BILANGAN 21
21
Hamonangan maralohon halak Kanaan
1Arad sada kota do i di Selatan ni tano Kanaan. Dung dibege raja ni kota i, na giot ro halak Israel mamolus sian dalan Atarim kehe ma ia mamorangi halahi jana ditaban ma piga-piga halak sian halahi. 2Dung i marniet ma halak Israel, ninna halahi ma tu Tuhan, “Muda dilehen Ho hamonangan di hami mangalo halahi, haulkononnami ma sude kota ni halahi tu Ho, jana roncohononnami ma halahi.” 3Ditangihon Tuhan pangidoan ni halak Israel jana ditolong ia halahi manaluhon halak Kanaan. Dung i dibunu halak Israel ma halak Kanaan i, jana dironcohon halahi kotana i, gabe digoari halahi ma inganan i Horma.
Ulok tumbaga
4Dung i ditinggalkon halak Israel ma Dolok Hor, mardalan laho tu Solok Akaba, giot mangkaliangi luat ni halak Edom. Hape ditongan dalan, nada sobar be halahi 5gabe marungut-ungut ma halahi tu Debata dohot tu si Musa. Ninna halahi ma, “Biasi obanonmu hami haruar sian Mesir, anso bunuonmu hami di parhorsihan on, so adong panganon dison, aek pe nada adong. Gialan hami hara ni panganon na so mardai on!” 6Dung i diparo Tuhan ma angka ulok na bisa tu tonga-tonga ni halahi. Bahat halak Israel mate dipagut ulok i. 7Jadi ro ma halak Israel manopot si Musa, ninna ma, “Madung mardosa hami hara ni ungut-ungutnami tu Tuhan dohot tu ho. Pangido ma saonnari tu Tuhan anso dipadao ulok on sian hami.” Jadi ditangiangkon si Musa ma bangso i. 8Dung i disuru Tuhan ma baenon ni si Musa sada ulok sian tumbaga jana lohothononnia tu ujung ni tiang. Ganop halak na nipagut ni ulok i, diligi ia ma tu ulok tumbaga i anso malum. 9Dibaen si Musa ma ulok sian tumbaga jana dibaen ia tu ujung ni sada tiang. Ganop halak na nipagut ni ulok i, gabe malum muda diligi ia tu ulok tumbaga i.
Sian Dolok Hor tu Rura Moab
10Ditoruskon halak Israel ma mardalan, lalu marbandar di kota Obot. 11Dung ditinggalkon halahi muse inganan i, marbandar ma halahi di bona ni Dolok Abarim, di halongonan sabola Habincaran ni Luat Moab. 12Dung sian i, marbandar halahi di Rura Zered. 13Sian i mardalan muse halahi jana marbandar di Utara ni Batang aek Arnon, i ma halongonan na bidang na lalu tu tano ni halak Amori. (Ia Batang aek Arnon, i ma batas ni tano Moab dohot Amori.) 14I ma harana umbaen na tarsurat di buku parporangan ni Tuhan, “..... Huta Waheb di Luat Sufa dohot napa-napana; Batang aek Arnon 15dohot robean na bidang lalu tu Luat Ar adop parbalohan dohot luat ni halak Moab.”
16Sian i kehe ma halahi adop inganan na nigoaran sumur-sumur. Didok Tuhan ma disi tu si Musa, “Suru ma halahi marlagut, giot lehenonKu aek di halahi.” 17Di hatiha i ma diendehon halak Israel, ende on,
“Ale sumur-sumur, marbuldak ma baen aekmu,
sambutonnami ma i mardongan logu.
18Sumur na nihuar ni anak ni raja
songon i dohot angka pamimpin ni bangso
na dihuar dohot tungkot harajaan
songon i dohot angka tungkot ni halahi.”
Sian halongonan i pinda ma halahi tu Matana, 19sian i tu Nahaliel, lalu tu Bamot, 20dung i tu rura na di luat ni halak Moab, di toru ni Dolok Pisga na adop tu parhorsihan.
Hamonangan mangalo Raja Sihon dohot Raja Og
(Pang. 2:26–3:11)
21Dung i disuru halak Israel ma suruanna manopot si Sihon, raja ni Amori laho pabolkaskon tona on, 22“Hami pangido di raja i anso dipaloas hami nian mamolus sian tano ni raja i. Nada pola manyirpang hami dohot pahan-pahanannami sian dalan masuk tu ladang sanga kobun anggur, jana nada pola hami buat aek sian sumur ni raja i. Di dalan godang i pe hami tongtong mardalan lopus haruar sian luat ni raja i.” 23Tapi nada diloas Raja Sihon boluson ni halak Israel luatna i. Dipalagut ia ma tentarania lalu kehe tu Jahas di halongonan laho mangalo halak Israel disi. 24Di parporangan i bahat tentara ni halak Amori mate dibunu halak Israel. Dung i diingani halak Israel ma luat ni musuna i sian Batang aek Arnon tu Batang aek Jabok, sabola sian Utara i ma di parbalohan ni luat ni halak Amon na togu partahananna i. 25Marhite na songon i madung sude kota ni halak Amori dirampas halak Israel, tarmasuk Hesbon dohot sude kota na menek humaliangna, gabe tinggal disi ma halahi. 26Kota Hesbon i ma kota sabungan ni Raja Sihon. Jungada do dialo ia raja Moab najolo, dirampas ia luatna olat ni Batang aek Arnon. 27I ma dalanna diendehon na malo songon on,
“Ro ma tu Hesbon,
tu kota ni Raja Sihon.
Anso hita ligi kota i.
Dibangun jana dipauli mangulahi.
28Jungada ma sanoli di kota i,
tentara ni si Sihon maju songon api.
Kota Ar di Moab dironcohonsa.
Angka tor saginjang ni Arnon ditolonsa.
29Iale halak Moab na marjaya!
Marmara ma ho bangso na mardebatahon Kamos!
Dipadiar debatamu ho gabe mangungsi.
Dadaborumunu ditaban raja Amori.
30Marmara ma saonnari pomparanna.
Sian Hesbon tu Dibon daona.
Sian Nasim tu Nofah donokkon ni Medeba.”
31Dung i tongtong noma tinggal halak Israel di luat ni halak Amori. 32Dung i disuru si Musa ma halahi manjalahi dalan na dumenggan laho mamorangi kota Jaser. Jadi dirampas halak Israel ma kota i dohot angka kota na menek humaliangna, jana mangusir halak Amori na tinggal disi.
33Dung i mangeldok ma halak Israel mardalan adop Basan. Ro ma Raja Og sian Basan rap dohot tentarania laho mangaroro halak Israel di kota Edrei. 34Didok Tuhan ma tu si Musa, “Ulang pola habiari i. Monang do ho baenonKu. Taluhononmu ma ia dohot sude rayat na di luatna i. Baen ma tusia songon na nibaenmu tu Raja Sihon na mangarajai Hesbon.” 35Dung i dibunu halak Israel ma Raja Og, angka anakna pe dohot sude rayatna; nada adong na tinggal. Dung i diingani halahi ma tano i.
Actualmente seleccionado:
BILANGAN 21: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society