BILANGAN 17
17
Tungkot ni si Harun
1Didok Tuhan ma tu si Musa, 2“Suru ma halak Israel mangalehen dua bolas tungkot tu ho, sian ganop pamimpin ni marga sada tungkot. Suratkon ma ganop goar ni pamimpin di tungkotna i, 3dung i suratkon goar ni si Harun tu tungkot ni na mangwakili Marga Levi. Ganop pamimpin ni marga adong sada tungkot. 4Oban ma tungkot i tu Bandar ParmiananKu payakkon di jolo ni Poti Parjanjian i. Disi ma inganan parsuoanKu dohot ho. 5Martunas do muse tungkot ni halak na dung Hupili. Marhite on ma antahonKu holso ni angka jolma na sai torus marungut-ungut mangalo Au.”
6Dipabolkas si Musa ma songon i tu halak Israel. Dung i dilehen ganop pamimpin ni halahi ma sada tungkot tu si Musa, sada tungkot sian ganop marga. Bahatna sude dua bolas, laing disi do tungkot ni si Harun. 7Dung i dipayakkon si Musa ma sude tungkot i di jolo ni Poti Parjanjian na di bagasan Bandar Parmianan Ni Tuhan.
8Ancogotna i, di na masuk si Musa tu Bandar Parmianan, diida ia tungkot ni si Harun na mangwakili Marga Levi madung martunas. Marbunga tungkot i jana mangerbang bungana, dung i batuna, batu ni katapang na malamun! 9Dibuat si Musa ma sude tungkot i jana dipatidahon ia tu sude halak Israel. Diida halahi ma na masa i, dung i dibuat angka pamimpin i ma mulak tungkotna be. 10Dung i didok Tuhan ma tu si Musa, “Payakkon ma mangulahi tungkot ni si Harun i di jolo ni Poti Parjanjian i. Angkon simpanon do tungkot i, gabe parningotan di halak Israel na sai ra mangalo i, bahaso angkon mate halahi muda sai dipupu halahi marungut-ungut.” 11Dipatulus si Musa ma sude na niparentahon ni Tuhan i.
12Dung i didok halak Israel ma tu si Musa, “Muda songon i do, marmara ma hami! 13Muda angkon mate jolma na mandonohi Bandar Parmianan Ni Tuhan i, antong anggo songon i nada adong be arop ni roha di hita sude.”
Actualmente seleccionado:
BILANGAN 17: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society