Etatelu 2
2
1Ulungu la kete wakashili ntungama, ndu diango tshe dieli loko. 2Ku lushi lʼesambeli, Unyashungu akakimo ulimu andi wakandatshaka. Ku ndi akumuya lushi lako uma lʼulimu andi tshe.#2:2 Heb. 4:4, 10. 3Unyashungu akatshokola lushi lʼesambeli, akalukidia,#2:3 Etum. 20:11. ne dia lushi lako mbakandumuya uma lʼulimu andi tshe wʼetungelu.
Untu lu Ekambo ka Edena
4Okondo wʼetungelu kʼulungu la kete uku akawatungama one. Lu lushi lakatungi Latuyalaka Unyashungu, 5ku nduku etumbatumba ka lʼusui kambuyala la kete, kuyanga diyu dia lʼusui diambutumba, ne dia laso ku Latuyalaka Unyashungu atalosha mvula la kete, ndu nduku untu akiko dia nkamba kete. 6Keli eungungi kakambelaka uma lu kete kakaloyaka diku dia kete tshe. 7Latuyalaka Unyashungu akatungi untu uma lu ditshu dia kete. Ndi akufufi luwi la lumu lu eshu wʼehembe. Ku pami akayala untu lasena#2:7 1 Kor. 15:45. 8Ku Latuyalaka Unyashungu akune ekambo lu kete ya Edena, lu leke lʼehutwelu ka unya. Leko kakandakitsha untu lakandatungi. 9Uma lu kete kakatumbia Latuyalaka Unyashungu wehu tshe wʼetamba weli amena lu ashu ndu weli ololo dia nde. Lʼatei ekambo kaki utamba a lumu #2:9 Eny. 2:7; 22:2; 14. ndu utamba wʼewu kʼakambu wʼololo ndu kʼakambu wa kolo. 10Ndjali kakakelaka uma lʼatei a Edena dia ndoya ekambo. Uma leko, to kakatatana ekedi enei. 11Lukumbu lʼokedi a ntundu, Pishona. Vo watokelaka lʼutshimba a kete tshe ya Havila, lenʼeli paunyi. 12Paunyi ya lu kete yako yeli ololo. Leko katutanemaka wehu ehendi wʼave wʼushinga a wulu, bedeliume la dive dia pesopeso. 13Lukumbu lʼokedi a hendi, Ngihona. Vo watokelaka lʼutshimba a kete tshe ya Kusha. 14Lukumbu lʼokedi a satu, Hidekele. Vo watokelaka lʼumamu a kete yʼAsuriya, utsha lʼehutwelu ka unya. Lukumbu lʼokedi a nei, Eyufarate. 15Latuyalaka Unyashungu akose untu, akukitsha lu ekambo ka Edena, dia ndi nkikambaka la nkilamaka. 16Ku Latuyalaka Unyashungu akakokomiya untu ati: Olekaki elua wʼetamba tshe wa lʼekambo uku alangaye. 17Keli, tolekaki elua wʼuma lʼutamba wa ewu kʼakambu wʼololo ndu kʼakambu wa kolo, ne dia lushi layuyole, we ayuvo.
18Latuyalaka Unyashungu akati ati: Kema ololo pami ntshikala ndame. Dimi layutungela ukimanyidi lufanyi la ndi. 19Uma lu kete kakatungi Latuyalaka Unyashungu nyama tshe ya la kete ndu fudu tshe ya lʼulungu. Ku ndi akayela le untu dia ndi mena okone ayolendi kumbu. Lukumbu tshe lakandole nyama la nyama mbakayala lukumbu lato. 20Okone untu akole dungalunga tshe kumbu, ndu fudu ya lʼulungu, ndu nyama tshe ya la kete. Laso ku untu atayala nduku la ukimanyidi lufanyi la ndi. 21Latuvalaka Unyashungu akaladia pami djo ya wulu, ku ndi akalali. Okone Latuyalaka Unyashungu akose weka andi omotshi wa luhandju. Ndi akadihi emunyi lu dihuli diako. 22La weka ako a luhandju wakandose uma le pami, mbakandatungi umuntu. Ku ndi akolombola utsha le pami. 23Pami akati ati: Weka a weka ami one, la umunyi wʼemunyi ami one. Vo wayuweta vati: Umuntu, ne dia uma le untu mbosamindi. 24Uma lu dikamlu ne, pami ayutshika shi la nyangu, ayumamana la wadendi, ku vo wayuyala dimba otoi.#2:24 Mat. 19:5; Mak. 10:7 8; 1 Kor. 6:16; Ef. 5:31. 25Pami la wadendi waki etakataka, keli vo kumbuka sonyi.
Actualmente seleccionado:
Etatelu 2: TLL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
La Bible en Otetela © Allianee Biblique de la Republique Democratique du Congo, 1991