pitu biri-biri jantan.” 30Dipatulus si Balak ma sude na nidok ni si Bileam i. Dihaulkon ia ma sada lombu jantan dohot sada biri-biri jantan di ganop langgatan i.
Actualmente seleccionado:
BILANGAN 23: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society