Chhut Âi-khi̍p Ki 39

Cho Chi-sṳ̂ ke Sṳn-fu̍k

(Chhut Âi-khi̍p Ki 28:1-14)

1Kì-têu yung làm-set, chṳ́-set lâu chhṳ̂m-fùng set ke phong-sien liòn chi-sṳ̂ chhai sṳn-só fu̍k-sṳ ke sṳ̀ só-chok ke kô-kui sṳn-fu̍k. Kì-têu yu vi Â-lùn cho sṳn-fu̍k. Liá he cheu Song-chú fûn-fu Mô-sî ke fa cho ke. 2Pí-sat-lie̍t yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ cho yî-fut-tet sṳn-fu̍k. 3Kì-têu chiông kîm-é tá-cho pho̍k-pho̍k, chién-cho se-se thiàu, lâu mà-sâ, làm-set, chṳ́-set, chhṳ̂m-fùng set ke phong-sien, yung yu-siu ke sú-kûng siu khiung-ha. 4Kì-têu yu vi yî-fut-tet cho lióng-thiàu cho-tet kiê ke kiên-tai, liòn chhai lióng-phién. 5Ke-thiàu lièn chhai yî-fut-tet, yung-lòi kiê chhai sṳ̂n-song ke tai-é, lâu yî-fut-tet yung khiung-yong ke chhòi-liau, he yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ chhiak ke. Liá lûng-chúng he cheu Song-chú fûn-fu Mô-sî ke fa cho ke. 6Kì-têu yu yung lióng-te fùng-mâ-nó siông chhai kîm-sṳ̂-khiên tú, khat-tén Yî-set-lie̍t sṳ̍p-ngi ke lai-é ke miàng. 7Liá lióng-te pó-sa̍k liòn chhai yî-fut-tet ke lióng-thiàu kiên-tai song, thoi-péu Yî-set-lie̍t ke sṳ̍p-ngi kî-chhu̍k. Liá lûng-chúng he cheu Song-chú fûn-fu Mô-sî ke fa cho ke.

Chho Hiûng-phài

(Chhut Âi-khi̍p Ki 28:15-30)

8Kì yung yu-siu ke sú-kûng chho hiûng-phài, lâu cho yî-fut-tet khiung-yong, yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ liòn-hó. 9Hiûng-phài he si-fông hìn ke, thia̍p-cho lióng-chhèn, chhòng ngi-sṳ̍p ngi kûng-fûn, fat ngi-sṳ̍p ngi kûng-fûn. 10Kì-têu chhai hiûng-phài táng-kô siông si-hòng pó-sa̍k: thi-yit hòng siông fùng-pó-sa̍k, vòng-ngiu̍k, lâu fùng-ngiu̍k; 11thi-ngi hòng liu̍k-pó-sa̍k, làm-pó-sa̍k, lâu chon-sa̍k; 12thi-sâm hòng chṳ́-ngiu̍k, pha̍k mâ-nó, lâu chṳ́-chîn; 13thi-si hòng súi-chhông-ngiu̍k, fùng-mâ-nó, lâu pit-ngiu̍k. Liá-têu chhiòn-phu siông chhai kîm-sṳ̂-khiên táng-kô. 14Sṳ̍p-ngi te pó-sa̍k ke mî-yit te khat-sông Yî-set-lie̍t yit-ke lai-é ke miàng, thoi-péu Yî-set-lie̍t ke sṳ̍p-ngi kî-chhu̍k. 15Kì-têu yung sùn-kîm chho hiûng-phài ke lien-é, chhiong nò-hó ke sok-è. 16Kì-têu yu chho lióng-chak kîm-sṳ̂-khiên lâu lióng-chak kîm khiên-é, kîm khiên-é ôn chhai hiûng-phài táng-kô ke lióng-thèu. 17Kì-têu chiông lióng-thiàu kîm lien-é chhôn chhai hiûng-phài lióng-thèu ke khiên-é tú. 18Lien-é ke nang-ngoi lióng-thèu chhôn chhai lióng-chak kîm-sṳ̂-khiên tú, lièn chhai yî-fut-tet thèu-chhièn ke kiên-tai táng-kô. 19Kì-têu yu chho lióng-chak kîm khiên-é, ôn chhai hiûng-phài hâ-poi ke lióng-thèu, vá-khiun yî-fut-tet ke nui-piên, 20chai chho lióng-chak kîm khiên-é, chiap chhai yî-fut-tet thèu-chhièn lióng-thiàu kiên-tai ke hâ-poi, vá-khiun liòn ke thi-fông, chhai sú-kûng chhiak ke tai-é táng-kô. 21Kì-têu yung làm-set ke tai-é chiông hiûng-phài ke khiên-é lâu yî-fut-tet ke khiên-é thak khiung-ha, sṳ́ hiûng-phài thiap chhai yî-fut-tet ke tai-é táng-kô, chhiu m̀-voi lut-thet. Liá lûng-chúng he cheu Song-chú fûn-fu Mô-sî ke fa cho ke.

Cho Chi-sṳ̂ Khì-thâ ke Sṳn-fu̍k

(Chhut Âi-khi̍p Ki 28:31-43)

22Kì yung chhiak-fâ ke sú-kûng lâu làm-set ke phong-sien lòi-cho chhai yî-fut-tet tái-hâ ke chhòng-sâm. 23Chhòng-sâm ke tûng-ông liù yit-ke khûng-é cho liâng-héu, chû-vì kâ-chhiak liâng-piên, chang m̀-voi lie̍t-thet. 24Chhòng-sâm hâ-poi ke sâm-sùn yung làm-set, chṳ́-set, chhṳ̂m-fùng set ke phong-sien, lâu mà-sâ cho sa̍k-liù, 25yu yung sùn-kîm ke se lìn-lòng kak chhai sa̍k-liù chûng-kiên. 26Liá lûng-chúng he cheu Song-chú fûn-fu Mô-sî ke fa cho ke.

27Kì-têu vi Â-lùn lâu kì ke-têu lai-é nâ mà-sâ cho nui-sâm, 28yu yung mà-sâ cho mo-é, thèu-kîn lâu tón-fu, 29yu yung mà-sâ lâu làm-set, chṳ́-set, chhṳ̂m-fùng set ke phong-sien, yung siu-fâ ke sú-kûng lòi chhiak yit-thiàu yêu-tai. Liá lûng-chúng he cheu Song-chú fûn-fu Mô-sî ke fa cho ke. 30Kì-têu yu yung sùn-kîm chho yit-mien péu-sṳ fung-hien ke phài-è, táng-kô khat-tén “Kûi Song-chú vì-sṳn”. 31Kì-têu yung làm-set ke tai-é chiông kì kiê chhai mo-é thèu-chhièn. Liá lûng-chúng he cheu Song-chú fûn-fu Mô-sî ke fa cho ke.

Sṳn-chong-phùng Vàn-kûng

(Chhut Âi-khi̍p Ki 35:10-19)

32Sṳn-chong-phùng, chhiu-he siông-kien ke chong-phùng, yit-chhiet ke kûng-chhàng chhiòn-phu vàn-sṳ̀n. Song-chú fûn-fu Mô-sî ke, Yî-set-lie̍t-ngìn chhiòn-phu cho-hó. 33Kì-têu chiông sṳn-chong-phùng lâu sṳn-chong-phùng ke só-yû yung-phín chhiòn-phu tai-to Mô-sî mien-chhièn, khì-chûng yû: kiêu-é, kut-ka, vàng-kong, chhû-é lâu chhû-chho; 34ngiam-fùng ke yòng-kú-phì táng-koi, chhin-chiâng ke phì-liau táng-koi, kak-tén yok-khui ke chong-man; 35yok-khui, yok-khui ke kong-é, lâu su̍k-chhui ke koi-é; 36kiûng-chok, chok ke yung-phín, lâu hien-pûn Song-ti ke kiûng-piáng; 37sùn-kîm ke tên-thòi, tên-chán, khì-thâ ke yung-phín, lâu tên-chán yung ke yù; 38kîm hiông-thàn, sṳn-yù, chhin-hiông ke hiông, sṳn-chong-phùng mùn-héu ke mùn-liàm; 39thùng chi-thàn lâu thàn-táng ke thùng-mióng, thàn ke kong-é lâu yung-phín, sé-thông-phùn lâu phùn-chho; 40vì thìn-yen ke chong-man, chong-man ke chhû-é lâu chhû-chho; thìn-yen mùn-héu ke mùn-liàm lâu sok-è, sṳn-chong-phùng ke tâng-é; 41chi-sṳ̂ chhai sṳn-só fu̍k-sṳ ke sṳ̀ só-chok chhin-chiâng ke sṳn-fu̍k, chhiu-he chi-sṳ̂ Â-lùn lâu kì ke-têu lai-é ke sṳn-fu̍k. 42Song-chú fûn-fu Mô-sî ke, Yî-set-lie̍t ngìn-mìn chhiòn-phu cho-hó lé. 43Mô-sî hi-khon kok-hong kûng-chhàng, khon kì-têu só-cho ke vàn-chhiòn chûn-cheu Song-chú ke min-lin. Mô-sî chhiu chuk-fuk kì-têu.

Actualmente seleccionado:

Chhut Âi-khi̍p Ki 39: THV12Rdb

Destacar

Copiar